YESU ape gupai kumbatayo nga apefuoko nika gbia ngbarago ti bakere ke ahe ti gi yangara aregbo re. (Mt. 9:​37; 24:14) Oni bingo wai agu afugoko re nada ti rengo ngba kparakpara gene rogo gu rago nga ga Transcarpathia, Ukraine yo. Kina rogo agbata gbua biata rogo gu rago re, adungurati yo 50 na abatungusipai bangeyo naima susa 5,400. * Nirengo, ka i kodi bange agu aboro du rogo agu agbata biata re dunduko boro sa dagba aboro biama rogo agu agbata re nga Dezire Yekova!

Wai du du aboro rogo agu adagbarago re? Wirina sa yo du rimoko nga Vasile aya, “Agu aboro du ane nabi Ziazia Kekeapai na irisa, i nga agu aboro naida na ruru mangaapai, pa gume tiyo ni kerehe, na i gu duadu nzunzu na nyemu ka undo akurayo.” Ko ape kurapai nga: “Anga aregbo dunduko i aida kuti gaani aida te. Ono ho mo ayugopai ni fuyo rogo Ziazia Kekeapai yo, i nadegatuyo adega wenengai.”

Rengo ngaha nga, ho awirina atungusapai ni rogo gu ngbatunga adagbarago du na badungu abatungusipai rogoho wa gure, i nagbiatiyo agbia na kura akpakarapai nga gu kura aboro agbianga tiyo na ni dedede ya. Ni kpiapai, kura dungurati gu du yo sa na abatungusipai rogoho 134 ono akporo rogo gayo dagbarago nga ga tungusapai gbua 50! Wai du abatungusipai namangi ariapai tipa ka mangapai kuti gupai re?

Badungu awirina nafutiyo ka ndu kaa tungusapai rogo agu arago nga gu du na bakere zingo abatungusipai rogoho. Wirina du garãko nga 90 du rimoko nga Ionash agumba gupai nga, “Ka i kparaka agu akporo du rogo gu dagbarago nga ga gaani dungurati, batungusipai sa nadu na akporo ue ka tungusapai rogoho. Mi natungusapai rogo gu gbaria mi araka rogoho, ono rogo agi aˈuru ninaasusa were kpotore naawoka awoka, mi aima ndu nunguro a tipa amairo wa 100 (akirometere 160) ku rogo gu dagbarago i afunga ha fu boro ni tungusipai rogoho ya, mi atungusipai rogo gu dagbarago re rogo pa-Hungarian.” Si naida abatungusipai mbupa kura gayo apai ambu tipa ka undo rogo kura adagbarago. Ionash aya, “Tipa mi gbia gatara mbata fu si guari, mi natona tungusapai ti ndu uru 4 wiso na ki tungusipai da ku nyemu ti ndu uru 6 ho gatara akaragatihe ni ku rogo gu gbata du kpure rogoho. Mi anaatungusapai wo bara ue watadu bara biata vuru poso yo.” Ya mo ko bihe nga undo adu kina ti gu ome ko aamangaha re? Ko aya, “Mi agbia bakere ngbarago ti gu ngbatunga tungusapai re. Si adu ni pa ngbarago fere ka undo kura ngbadimokporo nga gu naadu rogo gu rago nga gu adunga dungurati rogoho ya i wiriki rengo.”

Si nirengo nga, anga agu aboro dunduko du rogo agu adungurati du rogo gu rago re rengbe ka ndu gbanga nunguro te. Ono abatungusipai dunduko kodihe na aguyo nga sosono aboro namanga ome ka tungusapai rogo gayo dagbarago sirisiri. Ni sangbana gupai re, bange agu aboro dunduko naye tipa Tingida Pakpio Yesu rogo 2017 rogo agu agbata biata dunduko re ima kio wa bara ue kisusi bange agu abatungusipai du yo, watadu bebere bange agu aboro dunduko naraka rogo agu agbata re. Zanga kapa, ka ani vura kaa tungusapai kina wari vurũ si naida kindi ani “nimángi ga Gbia sunge zaza,” watadu bakere sunge kindi kinaho nga ga Gbia si aida ani mangihe.​​—⁠1 Kor. 15:⁠58.