KA PEPAI ngba kura gene, agu abawiriki Ziazia Kekeapai du na nyemu rengo wakina agu aboro nagbata dahabu. Si naida ngbatunga agu abawirikipai re mangisunge nyanyaki na ki kpatagara kuti weteka Ziazia Kekeapai tipa ka gbia nyanyakipa tatamana. Wangia ani abawiriki Ziazia Kekeapai, ginipai rengbe ani ka wirikaha ti wisigo agu agene biata i agbia dahabu ngbaha?

Ani ya mo nata pangbanga ime na mo ki bi wiri tooni he nakiko akiko be ima uru. Mo nugadi kusande na kidu na ngbarago tipa ka gbia mbusuduru dahabu. Si ni wiri umbaha kisusi ri kibiriti (allumetté) na pa bihe ima kpakara kisusi kikiipa geno mbia. Rengo ngaha nga, mo ngere kirikiri tipa ka bihe singia mo rengbe ka gbia gu kura ambusuduru dahabu berewe.

Wakina gure a, mo ima rengba ka tingida pa gu regbo kusayo ga Yekova moyambu aye ku kpuro yo tipa ka wisigopai na mo riipa gu pangbanga nga ga maabangirise du rogo Ziazia Kekeapai yo. Ka pepai ngba kura gene, si rengbe kadu nga mo natingida gu regbo atingida mo agbia gu mbusuduru dahabu nga ga toro re. Si rengbe kadu nga gupai re amangi ti gu regbo mo abi rimo Mbori nga Yekova ni bambataha rogo Ziazia Kekeapai yo. (Tam. 83:18) Watadu si rengbe kadu nga mo ainihe a nga mo ima rengba ka da ni bakurea Yekova. (Yak. 2:23) Mo ainihe nibasa ti gu regbo re nga mo ima gbia guhe ngba gbe kisusi dahabu! Na mo aima du na nyemu ka gbia gu kura dungu ambusuduru dahabu nga ga toro a.

Rukutu adahabu ti gu kura aregbo nadungura tihe ku pangba rukutu adi na kikindigihe he. I nayamba ngbatunga gi dahabu re nga dahabu dogoro. Agu aboro nagbata dahabu ima rengba ka gbiaha ni bakerehe nga gu rengbe ka ye na abawe akutu adorari fuyo.

Ho mo atona ka wirika Ziazia Kekeapai ni na aDezire Yekova, si nawira wa mo adu wakina gu boro nagbata dahabu kuru baraha ni bakerehe gbe. Si nawira wa pa berã mo kurii averesi nga ga Ziazia Kekeapai dedede akiisi gamo bakere inohe, isoke ki saro mo nyaki rogo toro yo. Wa mo aaberãkurii gu bawene arengo nga ga Ziazia Kekeapai re, mo awiriki wai rengbe mo ka mbeda na Yekova na ki banda tiro rogo gako nyemuse yo na kini ngere tipa nyenye unga.—Yak. 4:8; Yuda 20, 21.

 A wa gu boro ninaagbata dahabu amaabangirini tipa ka gbia gu bakere dahabu du pangba di rogo dogoro, si nawira kinawo mo amanga ome kaa gbata gu nyanyakipa akumuko nga ga toro. Fuo wirika mo gu nyanyakipa arengo nga ga Ziazia Kekeapai, si nawira wa si aima fõngbaduroyo mo di gu diandue naasa ro mo kpara gamo raka fu Mbori na ki zi bapatiza.—Mt. 28:19, 20.

Gu boro nagbata dahabu ima rengba ka gbia rukutu adahabu ni dunguhe rogo ambia yo. Gu kura ambia kinaho du na dahabu vuruhe yo nga gu si aida i kuadihe ni woronzo tipa ka kusa dahabu vuruhe yo. Ti tonatonaha, mo arengbanga ka bi gu dahabu re rogo woronzo te. Tipagine? Mbiko wene woronzo rengbe kadu na kina wiri daha rogoho tooni gbua. Wa vura duhe wo, paha ima nyaka fu gu boro nagbata dahabu tigani.

Si naida boro mangi ome amanga fuo susa ni “bambata tonatona apai nga ga Kristo.” (Eb. 6:1, 2) Si naida mo mangi ome amanga tipa ka kusa vovo apai rengbe mo ka wirikapai ti ni rogo gamo wisigo Ziazia Kekeapai yo. Sidu, ginihe rengbe mo ka mangaha tipa ka ino singia gamo wisigo Ziazia Kekeapai nisase nakusa surungbaha, ka si vura du nga mo aima digo ni wisigi Ziazia Kekeapai tipa agarã?

Mo du na nyemu ka wirikapai. Mo moiberãro wenengai tipa futufutuapai. Mo nimangi ome ti aregbo dunduko, na mo nika bi nyanyakipa mbusuduru adahabu abi nga ga toro naye be ga Mbori tatamana na ngbembatayo. (Rom. 11:33) Tipa ka kiiso gamo inohe rogo Ziazia Kekeapai yo, mo mangisunge wenengai na agu ahu wetekapai duho rogo gu fugo mo agumbaha. Mo ngere tipa gu rugapai mo aida na ni gbiati akaragapai kuti gamo asanahe rogo Ziazia Kekeapai na zerangbaduse. Mo sana kura aboro tipa agu averesi na gu kekeapai i nagbiaha undoyo na ki ngarasi yo. Mo pekepa gu wenewene apai mo nagbiaha ti regbo gamo wisigo Fugo Mbori fu kura aboro.

Rengo ngaha nga, anga gamo sasa gbua nga ka kiiso kina kungbo inohe te. Gu mokedi nangia Pauro azahe nga “inahe nafu enda.” (1 Kor. 8:1) Sidu tie, mo mangi ome kadu na umbasitise na ki du nyanyaki rogo idapase yo. Manga gu irisombori nga ga aborokporo dedede gbiati wisigo Ziazia Kekeapai nisase nika undo ro mo raki ringbisihe kuti ga Yekova arugute na ki fõngbaduroyo mo undo kura aboro. Kurii agi apai re dunduko, mo nika du na ngbarago mbiko mo ima gbia guhe ngba gbe kisusi dahabu.—Snz. 3:13, 14.