YA MO mo adunga na bakere gberãrago si ki saro mo berẽ gupai nga mo aidanga ka raka berewe te? Ka si du wo, mo ima rengba tie ka rugatiro na pa gupai naamanga Adriana. Ri anaambu be gu kaza nga ga bakere gberãrago na ka ri adunga na maabangirise ya. Amunganga abi Adriana na gu kaza nga ga bakere gberãrago.

Mo makianga gupai a naadu tipa kumba nga Kaoru naraka Japan yo, naangerafuo avunguko naima gbinza na kidu berewe na kaza. Ko aya, “Ti gu regbo re, ome apai basunge yo aima fu rire. Tingbafuo regbo, nyemu riahe aadunga tire te, na mi aadunga na rengba ka ra wenengai te. Mi atona ka berã gupai nga, gimi akpakarapai rengbe ka nyasa kusayo kina gu ka mi kpi.”

Kumba du Nigeria yo du rimoko nga Ojebode aya, “Mi anidu na bakere gberãrago ti aregbo dũ si kini sare mi naakpara ni kina boro aume, sidu, mi agbata gene tipa ka imo tire kusayo.” Si ni pangbarago tie nga, Ojebode, Kaoru, gbiati Adriana aaimongo tiyo te. Ono akama aboro naimo tiyo rogo agarã ni basasa dunduko.

Badungu agu aboro naimotiyo nga akumba, na badungu agu akumba re na zee ka sanahe tipa undo. Yesu agumba gupai nga agu aboro nakaza, i zingo munganga amanga yo. (Ruka 5:31) Sidu, ka mo du na bakere gberãrago si ki saro mo naaberã kina pa imo tiro, ka mo dunga na zee ka sanahe tipa undo ya. Badungu agu aboro nambu be gu kaza nga ga bakere gberãrago bi gupai nga gbia undo be amunganga ima rengba ka undoyo i du na diabese. Ojebode, Kaoru, gbiati Adriana aima gbia undo be amunganga na i gu duadu wenengai awere.

Amunganga ima rengba kafu dawa watadu ka fura namo nifu yo aberãpai tipa ka husa gu kaza nga ga bakere gberãrago. Agu aboro nambu be gu kaza nga ga bakere gberãrago naida a na gu undo ni zerangbaduse nga ga aborokporo gbiati abakure. Gu wene bakure rengbe ai boro kadu na ni nga Yekova, nga guko nafu bawene undo rogo Fugoko nga Baibiri.

Agu aboro nambu be gu kaza nga ga bakere gberãrago, si ima rengba ka ida gupai nga i gbia husa be amunganga tipa gbanga regbo na si ima rengba ka ida gupai nga i mangi ariapai kuti gayo gene raka. Ono ka si du nga mo nambu be gu kaza nga ga bakere gberãrago, mo ima rengba ka ngera tipa gu raka nga ga ngbarago du kumbatayo wakina Ojebode. Ko aya, “Mi nangera kumbatayo tipa ka bi Yesaya 33:24 si ni digisitihe, nga gu nagumbapa gu regbo boro ka yanga auru kpotosende ‘Mi nawoka te.’” Wakina Ojebode, mo gbia wasa ti gu ga Mbori kidohe du tipa “vovo kpotosende,” nga gu “ima” nikaa dunga rogoyo berewe ya. (Yugoti 21:1, 4) Gu kidohe re nayugo gupai nga bakere gberãrago gbiati fuda berãseyo adunga berewe te. Gamo agberãrago nika go kusayo nyeanye kindi. Gamo agberãrago, mo ‘atíngida nga pa ha te, si ayé nga ku berãro yo a te.’—Yesaya 65:17.