1-2. Tipagine Yekova azaki gene ti ni furani tipa ani du ni papara gako riikporo, na wai du ko amangi gipai re?

YEKOVA ima yamba rani ani du ni papara gako aborokporo du nga airisoko. Nairiwo gu bawene yambahe ngaha re! Agi aborokporo re nga agu aboro naima kparatiyo fu Mbori na kidu na idapase kuti motumo tumorii nga ga Wiriko. Gaani riikporo nga riikporo nga ga ngbarago. Ani nagbia ngbarago ti gu raka du na rogoyo ti ni awere, na ani nangi mbiko gu maabangirise du ani na ni nga ga raka nyeanye kindi—singia ngbangbaturũ yo watadu rogo Paradizo auru kpotosende.

² Yekova asa gupai nga ani du ni papara gako riikporo bambiko gupai nga ko ima kpinyemu rani ni bakerehe gbe. Ono tipa gupai nga Yekova mangi gupai re, si aidi ko mangi bakerepai tipa ka tumo rani. (Yo. 3:16) I angbe rani “ni mosoro.” (1 Kor. 6:20) Vurube motumo tumorii, Yekova asa gupai nga ani du na rengba kadu na mbembedi pagume na ko. Si ni pa momu furani kaa yamba gu Boro kii pani kisusi aboro dunduko rogo zegino nga Barani. Na, a wa ani abihe rogo gu kekeapai naadu mbata fu gere, Yekova nga gu Ba ngba kisusi.

3. Gini asanahe ani narengbe ka sana tirani na ni? (Oni bi gu sanduki nga “ Ya Mo Yekova Inipa Re?”)

³ A wakina gu kura Bake Ziazia Kekeapai sa, ani ima rengba ka sanahe nga: “Gini he mi ka [tumo na ni] fu Yekova tipa gu gako weneapai dunduko fu ko fere?” (Tam. 116:12) Karagapai nga ka ani rengbenga na tumo gu Barani du ngbangbaturũ yo te. Ono wa vura duhe wo, gako nyemuse koyo du ani ni nasarani ani kpinyemuko a. Gu mokedi nangia Yoane akepai ki ya: “Nyemuse ti rani, bambiko ko nyemurani adu ti ko mbata.” (1 Yo. 4:19) Gini agene rengbe ani ka yugo gupai ngbaha fu gu Barani du ngbangbaturũ yo nga ani ima kpinyemu ko?

4. Ringbisihe kuti Yakoba 4:8, tipagine si aida ani mangi bakere asadatise ti ni tipa ka mbeda na Yekova?

⁴ Yekova naida gupai nga ani mbedi na ko na kini fura na ko. (Oni gedi Yakoba 4:8.) Ko nangarasa rani nga ani “kpatagara kuti kpe kindi,” na ko nadegatuko furani ti aregbo dunduko. (Rom. 12:12) Anga Yekova ni gu boro adunga regbo beko tipa ka degatuko fu furani ya te. Na ani nadegaturani fuko ni geda ani Fugoko nga Ziazia Kekeapai, wa sa na agu awaraga rengbe ka undo rani ani girogoyo. Ani nagia ko a ni dega ani turani wenengai ti regbo agu adunguratise nga ga aKristano. A kina wai pa fura agude dedede na avunguyo naaundo yo i du mbembedi na avunguyo, kinawo a pa fura ani na Yekova dedede aundo rani ani nye mbembedi na ko.

5. Waigu rengbe ani ka mbakada gu gene ani amanga gaani akparakpee ngbaha?

⁵ Mo berẽnga kuriipa wai gamo akparakpee fu Yekova nidu. Yekova naida gupai nga ani kusuko kpotoraniyo fuko rogo kparakpee yo. (Tam. 62:8) Si naida ani sananga tirani na gu sanahe nga: ‘Ya mo gimi akparakpee nidu auru ngbare gbua wakina agu afugo i aima kehe boro adogodaha watadu si naaye kpotoreyo wa gu kekeapai boro akehe na beni nga gu naye kina boro kpotoniyo?’ Zanga kapa, mo ima kpinyemu Yekova gbe, na mo naida ka banda gamo pagume na ko ni nyanyakihe. Tipa ka manga gipai re, si naida mo naafura na ko dedede. Mo peke gu gamo gbugbu apai du kpotoroyo fuko. Mo peke agu apai fuko nafu ngbarago foro gbiati agu apai nafu gberãrago foro. Mo du na gu kido nga mo ima rengba ka sanako tipa undo.

6. Ginipai rengbe ani ka mangaha tipa ka nye mbembedi na gu Barani du ngbangbaturũ yo?

⁶ Tipa gupai nga ka nye mbembedi na gu Barani du ngbangbaturũ yo, si naida ani naafu tambuahe fuko ti aregbo dunduko. Ani ima ida kuti gupai bake papara Atambuahe akehe ki ya: “Ako Yekova gi Mbori, mo angeesi gamo iiriwo mangaapai na gamo aberã du kono du ani ni; i arengba nga na ringbisa ha na mo te! Bambiko ka mi vura nitaki pande he ki nigumba pa ha, si asúsa gu ka i gedi he!” (Tam. 40:5) Anga gupai gbua ani amangaha nga kadu na tambuahe fu Yekova te; ani nayugo gaani tambuahe ayugo fuko rogo afugoyo na rogo mangaapai yo. Gipai re nasa rani ani du kia ti dungu aboro areme. Ani naraka rogo gu zegino adunga aboro rogoho na tambuahe tipa agu apai dunduko Mbori amangaha fuyo ya. Na pai sa dagba agu apai yo nayugo gupai nga ani naraka ti “kusa rago” watadu yangara arame nga aboro ayugongo tambuahe te. (2 Tim. 3:1, 2) Ka ani ya dunga na ngbatunga gu sino re tirani ya!

7. Ginipai Yekova aida ani mangihe, na tipagine?

⁷ Avunguagude ninaaidanga awiriyo naatakpata dagbatiyo te, ono i naaida i du ni abakure. Wakina gure a, Yekova naida awiriko dunduko du ni abakure dagbatiyo. Gu nyemuse du ani na ni dagba tirani nayugo rani ni ndikidi aKristano. (Yo. 13:35) Ani ima ida kuti gupai bake papara Atambuahe akehe ki ya: “Nga gu wenepai na wenerago a ka awirina sungu sa na berã sa!” (Tam. 133:1) Ho ani akpinyemu awirinarani ni, ani nayugo gupai fu Yekova nga ani ima kpinyemuko. (1 Yo. 4:20) Nairiwo gu bawenepai ngaha kadu ni papara gu riikporo nga ga agu awirina ‘ringiyo nangbá angba fu akurayo, na du yee kpotoyo yo’!—Ef. 4:32.

8. Ringbisihe kuti 1 Yoane 5:3, gini nyanyakipa ndupai kisusi ani agiasangba Yekova ti ni?

⁸ Yekova naida gupai nga agude naagiasangba avunguyo, na ko naida gupai a nga ani naagiasangba ko. (Ef. 6:1) Ko rẽarẽ ani gisangbako bambiko ko nga Bakusirani, Bangerefuo raka rani, na ko du na tatamana tiko kisusi abaagude dunduko. Ono tie, gu nyanyakipa ndupai kisusi ani agiasangba Yekova ti ni nga ani ima  kpinyemuko. (Oni gedi 1 Yoane 5:3.) Wa vura duhe nga badungu nduapai duho si aida ani gisangba Yekova ti ni, ko amanganga rani ngbaome tipa ani gisangbako te. Yekova afu gu gamahe furani nga ga ranirii ka siapai, sidu, ko na ngbarago ho ani asia ni ka giasangbako mbiko gupai nga ani ima kpinyemuko.

9-10. Tipagine duhe ti ni ni nyanyakipa pai ka ino ga Mbori andiko na kini raki ringbisihe kutini?

⁹ Avunguagude ninaaida gupai nga awiriyo du ni bandabanda yo. Si du i naamaa andiko ti ni tipa si naabanda awiriyo. Ho agude airisa agu andiko re ni, i nayugo gupai nga i ima du na kido kuti avunguyo na i nabiyo na irisa. Sidu, nairiwo wai tie duhe furani ni nyanyakipa pai gbe ka ino agu andiko watadu arugute nga ga gu Barani du ngbangbaturũ yo na kini raki ringbisihe kutini. Ho ani amangaha ni wo, ani nayugo gupai nga ani ima kpinyemuko na ani nabiko na irisa na ani nagbia undo agbia a nitirani. (Yes. 48:17, 18) Ono tie, agu aboro naká Yekova gbiati gako andiko watadu arugute, i naye ki imisi kina tiyo ni yangaraha.—Gara. 6:7, 8.

¹⁰ Ho ani araka ni ngba gu gene nafu ngbarago fu Yekova, ani nadu ni bandabanda rani be agu apai rengbe ka imisa rani ti kpotorani, berãraniyo, na rogo toro yo. Yekova ima ino gupai duni wenehe gbe tipa rani. Aurora, nga guri naraka Amerika yo aya, “Mi ima ino gupai nga ho ani agiasangba Yekova ni, raka rani naadu ti aregbo dunduko ni wenehe kisusi.” Gipai re nga rengo ti aregbo dunduko. Waigu mo nagbia undo ti gia mo sangba Yekova?

11. Waigu kparakpee aundo rani?

¹¹ Kparakpee naundo rani ani naagiasangba, zavura ho duhe ni ni mbumbuhe ka mangaha wo.  Ti kura aregbo, si ima du ni mbumbuhe ka giasangba Yekova mbiko ani nga aboro ingapai, ono si naida ani naamanga asadatise amanga ti aregbo dunduko tipa gupai nga ka zanga basasangba ko. Bake papara Atambuahe azungodi Mbori ki ya: “Mo fú rugatinapai fere, si mi ka ka kuti ga rugute ti ni; ki berẽ pa ha na kpotore yo dunduko.” (Tam. 119:34) Denise, nga nazakigene aya, “Ho si nidu ni fere ni mbumbuhe ka irisa rugute sa dagba ga Yekova arugute yo, mi naamanga kparakpee tipa ome tipa ka manga gupai duni ruruhe.” Ani ima rengba kadu na gu kido nga Yekova nakaragapai akaraga ti aregbo dunduko kuti gu ngbatunga akparakpee re.—Rk. 11:9-13.

12. Ringbisihe kuti AEfeso 5:1, ginipai si aida ani mangihe?

¹² Oni gedi AEfeso 5:1. Bambiko gupai nga ani nga “awiri manguse,” watadu agu agude Yekova naima kpinyemuyo, si naida ani wiriki ko wenengai wa rengbe omerani na ni. Ani nawirika gako asino nidu ani ni aboro nyemuse, aboro weneringise, na ni agu aboro nambupai fu akuarani. Ho agu aboro ata inongo Mbori ya abi gaani wenesino mangaapai ni, si ima rengba ka fõngbaduyo yo tipa i wiriki dungu apai tipa ko. (1 Pet. 2:12) Si naida agu aKristano nga avunguagude naawirika Yekova rogo gu gene yo i amangapai na awiriyo ngbaha. Ka i mangihe wo, awiriyo ima rengba ka ida ka manga pabakure na gu Barani nga ga nyemuse ko.

13. Ginipai si aida ani naagberã rani kutini?

¹³ Si ningia sino agude kadu na ngbarago tipa abayo na kini fura tipa yo na ngbarago. Wakina gure a, ani na ngbarago tipa gu Barani du  ngbangbaturũ yo nga Yekova, na ani naida kura aboro inoko. Ani na kina gu bangisa berãpai Bakindo Davide adu na ni nga guko nakepai ki ya: “Mbisimore nasambua tihe rogo Yekova yo.” (Tam. 34:2) Ono tie, na ka si du nga ani nagunde agunde? Waigu rengbe ani kadu na wingbaduse? Ani rengbe kadu na wingbaduse ka ani aagbeberã rani kuti pa wai ani narengbe ka sa ngbarago ti Yekova na pa wai kura aboro narengbe ka gbia undo ti wirikapai tipa ko. Yekova nika fu gu wingbaduse afu furani ani aidaha. Ko aima undo agu awirinarani naadu rogo bambata sa kama agarã i du na wingbaduse, na ko nika undo rani aundo a.—1 Tesa. 2:2.

14. Gini bete nduapai duho duhe ti ni ni nyanyakipa pai ka mangasunge sa aboro ni abawiriki?

¹⁴ Yekova akparanga aboro te, sidu, ko na ngbarago ho ko abi gupai ni nga ani nayugo nyemuse fu kura aboro, zanga bipa gu ba i aye rogoho. (Amo. 10:34, 35) Gene sa dagba gu wene agene yo kisusi rengbe ani ka yugo nyemuse ngbaha fu kura aboro nga ni tungusa ani wene pangbanga fuyo. (Mt. 28:19, 20) Ginipai rengbe gi sunge re ka mangaha? Agu aboro nadega tuyo furani ima rengba ka mbakada gayo raka awere, na kidu na gu maabangirise nga ga raka nyeanye kindi kumbatayo.—1 Tim. 4:16.

15-16. Gini nduapai duho si aida ani du ti ni na ngbarago?

¹⁵ Yekova nga gu Ba nga boro nyemuse, sidu, ko naida gako aborokporo du na ngbarago. (Yes. 65:14) Badungu nduapai duho rengbe ani kadu ti ni na ngbarago awere, ka si vura du vurũ nga ani nagbia tirani na akpakarapai. Ni kpiapai, ani ima du na gu kido nga Barani du ngbangbaturũ yo ima kpinyemu rani bakere gbe. Ani ima du na gu ndikidi inohe nga ga Fugo Mbori nga Ziazia Kekeapai. (Yere. 15:16) Na ani nga papara gu kparakpara riikporo du na agu aboro rogoho nakpinyemu Yekova, kini kpinyemu gako arugute, na kini kpinyemu akurayo.—Tam. 106:4, 5.

¹⁶ Ani ima rengba ka nye na ngbarago bambiko gupai nga ani ima du na gu ndikidi maabangirise nga raka nika ngbaangba kumbatayo. Ani ima ino gupai nga barambeda, Yekova nika gbarasa gbegberẽ aboro naabayo kusayo na tiibe gako zogarago, kpotosende nika du berewe ni Paradizo. Ani ima du a na gu bawene maabangirise nga i nika zingisa agu aboro naima kpiko na i ki koditiyo berewe na gayo aboro. (Yo. 5:28, 29) Nairiwo gu pa ngbarago nika ngiaha re! Na gu nyakipaha anyaka gbe kisusi nga, ani ima du na gu kido nga gu irisa, sambuohe, gbiati iriso gu Barani nga ga nyemuse ko narẽ na ni, aboro dunduko barambeda kumbatayo ngbangbaturũ yo na auru kpotosende nikaa fuhe fuko.