1, 2. (a) Tipagine paranga aKristano adu ti ni na diabese rogo gu vura yo du kuti gu rimbasa aborovura nga gbegberẽ atoro? (Oni bi gu sura duti tonatonaha.) (b) Ginipai ani nika wisigoho?

GU MOKEDI nangia Pauro aringbisi gaani raka wangia ani aKristano kuti gu raka nga ga abanzengere nga aguyo nasovura. Rengo ngaha nga, gu vura ani asoho, si nga gu vura nga ga toro angianga kuti aboro ya. Ono wa vura duhe wo, avurarani nga ndikidi aboro. Satana gbiati adaimona nga kere abasovura nga aguyo du na bakere inohe. Ani rengbe ka bihe mbata wa ka ani dinga beyo te. Boro paranga aKristano tigayo, i rengbe kadu wa agu aboro adunga kandara wiri gene beyo ya. Ya mo i rengbe ka diabe gu rimbasa aborovura nga gbegberẽ atoro nga aguyo du na ome tiyo kisusi aboro re? Gu rengo duho nga, paranga aboro rengbe arengba ka diabeyo, na i nadia adiabe yo! Tipagine? Mbiko i ‘nanyaka anyaka rogo Gbia yo.’ Ono anga kina gbia ome sa be Mbori nga gu yangarapai i amangaha te. I ima vo tiyo tipa vura. Wakina agu abanzengere i naima rabayo wenengai, i ima “úkadi ga Mbori ũvura dunduko.”​—⁠Oni gedi AEfeso 6:​10-​12.

² Si rengbe kadu nga Pauro aima du na pa agu aũvura riko yo agu abanzengere nga ga aRomo yo anaavoho ho ko aagumba gu gako  kpiapai re ni. (Amo. 28:16) Ani wisigingo gu ndupai gu kpiapai re nadaada ti ni. Wa ani kaa wisigoho, oni moingo berãroni fuo agu apai kura paranga aboro nagumbaha tipa agu akpakarapai gbiati aundo du ti vo apapara gu ũvura nga ga toro ni basasa dũ.

3, 4. Wai du du gu rengo du rogo Fugo Mbori yo wakina gu giridimose nga ga ga aRomo abanzengere?

³ Oni gedi AEfeso 6:​14. Gu giridimose nga ga agu abanzengere nga ga aRomo yo anidu na kpakakpaka marã ti ni tipa ka banda dimo banzengere. I ambakadihe tipa si songodi gani marã ngbaduse ka si wonga baha ya. Gu giridimose re anidu na nyanyaki he ti ni nga gu naadu tipa tinda basape gbiati wiri guru sape. Ho banzengere ani tapa gani giridimose ni ndätätä, ni aima rengba ka ru nyanyaki na wingbaduse ka sovura.

⁴ Wakina gure a, gu rengo ani awirikaha rogo Fugo Mbori yo nabanda rani rogo toro yo be gu kereapai ziree ayugopai aye na ni. (Yo. 8:​31, 32; 1 Yo. 4:⁠1) Na ka ani kpinyemu agu arengo naye be Mbori, si nika du taata furani tipa ka tinda gaani “marã ngbaduse,” du rogoyo nga ka raka ringbisihe kuti ga Mbori ruru arugute. (Tam. 111:​7, 8; 1 Yo. 5:⁠3) Kurigure, ho ani arugatirani ni ziazia na agu arengo du rogo Fugo Mbori yo, ani ima rengba ka ru nyanyaki kuti asogorani ka songodapai ku baraha yo.​—⁠1 Pet. 3:​15.

5. Tipagine si aida ani gumba rengo ti ni?

⁵ Ka pepai ni masaku, ho ani avo gu rengo ni nga ga Ziazia Kekeapai ndätätä dimorani, si nika fõngbaduraniyo ani naaraka ringbisihe kutini na kaa gumba rengo ti aregbo dũ. Tipagine ani ane gumba ziree ti ni? Bambiko ziree aima digo nidu ni gu ga Satana ũvura du ko na diabese na ni kisusi. Ziree nagbarasapa gu boro nagumbaha gbiati guni naida kutini. (Yo. 8:​44) Sidu, wa vura du ani ni kpakpa aboro, si naida ani mangi ome ka ne gumba ziree. (Ef. 4:​25) Ono si ima rengba kadu ni kpakarakpakaraha. Abigail du garãri bawe na muambe aya: “Si arengbanga kaa ngera wa wenepai kaa gumba rengo ti aregbo dũ te, gbe ho duhe ni nga gumba ziree ima rengba ka batasa boro be kpakarapai.” Tipagine tie ri naasada ti ni kaa gumba rengo ti aregbo dũ? Ri aya, “Sangbakpotoreyo naadu ni gigirihe ku bangiri Yekova ho mi agumba rengo ni. Na avungure gbiati abakureami ima ino gupai nga i ima rengba ka kido kuti re.” Victoria du garãri nga 23 aya: “Ho mo agumba rengo ni na kini songodipai kubara gamo aida yo, aboro ima rengba ka manga ro gbegberẽ. Ono mo nagbia bakere aundo ti aregbo dũ: Mo nagbia wingbaduse, mo nadu mbembedi na Yekova, na agu aboro nakpinyemuro kini bi ro na irisa.” Nirengo, undo kinaho ti ‘vo rengo dimoroni’ ti aregbo dũ.

6, 7. Tipagine i naringbisi ruru mangaapai ti ni kuti marã ngbaduse?

⁶ Kura ngbatunga marã ngbaduse sa agu abanzengere nga ga aRomo yo anaavoho rogo bambata sa kama agarã angia kpakakpaka amarã nga gu angbaha anaapi kurii kuraha. I anaanyaga agu amarã re si rengbe na agu abarapa ni dũ tona ti ngbaduni ki dati dimoni, kpoto na he ngbaha yo wakina kombe naana zio agu amarã re ku rogo ba sa. Agu akura abarapa ni du kuari adu dunduko ni kisikisihe na kina amarã nga gu naadu ni zizihe kuti kpoto. Gi ngbatunga roko re anaambunga gene fu banzengere ni naata wa gu ni aidaha te, na si anaaida ni naabi gu kpakakpaka amarã re abi dedede singia si kindi nyanyaki kina rogo gu baha. Ono gu marã ngbaduse re anaabanda ngbaduni watadu gu kura nyanyakipa abarapa ni be rindi basape watadu rindi aguanza.

⁷ Nairiwo wai rẽ gu marã ngbaduse re arẽ ka yugo wai ga Yekova ruru arugute narengbe ka banda ngbaduraniyo! (Snz. 4:​23) Kina wai banzengere arengbanga ka aria gani marã ngbaduse na gu mbakadiyo ho rogo guhe yo anyakanga ya, kina wo a ani arengbanga ka mbu ga Yekova arugute nga ga gupai du ni ruruhe tipa gupai ani aberãha nga si du ni ruruhe ya. Ani ata dunga na gu tatamana tirani nga gu rengbe ani ka banda ngbadurani na ni te. (Snz. 3:​ 5, 6) Kuba gure, si naida ani naabihe dedede singia gu “marã ngbaduse” Yekova nafuhe furani re sungu kindi kina rii ngbadurani.

8. Tipagine duhe ti ni ni wenepai ani kakuti ga Yekova arugute?

⁸ Ya mo mo naabi ga Yekova ruru arugute ti kura aregbo wakina tindiro kuriro watadu wa si naka aka na gamo ranirii bero? Daniel du garãko nga 21 aya: “Abayugupai gbiati akuare sukuru yo aasawia re mbiko mi naraka ringbisihe kuti agu arugute nga ga Ziazia Kekeapai. Tipa bete regbo, mi aadunga berewe na wingbaduse te na mi ki du na bakere gberãrago.” Ko amangi wai ka diabe gupai re? Ko aya, “Niyangaraha, mi abi agu aundo du ti raka ringbisihe kuti ga Yekova arugute. Kura ‘abakureami’ atona kaa dia kere angua kutii kpotoyo yo; agu akurayo ki mbu sukuru. Si aima gberã ka bi wai raka yo aye kada. Yekova nabanda rani abanda nzunzu.” Madison du garãri nga 15 aya: “Vura du mi asoho tipa ka kakuti ga Yekova arugute na tipa ka zanga merafuo agu apai akuare aberãha nga si ni wenehe watadu si naye na ngbarago.” Sidu, ginipai ri naamangaha? Ri aya “Mi naatingida tire na gupai nga mi natinda rimo Yekova rire na aˈasada nga gu gene Satana azumudo re na aũvura ngbaha. Ho mi adia ni be gupai mi asota na ni, mi nadu na ngbarago na tire.”

9-11. (a) Gini rakata narukuba kurapai aKristano avoho? (b) Ginipai rengbe ka saha taata furani ani tungusipai?

⁹ Oni gedi AEfeso 6:​15. Banzengere nga ga aRomo aarengbanga ka ndu ku ba vura yo zanga na gani rakata nduni yo te. Gu gani rakata i ambakadihe rogo kpotonya yo re, si adu na akpotongbaha biata na si anaaundo ni ni ru zanga zutuka. Gu gene i anaambakada gu rakata re ngbaha anaasa ha si naaraka ni gbangaha na ka ndu boro igirãnga behe ya.

¹⁰ Wadu he nga agu arakata agu abanzengere nga ga aRomo yo anaavoho anaandu na yo sa vura, gu rakata nga gu narukuba kurapai nga gu aKristano avoho tigayo naundo yo i ndu na gu pangbanga nga ga zereda. (Yes. 52:7; Rom. 10:15) Wa vura duhe wo, si naida boro duadu na wingbaduse ka tungusapai ho momu akura ni. Bo du garãko nga 20 aya, “Mi aagunde agunde ka manga dezirepai fu akuare sukuru yo. Mi nabihe nga zee du naana manga re. Ho mi angera ni kusayo, mi ainongo gini ndupai ka mi adu ti ni na zee te. Mi awere na ngbarago ka manga dezirepai fu akuare.”

¹¹ Badungu paranga aboro bi gupai nga si taata fuyo i takipande wene pangbanga ho i ambakada tiyo ni wenengai. Ginipai rengbe mo ka mangaha tipa ka mbakadatiro? Julia du garãri nga 16 aya, “Gimi awaraga nidu ti aregbo dũ kina rogo gimi mangu nga ga sukuru, na mi naadega ture kuti agu aberãpai gbiati aida nga ga agu akuare du mi na yo sukuru yo. Fuani, mi kidu na rengba ka berãpa gupai rengbe ka undo yo. Ho mi ambakada tire ni, mi nafura tipa kina boro gupai nzunzu rengbe ka undo yo. Makenzie du garãri 23 aya: “Ka mo ngia wenesino boro na kingia gu boro nadegatuni wenengai, mo rugutiro aruga na gupai akuaro agbiatiyo na ni. Mi naageda agu awaraga dunduko i akusihe tipa paranga aboro. Rogo gu gene re, mi kini rengbe ka yugo gupai fu akuare rogo Ziazia Kekeapai yo watadu rogo jw.org yo nga gu rengbe ka undo yo.” A wa agu afugo re ayugoho, ka si du nga mo ima mbakada tiro wenengai ka tungusapai, gamo “rakata” nika nye nyanyaki kina ku nduro yo.

12, 13. Gini apai nga bete ga Satana ‘asiida we’?

¹² Oni gedi AEfeso 6:​16. Gu “vurakube” gu banzengere nga ga aRomo ni anaatindaha angia he nga gu naana dada ni tona ti kpuranga beni ki da ti rukusini. Si anaabanda ni be abasape, abaso, gbiati aguanza.

¹³ Bete agu ‘asiida we’ nga gu Satana narengbe ka zumudo ro na ni nga aziree tipa Yekova, ya Ko aberãnga paro te na boro ho ka kpinyemuro te. Ida du garãri nga bawe na ribua ni naasota na gu bipai tipa tiri nga sunge tiri te. Ri aya, “Mi naabi tire dedede nga Yekova mbembedi na mi te na ko aidanga kadu ni  Bakureami a te.” Wai du ri amangapai kuti gu zubohe re? Ri aya, “Adunguratise nanyakasa gimi idapase ni bakerehe kisusi. Mbata, mi anaasungo ba adunguratise yo ki zanga fu karagapai, kini berẽ gupai nga boro ho naida ka gia gupai mi aida ka gumbaha te. Ono awere tie, mi naambakada adunguratise na kini asadi ka fu karagapai bara ue watadu bara biata. Taatapai nga ni te, ono ho mi amangaha ni wo, mi nadu wenengai. Na awirina nangarasa re ni kerehe. Aregbo dunduko mi naaga ba adunguratise yo kini ini gupai nga Yekova ima kpinyemure.”

14. Gini rengo gupai namangi Ida ayugoho?

¹⁴ Gupai namangi Ida re nayugo nyanyakipa rengo sa: Gu vurakube i anaafuhe fu banzengere, si anaasonanga rogo gu baha te, ono bakio gaani vurakube nga idapase ima rengba ka umba watadu ka sona. Si nabi kina rani. (Mt. 14:31; 2 Tesa. 1:⁠3) Nairiwo wai duhe ni nyanyakipa pai ani naasonosa gaani idapase asonosa kindi!

15, 16. Wai du du maabangirise wakina kpakpari?

¹⁵ Oni gedi AEfeso 6:​17. Gu kpakpari agu abanzengere nga ga aRomo yo anaavoho, i anaambakadaha si naabanda riyo, goyo, na kpakpuyo. Kura akpakpari anidu na behe ti ni nga gu banzengere anaazio ho ti ni ho ni atinda ha ni beni.

¹⁶ Kina wai kpakpari abanda berã banzengere, gaani “maabangirise tipa bata” nabanda berãrani, du nga gaani tandu berãpai. (1 Tesa. 5:8; Snz. 3:​21) Maabangirise naundo rani ani moiberã rani fuo ga Mbori akidohe na si naundo rani ka ani dunga na bakere gberãrago kisusi ya ho ani agbiatirani ni na akpakarapai.  (Tam. 27:​1, 14; Amo. 24:15) Ono ka ani aida gaani “kpakpari” banda rani, si naida ani voho rirani yo angianga ka tindaha berani ya.

17, 18. (a) Wai du Satana narengbe ka sosoda rani ani di gaani kpakpari kusayo rirani yo? (b) Wai du rengbe ani ka yugo gupai nga Satana ananganga rani na gako ziree te?

¹⁷ Wai du Satana narengbe ka sosoda rani ani di gaani kpakpari kusayo rirani yo? Oni bingo gupai ko aasadi ka manga Yesu na ni. Nirengo, Satana aima ino gupai nga Yesu aamaabangiriko kada ni bazogo kurii ngbatunga aboro dunduko. Ono si aida Yesu pidi gu regbo apido Yekova asiaha. Na si adu nga ko nika rungo arungo na ki kpi. Sidu, Satana afu gu momu fu Yesu nga ko gbia gupai ko aamaabangiriko tipaha re ni kina ipo. Satana afu gu berãpai fu Yesu nga ka ko irisiko kina bara sa gbua, ko nika da ni bakindo zegino nibasa kinaho. (Rk. 4:​5-7) Wakina gure a, Satana ima ino gupai nga Yekova kido rani nga ko nika fu aũborose furani rogo vovo zegino. Ono si naida ani sungudi regbo asungudo, na mbata fu ani gbia agu aũborose re, ani ima rengba ka susa rogo akpakarapai yo. Sidu, Satana nafu gu momu furani nga ani raki gu ngbatunga wene raka re kina awere. Ko naida ani peresipa gbata aũborose mbatayo fu apai dũ, kadu na agu ahe re nibasa kina awere. Satana nangarasa rani nga ani moi ga Mbori Kindo rogo ue bangiriba.​—⁠Mt. 6:​31-​33.

¹⁸ Wa gu kura badungu paranga aKristano, Satana ananganga Kiana du garãri 20 na gu gako ziree re te. Ri aya, “Mi ima ino gupai nga gu yangara ziga du kuti gaani akpakarapai sa nga kina ga Mbori Kindo.” Wai du du gu maabangirise re na ome kurii gari berãpai gbiati gari mangaapai awere? Ri aya, “Gu maabangirise nga ga Paradizo naundo re ka mi bingo agu asasa nga ga zegino na nyanyakipaha kisusi ya. Mi aidanga ka mangasunge na gimi abirĩ tipa ka gbia undo tipa tire watadu ka gbia sonakumbatayo basunge marã yo te. Kuba gure, mi namangasunge na gimi regbo gbiati ome ka manga agu asasa nga ga toro.”

19, 20. Wai du rengbe ani ka kiiso gaani abirĩ nga ga mangasunge na Fugo Mbori?

¹⁹ Gu basape agu abanzengere nga ga aRomo yo anaamangasunge na ni ti gu regbo Pauro ake gu gako waraga re, bagizoho adu wa bebere metere sa na i ambakadihe tipa ka sovura na ni na gu boro du mbembedi. Ndupai sa agu abanzengere nga ga aRomo yo aigirã ti ni ni kerehe angia i anaawirika sovura na gayo basape na aˈuru dũ.

²⁰ Pauro aringbisi Fugo Mbori kuti Basape nga gu Yekova nafuhe furani. Si naida ani ini wai ka mangasunge na ni wenengai ho ani asongoda pai ni kubara gaani aida yo, watadu ho ani aruga gaani aberã ni. (2 Kor. 10:​4, 5; 2 Tim. 2:​15) Wai du rengbe mo ka sonakumbatayo rogo gamo abirĩ yo nga ga mangasunge na ni? Sebastian du garãko 21 aya: “Mi aima digo ni mangipai nga kaa ke veresi sa rogo ai kapita nga ga Ziazia Kekeapai nga gu mi agedaha. Mi nadungura agu averesi nga gu ngbaangba gbe tire. Gupai re naundo re mi rugutire bakere gbe na agu aberã nga ga Yekova.” Daniel fugoko nidu kusayo aya: “Ho mi amanga gimi geda Ziazia Kekeapai ni, mi naarogoda agu averesi mi abihe nga si rengbe ka undo agu aboro mi agbiayo gene tungusapai yo. Mi ye ka bi gupai nga aboro nakaragapai wenengai kuti gupai mo atungusaha ho i abi gupai ni nga mo na nyanyaki ida kuti Ziazia Kekeapai na mo namanga ome ka undo yo.”

21. Tipagine si aidanga ani gunde ti ni be Satana gbiati adaimona ya?

²¹ A wa gu paranga aboro du afugoyo rogo gi kekeapai re nayuguhe, ndupai ho boro gunde be Satana na adaimona te. Rengo du tigu nga i na ome tiyo, ono boro ima rengba ka diabeyo. Na i arakanga nyeanye kindi te. Barambeda, ti regbo gu Zogarago Tipa Agarã Kutu nga ga Kristo, i nika dingisa yo ku rogo ba sa ka gene adunga beyo i mangi ai wiripai ya, tingbafuo gure, i ki gberesi yo. (Yugo. 20:​1-3, 7-​10) Ani ima ino vurarani, gako abirĩ, na gupai ko aida ka mangaha. Na ga Yekova undo, ani ima rengba ka ru nyanyaki ka sovura kutiko!