Tipa akutu agarã, boro ho naini karagapai mbata kuti gu sanahe re te. Ti kina gu bangisa regbo re, riri akaza aaimo amirioni aboro. Niyangaraha, aboro-birĩ-inohe aini gu rengo du tipa akaza. I akuru bara gupai nga akaza naye dedede be rukutu agbiro wa abekiteria [agbiro vuseyo] watadu virus [agu agbiro nasungo rogo kure] nga agura i abira na kina maikrosikopu. Pa kura bara gi rengo re ima undo aboro i bandatiyo be akaza na kini husi dungu akaza, nga gu sa birioni aboro i naaraka ni gbangaha na wene kpotoyo.

Na ginipai tigaha du tipa kura nyanyakipa asanahe wa gi du kusende re?

• Da nga Mbori?

• Da nga Yesu Kristo?

• Ga Mbori Kindo nga gine?

• Gini maabangirise du tipa raka kumbatayo?

Amirioni aboro ima gbia akaragapai kuti agu asanahe re na si ima sa gayo raka si du ni wenehe. Mo ima rengba ka gbia undo ti agu akaragapai re a.

Mo ima rengba ka bakabangiro nga, ‘Wai gu duhe taata ka gbia rengo tipa ai pai?’ Gu kurapai berewe nga, si na wira wa gbia rengo tipa badungu apai ima du ni kpakarakpakaraha gbe. Tipagine?

Badungu aboro akidongo kuti agu aboro nazogarago, ababagiahe, watadu agu aboro nagumba apangbanga tipa i gumba rengo fuyo te. Si taata fu aboro i ini singia rengo du kura aboro agumba ha fuyo watadu gayo abipai du gbua i agumbaha, kini hõko kura atingidapai watadu kini pe ziree fuyo te. Mbiko gupai nga aboro akidongo kuti akurayo te na badungu atingidapai nga ziree, aboro aidanga ka ida kuti gupai du nga rengo na gupai si ayugoho tipa yo te.

Ka agi akpakarapai re vura du vurũ, si taata ka gbia agu akaragapai du nga rengo kuti gu nyanyakipa asanahe nga ga raka. Ngba gini gene? Ni manga mo kina gu bangisa apai mo naamangaha tipa ka gbia karagapai kuti agu asanahe anyakanga paha gbe ya.

Mo naagbata rengo agbata na aˈuru dunduko ni betehe. Mo makianga gupai du tipa Jessica. Ri nagumba gupai nga, “Gu riahe du na awande rogoho ima soga wire ni kerehe, zavura wiri mbusuduru kpaku awande rogo riahe ima rengba ka imo ri.” Si naida Jessica ini gupai nga gu riahe ri angbehe, si ni wenehe tipa wiiri. Ri nagumba gupai nga, “gu bambatapai mi amangaha nga, ka geda gu kekeapai sirisiri du ti kpoto ariahe na ki wisigi agu ahe i adunguraha ku rogo ho. Fuoho, mi namanga wetekapai berewe kumbatayo na zavura ki yambu agu aboro nambakadi gu riahe re tipa ka inoho singia mbusuduru awande aatinga ku rogoho te. Na mi naasana kura aboro a nga aguyo du mi nakido kutiyo ka ino singia gu bambakada ariahe re nambakada ariahe ngba wene gene.”

Gu gene mo agbata rengo ngbaha arengbanga kadu ni kpakarakpakaraha wa ga Jessica te, ono wa kina Jessica, mo ima rengba ka mangasunge na agi apai du kusende re tipa ka gbia akaragapai kuti agu asanahe du mo na ni:

• Mo gbia agu arengo du tipa gupai re.

• Mo mangi kura wetekapai.

• Mo moiberã ro nga agu aba mo amanga wetekapai rogo si nagumba kina rengo.

Gi bangisapai re ima rengba ka undoro mo gbia agu akaragapai nga rengo kuti gu nyanyakipa asanahe nga ga raka. Ngba gini gene?

Ho Jessica aagbata gu rengo ni nga ga Ziazia Kekeapai, ri amangisunge na kina gu bangisa gene gbata rengo ri amangisunge na ni ho ri agbata gu riahe ni du ni wenehe tipa wiiri. Ri aya, “Zogatise ka geda Ziazia Kekeapai zezeredi na kini mangi wetekapai zanga nyomoro undore mi gbia gu rengo du rogo Ziazia Kekeapai.” Wakina Jessica, amirioni aboro ima wirikapai tipa gupai Baibiri agumbaha tipa agi asanahe re:

• Tipagine ani araka tini?

• Ginipai ninaamanga ho boro akpi ni?

• Tipagine aboro arungo ti ni?

• Ginipai Mbori amangaha tipa ka digiso arungo?

• Wai gu rengbe ani kadu na gu ramukporo du na ngbarago?

Mo rengbe ka gbia agu akaragapai nga rengo kuti agi asanahe re gbiati akuraha ni geda mo Ziazia Kekeapai na kini mangi kura wetekapai rogo Internet rogo www.pr418.com/zne.