Mbori Akusi Rani Ani Raki Nyeanye Kindi
DA Dagbarani aidanga ka gbia ngbarago rogo raka yo ya? Mo berẽnga kina pa wai raka nika ngba ho aboro nika raka ni na wene kpotoyo zanga akaza! Gure rengbe ka sarani ani raki ni gbangaha na abadiangbarani, ani ta rogo gu kura arago, ani wiriki gu kura abirĩ, ani du na tatamana, na kini wiriki gu dungu apai ani aida ka inopai tipaha.
Anga gere nga gupai aboro aida ka mangaha te? Tipagine aboro aida ka raka ti ni nyeanye kindi? Ziazia Kekeapai nape gupai furani nga Mbori amoi nyemupai ku kpotoraniyo. (Batungusipai 3:11) Baibiri naya berewe a “Mbori nga nyemuse.” (1 Yoane 4:8) Ya mo mo nabihe nga gu Mbori nga ga nyemuse ko rengbe ka maa nyemu raka nyeanye kindi ku rogo rani yo kina ko berewe ki ni ru ka saha ni mbumbupai tipa si mangi?
Si tie ziazia nga boro ho naida ka kpi te. Nirengo, Baibiri nayamba kpio nga ‘vurarani.’ (1 AKorindo 15:26) Kpio naye fuo kura aboro mbuyo kindi rukutu; na agu akurayo i nagbinza. Ono gu rengo duho nga ani dunduko nika kpi akpi. Tipa kura aboro, i aidanga ka berã kandara berẽberẽ paha te, mbiko si naba kina gunde tiyo. Ya mo Mbori anyasariipa gi vurarani re? Ya mo si taata nirengo?
GU GOPAI NAFU MAABANGIRISE
Ya mo ngbaro rengbe ka zera ka mo ini gupai nga anga ga Mbori ringbisapai nangia aboro ni kpiki te? Gu bambata kitabu nga ga Baibiri nga Bambata Pai nafu gu gopai nayugoho nga ga Mbori ringbisapai tipa aboro auru kpotosende angia i raki nyeanye kindi. Yekova Mbori ambakadi kpotosende na agu ahe dunduko aboro aidaha tipa kaa raka. Fuani, ko akusi bambata kumba nangia Adamu na ki moiko ku rogo ati nangia Edene. Fuo gure, “Mbori ki bi agu ahe dunduko ko amangi he, oni ngére, si ki du ni wene he gbe.”—Bambata Pai 1:26, 31.
Pa Fu Rugute ni Ue he 32:4) Zavura diako nangia Eva ingapai aadunga ti ri te, ri adu wenengai ti kpotori na berãri yo. Yekova aya fuyo: “Oni zúga azuga, ki nge ange, ki hisi kpotosende berewe ki zogo ho; ki nikindo auru agu atĩo du baime yo na auru azire ari na gu unga anya dunduko nawo awo auru kpotosende.”—Bambata Pai 1:28.
Mbori akusi Adamu rogo kpiako yo zanga ingapai du tiko. (Si adu nga si nika dia regbo adia tipa i hiisi kpotosende na awiriyo. Si aaida Eva batika, awiiri ki tona batika awiriyo daho ka aboro ahiisi kpotosende ni kina wai Mbori aida si mangi. (Yesaya 45:18) Ya mo si rẽarẽ boro berẽ gupai nga, ya mo Yekova arengbe ka fu gu momu nga ga raka nyeanye kindi fu Adamu na Eva ka si adu nga i nika raka tipa kina bete regbo ka bi awiriyo na atita yo zanga i ini gupai nika manga yo?
Mo berẽnga kina pa gu sunge Mbori afuhe fuyo nga ga zoga anya. Mbori aya fu Adamu ko yambu rimo anya, gu sunge re nisaha aima dia gbanga regbo. (Bambata Pai 2:19) Naida ka ya tipa ko zogo ra, ka si aidi gupai nga ko wirikipai tipa ra na ki inidi tiko na ami wenengai tipa ka ngerafuo ra. Ka gure adi gbanga regbo kisusi yamba kina rimo ra gbua.
Gu rugute Mbori afuhe fu bambata arogotise nga i hiisi kpotosende na ki zogo anya re nayugo gupai nga ko ambakadi yo i raki tipa gbanga regbo. Nirengo, Adamu aima raka tipa gbanga regbo gbe.
GA MBORI RINGBISAPAI TIPA ABORO NGA I RAKI NYEANYE KINDI ROGO PARADIZO KPOTOSENDE
I ARAKI TIPA GBANGA REGBO GBE
Adamu, agarã 930
Metusera, agarã 969
Noa, 950 agarã
Agarã aboro areme, 70-80
Baibiri nape gupai nga aboro aima raka ni gbangaha kisusi rani areme. Si naya: “Garã Adama adu dunduko 930.” Fuo gure si fura tipa gu kura akumba sita naima raka kisusi agarã 900! Agu akumba re angia Sete, Enosa, Kenana, Yerede, Metusera, na Noa. Agi aboro re dunduko araki mbata fu gu Ime Akangbii naadu ti rago Noa—Noa araki tipa agarã nga 600 mbata fu gu Ime Akangbii re ye. (Bambata Pai 5:5-27; 7:6; 9:29) Ginihe naasa agu aboro re i raki ni gbangaha wa gure?
I abatika agi akumba re tingbafuo i do Adamu na Eva ati Edene yo mbata fu ingapai moipai. Si nawira wa si nga ndu gupai i araki ti ni ni gbangaha. Ono wai du duhe nga pa zanga ingapai nasa boro ni raki ni gbangaha? Na wai du Mbori nika diabe kpio? Tipa ka gbia karagapai, si naida ani rugutirani na ndu gupai ani agbinza ti ni na kini kpiki.