1. Ginipai si aida ani dunduko mangihe?

YA MO mo rengbe ka kpinyemu ka ora gu oto abaangirã mo naima ino gupai nga si ima kpakara, gbe ka si du nga mo nawoka awoka watadu mo na mbugo? Si nawira wa mo arengbanga ka kpinyemuhe te. Ono tie, gu mokedi nangia Pauro ape gupai nga ndikidi aKristano dunduko naora oto abaangirã. (Eb. 12:1) Na ani dunduko si aida ani hipai ki da ti digidoho ka ani aida ka gbia gu mosoro Yekova nika fuhe furani, singia ani nga paranga aboro, gbinza aboro, agu aboro du na ome tiyo, watadu agu aboro du na mbugo.—Mt. 24:13.

2. A wa duhe ni kekehe rogo 2 Timoteo 4:7, 8, tipagine Pauro adu ti ni na ranirii nga ga fugo?

² Pauro adu na ranirii nga ga fugo mbiko ko aima ‘ora oto abaangirã ki digisihe.’ (Oni gedi 2 Timoteo 4:7, 8, NW.) Ono ginihe tie du nzunzu nga gu oto abaangirã Pauro afura tipaha re?

3. Ginihe du nga gu oto abaangirã Pauro afura tipaha?

³ Pauro anaake pai ake ti kura aregbo tipa agu apai nanaamanga ti regbo agu ambaro i anaangihe rogo gu ringara aGiriki naadu mbata tipa ka yugo nyanyakipa apai na ni. (1 Kor. 9:25-27; 2 Tim. 2:5) Ko aringbisi gu raka nga ga Kristano bara dunguhe kuti oto abaangirã. (1 Kor. 9:24; Gara. 2:2; Frp. 2:16) Boro natona ora gi “oto abaangirã” re ho ni akpara tini ni fu Yekova na ki zi bapatiza. (1 Pet. 3:21) Ni nadigiso gani oto abaangirã ho Yekova afu gu mosoro ni fu ni nga ga nyenye unga.—Mt. 25:31-34, 46; 2 Tim. 4:8.

4. Ginipai ani nika sakapai tipaha rogo gi kekeapai re?

⁴ Gini bete awiratise du dagba ora ni gbangaha na ndue na raka gu raka nga ga Kristano? Dungu awiratise duho. Ani sakingo pai tipa agu biata. Bambataha nga, si naida ani pekefuo gu gene du ni ruruhe; uehe nga, si naida ani moiberãrani kuti pa digisoho; na biataha nga, si naida ani naaora aora kindi ka akpakarapai vura du tirani vurũ.

5. Gini gene si aida ani pekefuo ho, na tipagine?

⁵ Tipa ka rẽ ka gbia mosoro rogo ndikidi oto abaangirã yo, si naida agu aboro naora oro kina ngba gu gene ambakadi pa gu oto abaangirã re nayuguhe. Wakina gure a, ka ani aida ka gbia gu mosoro nga ga nyenye unga, ani du wa ka ani pekefuo gu gene raka nga ga aKristano. (Amo. 20:24; 1 Pet. 2:21) Ono tie, Satana na agu aboro napekafuo gako kpiapai naida gupai nga ani mangi gu siapai du kia; i naida ani naandu kindi kumbatayo kaa ‘ora na yo.’ (1 Pet. 4:4) I nasawia pa gu gene raka asawia ani apekafuo ho na kini gumba gupai nga gu gene du yo ngbaha ngba kisusi, mbiko si nandu sa ranirii. Ono gupai i agumbaha re nga ziree.—2 Pet. 2:19.

6. Ginipai oni awirikaha ti gu kpiapai nga ga Brian?

⁶ Ai gu boro naora na agu aboro du ga Satana zegino na maapai kurii yo naye ka bi gupai niˈipo nga gu gene ni nasiaha andunga sa ranirii te; si nandu sa kina sunge akanga. (Rom. 6:16) Oni bingo gu kpiapai nga ga Brian. Avunguko angarasi ko nga ko pekefuo gu gene raka nga ga aKristano. Ono ho ko adu ni ni wiri paranga, ko aatikö atikö singia gu gene re asako ko du na ngbarago. Brian adiberã ka ora na agu aboro naraka kuti agu arugute nga ga ga Satana zegino. Ko aya, “Mi aainongo ho nga gu ranirii mi aakpinyemuhe re nika sa re mi inidi tire na kere ahe te. Fuo bete regbo kusa, mi aadia kere angua kutii kpotoreyo, kini mbiri buda ni bakerehe, na kini raki wasiwasi raka. Vuru agu agarã yo nangbefuo gure, mi aadia agu angua kutii kpotoreyo naadu ni kerehe kisusi nga gu nazio baha ti boro na mi aye kada ni kanga fu dungu agu akuraha. . . . Mi atona baga kere angua tipa ka songoda gimi raka.” Niyangaraha tie, Brian adiberã ka raka ringbisihe kuti ga Yekova arugute. Ko aˈaria gu gene ko aandu ngbaha na ki zi bapatiza rogo 2001. Ko na ndikidi ngbarago awere mbiko ko napekafuo gu gene raka nga ga aKristano. *

7. Ringbisihe kuti Matayo 7:13, 14, gini agene ue du barabangirani?

⁷ Si ni nyanyakipa pai tie ani sia gu gene du ni ruruhe tipa ka pekafuoho. Satana naida gupai nga ani dunduko mbu oto ngba gu gene du ni pangipangi he nga gu “nangbe koyo du unga ni” ki ye ka ndu ngba gu kikii gene dungu aboro rogo gi zegino re andu ngbaha. Dungu aboro nandu ngba gu gene re na si taata ka ndu ngbaha. Ono si “nangbe koyo du kpio ni.” (Oni gedi Matayo 7:13, 14.) Tipa ka nye ngba gu gene du ni ruruhe na ki zanga ne kusayo ti ni, ani du wa ka ani kido kuti Yekova na kini degeturani fuko.

8. Ka gu boro naora oto abaangirã koto, ginipai ni amangaha?

⁸ Agu aboro naora oto abaangirã ni gbangaha namaaberã yo kuti gu gene du barabangiri yo tipa gupai nga ka i kotonga ya. Ono tie, i ima rengba ka fõ tiyo ti agu akurayo i aora na yo watadu ka ba ndu yo ku rogo duhe. Ka i ti kusande, i naguari kuari na kini ndu kindi kumbatayo kaa ora. I amaanga berãyo gbe tipa gupai sayo i koto te, ono kuti pa digiso yo gayo oto gbiati gu mosoro du yo na maabangirise tipa ka gbiaha.

9. Ka ani koto, ginipai si aida ani mangihe?

⁹ Rogo gaani oto abaangirã yo, ani ima rengba ka kota bara dunguhe, kini mangi aingahe rogo agu apai yo ani apehe na kini mangihe. Watadu agu aboro ani aora na yo ima rengba ka manga aingahe nga gu rengbe ka imisa rani. Ka pai wa gure mangi, ka si iriwongo tirani ya. Ani dunduko nga kpakpa aboro, na ani dunduko naora kina ngba gu bangisa pangipangi gene nandu sa unga re. Sidu, ani “nafõ” tirani afõ ti akuarani ti kura aregbo. Pauro aima ino gupai nga kura aregbo kinaho pai nika nidu ‘bangiri boro kuti kura ni.’ (Koro. 3:13) Ono kuba gupai nga ka maaberãrani kuti gupai sarani ani koto, si naida ani moiberãrani kuti gu mosoro du kumbatayo. Ka ani koto, si naida ani guari kuari na kini oro kindi. Ka ani du na zinga na ki ká ka guari kuari, ani digisingo gaani oto na ki di mosoro te. Kurigure, ani ima rengba kadu ni ũkota fu agu aboro naˈasada ka ora ngba gu pangipangi gene nandu koyo du unga ni.

10. Waigu rengbe ani ka ne du ni “ũkota” fu kura aboro?

¹⁰ Gu kura gene rengbe ani ka ne du ni “ũkota” fu agu akuarani ani aora na yo ngbaha nga, nimbu ani yo i mangi apai ngba gu gene i aida ka mangaha ngbaha ho du rengba ni kuba gupai nga kaa ida i nimangi apai dedede kina ngba gu gene ani aidaha. (Rom. 14:13, 19-21; 1 Kor. 8:9, 13) Ngba gi nyanyakipa gene re, ani wa agu aboro naora ndikidi oto abaangirã te. I namanga abaangirã tipa kada mbata fu akurayo, na ai gu boro naora naˈasada ka gbia mosoro tipa kina tini. Agu aboro naora re naberã kina pa agu apai gbe ngbatiyo. Sidu, i ima rengba ka siko gu kura aboro kusayo ho i aora ni na yo tipa gupai nga kina yo du mbatayo. Gu kparakparapai du dagbarani na agu aboro naora ndikidi oto abaangirã nga, ani amanganga abaangirã kada mbata fu akuarani te. (Gara. 5:26; 6:4) Gaani sasa nga ka undo badungu aboro wa rengbe omerani  na ni tipa ani digisi oto sa na yo na ki gbia gu mosoro nga ga unga. Sidu, ani ninaasada ka mangapai kuti gu rugute ga Mbori toro adu kugii Pauro ko kehe nga ka ani ‘berẽnga pa kina gaani pai ya, ono ani berẽ pa ga akuarani apai.’—Frp. 2:4.

11. Ginipai gu boro naora amaaberã ni kutini, na tipagine?

¹¹ Kupati gupai nga agu aboro naora ndikidi oto abaangirã naamaaberãyo kuti gu gene du barabangiri yo, i namaa berãyo a kuti pa digiso yo ho. Ka si vura du nga i abingo gu ba gayo oto adigo rogoho ni bangiriyo te, i ima rengba kaa makia patiyo berãyo yo i nidigisi gayo oto na kini di gayo mosoro. Gupai nasayo i naandu kindi kumbatayo nga pa berãyo dedede kuriipa gu mosoro i nika gbiaha.

12. Ginihe Yekova nakido pa fuhe furani?

¹² Rogo gu oto abaangirã yo ani aoraha, Yekova ima fu gu kido fu gako aboro nga ko nika fu mosoro afu fu agu aboro nika digiso gayo oto abaangirã, na gu mosoro re nga nyenye unga singia ngbangbaturũ yo watadu rogo paradizo auru kpotosende. Ziazia Kekeapai nasakapai tipa gi mosoro re tipa gupai nga ani makiapa wai gaani raka nika du ni bawenehe. Ho ani aberã aberã ni kindi kurii agu apai Yekova nakidopaha kumbatayo furani, si nika sa gupai nga ani diberã ka hipai.

13. Ginihe du berani nga gu adunga be agu aboro naora ndikidi oto abaangirã ya?

¹³ Si anaaida agu aboro nanaangi mbaro oto rogo ringara aGiriki diadia be agu apai duwa mbugo gbiati igirã. Ono guhe i anaakido kutini angia gu rabahe i anaagbiaha gbiati gayo ome. Ani wakina yo, ani nagbia rabahe agbia a tipa wai ka ora gu oto abaangirã du ani rogoho. Ono gaani pai ngba kisusi agu aboro naora ndikidi oto abaangirã. Ani nagbia ome be Yekova, na digido wai rengbe ko ka undo rani ti ni te. Ka ani kido kuti Yekova, ko akidongo he ka raba kina rabaraba rani sa te ono ka sarani ani du nyanyaki a!—1 Pet. 5:10.

14. Waigu 2 AKorindo 12:9, 10 aundo rani ani hi akpakarapai?

¹⁴ Pauro ahi dungu akpakarapai. Kurii gu nga aboro anaasenga ko na kini rungosi ko, ko anidu adu rurungbura ti kura aregbo na si anaaida ko sovura kuti guhe ko aya si adu wa ‘kiwe ti kpotoko’ yo. (2 Kor. 12:7) Ono kuba gupai nga ko bi agi akpakarapai re ni ndu gupai si aida ko mbu iriso Yekova ti ni, ko abihe nipa momu ka kido kuti Yekova. (Oni gedi 2 AKorindo 12:9, 10.) Mbiko gupai nga Pauro adu na gi bipai re, Yekova aundo ko rogo gako aˈasada yo dunduko.

15. Ka ani wiriki Pauro, ginihe ani nika gbiaha?

¹⁵ Aboro ima rengba a ka senga rani watadu ka rungosi rani tipa gaani idapase. Si ima rengba kadu a nga ani nasovura kuti akaza kpotose watadu mbugo. Ono ka ani wiriki Pauro, gaani akpakarapai wa duhe ni basasa dunduko rengbe kada nipa momu tipa ka gbia ga Yekova undohe.

16. Ka si vura du nga kpotoro wenengai te, ginipai rengbe mo ka mangaha?

¹⁶ Ya mo mo piapi riiba watadu mo sungu rii ngbagida gbarĩgbarĩ aboro? Ya mo arukusi ro ni rurungburaha watadu mo angeranga wenengai te? Ka ngia wo du du apai tipa ro, ya mo ka mo oro wa sa na paranga aboro watadu agu aboro du na kpotoyo wenengai? Mo ima rengba ka ora na yo! Badungu sosono aboro gbiati agu aboro adunga kpotoyo wenengai ya naora tigu gene nga ga unga. Ka i mangingo gi sunge re ngba gayo ome te. Kuba gure, i nagbia ga Yekova ome nidega yo tuyo kuti agu adunguratise nga ga aKristano rogo terefuni watadu kaa bi adunguratise rogo vidio. Na i namanga sunge sa aboro ni abawiriki nimanga yo dezirepai fu amunganga, agu aboro nangera fuo aborokaza, gbiati agumeyo.

17. Waigu Yekova abi agu aboro adunga kpotoyo wenengai ya?

¹⁷ Ka gene adunga bero ka manga agu apai dunduko mo aida ka mangaha fu Yekova ya, ka rago  gberẽnga tiro mo ki berẽ gupai nga ka mo hinga pai ki da ti digido gi sino raka re ya te. Yekova ima kpinyemu ro mbiko gamo idapase kutiko na mbiko agu apai dunduko mo namangihe fuko vuru agu agarã yo ninaasusa. Mo naida na gako undo awere kisusi gu niidu mbata, na ko ambunga ro te. (Tam. 9:10) Kuba gure, ko nika du mbembedi na mo gbe. Mo bingo gupai kura wirina apehe nga guri du na akpakarapai nga ga kaza, ri aya: “Wa duhe nga mi na dungu akpakarapai tire nga ga kaza nga gu nakio kina kumbatayo, mi nabihe nga mi adunga berewe na dungu amomu nga ga yugo rengo fu aboro dedede te. Ono mi ima inoho nga gu wiri tooni ome mi amangaha nayeaye na ngbarago ku kpoto Yekova yo na si nasa re mi du na ngbarago.” Ho du mo ni na gberãrago, mo tingidi gupai nga Yekova na kina ro. Mo berẽkurii gu kpiapai Pauro amoihe, na ki tingidi gu gako afugo wasa nga: ‘Mi nangi angi mbiko agu apai rungbura mi ti ni, . . . bambiko ho mi nirungbura ni mi nidu ho nyanyaki.’—2 Kor. 12:10.

18. Gini kere kpakarapai du kia kura aboro agbiatiyo na ni?

¹⁸ Gu kura aboro naora ngba gu gene nga ga unga nagbiatiyo agbia na gu kura kpakarapai. I nasovura kuti agu akpakarapai nga gu kura aboro abingo ho ya. Ni kpiapai, i nasovura kuti bakere gberãrago watadu bakabangirise. Tipagine agi airisi Yekova re agbiatiyo ti ni na gi ngbatunga kere kpakarapai re? Bambiko ho du boro ni na kuokuo beni watadu ho ni nanye ni kubani rii ngbagida gbarĩgbarĩ aboro, aboro dunduko rengbe ka bi gu kpakarapai ni andu rogoho na si ki sa gupai nga i undo ni. Ono tie, agu aboro nasovura kuti agu apai nafuda boro berãseyo ima rengba kaa ngera wa pai ho namanga yo te. Gayo imisiri wakina gu imisiri nga ga gu boro beni nakuo watadu nduni. Ono mbiko gupai nga ka kura aboro bingoho nga i rogo imisiri te, aboro arengbanga ka yugo nyemuse fuyo na kini berẽpa yo wa gu si aidaha te.

19. Ginipai ani awirikaha ti gu kpiapai nga ga Mefibosete?

¹⁹ Ka si du nga mo arengbanga ka manga kuraapai te na aboro aruganga tiyo na agu pai du tipa ro te, mo ima rengba ka gbia wasa ti gu kpiapai nga ga Mefibosete. (2 Sam. 4:4) Ko angia gbarĩgbarĩ boro na Bakindo Davide adu na iraira bipai tipa ko na ki mangi fuko ngba iraira gene. Anga Mefibosete namangipai ka ye na agi apai re kuti tiko te. Ono wa si avura du wo, ko aambunga tiko fu zinga te; ko adu na tambuahe tipa gu weneapai namangi fuko rogo gako raka yo. Ko adu na tambuahe tipa gu wenesino Davide ayuguhe fuko mbata kusayo. (2 Sam. 9:6-10) Sidu, ho Davide adu ni na iraira bipai tipa Mefibosete na ki mangi fuko ngba iraira gene, Mefibosete aˈasadi ka makiapa agu apai dunduko nasa gupai re si mangi. Ko aambunga gu ingahe nangia ga Davide si sako ko du na zinga te. Na ko aabiranga Yekova tipa gupai Davide amangihe te. Mefibosete amoiberãko tipa gupai rengbe  ko ka mangaha tipa ka songoda gu bakindo Yekova amoiko. (2 Sam. 16:1-4; 19:24-30) Yekova asa gupai nga i ke ga Mefibosete kpiapai ku rogo Ziazia Kekeapai yo tipa ani rengbe ka wirikapai ti ni.—Rom. 15:4.

20. Waigu rengbe bakabangirise kadu na sangbanaha kurii kura aboro, ono gini kido si aida i du na ni?

²⁰ Mbiko bakere bakabangirise, gu kura awirina na bakere gunde na zee namanga yo amanga ho du yo ni na kura aboro. Si ima rengba kadu fuyo ni kpakarakpakaraha kadu dagba dungu aboro, ono wa vura duhe wo, i nandu kindi tipa agu adunguratise nga ga dungurati gbiati kikindigi adunguratise. Si ima kpakara fuyo ka fura na agu aboro i ainongo yo ya, ono wa vura duhe wo, i nafura afura na aboro gene tungusapai yo. Ka ngia wo du du apai tipa ro, mo du na gu kido nga mo ni saro te. Badungu aboro kinaho du wakina ro. Mo tingidi gupai nga Yekova na ngbarago na gu asadatise mo amangaha na kpotoroyo dũ. Pa nye mo kindi kaa ndu kumbatayo nga gu gopai nayugo gupai nga ko nafu maku afu foro na kini fu gu ome foro mo aidaha. * (Frp. 4:6, 7; 1 Pet. 5:7) Ka mo airiso Yekova si ki vura du vurũ nga mo na kaza watadu mo ni fudifudi ro berãro yo, mo ima rengba kadu na gu kido nga mo nafu ngbarago afu fu Yekova.

21. Na gu undo nga ga Yekova, ginipai ani dunduko nika du na rengba ka mangaha?

²¹ Si ni wenepai nga, kparakparapai kinaho dagba ndikidi oto abaangirã na gu Pauro afura tipaha. Ti agu aregbo i aakeka Ziazia Kekeapai ti ni, agu aboro nanaaora oto abaangirã, boro sa gbua nanaadia mosoro. Gu kparakparapai du dagbaha na gaani oto abaangirã nga, agu aboro dunduko nika hipai ni ruruyo ngba gu gene raka nga ga aKristano nika gbia gu mosoro nga ga nyenye unga. (Yo. 3:16) Na rogo ndikidi oto abaangirã yo, si naida kpoto agu aboro naora dunduko du wenengai, ka si aadunga wo ya, i digisingo gayo oto abaangirã te. Ono tipa gaani oto ti gaani, badungu rani adunga kpotorani wenengai ya, ono wa vura duhe wo, ani nahipai ahi. (2 Kor. 4:16) Na gu undo nga ga Yekova, ani dunduko nika ora gu oto abaangirã re ki digisihe!