Gu rugute nga ga Baibiri: “Ka oni dú nga ni akanga fu nyemu marã ya; agu ahe du be roni si ki rengbe bangironi.”​—AEbere 13:5.

Badungu ahe du ho areme rogo zegino aboro azomia rani tipa ani gbiaha. Ono tie, Baibiri naya ani “rengbe” be kina agu ahe du berani. Wai du rengba ani ka mangaha?

Ani mbu ‘kpinyemu marã.’ Aboro rengbe ka manga ai pai tipa marã ka si vura du vurũ nga si rengbe ka gbarasapa kpotoyo, gayo aborokporo, asino yo, zavura gayo kikii tipa​—‘kpinyemu marã.’ (1 Timoteo 6:10) Gupai re ima gberã wai! Niyangaraha, gu boro nakpinyemu kumuko si “anyasa nga gani nyemuhe” te.​—Batungusipai 5:10.

Mo bi aboro na nyanyakipa yo ti ahe. Nirengo, aũborose naundo aundo. Ono ka si kpingo nyemu rani watadu ka tambua rani te; kina aboro rengbe ka mangaha. Du na ndikidi “abadia ngbanya” watadu ndikidi abakure rengbe ka undo rani ani du na ngbarago.​—Asanza 17:17.

Gu rugute nga ga Baibiri: “Wasawasa kpoto boro yo du wa wene ngua kaza.”​—Asanza 17:22.

Wakina “wene ngua kaza,” ngbarago rengbe ka undo rani ani hi kaza. Ono wai du rengbe ani ka du na ngbarago baraho ani awoka awoka ni?

Mo du na tambuahe. Ka ani nye kuti berãkurii gupai nafuda rani, ‘aʹuru dunduko’ nika du ni gbegberẽhe bangirani. (Asanza 15:15) Kuba gure, Baibiri naya, mo “nitambua he.” (AKorosaio 3:15) Mo asadi kadu na tambuahe tipa gu wene apai namanga rogo gamo raka yo, ka si vura umba wai vurũ. Nzere uru ho si ati ni, wene dodoroma wege nyemu, gbiati fugo gu boro du patiro rengbe arengba ka fu ngbarago foro.

Mo mangi apai fu kura aboro. Ka si vura du nga kpotorani wenengai te, “fu he ngba ti dia ha.” (Amokedi 20:35) Ho aboro atambua rani ni tipa gu ome ani amangaha, si nafu wasa furani gbiati ngbarago, na gure nadia berãrani kusayo ti gaani fudifudiapai. Ani rengbe ka sa gaani raka si du ni wenehe ni undo ani kura aboro tipa gayo raka du wenengai.

Gu rugute nga ga Baibiri: ‘Oni idipa agu apai nangba [watadu agu apai nyakipaha].’​—AFiripoio 1:10.

Agu arogotise adianga regbo ka sungo sa ya ima rengba ka gbarasapa gayo rogatise. Si naida kumba na dee bi gayo rogatise ni guhe nyakipaha gbe rogo raka yo.

Oni mangi apai sa. Kuba gupai nga boro naamanga apai ni sani, si adu wenengai ka i mangi mbakadapai kaa manga apai kina sa. Baibiri naya, “Du aboro ue ngba ti du boro sa.” (Batungusipai 4:9) Oni ima rengba ka manga riahe sa, mangonvo, ka sungo kporo ka zambuasi tironi, na ka ndu ka ngi ambaro sa.

Mo kpinyemu gamo badiarogatise. Baibiri nangarasa arogotise nga i kpinyemu tiyo na kini irisi tiyo. (AEfesa 5:28, 33) Mongo ti ngbase, dungotise, watadu fu wiri tooni gamahe ima rengba ka nyakasa gaoni rogatise. Kina rengo du nga, si naida mo kodiba sa na kina gamo badiarogatise angianga na kura boro ya.​—AEbere 13:4.