I natungusa gu wene pangbanga nga ga Kindo rogo zegino dunduko, wa gu Yesu agumbaha ni sangbanebi. (Matayo 24:14) Gu buku nga ga Ziazia Kekeapai nga Daniere nagumba gupai furani nga gi Kindo re nga zogarago be Mbori. Kapita 2 nga ga gi buku re na sangbanebi rogoho nga gu nafura tipa gu kura zogarago nga ga aboro, watadu akindo, natona Babera yo da kuti gaani regbo areme. Veresi 44 agumba pa gupai nika manga kumbatayo, si aya:

“Mbori ngbangbaturũ amáa gu ngbi nga gu ka i agbárasa nga ha wa sa ya, ka i afú nga pa zoga ha fu kura aboro a ya. Si akúadi agi angbi re rukutu ki digisi he dunduko, si ki nye anye kindi.”

Gi sangbanebi re gbiati agu akuraha du rogo Ziazia Kekeapai aima pe gupai nga ga Mbori Kindo nika dia agu azogarago nga ga wiri aboro dunduko kusayo na si ki du ni nyanyakihe ki ye na arugapai fu aboro ku auru kpotosende. Raka nika du wai tii gu Kindo re? Bawene akidohe gere nga gu nika da ti rengo barambeda.

• VURA ADUNGA BEREWE TE

  Atambuahe 46:9: “[Mbori] namanga pai, vura nyasi digida kpotosende yo; ko nakua mboto, ki kuadi baso rukutu, ko nazo angbagidavura ku we yo!”

  Mo berẽnga pa wai ka zegino ni du ka i namangasunge na agu amarã duho dunduko gbiati gu inohe i amangasunge na ni tipa kaa mbakada aũvura tipa undo aboro angianga kaa imo yo ya! Gu kidohe re nika da ada ni rengo tii ga Mbori Kindo.

• AKAZA ADUNGA BEREWE TE

  Yesaya 33:24: “A nga boro kporo sa ayá, ‘Mi nawoka’ te.’ ”

  Mo berẽnga pa gu zegino aboro nikaa mbunga be kaza ngbaduse, kansa, mararia, watadu ai gu kura rukutu akaza ya. Abambungua gbiati adawa adunga berewe te. Rengberengbe kpotose​​—⁠nga gu pai nika du kumbatayo fu agu aboro nika raka auru kpotosende.

• ZINGO RIAHE ADUNGA BEREWE TE

  Atambuahe 72:16: “Zende ahe zúku rogo ringara kpaima; si wó ri abaagangara yo.”

  Kpotosende nika kusa riahe fu aboro dunduko, na aboro dunduko nika gbia ha. Gomoro gbiati zingo riahe adunga berewe te.

• IMA, RUNGO, GBIATI KPIO ADUNGA BEREWE TE

  Yugoti 21:4: “[Mbori] awéga aume ti bangiriyo ku sa yo dunduko. Kpio adú nga berewe te, rungo adú nga yo na akpe na ima a te, bambiko bambata apai aima nyasa.”

   Gere nayugo gupai nga si nika ngia rengberengbe raka nikaa dunga na digidoho ti ni ya rogo paradizo­ auru kpotosende! Si nga gupai Bakusirani nga, Yekova Mbori nakido paha.

Ya mo agipai re bangiro wa gupai kaa manganga ya? Wa vura duhe nga, badungu aboro ima rengba ka ida gupai nga raka wa gu kido yo paha rogo Ziazia Kekeapai nika du ni bawenehe ni rengo, tipa kura andu apai, badungu aboro nabi raka nyeanye kindi ni gupai naima kpakara fuyo ka gia rogoyo. Gi pai re airiwongo te, mbiko boro ho naraki nyeanye kindi rengbe ka gumba paha fura ni te.

Aboro aima du ni akanga fu ingaapai na kpio, na kini rungo be aigirã, arungo, gbiati kpakarakpakara raka tipa gbanga regbo nga gu badungu aboro abihe nga si nga gene raka. Ono si kia ti gupai Bakusirani nga Yekova Mbori akidopaha fu wiri aboro.

Tipa ka undo rani ani du na tambuahe tipa agu apai dunduko Mbori nakido paha, Ko naya na kido tipa fugoko we: “Si akáraga nga tihe fere gbua te, ono si anyása gu pai ngba ti re, ki kpatare rogo gu pai mi akedi he tipa ha.”​—⁠Yesaya 55:⁠11.

I fura tipa Yekova rogo Ziazia Kekeapai yo ni gu Mbori “arengba nga na re zire ya.” (Tito 1:⁠2) Wa duhe nga ko ima kido pa gi wene ahe dunduko du ku mbatayo re, si adu ni patatamana ku bara rani yo ka wisigo gupai nga: Ya mo si ni rengo nga aboro ima rengba ka raka nyeanye kindi rogo gu paradizo i nakido paha ku auru kpotosende ane? Ginipai si aida ani mangihe tipa ka gbia undo ti ga Mbori kidohe? Rogo agu akpewaraga naye kumbatayo re, mo nika gbia wene apai yo nga gu nika undo ro mo karagapai kuti agi asanahe re.