1. Ginipai rengbe Yekova ka mangaha tipa ka digiso gako ringbisapai?

YEKOVA ima rengba ka sa tiko ni gu ngbatunga boro ko aida kadu nga ni tipa ka digiso gako ringbisapai. Ni kpiapai, Yekova ima sa tiko ni Bayugupai, Bafu wasa, na Batungusipai. Gere gbua nga bete agu agene rengbe ko ka sa tiko ngbaha kadu ni gu boro ko aida kadu nga ni. (Yes. 48:17; 2 Kor. 7:6; Gara. 3:8) Wa vura duhe wo, ko namangasunge dedede na aboro tipa ka digiso gako aringbisapai. (Mt. 24:14; 28:19, 20; 2 Kor. 1:3, 4) Yekova ima rengba ka fu tatamana gbiati ome fu ai boro tipa ni da ni gu ngbatunga boro ko aida ni da nga ni tipa ka digiso gako ringbisapai. Agi apai re dunduko nayugo rogo rimo Yekova yo na bete wene abawirikipai ninaagumba gipai re agumba a.

2. (a) Tipagine rengbe ani ti ni ti kura aregbo kadu na tiko singia Yekova namangasunge na ani? (b) Ginipai ani nika wisigoho rogo gi kekeapai re?

² Ani dunduko naida na gupai nga Yekova mangisunge na ani tipa ka digiso gako ringbisapai, ono bete kura aboro ima rengba kadu na tiko singia Yekova namangasunge na yo. Tipagine? Mbiko i nabi tiyo nga i arengbanga ka mangapai ni bakerehe berewe kuti wai i akpinyemuhe te mbiko pa garã yo, agu apai du tipa yo, gbiati gu ome du yo na ni. Ono tipa kura aboro tigayo, i nabihe nga i namanga gupai rengbe arengba na si aidanga i mangi gu kura apai berewe susi gure te. Rogo gi kekeapai re, ani nika sakapai tipa wai rengbe Yekova ka fu agu aundo furani ani aidaha tipa ka digiso gako ringbisapai. Fuo gure, ani nika wisigo agu apangbanga du rogo Ziazia Kekeapai yo tipa wai Yekova afu nyemupai na ome fu gako amoyambu nangia akumba na adee tipa i mangipai. Ni yangaraha, ani nika wisigopai tipa wai rengbe ani ka mbu Yekova ko mangisunge na ani.

3. Ringbisihe kuti gupai du ni kekehe rogo AFiripoio 2:13, waigu rengbe Yekova ka fu nyemupai furani tipa ani mangipai?

³ Oni gedi AFiripoio 2:13, NW. * Yekova ima rengba ka fu nyemupai furani tipa ani mangipai. Waigu rengbe ko ka mangaha? Ni kpiapai, si rengbe kadu nga ani bi boro rogo gaani dungurati naida na undo watadu gu kurapai gu duho si aida i mangihe rogo dungurati. Watadu abaakumba gedi gu waraga furani ye be-basunge yo nga gu nagumba gupai furani nga sunge nga ga Kindo gu duho si aida i mangihe rogo gu kura papara rago kubani. Gipai re ima rengba ka sa rani ani sana tirani nga, ‘Ginipai rengbe mi ka mangaha tipa ka undo?’ Watadu si rengbe kadu nga ani gbia gu sunge du ni nyanyakihe na ani ainongo singia ani rengbe ka mangaha wenengai te. Watadu tifuo geda ani bete averesi rogo Ziazia Kekeapai yo, ani rengbe kaa bakabangirani nga, ‘Waigu rengbe mi ka mangasunge na gi papara Ziazia Kekeapai re ka undo kura aboro?’ Yekova amanganga rani ngbaome tipa ani mangi ai pai te. Ono ho Yekova abi gupai ni nga ani naberãpa gupai rengbe ani ka mangaha, ko ima rengba ka fu nyemupai furani tipa ani mangi gupai ani naberẽhe.

4. Waigu rengbe Yekova ka fu ome furani tipa ani mangipai?

⁴ Yekova ima rengba ka fu ome furani tipa ani mangipai. (Yes. 40:29) Waigu rengbe ko ka mangaha? Ko rengbe ka fu gako ziazia toro tipa si sonosi gu tandu mangapai du tirani. (Gate 35:30-35) Yekova rengbe ka mangasunge na gako riigbu tipa ka yugopai furani tipa wai ka manga kura ngbatunga asunge. Ka si du nga mo nabaka bangiro tipa wai ka manga gu sunge i nafuhe foro, mo sanahe tipa undo. Ti kina gu bangisa regbo re a, mo ima rengba ka sana gu Barani nga ga gamahe ko tipa “gu bakere tandu susi.” (2 Kor. 4:7; Rk. 11:13) Ziazia Kekeapai na dungu akpiapai rogoho nga ga akumba na adee, nga aguyo Yekova afu agu ahe dunduko fuyo i aidaha, na ko amangi gipai re ni fuko nyemupai na ome fuyo tipa i mangipai. A wa ani kaa wisigo agi akpiapai re, mo asadingo ka berãpa wai rengbe Yekova ka mangasunge na mo tipa mo mangi ngbatunga apai wakina gu i amangihe.

5. Ginipai ani awirikaha ti wai Yekova amangisunge na Moize gbiati gu regbo ko amangisunge na ko ti ni tipa ka batasa Gako aboro?

⁵ Yekova asa Moize ko du ni batasi fu aYisaraere. Ono gini regbo Yekova amangisunge na ko ti ni? Ya mo ko amangisunge na Mose tingbafuo ‘i yugu gu tatamana nga ga aEzipeto fu ko dunduko’? (Amo. 7:22-25) Oó, Yekova amangisunge na Moize tingbafuo ko undo ko ko da ni boro umbasitise na ni bayee kumba. (Amo. 7:30, 34-36) Yekova afu ngarã fu Moize tipa ko fura fu gu bazogo nangia ga Ezipeta ko nga gu ko naadu na ome kisusi. (Gate 9:13-19) Ginipai ani awirikaha ti wai Yekova amangisunge na Moize gbiati gu regbo ko amangisunge na ko ti ni? Yekova namangasunge na agu aboro naˈasada ka wirika gako asino na kini kido kutiko tipa nyakasaro.​—Frp. 4:13.

6. Ginipai ani awirikaha ti gu gene Yekova amangisunge na Baruzirai ngbaha tipa ka undo Bakindo Davide?

⁶ Kama agarã kusa, Yekova amangisunge na Baruzirai tipa ko undo Bakindo Davide. Davide na gako aboro adu na ‘gomoro, mbugo, gbiati gomoro ime’ ti gu regbo ko aaora be gu wiriko nangia Abisaroma. Baruzirai naaima da ni gbinza kumba ti gi regbo re gbiati kura aboro amoi gayo raka ngbapai yo tipa ka fu undo fu Davide na agu aboro naadu na ko. Baruzirai aaberãnga gupai nga wa ko adu ni gbinza ko Yekova arengbanga ka mangasunge berewe na ko te te. Kuba gure,  ko amangisunge na agu ahe naadu beko tipa ka undo gu ga Mbori amoyambu naadu rogo zingo. (2 Sam. 17:27-29) Ginipai rengbe ani ka wirikaha ti gipai re? Ka garã rani vura du wai, Yekova ima rengba ka mangasunge na ani tipa ani fu undo fu awirinarani singia aguyo du mbembedi na ani watadu aguyo du rogo gu kura aringara nga aguyo du rogo azingo. (Snz. 3:27, 28; 19:17) Ka gene avuranga du berani tipa ani undo yo ni tirani ya, ani ima rengba ka fu agamahe tipa gu sunge namanga rogo zegino dunduko tipa si rengbe ka undo awirinarani ti gu regbo na rogo gu ba du zingo rogoho.​—2 Kor. 8:14, 15; 9:11.

7. Waigu Yekova amangisunge na Simona, na wai pa ino ani gipai re angarasa rani?

⁷ Yekova akido gu ruru gbinza kumba nangia Simona naadu Yerusarema yo nga, ko akpingo mbata fu ko bi Masiya te. Gu kidohe re aima fu wasa gbe fu Simona mbiko ko aima digo ni pidi Masiya tipa dungu agarã. Yekova afu maku fu Simona tipa gako idapase na hipai. Rogo gu kura uru sa, ko aye ku yekaru yo “mbiko ziazia toro.” Ko abi fogo Yesu yo na Yekova ki mangisunge na ko tipa ko gumba sangbanebi tipa gu gude si adu nga ko nika ngia Kristo. (Rk. 2:25-35) Wa vura duhe nga si nawira wa Simona akpi mbata fu Yesu tona gako sunge tungusapai, ko aima du na tambuahe nga Yekova amangisunge na ko rogo gi gene re. Na ko nika gbia weneapai kumbatayo. Rogo vovo zegino, gu ruru kumba re nika bi wai ga Yesu zogarago nika du nipa maku fu arikaaboro dunduko auru kpotosende. (Bam. P. 22:18) Ani ima rengba kadu a na tambuahe tipa ai ngbatunga gu gene Yekova amangasunge na ani ngbaha ti ngba gako sunge.

8. Waigu rengbe Yekova ka mangasunge na ani wa gu ko amangisunge na Barunaba?

⁸ Rogo bambata sa kama agarã fuo batikayo Kristo, kura wenesino kumba sa rimoko angia Yosefa adu na nyemu gupai nga Yekova mangisunge na ko. (Amo. 4:36, 37) Amokedi anaayamba Yosefa nga Barunaba, du rogo yo nga ‘Wiri Wasa,’ na si nawira gupai nga i anaayamba ko wo mbiko gupai nga ko aima du na gu sino tiko gbe nga ga fu wasa. Ni kpiapai, tifuo Saura da ni Kristano, badungu awirina aagunde agunde tipa ka ndu fuoko mbikopa wai ko anaarungosi agu aboro naidi kuti Yesu. Ono tie, Barunaba aye ki fu wasa fu Saura na ki undo ko, na Saura aima du na tambuahe tipa gi wenesino re. (Amo. 9:21, 26-28) Kusa, agu abaakumba naadu Yerusarema yo abihe nga si naida i fu wasa fu agu awirina naaraka Andiokia Suria yo. Da du i akedi ni? Barunaba! I aima manga wene siapai. I nape gupai furani nga, Barunaba “ki ngarasi yo angarasa dunduko, ki ya i ká kuti Gbia ni nyaka kpotoyo yo.” (Amo. 11:22-24) Wakina gure areme, Yekova ima rengba ka undo rani ani fu wasa fu awirinarani. Ni kpiapai, ko ima rengba ka mangasunge na ani tipa ani fu wasa fu agu aboro zanga gayo aboro rogo kpio yo. Watadu ko ima rengba ka fõ ngbaduraniyo tipa ani ndu ka bi gu boro du na kaza watadu gberãrago watadu ka yamba ni rogo terefuni ka gumba bete afugo wasa fu ni. Ya mo mo ambu Yekova ko mangisunge na mo wa Barunaba?​—1 Tesa. 5:14.

9. Ginipai ani awirikaha ti gu gene Yekova aundo gu wirina ngbaha nga Vasily tipa ko da ni wene bakumba?

⁹ Yekova aundo wirina rimoko angia Vasily ko da ni wene babanda akandoro rogo toro yo. Ho Vasily ada ni ni bakumba mbuko na garãko 26, ko aagunde agunde nga ko arẽnga tipa ka undo dungurati rogo toro yo te, gbe ka undo agu aboro naadu rogo akpakarapai rogo dungurati. Wa si avura duwo, ko agbia wene rabahe be agu abaakumba du na inohe na vurube Gu Sukuru Nga ga Sunge Kindo. Vasily amangi ome nyanyaki tipa ka manga sonakumbatayo. Ni kpiapai, ko atangara bete apai nga gu rengbe ko ka mangaha. Kina wai ko anaamanga ome kaa manga agi apai re ni basasa, kinawo a ko atona kaa diabe gako gunde. Gupai ko agumbaha awere  nga: “Gupai nanaagundesi re mbata kusayo awere nafu kina bakere ngbarago fere. Ho Yekova aundo re ni mi gbia gu veresi rẽarẽ nga gu nika fu wasa fu wirina nga kumba watadu dee rogo dungurati, si naye na bakere ngbarago fere.” Awirina, ka ani wiriki ga Vasily kpiapai ki mbu tirani tipa Yekova mangisunge na ani, ko ima rengba ka fu ome furani tipa ani mangi bakere apai rogo dungurati.

10. Ginipai Abigaira amangihe, na ginipai mo awirikaha ti gari kpiapai?

¹⁰ Bakindo Saura aadofuo Davide na gako aboro, na i kini idi na undo. Ga Davide akumba asana gu kumukokumuko kumba rimoko angia Nabara tipa bete riahe. I abihe nga si rẽarẽ tipa i sanahe mbiko wa aima digo ni banda ga Nabara akandoro ngbakungba yo. Ono gi boro gbangbati nga Nabara re aima ká ka fu ai he fuyo. Davide azingi ni kerehe na ko ki diberã tipa ka imo Nabara na agu akumba dunduko naadu rogo gako kporo. (1 Sam. 25:3-13, 22) Ono tie, Abigaira angia dia Nabara, tamari adu ni wenehe na ri kidu ni boro rugatinapai. Ri ayugu bakere ngarã, ki ti sande pati ndu Davide na ki zungodi ko tipa ka ko dinga bapekure ni imoko Nabara gbiati gako akumba ya. Ri aruguko rogo birĩ yo tipa ko mbu apai ku bee Yekova. Ga Abigaira wene afugo na gu mangapai nga ga tatamana aima zio ngbadu Davide yo. Ko ki rugutiko na gupai nga Yekova du nakedi ri. (1 Sam. 25:23-28, 32-34) Abigaira aima sonosa agu asino naasa gupai nga Yekova mangisunge na ri. Wakina gure a, Yekova ima rengba ka mangasunge na agu aKristano nga adee, nga aguyo nasonosa agu asino nga ga mangapai na tatamana gbiati rugatinapai tipa i ngarasi gayo aborokporo gbiati kura aboro rogo dungurati.​—Snz. 24:3; Tito 2:3-5.

11. Ginipai agu awiri Saruma nangia adee amangihe, na ada areme nawirika gayo kpiapai?

¹¹ Fuo dungu kama agarã kusa, agu awiri Saruma nangia adee adu dagba agu aboro yo Yekova amangisunge na yo tipa i mbakadi angapa Yerusarema. (Nem. 2:20; 3:12) Wa vura duhe nga Saruma angia banyaki, agi awiriko nangia adee re aima du regerege tipa ka manga gu kere kpakarakpakara sunge re. (Nem. 4:15-18) I aadunga wa agu akumba nangia ga Tekua yo, nga agu yo ‘naafunga tiyo tipa’ sunge ya te! (Nem. 3:5) Mo berẽnga pa gu ngbarago agu awiri Saruma nangia adee adu na ni ho gu sunge re anyasi ni vuru arame yo gbua 52! (Nem. 6:15) Ti gi gaani regbo re, agu awirina nga adee nafutiyo ni tiyo tipa ka manga kparakpara asunge fu Mbori wa gu nga, mekaarago gbiati ngerafuo agu abambu i nakparaha fu Yekova. Gayo birĩ mangasunge, nyemupai, gbiati du ni ruruse si aidaha tipa gi sunge re du na diabese.

12. Waigu rengbe Yekova ka mangasunge na ani kina wai ko amangisunge na Tabita?

¹² Yekova afõngbadu Tabita yo ri zugo rogo “wene sabe na inapai,” gbe fu adekurugbo. (Amo. 9:36) Bambiko gi gari wene asino nga ga gamahe na inaapai re, badungu aboro akpari tipa ri ho ri akpi ni. Ono i aima du na bakere ngbarago kisusi ti gu regbo gu mokedi nangia Petero azingisi ri be kpio. (Amo. 9:39-41) Ginipai ani awirikaha be Tabita? Singia ani nga paranga aboro watadu sosono aboro, akumba watadu adee, ani dunduko rengbe ka manga agu apai du ni wenehe tipa ka undo awirinarani nga akumba na adee.​—Eb. 13:16.

13. Waigu Yekova amangisunge na gu wirinarani nga Ruth naadu ni boro zee, na ginipai ri agumbaha?

¹³ Wirinarani nga Ruth naadu ni boro zee adu na nyemu kada ni mokedi. Ho ri adu ni ni paranga degude, ri anaandu kporo na kporo ni ipo zaaza kaa kparaka atrakte wa rengbe ome ri na ni. Ri aya, “Mi aima gbia bakere ngbarago ti gi sunge re.” Ono wa si avura duwo, fura fu aboro rogo gayo akporo na kini fura fu aboro tipa ga Mbori Kindo adu ni kpakarakpakaraha furi. Wa si avura du nga Ruth angia boro zee, ri ada ni  nazakigene ri ki du na garã ri 18. Rogo gu garã nangia 1946, ri andu tipa Gu Sukuru Nga ga Girada na kusa ri amangisunge rogo agu aringara nga Hawaii na Japan. Yekova amangisunge na ri tipa ri mangi bakere sunge tungusapai rogo agi arago re. Tifuo manga Ruth sunge tungusapai tipa garã mbembedi kuti 80, ri aya: “Yekova ninaanyakasa re ti aregbo dunduko. Ko ima undo re mi di be gimi gunde na zee. Mi ima ida kuti gupai nirengo nga, Yekova ima rengba ka mangasunge na ai gu boro namaa gani kido kuti ko.”

14. Ringbisihe kuti AKorosaio 1:29, ginipai rengbe ani ka mangaha ka ani aida Yekova mangisunge na ani?

¹⁴ Rogo gu pangbanga yo nga ga aboro, Yekova aima sa gako amoyambu ngba dungu agene tipa i mangi ngbatunga apai ni bakiakia. Waigu ko nika mangasunge na mo? Gipai re nabipa wai gbe mo nika fu tiro ka mangasunge. (Oni gedi AKorosaio 1:29.) Ka mo fu tiro tipa Yekova mangisunge na mo, ko ima rengba ka sa ro mo du ni zaaza batungusipai, wene bayugupai, bafu wasa, tatamanatatamana bamangisunge, gu bakure nafu undo, watadu gu kura ngbatungapai si aidaha tipa ka digiso gupai ko akpinyemuhe.

15. Ringbisihe kuti 1 Timoteo 4:12, 15, ginipai si aida gu paranga aboro nga awirina du areme zungodi Yekova ko undo yo i mangihe?

¹⁵ Na ginipai tigaha du tipa roni paranga aboro nga agu roni naima tona kaa nyaka? Bakere zingo duho tipa agu akumba du na ome tipa i undo dungurati ni amoundo abaakumba. Rogo dungu adungurati, abaakumba nge bangeyo kisusi amoundo abaakumba. Paranga aboro, ya mo oni rengbe ka sonosa gu nyemupai nga ga manga kura asunge rogo dungurati? Ti kura aregbo, kura awirina naagumba gupai nga, “mi na ngbarago kaa mangasunge ni kina batungusapai.” Ka si du nga wo du mo naabi tiro, mo zungodi Yekova tipa ko undo ro mo sonosi nyemupai tipa ka rẽ ka manga sunge ni moundo abaakumba na ko fu ome foro tipa mo asadi tiro na omero dunduko tipa ka mangasunge fu ko. (Batu. 12:1) Ani naida na gaoni undo!​—Oni gedi 1 Timoteo 4:12, 15.

16. Ginipai si aida ani sana Yekova tipaha, na tipagine?

¹⁶ Yekova rengbe ka sa ro mo du ni gu ngbatunga boro ko aida ni tipa ka digiso gupai ko akpinyemuhe. Sidu, mo sanako ko fu nyemu manga gako sunge foro na mo ki sanako tipa ko fu gu ome foro mo aidaha. Singia mo ni parangaro watadu sosono ro, mo mangisunge na gamo regbo, ome, gbiati gu kura ahe rengbe kadu bero tipa ka fu irisa fu Yekova. (Batu. 9:10) Ka mo gbia momu tipa ka manga dungu apai ti ngba ga Yekova sunge, ka mo kanga ha ni ipo mbiko gupai nga mo nabi tiro nga mo arengbanga ka mangaha ya te. Si nirengo nipa momu tipa ka manga gupai rengbe ani ka mangaha tipa ka ye na gu irisa rẽ fu gu Barani nga ga nyemuse ko!