1. Wa vura duhe nga rogatise natona dedede na ngbarago, ginipai rengbe agu aboro rogotiyo ka maabangiriyo tipaha? (Oni bi gu sura du ti tonatonaha.)

HO Nadikumba akura ni ku barabangiri badiri ti regbo gayo rogatise, i nadu na bakere ngbarago. Ti regbo gayo bakure nga ga rogatise, gayo nyemuse nakio si ki dati gupai nga i mangi mozunga nga i nika nye ni ruruyo fu gayo badiarogatise. Rengo ngaha nga, si naida ariapai mangi amanga wa aboro ue akodatiyo ka tona vovo ramukporo. Ono Fugo Mbori nafu arugute fu agu aboro dũ nasia ka manga rogatise, mbiko gu Batona mburu rogatise nga boro nyemuse re naida agu aboro dunduko rogotiyo i du na diabese gbiati ngbarago rogo gayo ramukporo. (Snz. 18:22) Wa vura duhe wo, Ziazia Kekeapai nape gupai furani gbaiga nga gu kpakpa aboro dunduko narogatiyo “pai afúda boroyo afuda.” (1 Kor. 7:28) Wai du rengbe yo ka umbasi agu apai nafuda yo re? Na ginihe rengbe ka sa ga Kristano rogatise si du na diabese?

2. Gini angbatunga nyemuse si aida arogotise yuguhe?

 ² Ziazia Kekeapai nanyakasapa nyaka nyemuse. Si naida wesewese nyemuse (pa-Giriki, phi·liˈa) aida rogo rogatise yo. Gu nyemuse du dagba arogotise (eˈros) naye na ngbarago, na nyemuse tipa aborokporo (stor·geˈ) na nyanyakipaha ho i avunga agude ni. Ono gu nyemuse naruriipa arugute (a·gaˈpe) nasa rogatise si du na diabese. Gu mokedi nangia Pauro akepai tipa gu ngbatunga nyemuse re ki ya: “Gu ni nikpí nyemu diani wa du oni ni ba sa sa, wa kina tini; dia boro nigunde agunde ti kumbani.”—Ef. 5:33.

3. Wai du si aida banyaka nyemuse du dagba arogotise?

³ Pauro akepai nga: “Akumba, oni kpí nyemu adiaroni, a wa Kristo akpi nyemu kanisa a, ki fu tiko tipa ha.” (Ef. 5:25) Si naida apefuo Yesu wiriki gako kpiapai ni kpiyo nyemu kura aboro kina wai ko akpinyemuyo. (Oni gedi Yoane 13:34, 35; 15:12, 13.) Gu nyemuse du dagba agu aKristano nga arogotise, si naida si du ni nyanyakihe si ki da ti gupai nga guni ima rengba ka kpi tipa kurani ka si aidaha wo. Ono ka akpakarapai du rogo rogatise, si ima rengba ka du ni mbumbupai fu boro ni yugu gu ngbatunga nyemuse re. Wa vura duhe wo, gu nyemuse nga a·gaˈpe “nambu pa apai dunduko, si du gaha idapase, na gaha maabangirise na gaha hi pa apai anyasa nga te.” Nirengo, “nyemuse adíga nga te.” (1 Kor. 13:7, 8) Ka agu arogotise nagunde ti Mbori atingida gu mozunga i amangihe ka kpinyemu tiyo na ka nye ni ruruyo dagbatiyo, si rengbe ka undo yo i mangipai kina sa na ngbanya kuti ga Yekova arugute tipa ka mbakada akpakarapai.

4, 5. (a) Ga kumbakudee sunge nga gine wangia ko bariikporo? (b) Si naida diakumba bi ga kumbari pagbia wai? (d) Gini ariapai si aaida kura arogotise mangihe?

⁴ Pauro akepai tipa agu atindiro du kurii arogotise ni basasa ki ya: “Dere akumba, oni nirá ara fu akumbaroni, wa fu Gbia. Bambiko kumbani nga rini, a wa du Kristo ni ri kanisa, du ni tiko ni batasi kanisa nga boroko.” (Ef. 5:22, 23) Gi mbakadapai re asanga diakumba ri du na pa ri kusende ti kumbari te. Nirengo, si naundo ri ri ringbisi gu sunge Mbori afuhe fu dee ho ko aya ni wẽ: “Ngba nga ha kumba [Adamu] sungu ni sa ko te; mi ambákada mounda rengbe tipa ko.” (Bam. P. 2:18) A wa Kristo nga “ri kanisa,” ayugu nyemuse, kinawo a si aida kumbakudee ngerekurii diako rogo nyemuse yo. Ho ko amangaha ni wo, ri nadu wenengai na ki ni gbia ngbarago ka irisa ko, kini songodi ko, na kini ra kutiibe ko.

⁵ Cathy ^[1] idi kuti gupai nga rogatise naida boro mangi ariapai amanga, ri aya: “Ho mi adu ni ni nakuparanga, mi adu ngbarire na kini ngerefuo tire. Rogatise angia ariapai fere mbiko mi awiriki kaa ngera ku be kumbami. Si aadunga taata fere te, ono si ima mbedisa rani gbe wangia ani arogotise ani mangi apai kina wai Yekova aida na ni.” Kumbari nga Fred aya: “Manga adiaberã aadunga fere ni taatapai te. Rogo rogatise yo, si ima kparaka gbe ka manga gu diaberã du tipa aboro ue. Ono pa gbata ani ga Yekova rugapai rogo kparakpee yo na mi kini degeture kuti ga diare aberãpai nasaha taata. Mi nabihe awere nga ani ima rẽ nzunzu!”

6. Wai du du nyemuse wa gu “ũvodatise nga ga ziaziapai” ho kpakaraapai akura ni rogo rogatise yo?

⁶ Nyanyaki rogatise nakoda agu aboro ue nambupai ti agu azangarengba nga ga akurayo. I ‘nahipai fu akurayo, nivu akurayo.’  Nirengo, i dunduko ue namanga aingahe amanga. Ono ho guni aingahe ni, si nafu momu tipa i wirikipai ti gu ingahe re, ki vu akurayo, na ki mbu nyemuse nga gu “ũvodatise nga ga ziaziapai” si mangi gaha sunge. (Koro. 3:13, 14) Kurigure, “nyemuse nahi pai ni gbanga ha, ki du na weneringise . . . si aberã nga gbegberẽpai kuti boro te.” (1 Kor. 13:4, 5) Ka kpakaraapai akura, si naida i nyasiriipa ha ni ipo. Sidu tie, si naida agu aKristano nga arogotise asadi ka mbakada gu kpakarapai ka kuru dagbayo mbata fu ti uru. (Ef. 4:26, 27) Tipa boro ya wẽ “mo mbupai fere wa mi ni naimisi ro” si naida ni du na umbasitise gbiati wingbaduse, gipai re nasa gupai nga arogotise mbakadi gayo kpakaraapai na gipai re ki mbedisi yo.

7, 8. (a) Gini arugute Ziazia Kekeapai afuhe nibipa kodaba rogo rogatise yo? (b) Tipagine si aida arogotise yugu nunga ti ni dagbayo?

⁷ Ziazia Kekeapai nafu agu arugute rengbe ka undo arogotise i du na wene bipai tipa agu akpakarapai nga ga rogatise. (Oni gedi 1 AKorindo 7:3-5.) Si naida boro bi ga kurani nyemupai na gani azingo na nyanyakipaha. Ka si du nga kumba amanganga diako rogo nunga yo te, si rengbe kadu furi ni kpakarapai ri gbia ngbarago ti kodaba. Ziazia Kekeapai nagumba gupai fu kumbakuadee nga i ra kporo na adiayo “na rugatinapai.” (1 Pet. 3:7) Si aidanga boro kodiba na diani ngbaome watadu ka sana ri ngbaome tipaha te, ono si naida nyemuhe ye nisaha. Nyemu kodaba nazio akumba ni ipo ti adee, ono si naida i mangihe ti gu regbo ngba angba tipa yo dunduko ue.

⁸ Wa vura duhe nga Ziazia Kekeapai afunga arugute tipa gu ngbatunga apai rengbe arogotise ka mangaha ka yugo gayo nyemuse te, si nafura afura tipa yugo nyemuse. (Ga So. 1:2; 2:6) Si naida agu aKristano nga arogotise mangi fu gayo abadiarogatise rogo nunga yo.

9. Tipagine si aidanga ani ba nyemu kodaba ti gu boro angianga gaani badiarogatise ti ni ya?

⁹ Nyanyaki nyemuse tipa Mbori na gaani amurakporo asanga rani ani mbu boro watadu kurapai si gbarasipa gaani rogatise te. Kura aramukporo ima gberã mbiko gaha abadiarogatise nabi agu ahe nazingisa nyemu kodaba ti boro. Si naida ani ne ngbatunga gu sino re watadu gu sino nga ka kpinyemu gu boro angianga gaani badiarogatise ya. Na si naida ani ne agu amangapai naba nyemu kodaba ti gu boro angianga gaani badiarogatise ya. Pa tingida ani gupai nga Mbori ima ino gaani aberã na gaani mangaapai nika nyakasa gu nyemupai du ani na ni ka sa ngbarago ti ko na ki nye na iriiri mangaapai.—Oni gedi Matayo 5:27, 28; AEbere 4:13.

10, 11. (a) Wai du mbutise akio areme kina kumbatayo? (b) Ginipai Ziazia Kekeapai apehe tipa kparaka? (d) Ginipai nika undo arogotise ka i kparakanga ni ipo ya?

¹⁰ Ka si du nga kere kpakarapai kpatagara ku rogo rogatise, si rengbe ka sa guni sa watadu i dunduko ue berẽpa kparaka watadu mbutise. Rogo kura aringara, badungu arogatise nadigo na mbutise. Gi mangapai re angenga rogo gu dungurati nga ga aKristano te, ono pa nge agu akpakarapai nga ga ramukporo dagba ga Mbori aboro yo naye na kina bakabangirise.

¹¹ Ziazia Kekeapai nafu agu arugute nga: “Ka de guari nga pati kumbari ya, (ono si ngia ri guari, watadu ri nye ni sa ri, na ri mbakadi pai na kumbari berewe) – ka kumba mbu nga diako a ya.” (1 Kor. 7:10, 11) Si aidanga arogotise bi pa kparaka taata te. Wa vura duhe nga si nawira wa kparaka ima rengba ka ye na zereda ho kpakarapai akura  ni, si naye na kina bakere fudifudi apai dedede. Fuo Yesu pe gupai Mbori agumba tipa mbu kumba bani na nani na ki kakuti diani, ko aya: “Gu Mbori akpamia re ka boro kpara nga ha ya.” (Mt. 19:3-6; Bam. P. 2:24) Gipai re nayugo gupai a nga si aidanga kumbakudee watadu diakumba kpara guhe ‘Mbori akpamiaha’ te. Yekova nabi rogatise ni gu pagume adigongo ya. (1 Kor. 7:39) Si naida pa ino ani gupai nga ani dunduko nika karagapai akaraga fu Mbori ni basasa sa arogotise i mangi kakaka asadatise ka mbakada akpakarapai ni ipo tipa ka si da nga ti kerepai ya.

12. Ginipai rengbe ka sa arogotise i berẽpa kparaka?

¹² Maabangirise tipa agu apai nikaa manganga ya ima rengba ka ye ka kpakaraapai ku rogo rogatise yo. Ho boro aberãha ni nga gaani rogatise nika du na ngbarago ka si amanganga wo ya, ni nadu na bakere gberãrago, ki bihe nga i anangi ni na ni ki du na zinga. Agu agene aboro amangapai ngbaha na wai i asonosi yo ima rengba ka ye na kpakarapai, watadu zangagiatise ima rengba ka kura nibipa marã, agume, gbiati pa sonosa agude. Wa vura duhe wo, si ni pa ngbarago nga badungu agu arogotise nga aKristano nagbia gene agbia tipa ka mbakada agu akpakarapai re mbiko i nambu Mbori ko nungusi yo.

13. Gini nyanyaki nduapai duho tipa kparaka?

¹³ Kura aregbo kinaho boro narengbe ka bihe nga si rẽarẽ ka kparaka. Zanga ngerafuo badiarogatise rogo wia yo, manga ni ngba gbegberẽ gene, na sa gani raka rogo toro yo si du ngbapai yo nga gu nduapai kura aboro nabihe nga si rẽarẽ i kparaka. Si naida agu arogotise du na kere kpakaraapai gbata undo be abaakumba. Agu awirina du na inohe re i rengbe ka undo arogotise i mangipai kuti agu arugute du rogo Fugo Mbori yo. Tipa ka mbakada akpakarapai rogo rogatise yo, si naida ani kpari fu Yekova a tipa gako ziazia toro na gako undo tipa ka mangapai kuti agu arugute nga ga Ziazia Kekeapai na kini yugu agu asino nga ga zuzu toro.—Gara. 5:22, 23. ^[2]

14. Ginipai Ziazia Kekeapai apehe fu agu aKristano naamangi rogatise na agu aboro angianga airisi Yekova ya?

¹⁴ Ti kura aregbo, si rengbe kadu nga Kristano aima manga rogatise na gu boro angianga ga Yekova moyambu ya. Ho pai amanga ni wa gure, Ziazia Kekeapai nafu wene nduapai nga gu si aida i nye ti ni kina sa. (Oni gedi 1 AKorindo 7:12-14.) Singia guni nga zanga idipase inihe watadu ni ainongo ho te, ni ni “ziazia” ni mbiko ni di idipase. Agu agude ka i vungu ra ami nadu ni kina “ziazia” ra bangiri Mbori. Pauro aya: “Mo aina waĩ, de, si ngia mo abatasa kumbamo? na mo aina waĩ, kumba, si ngia mo abatasa diaro?” (1 Kor. 7:16) Si nangera wa badungu adungurati nga ga aDezire Yekova na agu arogotise rogoho gu ni nga Kristano aima manga ome ka undo ka ‘batasa’ gani badiarogatise.

15, 16. (a) Gini arugute Ziazia Kekeapai afuhe fu agu aKristano nga dereakumba adunga akumbayo ni ga Mbori amoyambu ya? (b) Ginipai rengbe Kristano ka mangaha “ka gu ni guari adu nga na idapase ya”?

¹⁵ Gu mokedi nangia Petero arugu dereakumba i ra fu akumbayo “ya ka ngia agu yo aida nga sangba Mbori ya, i aye ka ida pa ko mbiko gaoni mangaapai. Si arengba nga oni gumba fugo te; wa i nabi gaoni rurupai du na gunde ti ni.” Pa yugo agu asino nga “bayee toro du zezeredi, si bangiri Mbori ni bakere genoho,” na si ima rengba ka sa diakumba ri ye na kumbari sa ndikidi irisombori susi gu gbua nga kaa gumbapa agu aida nga ga aKristano fuko.—1 Pet. 3:1-4.

¹⁶ Ginipai ka mangi ka gu ni angianga idipase ya diberã ka kparaka? Ziazia Kekeapai  naya: “Ka gu ni guari adu nga na idapase ya, ni guari; ka si du wo, gu idipase nye, watadu kumba na de, ni adu nga ni vodivodi ni te, bambiko Mbori ayambu rani sa zereda.” (1 Kor. 7:15) Gipai re ayugongo gupai nga gu Kristano re ima rẽ awere ka manga rogatise te, ono ni azionga gani badiarogatise ni nye na ni te. Kparaka ima rengba ka ye na bete zereda. Na Kristano rengbe arengba kadu na kido nga gani badiarogatise nika karaga tini akaraga i mbakadi gayo rogatise berewe na ni ki da ni idipase.

17. Ginipai si aida arogotise peresipaha mbatayo?

¹⁷ Mbiko raka ani rogo “kusa rago” ani nagbiatirani na “gbegberẽ rago.” (2 Tim. 3:1-5) Wa vura duhe wo, ka ani du rogo toro yo nyanyaki, si nika undo rani be gu maapai kurii nga ga gi zegino re. Pauro akepai nga “rago guru, ya fuo gere agu yo du na adiayo i du wa ka i adu nga na adiayo ya. . . Agu yo namanga pai na gi zegino re ki du wa ka i aka nga kuti pa gi zegino re ya.” (1 Kor. 7:29-31) Pauro ayanga ane wẽ boro mbu gani atindiro nga ga rogatise te. Ono tie, nibipa wai rago na guru, si naida i peresipa agu apai nga ga toro mbatayo.—Mt. 6:33.

18. Tipagine rengbe aKristano arengba ka gbia ngbarago ti ni rogo rogatise yo na kidu na diabese?

¹⁸ Wa vura duhe nga ani naraka ti kere aregbo na ga aboro arogatise nagburuwa pati rani, ani ima rengba ka sa gaani rogatise si du na ngbarago gbiati diabese. Nirengo, agu aKristano nga arogotise kakuti ga Yekova aboro, i namanga agu arugute nga ga Ziazia Kekeapai, na ki idi na gu ngbembatayo nga ga ga Yekova ziazia toro, i ima rengba ka bandapa guhe “Mbori akpamia re ka boro kparanga ha ya.”—Mk. 10:9.