LUZIA NATERENGA NA GARE NDURI. Mburi ni tooni gude, ri adi gu kaza nga porio, nga gu kere kaza nasovura kuti agu agbaga nadia apai berãse yo kaa kedaha ku rogo apapara boro dunduko. Ho garã Luzia ada ni nga 16, gu dee ri aamangasunge furi agumba gupai furi nga, “Mbori afu gu mbusa foro nga ga gbarã mbiko gupai nga mo anaagianga sangba avunguro te na mo angia boro nyakarii.” Tingbafuo agarã kusa, Luzia na berã kindi kuriipa gu gberãrago ri adu na ni.

HO DAMARIS AINI GUPAI NI NGA RI NA GU KANSA NGA GA BERÃ, bari asana ri nga: “Ginipai du mo namangihe sa gipai re si mangi ro? Si wa mo ima manga kere gbegberẽpai. Si du Mbori afu mbusa ti ni foro.” Rago aima gberã ti Damaris ni kerehe.

Tipa akutu agarã, aboro aima ida kuti gupai nga kaza nga mbusa be Mbori. Buku sa (Manners and Customs of Bible Lands) nape gupai nga, badungu aboro ti gu regbo nangia ga Kristo aidi kuti gupai nga “kaza naye singia be gu ingapai nga ga gu boro nawoka, watadu be gu ingapai nga ga agumeni, na si nga mbusa tipa gu ingapai re.” Buku sa (Medieval Medicine and the Plague) nape gupai nga, bangbanda bisue kama agarã na bawe na bisue kama agarã Fuo Batikayo Kristo, “kura aboro aidi kuti gupai nga Mbori aye na riri-akaza tipa kafu mbusa fuyo tipa gayo aingapai.” Sidu, ho amirioni aboro akpi ni be riri-kaza rogo ringara Putu kirikiri rogo 14 kama agarã, Ya mo Mbori du naasarangbanga gbegberẽ aboro? Watadu gu riri-kaza re aye gbua mbiko bakiteria, ringbisihe kuti gu wetekapai nga ga agu aboro nawisigopai tipa akaza? Kura aboro ima rengba ka baka bangiriyo nga, ya mo Mbori namangasunge amanga nzunzu na akaza tipa ka mbusa aboro tipa gayo aingapai? *

MO MAKIANGA GIPA RE: Tipagine ka Yesu arengbe ka husa aboro ti ni ka si angia kaza gbiati rungo angia mbusa be Mbori? Ya mo ka gure adunga wa bapa ga Mbori ruru sarangbanga na ruru mangaapai te? (Matayo 4:23, 24) Yesu aarengbanga ka manga gupai naadu kia ti gu Mbori amangaha te. Ko aya: “Mi namanga kina agu apai ngba ti ko waragoagira” na, “wa Buba afu rugute fere, kina wo mi amanga.”—Yoane 8:29; 14:31.

Ziazia Kekeapai ima gumbaha gbaiga. Yekova Mbori “zanga irairapai.” (Pa Fu Rugute ni Ue he 32:4) Ni kpiapai, Mbori arengbanga ka sa tiyara (avion) si ti ariyo ki imi dungu akama aboro wenesa mbiko gupai nga ko naida ka fu mbusa fu boro rogo gu tiyara re te! Ringbisihe kuti ga Mbori ruru mangaapai, ga Mbori ruru moyambu nangia Abarayama aya, ka Mbori ‘gbárasingo ruru aboro na gbegberẽ aboro te.’ Ko aya “si túrũ aturã.” (Bambata Pai 18:23, 25) Berewe a, Ziazia Kekeapai naya, “Mbori amanga nga gbegberẽ te”; ko ‘amanganga irairapai te’.—Eyobo 34:10-12.

Ho ani arungo ni anga si nga Mbori nafu mbusa furani mbiko ani mangi ingapai te. Yesu nitiko aima fura tipa gipai re gbaiga ho ko na gako abawiriki abi kumba ni nga guko i avungu ko na vurari. ‘Gako abawiriki ki sana ko, ki ya, “Bayugupai, watadu gi kumba re, na avunguko, da namangi gbegberẽpai, i avungu ko ti ni na vurari?” Yesu ki karaga ha ki ya, “Gi kumba re watadu avunguko; i amanga nga gbegberẽpai te, si adu wo i yugu kina ga Mbori pai rogo ko yo.”’—Yoane 9:1-3.

Nibi gupai nga gi iraira bipai re aima maapai, si na wira wa ngba ga Yesu abawiriki aima zera ho ko aya ni we gi kumba re watadu avunguko aamanganga ingapai ngba gu gene naye na gi gberãngo re te. Yesu aahusanga  kina husi husi ga gi kumba re vurari te, ono pa husa ko gi kumba re aˈaria gu ziree ida nga rungo nga mbusa be Mbori. (Yoane 9:6, 7) Agu aboro nambu be kere akaza areme ima rengba ka gbia wasa ti inoyo gupai nga anga Mbori nasayo i ni rungo te.

Ziazia Kekeapai nafu kidohe furani nga

• “Ka i asadi nga Mbori na gbegberẽpai te, ko aasada nga boro tigako wa sa te.” (YAKOBA 1:13) Nirengo, gu “gbegberẽpai” nga gu niima manga aboro tipa akama agarã, kodihe na kaza, rungo, na kpio, i nika diaha kusayo barambeda.

• Yesu Kristo ‘ahusi agu yo dunduko naa kaza.’ (MATAYO 8:16) Wiri Mbori ayugu gupai ga Mbori Kindo nika mangaha rogo zegino dunduko ni husa ko agu aboro dunduko naaye fuoko.

• “Ko [Mbori] awéga aume ti bangiriyo ku sa yo dunduko. Kpio adú nga berewe te, rungo adú nga yo na akpe na ima a te, bambiko bambata apai aima nyasa.”​—YUGOTI 21:3-5.

Tipagine du tie aboro agbiatiyo ti ni na bakere fudifudiapai gbiati arungo? Aboro aima digo niberẽkurii gu sanahe re tipa dungu akama agarã. Ka si du nga Mbori si aida ani birako te, da du tie si aida ani birani? I nika sakapai tipa agu akaragapai du kuti agu asanahe re rogo gu kekeapai ngbefuo gere.