1. Tipagine Yekova narẽ ti ni ani fu iriso fu kina ko sa?

YEKOVA ima rẽ tipa ani fu iriso fu kina ko sa bambiko ko nga Bakusirani na ni Bafu Unga. (Yugo. 4:11) Ono tie, kpakarapai kinaho ani agbiatirani na ni. Wa vura duhe nga ani ima kpinyemu Yekova na kini yugu irisa fuko, gu kuraapai ima rengba kadu na nyanyakipaha rogo gaani raka yo si ki sa gupai nga si ká na ani ti kpi ani kina nyemu Yekova sa na kini irisi kina ko sa. Si naida ani rugutirani na pa wai gupai re narengbe ka manga. Ni bambatapai tie, ani sakingo pai tipa gupai si ayugoho ka iriso kina Yekova sa.

2. Ringbisihe kuti Gate 34:14, ginipai ani nikaa manganga ha ya, ka ani aairiso kina Yekova sa?

² Yekova nga “iraringo Mbori,” nayugo gupai nga ko naida ani ra fu kina ko sa. Sidu, ko naida ani irisi kinako sa. Rogo Ziazia Kekeapai yo, ranigose fu kina Yekova sa nayugopa dudunguro nyemuse fuko. Ka ani aairiso kina Yekova sa, ani mbunga ai boro watadu ai pai si di ba ko ngbaduraniyo te.​—Oni gedi Gate 34:14.

3. Tipagine du gaani ranigose fu Mbori ti ni na nduhe ti ni?

³ Gaani ranigose fu Mbori na kina nduhe ti ni. Tipagine duhe ti ni wo? Bambiko si narurii agu arengo ani nawirikihe tipa ko. Ani ima ye ka kpinyemu gako wene asino. Ani ima ino agu apai Yekova akpinyemuhe na agu ko asogaha, na ani nabi apai kina wai ko abihe. Ani ima rugatirani na gako ringbisapai tipa rani na kini songodihe. Si ni pa irisa furani nga ko fu gu momu furani nga ga du ni abakureako. (Tam. 25:14) Agu apai dunduko ani awirikaha tipa Bakusirani nambedisa rani koyo du ko ni.​—Yak. 4:8.

4. (a) Gini ahe Bakitingbanga amangasunge na ni tipa ka rungburasi gaani pa ranigose sa fu kina Yekova? (b) Gini apai ani nika wirikaha rogo gi kekeapai re?

 ⁴ Gi zegino re kutiibe Bakitingbanga, na ko namangasunge na ni ka kusa agu ahe aboro aidaha gbe si du na nyanyakipaha rogo gaani raka yo na kini sa gaani gbegberẽ nyemupai ni mbumbuhe tipa ka káha. (Ef. 2:1-3; 1 Yo. 5:19) Ko naida gupai nga ani kpinyemu gu kura apai a tipa gupai nga ka ani kpingo nyemu kina Yekova sa ya. Ani nika sakapai tipa agene ue Bakitingbanga amanga gipai re ngbaha. Ni bambataha, ko naˈasada rani tipa ani merefuo aũkumuko, na ni uehe, ko namaapai kurirani tipa ani mangi mumungo asiapai nga ga aũngbarago.

5. Tipagine si aida ani bandatirani ti ni ti sonosa nyemu marã?

⁵ Ani dunduko naida na guhe ka ani rihe, iriiri aroko tipa vodaha, na wene ba kaa raka rogoho. Ono tie, si naida ani bandatirani ti kpinyemu marã. Badungu aboro areme nga “airakpinyemumarã,” na i nakpinyemu agu ahe rengbe marã ka ngbehe. (2 Tim. 3:2) Yesu aima ino gupai nga apefuoko ima rengba ka sonosa ngbatunga gi nyemuse re. Yesu aya: “A nga boro sa ka ra fu abaira ue te; bambiko ni asóga gu ni sa, ki kpi nyemu gu ni; watadu ni aká kuti gu ni sa, ki payasi pa gu ni. Ka oni ata ra nga fu Mbori nira fu ũzegino a te.” (Mt. 6:24) Gu boro nairiso Yekova na ti kina gu bangisa regbo re kini di bakere regbo na asadatise kaa gbata agu aũkumuko nga ga gi zegino re, ka pepai ngba kura gene, gure wa ka i ya ni naˈasada ka iriso agbia ue. Gu boro re afunga rengberengbe iriso fu Yekova te.

6. Ginipai ani awirikaha ti afugo Yesu fu gu dungurati naadu Raodikiya yo?

⁶ Agu aKristano naadu Raodikiya aatangbadu yo nga: “Mi kumuko, ki dungura ũkumuko, zingohe amanga nga re te.” Ono aYekova na  Yesu aabi yo nga ‘rungorungo aboro nga yo gbe, adu nga na he be yo ya, nga airavurari, nga kundiri aboro a.’ Yesu afu rugute fuyo, angianga mbiko gupai nga i angia airakumuko ya, ono mbiko gupai nga gayo nyemuse tipa aũkumuko aagbarasapa gayo pagume na Yekova. (Yugo. 3:14-17) Ka ani bi gupai nga nyemu gbata aũkumuko nasona kpotorani yo, si naida ani mangipai ni ipo tipa ka ruga gaani berãpai. (1 Tim. 6:7, 8) Ka ani aaruganga gaani berãpai ya, kpotorani yo nika du ni kparakakparakaha na ka Yekova aidanga na gaani iriso ya. Ko nga “iraringo Mbori.” (Pa Rug. 4:24) Waigu rengbe marã kadu na nyanyakipa ru rogo gaani raka yo?

7-9. Ginipai ani awirikaha ti gu kpiapai nga ga gu bakumba nga David?

⁷ Ani makianga gu kpiapai nga ga David nga bakumba sa Amerika yo. Ko aya ko angia gu bamangisunge naamangasunge nyanyaki. Gu basunge ko aamangasunge rogoho afu wene sunge fuko na bakere marã, na i anaabi ko ni boro sa dagba gu wene abamangisunge yo naini manga gu sunge re rogo gu ringara re. David aya, “Ti gu regbo re, mi aberẽ gupai nga gimi diabese aayugo gupai nga Yekova nafu amaku fere.” Ono ya mo gako diabese aaye nzunzu be Yekova?

⁸ David aye ka rugatiko na gupai nga gako sunge aagbarasapa gako pagume na Yekova. Ko aya, “Mi anaaberã kina pa agu akpakarapai nga ga sunge ho mi aniidu ni ba agu dunguratise yo nga ga dungurati na zavura gene tungusapai yo. Mi aagbia bakere marã, ono mi adu ni bakere fudifudi re berãre yo, na gimi rogatise adu rogo kpakarapai.”

⁹ Si aaida David mangi diaberã tipa gupai naadu na nyanyakipaha. Ko aya, “Mi amangi nyanyakipa diaberã tipa ka mbakada agu apai naadu tipa re.” Si aaida David mangi ariapai  rogo gako sunge yo, sidu, ko agumba pa gupai fu gako bairasunge ko aaida ka mangaha. Sangbanaha angia gine? I ado David ti gako sunge! Ginipai ko amangihe kuti gipai re? Ko aya, “Rogo gu uru nangbefuo gure, mi asanahe tipa ka mangasunge ni gu moundo abazakigene namangaha amanga kindi.” ADavid na diako atona mangasunge giriso arago tipa si naaundo yo. Tifuo bete regbo, ko atona mangasunge Kindo ti aregbo dũ ni bazakigene, na kusa diako atona manga sunge abazakigene a. Agi arogotise re adiberã ka manga gu sunge badungu aboro aidanga ka mangaha ya, ono gu ngbatunga sunge i amangaha nga gupai paha nanyaki fuyo gbe te. Wa vura duhe nga i agbianga bakere marã berewe wa gu i anaagbiaha mbata te, i nidu adu na bete marã beyo rogo adiwi dunduko tipa agu apai i aidaha. I naida ka maa Yekova ni bambata boro rogo gayo raka yo, na i ima ye ki rugutiyo na gupai nga ko nangera angerafuo agu aboro namaa pa Kindo ni bambatapai rogo gayo raka yo.​—Mt. 6:31-33.

10. Waigu rengbe ani ka banda kpotoraniyo?

¹⁰ Ka ani vura du na tooni marã berãni watadu bakere marã, gupai si aida ani mangihe nga ka banda kpotoraniyo. Ngba gini gene? Ka mo sonosinga nyemu marã ya. Na ka mo mbunga gamo sunge marã si du na nyanyakipaha rogo gamo raka yo kisusi gamo sunge fu Yekova ya. Waigu rengbe mo ka inoho singia gupai re namanga ro? Gu kura asanahe rengbe mo ka sana tiro na ni nga: ‘Ya mo mi naaberã gbe kina tipa gimi sunge ho du mi ni badunguratise yo na gene tungusapai yo? Ya mo mi naabaka bangire dedede tipa gbia bakere marã kumbatayo? Ya mo marã gbiati aũkumuko naye na kpakarapai ku rogo gimi rogatise? Ya mo mi rengbe ka manga gu sunge aboro aidanga ka mangaha ya ka si du nga si nambugene fere tipa mi di bakere regbo kuti iriso Yekova?’ (1 Tim. 6:9-12) Ho mo nikaa berã ni kurii agi asanahe re, si naida mo tingidi gupai nga Yekova ima kpinyemu ro na ko namanga gako kidohe fu agu aboro du fu kina ko sa, ko naya: “Mi ahe nga unda ro wa sa te, mi ambú nga ro a wa sa te.” Si du nga ndu gupai Pauro aya ti ni wẽ: “Ka oni dú nga ni akanga fu nyemu marã ya.”​—Eb. 13:5, 6.

11. Ginipai rengbe aũngbarago ka manga boro na ni?

¹¹ Yekova naida aida ani gbia ngbarago rogo raka yo, na aũngbarago ima rengba ka undo rani ani du na ngbarago. Nirengo, Fugo Mbori nagumba gupai nga, “A nga he ho ngba fu boro  susi gu pai nga ni ta ri he ni mbiri he, te, rago ki ningba angba ti ni mbiko gani sunge.” (Batu. 2:24) Ono tie, bakere agu aũngbarago du rogo zegino ima rengba kadu na gbegberẽ sangbanaha kurirani. Si ima rengba ka sa badungu aboro i tona kaa ida watadu kaa kpinyemu agu apai Fugo Mbori asogaha.

12. Ringbisihe kuti 1 AKorindo 10:21, 22, tipagine si aida ani sia gaani aũngbarago ti ni na tatamana?

¹² Ani naida ka ra fu kina Yekova sa, sidu, ka ani ta ringa riahe “ti gu mbisa nga ga Gbia” kini rihe ti “ga adaimona” ya. (Oni gedi 1 AKorindo 10:21, 22.) Rihe na boro dedede ninaayugo pabakure. Ka ani sia agu aũngbarago nasonosa pa zuu, sangbaatoro, wasiwasi mangaapai, watadu gu kura nyemuapai gbiati abipai nga ga borose, si wa ka i ya ani narihe na avura Mbori na kini ri gu riahe i ambakadaha. Ni sangbana gipai re, ani agbarasanga kina tirani sa te ono ani nagbarasa gaani pagume a na Yekova.

13-14. Ringbisihe kuti Yakoba 1:14, 15, tipagine si aida ani du ni ti ni na rubangirise tipa agu aũngbarago ani asiaha? Oni funga kpiapai.

¹³ Ngba gini gene rengbe ani ka ringbisa aũngbarago kuti riahe? Ho ani arihe ni, ani ima rengba ka sia guhe ani amaa ku ngbarani yo. Ono bara sa kindi ani nambiri riahe ku vu rani yo, ani berewe na ome ka sia pa wai si nika mangasunge na kpotorani te. Wene riahe ima rengba ka sa kpotorani si du wenengai; ono gu riahe adunga wenengai ya ima rengba ka sa kpotorani ka si dunga wenengai ya. Ani arengbanga ka bi sangbanaha nibasa te, ono sangbanaha nika duadu ni yuguyuguhe tifuo bete regbo.

¹⁴ Wakina gure a, ho ani asia gaani aũngbarago ni, ani ima rengba ka sia gu ngbatungaha ani nika hiiso berãrani na ni. Tifuo gure, agu aũngbarago ani asiaha rengbe kadu na maapai kurii gaani aberã na mangaapai. Wene aũngbarago ima rengba kadu ni wenehe furani; gbegberẽ aũngbarago ima rengba ka gberesapa rani. (Oni gedi Yakoba 1: 14, 15.) Ani arengbanga ka bi gu gbegberẽ sangbanapai du ti gi aũngbarago re ni ipo te, ono ani ima rengba ka bihe tifuo bete aregbo. Si du Ziazia Kekeapai afu gu zahe ti ni nga: “Ka i nángi nga roni ya; i asawia nga Mbori te, bambiko gu he rũ boro kina ha ke ni a. Bambiko gu ni narũ he fu kina boroni ni aké zirã ake be borose.” (Gara. 6:7, 8) Si ni nyanyakipa pai furani tipa ani sogo agu aũngbarago dunduko nasonosa pa agu apai Yekova asogaha!​—Tam. 97:10.

15. Gini gamahe Yekova nafuhe furani tipa ani naagbia ngbarago ti ni?

¹⁵ Badungu ga Yekova aboro nagbia ngbarago ti bi gu wene ambakadapai du rogo gaani terevizioni nga ga Internet nga JW Broadcasting^®. Wirinarani nga Marilyn aya: “JW Broadcasting ima undo re mi du na ngbarago, na mi rengbe ka bi agu apai dunduko du rogoho mbiko si dunduko du ni wenehe. Ho mi ni duni nisare watadu na gberãrago, mi naagbia ngarasaro ti agumbapai watadu agu ambakadapai nga ga Morning Worship. Si nasa re mi naabi tire mbembedi na Yekova gbiati gako riigbu. Gu mbakadapai nga ga JW Broadcasting ima aria gimi raka.” Ya mo mo nagbia undo ti ga Yekova gamahe? Kupati gu vovo ambakadapai ninaakura na adiwi dũ, JW Broadcasting na dungu ambakadapai rogoho nga ga dede afugo na avidio gbiati abia nga gu nafu ngarasaro.

16-17. Tipagine si aida ani du ti ni na zatise nibipa gu bakio regbo ani adiaha kuti aũngbarago, na waigu rengbe ani ka manga gipai re?

¹⁶ Si naida ani du na rubangirise nibipa gu ngbatunga aũngbarago ani agbia ngbarago ti ni gbiati gu bakio regbo ani adiaha kutini. Ka ani adunga na rubangirise ya, ani ima rengba ka dia bakere regbo kuti zambuasi tirani kisusi gu regbo ani adiaha kuti mangasunge fu Yekova. Badungu aboro nabihe ni mbumbuhe  kadu na zatise nibipa bakio gu regbo i diaha kuti aũngbarago. Wirina nga Abigail du garãri nga 18 aya: “Bi terevizioni ninaaundo re mi gbia wasa nyemu tingbafuo gbanga uru nga ga bakere sunge. Ono ka mi adunga na rubangirise ya, mi ima rengba ka dia dungu asa kuti bi terevizioni.” Paranga wirina du rimoko nga Samuel aya: “Ti kura aregbo, mi naabi dungu guruguru avidio rogo Internet. Mi naatona ha na bi gu sa gbua, na fuani, mi ki di badungu asa kutini ka mi ainongo ya.”

¹⁷ Waigu rengbe mo kadu na zatise nibipa bakio gu regbo mo adiaha kuti aũngbarago? Gu bambatapai si aida mo mangihe nga ka ino bakio gu regbo mo adiaha kuti aũngbarago. Mo ima rengba ka ke bakio gu regbo re sande tipa poso sa. Mo ke bakio gu regbo rogo karendaria mo adiaha kuti bi terevizioni, bi apai rogo Internet, na ngi ambaro rogo terefuni. Ka mo bi gupai nga mo nadia bakere regbo ni kerehe kutini, mo asadi ka manga ringbisa regbo mangaapai. Mo diberã ka manga nyanyakipa apai mbata, na mo ki di gu yangara regbo nika nye kuti aũngbarago. Fuo gure, mo ki sana Yekova ko undo ro mo nye kuti manga gupai mo nadiberã tipaha. Ka mo mangihe wo, mo nika du na regbo gbiati ome tipa gamo wisigo Ziazia Kekeapai nisase, gu irisombori nga ga aborokporo, agu adunguratise nga ga dungurati, na kini irisi Yekova ni manga mo sunge tungusapai. Mo ima rengba ka gbia bakere ngbarago ti gu regbo mo adiaha kuti aũngbarago, bambiko mo namaa Yekova mbatayo rogo gamo raka.

18-19. Waigu rengbe ani ka yugo gupai nga ani nye fu kina Yekova sa?

¹⁸ Tingbafuo gu mokedi nangia Petero kepai nibipa digido ga Satana zegino na nibipa gu vovo zegino nika ye kumbatayo, ko aya: “Wa oni nangera tipa agi apai re, oni nifú tironi nyanyaki ya i bi roni zezeredi, ka wiri biriko he adú nga ti roni barangba ko na sirõ a ya.” (2 Pet. 3:14) Ho ani airisa gu rugute re ni na kini mangi ai gupai rengbe ani ka mangaha tipa ka nye ni gigiri rani rogo gaani mangaapai yo na rogo toro yo, ani nayugo gupai nga ani nye fu kina Yekova sa.

¹⁹ Satana na gako zegino nikaa asada rani kindi tipa ani moi pa kura apai mbatayo rogo gaani raka kuba maa ani Yekova. (Rk. 4:13) Ono ka ani vura kaa gbiatirani na gini akpakarapai vurũ, ani ambunga ai boro watadu ai he si di ba Yekova ngbaduraniyo te. Ani ima diaberã kaa fu gaani iriso naabaha fu kina Yekova sa, bambiko kina ko sa rẽ tipaha!