1, 2. Tipagine du si aida ani raba kura aboro ti ni i mangi agu asunge nga ga Kindo?

TUNGUSA gu wene pangbanga nga ga Kindo angia ga Yesu bangua sunge. Ono tie, ko adi regbo ka raba kura aboro ni ababanda akandoro na ni abayugupai. (Mt. 10:5-7) Wa vura duhe nga Firipo adu na bakere sunge beko nga ga tungusa wene pangbanga, kango ti ni te nga ko aima undo awiriko nga adegude biama i ini wai ka tungusa gu rengo nga ga Ziazia Kekeapai fu kura aboro wenengai. (Amo. 21:8, 9) Wai du nyakipa gu ngbatunga rabahe re areme?

² Rogo zegino dunduko, bange agu aboro nadia rengo kugume nange kina ku mbatayo. Gu vovo aboro ata zingo bapatiza ya, si naida i inipa nyaka wisigo Ziazia Kekeapai nisase. Si naida i yugu wai fuyo a ka tungusa wene pangbanga fu kura aboro na ka yugo rengo fuyo. Rogo gaani adungurati, si naida i ngarasi awirina nga akumba i mangi ome ka rẽ tipa i sia yo ni moundo abaakumba na ni abaakumba. Agu aKristano naima nyaka rengbe ka mangasunge na “wene andika” watadu wene arugapai ka undo vovo aboro i sono rogo toro yo.—Snz. 4:2.

3, 4. (a) Wai du Pauro aringbisi wisigo Ziazia Kekeapai na gu tungusapai du na wene sangbanaha? (b) Mbata fu ani ngarasi agu aboro ani awisigo Ziazia Kekeapai na yo i wisigi Ziazia Kekeapai nisayo, ginipai si aida ani nimangihe amanga?

³ Wai du nyakipa wisigo Ziazia Kekeapai nisase? Ani nagbia karagapai rogo agu afugo yo gu mokedi nangia Pauro apehe fu akurako aKristano Korosai yo. Ko akepai nga: “Ani apiriga nga tigaani ti kparakpe tipa roni nizungadi he te, oni híki be ina pa [sangba Mbori] na gu tatamana nga ga Ziazia Toro na rugatise, ki ta ata ki re are na gu pai Gbia akpi nyemu he, ki nizu rogo wene apai dũ, ki nisono na ina pa Mbori.” (Koro. 1:9, 10) Na gu ngbatunga ndikidi inohe re, agu aKristano naadu Korosai yo arengbe ka “ta ata ki re are na gu pai Gbia akpi nyemu he.” Gipai re arengbe ka mbugene fuyo i “nizu rogo wene apai dũ,” gbe rogo tungusa wene pangbanga yo. Tipa gupai nga irisi Yekova mangisunge fuko wenengai, si naida ni niwisigi Ziazia Kekeapai dedede. Si ni wenepai ani undo agu aboro nawisigo Ziazia Kekeapai i ini gu rengo re.

⁴ Mbata fu ani undo kura aboro i gbia undo ti wisigo Ziazia Kekeapai nisase, ani nitirani si aida ani inipa nyakaha. Nirengo, ani nitirani si aida ani du na wene mbakadapai nga ga wisigo Ziazia Kekeapai. Sidu mo rengbe ka sana tiro nga: ‘Ho irakporo ape gu berãpai ni adunga ringbisihe kuti gu yugopai nga ga Ziazia Kekeapai ya watadu ho ni asana kpakarakpakara sanahe ni, ya mo mi rengbe ka fu gu karagapai du mburuhe rii Ziazia Kekeapai? Ho mi agedapai ni tipa wai Yesu, Pauro, gbiati kura aboro akpatagara kuti sunge tungusapai, ya mo mi naberã kuriipa wai rengbehe kadu na maapai kurii gimi sunge fu Yekova?’ Ani dunduko naida na gu inohe gbiati rugute du rogo Fugo Mbori yo. Na ka ani pepa wai fu kura aboro ani nagbia undo ti gaani wisigo Ziazia Kekeapai nisase, ani ima rengba ka ngarasa yo i gbia gu ngbatunga aundo re nidu yo ni agu aboro nawisigo Ziazia Kekeapai kakaka.

5. Oni funga aberãpai tipa wai ka undo vovo aboro i niwisigi Ziazia Kekeapai nisayo dedede.

⁵ Mo rengbe ka sanahe nga: ‘Wai du rengbe mi ka raba gu boro mi awisigo Ziazia Kekeapai na ni ni wisigihe dedede?’ Gu wene gene rengbe mo ka tonaha ngbaha nga ka yugo wai funi rengbe ni ka mbakada gu waraga oni awisigoho na ni. Mo rengbe ka fu berãpai funi nga ni wisigi gu riipai nga kura apai du rogo gu buku nga Gini Apai Nzunzu Ziazia Kekeapai Ayugoho? na ki gedi agu averesi du yo. Mo undo ni ni mbakadi adunguratise na gu sasa nga ga ka fu akaragapai ti aregboho. Mo ngarasi ni ni gedi agu aNgbaõbambu Sinziri na Awake! dunduko nakura. Kangia Watchtower Library watadu Watchtower ONLINE LIBRARY kina rogo gani fugoyo, mo rengbe ka yugo wai rengbe ni ka mangasunge na ni ka karagapai kuti agu asanahe aboro asanaha. Ni sangbana  gu ngbatunga undo re, si nawira wa ni nika du na ngbarago ka wisigo Fugo Mbori nisani.

6. (a) Wai du rengbe mo ka undo gamo bawiriki Ziazia Kekeapai ni sonosi nyemu Ziazia Kekeapai ngbaduniyo? (b) Ginipai si awira wa bawiriki Ziazia Kekeapai rengbe ka mangaha ka ni sonosi nyemu Ziazia Kekeapai?

⁶ Rengo ngaha nga, si aidanga ani mangi boro ngbaome ni gedi Ziazia Kekeapai na kini wisigihe te. Kuba gure, ani mangisunge na agu aũsunge ga Yekova riigbu nafuhe furani tipa ka undo bawiriki ni kiisi gani nyemuse tipa Ziazia Kekeapai. Kusa, gu bawiriki re rengbe kadu wakina gu bake papara atambuahe nabibia nga: “Si ni wene he fere ka mbeda na Mbori; mi moi Gbia nga Mbori ni gi bagbuko.” (Tam. 73:28) Ga Yekova toro nika mangasunge na gu bawiriki Ziazia Kekeapai naberãpaha na kidu na tambuahe tipaha.

7. Wai du Yesu araba abatungusi wene pangbanga? (Oni bi gu sura duti tonatonaha.)

⁷ Rogo Matayo kapita 10, ani nabi arugapai yo Yesu afuhe fu gu gako amokedi naadu 12. Kuba gupai nga ko fura tipa apai dunduko, ko asia apai asia ka fura tipaha. ^[1] Agu amokedi re adegetuyo wa Yesu ayugu wai fuyo ka tungusapai wenengai. Fuani i ki ndu ka tungusapai. Mbiko i abi wai Yesu aayugopai, si aaimanga te i ki da ni wene abayugu gu rengo du rogo Ziazia Kekeapai yo. (Mt. 11:1) Ani rengbe arengba ka raba gaani abawiriki Ziazia Kekeapai i du ni wene abatungusipa wene pangbanga. Ani wisigingo agene ue awere rengbe ani ka undoyo ngbaha.

8, 9. (a) Wai du Yesu anaafura na aboro ti regbo gako tungusapai? (b) Wai du rengbe ani ka undo vovo abatungusipai i nifura na aboro kina wai Yesu anaafura?

⁸ Fugo na aboro. Yesu anaafura dedede na aboro ni basasa tipa ga Mbori Kindo. Ni kpiapai, ko afura na gu dee naadu pati ga Yakoba guga mbembedi na gu gbata nga Sukara zaaza na si kidu na wene sangbanaha. (Yo. 4:5-30) Ko afura a na Matayo Revi, nangia barogo marã ngbeti. Akitabu Wene Pangbanga fura ni kina wiri guruhe tipa gu fugodagbase re, ono Matayo aidi ga Yesu yambahe ka pekafuoko. Matayo gbiati kura aboro agi Yesu ko nifura ni gbangaha ti regbo gu pumbo naadu kua Matayo yo.—Mt. 9:9; Rk. 5:27-39.

⁹ Ti gu kura regbo, Yesu afura ngba wene gene fu Natanaere, nga guko naadu na gbegberẽ bipai tipa aboro Nazareta. Ono tie, si afõngbadu Natanaere yo ko aria gako bipai. Ko kini diberã ka wisigopai tipa gupai Yesu nangia boro Nazareta aayugoho. (Yo. 1:46-51) Sidu, ani na wene ndupai berani ka undo vovo abatungusipai i nifura na aboro wenengai na ngba zezeredi gene. ^[2] Si nawira wa agu aboro ani nika undoyo wa gere, nika du na ngbarago ka bi wai agu aboro du na nyemu rengo akaragapai kuti wai i aberãpa yo gbiati gayo zezeredi afugo.

10-12. (a) Wai du Yesu asonosi gu nyemupai kura aboro adu na ni tipa wene pangbanga? (b) Wai du rengbe ani ka undo vovo abatungusipai i mbakadi gayo birĩ yugopai wangia yo abayugu gu rengo du rogo Ziazia Kekeapai yo?

¹⁰ Sonosa gu nyemupai du ti aboro. Yesu adu na wiri guru regbo beko ka manga gako sunge tungusapai. Wa si avura duwo, ko adi regbo ka sonosa gu nyemupai aboro adu na ni tipa wene pangbanga. Ni kpiapai, Yesu asungu rogo kurungba ka yugopai fu rimbasa aboro. Ti gu regbo re, ko asa Petero ko zi bakere atĩo ngba iˈiriwo gene na ki ya fuko: “Mo nikazia aboro ni ungayo ku mbata yo.” Sangbana ga Yesu afugo na mangaapai angia gine? Petero na abadiangbako “agara gayo kurungba . . . kuti ngba gango ime, i ki mbu ahe dunduko ki nipeke [Yesu].”—Rk. 5:1-11.

¹¹ Nikodemo naadu rogo ga aYudo Barondo adu na nyemu ga Yesu yugopai. Ko aaida  ka wirika dungu apai ono ko kini gunde agunde be gupai aboro nika gumbaha ka i biko ko nifura na Yesu. Yesu anaringinga na gako regbo te; ko agbia Nikodemo yuru ti gu regbo rimbasa aboro aadunga ya. (Yo. 3:1, 2) Ginipai rengbe ani ka wirikaha ti agi apangbanga re? Wiri Mbori adi regbo ka sonosa gu idapase nangia ga aboro ni basasa. Anga si naida ani ni karaga tirani fuo agu aboro du na nyemupai na kini wiriki Ziazia Kekeapai na yo zanga nyomoro te?

¹² Si nawira wa vovo abatungusipai ima rengba ka mbakada gayo birĩ tungusapai ka ani mangisunge na yo sa gene tungusapai yo. Ani rengbe ka undoyo i berẽpa agu aboro nayugu kandara wiri tooni nyemupai. Ani rengbe ka sana vovo abatungusipai i gasi rani ho ani akaraga tirani fuo aboro watadu ho ani andu ni ka wirika Ziazia Kekeapai nayo kporo. Ka ani raba vovo abatungusipai na kini ngarasiyo wa gure, nirengo, i duadu na nyemu ka sonosa gu nyemupai nga ga kura aboro na kini wisigi Ziazia Kekeapai na aboro nitiyo. I nika wirika gupai a nga si aidanga omeyo bati ni ipo te, ono i du na zerangbaduse na ki kpatagara kuti tungusapai.—Gara. 5:22; oni bi gu sanduki nga “ Si ni Nyanyakipa Pai ka Kpatagara.”

13, 14. (a) Ginipai mo aberãha tipa agu akpiapai du rogo Ziazia Kekeapai yo tipa agu aboro naambupa gayo apai tipa ka undo akurayo? (b) Rogo gini agene yo du rengbe mo ka raba vovo abatungusipai gbiati paranga aboro i yugu nyemuse fu awirinayo?

¹³ Agu apangbanga du rogo Ziazia Kekeapai nanyakasapa gu momu du berani nga ka “kpi nyemu awirina” na ka mangapai fu akuarani. (Oni gedi 1 Petero 1:22; Ruka 22:24-27.) Wiri Mbori afu ahe dunduko kodihe na ungako tipa ka mangapai fu aboro. (Mt. 20:28) Doruka “agberẽ agberã be wene sabe na inapai.” (Amo. 9:36, 39) Wirina ni dee nangia Maria naadu Roma yo ‘anaambu na sunge’ tipa agu aboro naadu rogo dungurati. (Rom. 16:6) Wai du rengbe ani ka undo vovo aboro i inipa nyaka undo awirinayo?

¹⁴ Agu awirina naima nyaka rengbe ka sana vovo aboro i gasi yo ho i andu ni ka bi gu boro nawoka gbiati gbinza boro. Ka si daada, avunguagude rengbe arengba ka dia awiriyo ho i andu ni ka bi ngbatunga agu aboro re. Abaakumba rengbe ka mangasunge na kura aboro tipa ka bi gupai nga wene riahe kina be gaani sosono aboro na ka ngerafuo akpuyo. Rogo agi agene re, paranga aboro gbiati vovo aboro nawirika ka mangapai fu kura aboro na wene sino. Ho gu kura bakumba sa anaatungusapai ni, ko anaadia wiri guru regbo ka bi wai agu awirina du rogo gako dagbarago adu. Rogo gi gene re, gu paranga wirina naana gasa ko awiriki gupai nga agu aboro dunduko du rogo dungurati si aida i kpinyemuyo.—Rom. 12:10.

15. Tipagine duhe ti ni ni nyanyakipa pai fu abaakumba i du na nyemu gu sonakumbatayo nga ga akumba rogo dungurati?

¹⁵ Wa duhe nga Yekova namangasunge na akumba ni abayugupai rogo dungurati, si ni nyanyakipa pai tie fu agu awirina nga akumba i sonosi birĩ nga ga manga gumbapai wenengai. Wangia mo bakumba, ya mo mo rengbe ka degaturo fu moundo abaakumba ni ni wiriki ka manga gani gumbapai? Gamo undo rengbe ka sani ni mbakadi gani birĩ nga ga yugo Fugo Mbori.—Nem. 8:8. ^[3]

16, 17. (a) Gini nyemupai Pauro adu na ni tipa ga Timoteo sonakumbatayo? (b) Wai du rengbe abaakumba ka raba agu aboro wenengai nika du ni abaakumba rogo dungurati kumbatayo?

¹⁶ Bakere zingo duho tipa abaakumba rogo gu dungurati nga ga aKristano, na si naida rabahe aida fu agu aboro nika manga gu sunge re kumbatayo. Pauro ape memeapai tipa wai rengbe boro ka fu gu rabahe re ho ko afura ni fu Timoteo ki ya: “Mo tigamo, wire, mo nyákasi tiro rogo gu undahe du rogo Kristo Yesu  yo. Agu apai mo agi ngbare na dagba dungu adezire a re, mo fú kina ha fu kangara aboro, ka rengbe na yugo pai fu akura yo a.” (2 Tim. 2:1, 2) Timoteo awirikipai ni manga ko sunge na gu mokedi nangia sosono kumba re. Fuani, Timoteo ki mangisunge na agu agene yugopai nangia ga Pauro rogo gako tungusapai yo na rogo kura ziazia asunge yo.—2 Tim. 3:10-12.

¹⁷ Pauro aambunga Timoteo gbua kidu na gu maabangirise nga ko nika gbia rabahe agbia te. Ko anaata sa na gu paranga kumba re. (Amo. 16:1-5) Abaakumba rengbe ka wirika ga Pauro kpiapai ni nduyo na agu amoundo abaakumba du na inohe ka ngarasa akandoro ho daada ni. Rogo gi gene re, abaakumba nafu momu fu gu wirina re ni bi gu yugopai, idapase, hipai, na nyemuse si aidaha be agu ababiapai nga aKristano yo. Gi mangaapai re nafubee tipa ka raba agu aboro nika da ni ababanda “ga Mbori rimbasa akandoro” kumbatayo.—1 Pet. 5:2.

18. Tipagine du si aida ani bi raba kura aboro tipa i mangi ga Yekova sunge ti ni na nyanyakipaha?

¹⁸ Si ni nyanyakipa pai ka fu rabahe mbiko gu bakere zingo na momu du tipa ka mangasunge fu Yekova. Gu kpiapai du tipa rabahe Yesu gbiati Pauro amoihe rengbe arengba ka mangasunge areme. Yekova naida gako amoyambu du awere gbia wene rabahe tipa ka manga agu asunge nga ga Kindo. Mbori fu gu momu furani nga ka undo vovo aboro i sonosi gayo birĩ ka manga agu asunge si aidaha rogo dungurati. Wa apai agberã rogo zegino kina kumbatayo na vovo amomu kini kuru tipa ka tungusapai, gu ngbatunga rabahe re na nyanyakipaha na si naidaha aida ni ipo.

19. Tipagine du si aida mo du ti ni na kido nga gu ome mo amangaha ka raba aboro i mangi ga Yekova sunge nika duadu na diabese?

¹⁹ Rengo ngaha nga, si nadia regbo gbiati bakere ome ka raba aboro. Ono Yekova gbiati Wiriko nika undo rani aundo na ki fu tatamana furani tipa ani fu gu ngbatunga rabahe re. Ani adu na ngbarago ka bi agu aboro ani aundo yo i ‘nimangisunge’ nyanyaki. (1 Tim. 4:10) Na ani ndu nga andu kindi kumbatayo kaa manga sonakumbatayo rogo toro yo wa ani amanga ziazia sunge fu Yekova.