Mbori ambakadi kpotorani ngba iiriwo gene na gu rengba nga si hu ahu. Ho he ahõga kpotorani ni, ka mburaka rani, watadu ka rũ rani, “kpotorani natona gu kere kpakarakpakara sunge nga gu i ambakadihe si niwisi kiki aro na rukutu aro.” (Johns Hopkins Medicine) Kpotose namangapai ni ipo tipa ka rugusa gupai nga kure niga, ka kiiso gene kure, ka wiiso aro, na ka nyakasa apara kure.

MO MAKIANGA GIPAI RE: Ka si du nga Bakusiahe ambakadi kpotorani si niwiisi aro awiiso, ya mo ani arengbanga kadu na kido kuti gu gako kidohe nga ka undo rani ani hu be gu fudifudiapai nga ga berãseyo te? Bake papara Atambuahe akepai ki ya, “Ko nahusa agu yo du na rungo kpotoyo yo, ki vodi gayo aoro a.” (Atambuahe 147:3) Ka si du nga mo ni fudifudi ro berãro yo be agu apai mo amangihe kusayo, wai gu rengbe mo ka du na gu kido nga Yekova nika voda gamo aro avoda​—awere na kumbatayo?

Mbori nakidohe nga: “Ka mo gúnde nga ya, mbiko mi du na mo, ka mo kío nga ya, mbiko mi nga ga Mbori; mi anyákasa ro, mi aúnda ro, mi asóngoda ro ni kumbabere du na gi rurupai.” (Yesaya 41:10) Gu boro ini gupai nga Yekova naberã pani aberã, ni na gu zereda nga ga berãse yo na ni na ome tipa ka sovura kuti dungu aˈasada. Gu mokedi nangia Pauro ayambu gi zereda nga ga berãse yo re nga, “gu zereda nga ga Mbori nagasi rugatinapai dunduko.” Pauro agbia kurapai kuti ni berewe nga: “Mi rengbe na manga apai dunduko rogo gu ko nanyakasa re.”​—AFiripoio 4:4-7, 9, 13.

Ziazia Kekeapai naundo rani ani sonosi idapase kuti ga Yekova akidohe tipa ga aboro raka kumbatayo. Ni kpiapai, Yugoti 21:4, 5 (du afugoho rogo gu kpewaraga ngbefuo gere) nape gupai furani ko nika mangaha na ndu gupai rengbe ani ka kido kutiko ti ni nga ko nika mangaha amanga:

• “Ko awéga aume” ti bangiri aboro kusayo dunduko. Yekova nika dia gaani arungo gbiati gaani abakabangirise kusayo dunduko, zavura gu gaani abakabangirise nga gu anyakanga paha bangiri kura aboro ya.

• “Nasungu auru mbatabakindo” rogo gu taarimo nga ngbangbaturũ, gu Bakindo Du na Tanduapai Dũ kurii kusikusiahe nika mangasunge na gako ome gbiati pagbia tipa ka dia arungo na ka fu gu undo furani ani aidaha.

• Yekova ima yugoho nga gako akidohe ni ‘ruru he na nirengo a.’ Gere nayugo gupai nga Yekova ima maa fuo beko ti gipai re na rimoko nga ko nika manga gipai re amanga.

“‘Ko awéga aume ti bangiriyo ku sa yo dunduko. Kpio adú nga berewe te, rungo adú nga yo na akpe na ima a te, bambiko bambata apai aima nyasa.’ Gu ko nasungu auru mbatabakindo, ko ki ya, ‘Oni ngére, mi nambakada ahe dunduko ni vovo ho.’ Ko ki ya, ‘Mo ké agi apai re, bambiko si nga ruru he nga rengo a.’”​—Yugoti 21:4, 5.

Zegino gbiati Ziazia Kekeapai nayugopa wai du gu Barani du ngbangbaturũ yo furani gbiati asino ko. Wa vura duhe nga kusikusiahe narukuba ndikidi yambahe tipa ka ino Mbori ni gu Bakure du na nyemuse, Ziazia Kekeapai namaa gu yambahe re gbaiga nga: “Oni mbédi na Mbori, ko ki mbedi na oni.” (Yakoba 4:8) Amokedi 17:27 naya: “Ko aturã nga na ani wa sa te.”

Wa mo nikaa dia regbo tipa ka ino Mbori, mo nika ida kuti gupai nga “ko naberã pa” ro aberã. (1 Petero 5:7) Gini aundo du ti du na ngbatunga gi kido kuti Yekova re?

Mo makianga gupai naadu tipa Toru du Yapani yo. Nako nangia Kristano nasonosi ko, wa si avura du wo, ko arimisi tiko ku rogo gu sunge zuu nga ga agu amangi gbegberẽ apai nga ga Yapani yo. Ko aya, “Mi aima ida kuti gupai nga Mbori ima soga re, na mi aima inoho nga pakpio agu aboro du patire, gbe, aguyo mi akpinyemu yo, angia mbusa kurire.” Toru idi kuti gupai nga mbiko gi gbegberẽ aboro ko aaraka dagbayo re na gayo gbegberẽ aberã, ko ada “ni gu boro adunga na nunga ya.” Nibipa gako nyemupai, ko aya, “Mi aaida ka kpi ni agbaa re fuo imo mi gu boro kiipa ni kisusi re tipa ka ye na worimo kurire.”

 Ono tie, ho Toru na diako nga Hannah awisigi Ziazia Kekeapai ni, Toru amangi ariapai tooni tooni rogo gako raka na wai ko anaangera. Hannah aya, “Mi aabi kumbami abi ko nimangi ariapai.” Awere, Toru nagumba gupai na kido nga: “Mbori gu du kinaho naberã pa rani ni basasa. Ko aidanga boro kpi te, na ko na nyemu ka mbupai fu agu aboro nasaberã yo ti gayo aingapai. Ko nadegatuko adega kuti agu apai ka ani arengbanga ka gumbaha fu kura boro ya ono fu kinako na kuti gupai ka kura boro aruganga ti ni na ni ya. Barambeda kumbatayo, Yekova nika dia akpakarapai dunduko, arungo, gbiati aima. Zavura kina awere, ko naundo rani aundo ngba agu agene ani aberãnga paha ya. Ko naberã pa rani aberã na kini undo rani ho du ani ni ngbaapai yo.”​—Atambuahe 136:23.

A wa ga Toru pangbanga ayugoho, ino gupai nga Mbori ima rengba ka dia agberãngo kusayo na ki wege aume kusayo bangirani yo afunga kina maabangirise furani tipa kumbatayo te ono si naundo rani aundo ani raki wene raka awere. Nirengo, zavura rogo gu zegino hii be arungo re, mo ima rengba ka gbia undo ti ga Mbori undo.