Mi asono Puerto Limón ku uroyo Costa Rica yo. Avungure adu na agude beyo muambe, na mi nangia saba yo. Buba akpi mbure na garã nga muambe. Nina asonosi rani zanga buba.

Ngi kandi bee nangia papara gimi raka. Ngi kandi aima ngba tire mbure ni gude. Ho garãre adu ni bangbanda 18 na 19, mi aga ku rogo gu riigbu ngi kandi nga ga amateur. Ho mi aangi kandi ni fu gu riigbu nga ga amateur mbure na garãre 20, kura kumba naagbata wene abangi mbaro asana re tipa mi ngi fu kura nyanyaki riigbu sa Nicaragua yo. Ono tie, nina ana kaza akaza ti gu regbo re na mi anaangerafuo ri, mi aaidanga ka raka Nicaragua yo te. Mi kini ká ka ndu ka ngi. Kusa, kura ko asana re berewe tipa mi ye ka ngi fu gu riigbu nga ga ringara nga ga costa rica, nga gu naadu na siakasiaka abangi kandi rogoho nga ga amateur. Bara gere, mi kini idihe. Mi atona ngi fu gu riigbu nga ga ringara rogo gu garã nangia 1949 kuti 1952, na mi angi dungu akandi rogo agu aringara nga Cuba, Mexico, gbiati Nicaragua. Mi anaangi awenengai na ki du ni gu boro i anaakido akido kuti ni, mi angi akandi nga 17 zanga manga kandara wiri ingahe sa. Rago anaangba tire kaa gia ndurumo aboro i ni tangbayo na rimore!

Gu gbegberẽpai duho nga, mi araki wasiwasi raka. Wa si avura du vuru nga mi adu na bangisa dee, mi aduadu na kura adee. Mi anaakpi buda. Rogo kura uru sa mi akpibuda, ho mi azingi ni rame yo rogo kura girorago, mi aatingidanga wai mi ayego ku kporo yo te! Mi anaangi dumuna gbiati ake.

Ti gu regbo mi aaraka ngbatunga gi raka re, nina ada ni boro sa dagba aDezire Yekova. Ri aasadi ka sare mi du na ri rogo gari idapase, ono ri aadunga na diabese ti bambataha te bambiko mi aima fu tire tipa gimi mbaro. Ho mi aanidu ni ba wirika kandi yo ti regbo riahe, gomoro anaamanganga re te! Berãre aanidu tipa kina kandi. Mi akpinyemu kandi susi ahe dunduko!

Ho garãre adu ni nga 29, mi awo ho mi aaida ka zio kandi ni ti gu regbo ani angi ru. Fuo mi hu behe, mi ambu ngi kandi fu ringara. Mi kini tona kaa yugo ngi kandi fu agu abangi kandi nga ga gu riigbu nga ga amateur nadu mbembedi na kpure.

Rogo gu garã nangia 1957, mi aidi yambahe tipa ka ndu tipa gu bakere dunguratise nga ga aDezire Yekova nga gu i aamangaha rogo gu ba ngi kandi mi aima ngi kandi nga ga bee rogoho mbata. Wa mi asungu dagba agu boro naye tipa dunguratise, mi abi gu kparakparapai du bangbanda gu mangaapai nga ga aDezire Yekova na gu mangaapai nga ga agu ndurumo aboro nanaaye tipa ka bi kandi. Gupai mi abihe ba gu dunguratise yo re asa re mi tona wirika Ziazia Kekeapai na aDezire Yekova na ki tona nduge tipa gayo adunguratise.

Rago aima ngba tire na gu badungu ayugopai nga ga Ziazia Kekeapai nga gu mi awirikihe. Ni kpiapai, Yesu agumba gupai nga ti yangara aregbo, gako abawiriki nika tungusapai gu wene pangbanga nga ga ga Mbori Kindo rogo zegino dunduko. (Matayo 24:14) Mi aye ka ino gupai nga ndikidi aKristano atungusa nga pai tipa marã te. Yesu aya: “Wa i nafuku ahe fu roni gbe, oni fúku he tigaoni kina wo.”—Matayo 10:8.

Wa mi aawirika Ziazia Kekeapai, mi anaaringbisa agu apai si anaapehe na agu apai mi anaabihe dagba aDezire Yekova. Mi aima kpinyemu gu ome i amangaha tipa ka tungusa gu wene pangbanga ga ga Mbori Kindo rogo zegino dunduko. Mi abi gu toro nga ga gamahe dagbayo nga gu Yesu azinahe fu aKristano i yuguhe. Ho mi agedi Marako 10:21 na ki bi ga Yesu yambahe ni nga, “mo ki ye ki nipeke re,” Mi aima ida ka da ni Dezire Yekova.

Si aima dia re na regbo tipa ka manga gi diaberã re. Tipa dungu agarã, mi anaangi gimi namba nga ga momu na aposo dũ bangi mbaro momu yo. Ono tie, mi awiriki gupai rogo Ziazia Kekeapai nga, Mbori aidanga na airisi gu mbori nga ga “Adoavure,” na airangbaduse te. (Yesaya 65:11; AKorosaio 3:5) Si du, mi adiberã ka mbu ba ake. Gu bambata rago Poso mi ambu ngi ake gbiati namba nga ga, “momu,” marã ati fere ti gi namba. Aboro atona ka moma re mbiko mi aanginga rogo gu poso re te, na i asosodi re mi ngi berewe, ono mi aaidanga ha te. Mi aandunga ku ba ake yo berewe te.

Mi agbia tire na kura asada berewe nga ga ‘vovo borose’ rogo kina boro gu uru mi azi bapatiza ti regbo gu bakere dunguratise nga ga aDezire Yekova. (AEfeso 4:24) Ho mi aakaraga tire ni ku rogo gu bambu rame ti marã mi aaraka rogoho rogo gu nyemu re, mi abi gu dee mi azi bakure na ri bakuru kusayo ri ni pidi re pangbadimo gimi bambu. Ri aya fere: “Mo yengo Sammy tipa ani gbia ngbarago wa sa!” Mi akaragapai fu ri ni ipo ki ya: “Oó!” Mi ape gupai fu ri nga, mi naraka awere kuti agu arugute nga ga Ziazia Kekeapai. (1 AKorindo 6:18) Ri ata ngbari ki ya: “Gine?”. Ri aumbasi pa gu bipai nga ga Ziazia Kekeapai tipa wasiwasi kodaba na ki kakuti gupai nga si naida ani tona gaani pabakure berewe na ri. Mi arimi ku dimo kpure yo na ki kisi gimi ngbadimo. Areme, mi na ngbarago ka gumba gupai nga, tona ti gu regbo mi ada ni Dezire Yekova rogo gu gara nangia 1985, mi ima nye niruru re kuti agu aariapai mi amangihe rogo gimi raka yo.

Mi nabihe wa ka i ya mi ke buku ake na pa agu aundo mi nagbiaha ti pekafuo agu arugute nga ga Ziazia Kekeapai! Bete agu aundo re nga, mi awere na ndikidi abakure, ndikidi maabangirise rogo raka yo, gbiati ndikidi ngbarago.

Mi nagbia ngbarago kindi ti ngi kandi nga ga bee, ono mi ima aria gimi bipai. Ngi kandi nga ga bee naye na irisa gbiati marã, ono agu ahe re anyenga kindi te. Gimi pabakure na Mbori gbiati ga awirinina du mi nga papara yo nika nyeanye kindi. Ziazia Kekeapai naya: “Zegino napaya apaya, na gaha nyemuhe: ono gu ni ka amanga gu pai Mbori akpi nyemu he ni nye anye kindi.” (1 Yoane 2:17) Awere mi nakpinyemu Yekova Mbori gbiati gako aboro kisusi ahe dunduko!