Gu Rengo du Tipa Raka Kumbatayo
Ya mo mo abakingo bangiro tipa gini apai nika manga kumbatayo? Ziazia Kekeapai napepa gu nyanyakipa apai furani nika manga barambeda, na nga gu nika du namaapai kurii ga aboro raka rogo zegino dunduko.
Yesu aima sakapai furani tipa wai ani ‘ka inoho ya ga Mbori ngbi mbedi.’ (Ruka 21:31) Ko agumbapai nisangbanebi ya, bangbanda kura apai, avura nika du, bakere bazigizo, angbongi watadu zingo riahe, gbiati riri akaza—nga kina boro agu apai ani abihe si ni mangi areme.—Ruka 21:10-17.
Ziazia Kekeapai nayugo gupai berewe a nga “kusa rago,” watadu yangara arame nga ga gu zogarago nga ga wiri aboro nika du ni yuguyuguhe be pa wai aboro nikaa mangaapai ni gbegberẽhe. Mo ima rengba ka gedapai tipa gu gbegberẽ apai re rogo 2 Timoteo 3:1-5. Ho mo abi gi gbegberẽ asino re ni na mangaapai ti aboro areme, zanga kapa, mo ima ida kuti gupai nga gi sangbanebi nga ga Ziazia Kekeapai re nandu wa sa na agu apai namanga awere.
Ginipai gipai re ayugoho? Regbo ima mbeda tipa ga Mbori Kindo mangi bakere ariapai nga gu nika sa raka auru kpotosende si du ni wenehe. (Ruka 21:36) Rogo Ziazia Kekeapai yo, Mbori nakido pa wene apai tipa kpotosende na tipa agu aboro nika raka rogoho. Bete akpiapai du re.
WENE ZOGARAGO
“I aasia pa zogarago fu ko [Yesu] na taarimo na ngbi, ya aboro dunduko, na arikaaboro, na ngbatunga aboro na afugoyo mangi pa ko; gako zogarago nga nyenye zogarago, nga gu nikanyasa nga ya, gako ngbi nga gu ka i agbárasa nga ha wa sa ya.”—DANIERE 7:14.
Gupai gipai re ayugoho: Mo ima rengba ka gbia ngbarago ti raka tiibe gu zogarago du kurii zegino dunduko Mbori nasigiraha na Wiriko ki ngia Bakindo.
WENE KPOTOSE
“A nga boro kporo sa ayá, ‘Mi nawoka’ te.”—YESAYA 33:24.
Gupai gipai re ayugoho: Mo awokanga te watadu ka gbarã; mo nika du na rengba ka raka zanga kpio.
NYENYE ZEREDA
“Ko namanga pai, vura nyasi digida kpotosende yo.”—ATAMBUAHE 46:9.
Gupai gipai re ayugoho: Vura adunga berewe te gbiati agu arungo si aye na ni.
KPOTOSENDE NIKA HI BE WENE ABORO
“Gbegberẽ boro adú nga ho berewe te . . . Bayee aboro adía kumbo ringara.”—ATAMBUAHE 37:10, 11.
Gupai gipai re ayugoho: Gbegberẽ aboro adunga berewe te, kina agu aboro nika du na nyemu ka giasangba Mbori.
KPOTOSENDE DUNDUKO NIKA DU NI PARADIZO
“I adúdua abambu ki niraki rogo; i arũka bakakue aati yo ki niri zuzuhe.”—YESAYA 65:21, 22.
Gupai gipai re ayugoho: Kpotosende naabaha dunduko nika du ni bawenehe. Mbori nika digiso gu gaani kparakpee nga, gupai ko akpinyemuhe mangi “rogo kpotosende.”—Matayo 6:10.
Gere Ima Rengba a ka Ngba Tiro
AGU ASANAHE BAIBIRI AKARAGAPAI KUTI NI
Gini Apai ga Mbori Kindo Nika Mangaha?
Mo wirikipai tipa agu apai nika manga ho ga Mbori zogarago nika tona zogarago ni kurii kpotosende.
