WA Vura duhe nga gu basasangba nga ga bambata avungura nangia Adamu na Eva aye na kpio kurii aboro dunduko, si aʹarianga ga Mbori ringbisapai tipa aboro te. Rogo Fugo Mbori nga Baibiri naabaha, ko ima yugoho gbaiga nga gako ringbisapai aʹarianga tihe te.

• “Ruru aboro adía kumbo ringara, ki nye anye kindi.”​—Atambuahe 37:29.

• “Ko adígisa pa kpio nye anye kindi, Gbia Mbori awéga aume ti bangirise ku sa yo dunduko.”​—Yesaya 25:8.

• “Yangara vura i nikagbarasa ha nga kpio.”​—1 AKorindo 15:26.

• “Kpio adú nga berewe te, rungo adú nga yo na akpe na ima a te.”​—Yugoti 21:4.

Wai du Mbori nika ‘digisa kpio,’ nga vurarani na ki ‘gbarasihe’? A wa ani ni bihe, Baibiri napehe ziazia nga “ruru aboro . . . [nika] nye anye kindi.” Ono Baibiri naya berewe wẽ “a nga ruru boro auru kpotosende no namanga wenepai” te. (Batungusipai 7:20) Ya mo gure nayugo gupai nga tipa Mbori dibe kpio, ko nika mbupa gako andiko ambu du tipa ruru sarangbanga tipa aboro ingapai raki nyeanye kindi? Ka pai mangingo wa gure te! Mbori arengbanga ka mangapai wo te mbiko ko nga gu “Mbori arengba nga na re zire ya.” (Tito 1:2) Ginipai tie ka Mbori amangihe tipa ka digiso gako bawene ringbisapai naadu tipa aboro?

Yekova Mbori amangi wene mbakadapai tipa ka batasa aboro be kpio ni fuko motumo. Motumo nga guhe boro atumoho kuba guhe gberẽ paha na ba nyakapaha nadu kina kubani sa. Wa duhe nga aboro dunduko nangia aboro ingapai Mbori aima sarangbanga yo sa kpio, Baibiri napehe ziazia nga: “A nga boro ho sa rengbe na tumo wirinani te, watadu ka fu motumo fu Mbori tipa ni a te, bambiko tumo mbisimoni du ni kikiipa he, gasi pa ha agasa kindi.”​—Atambuahe 49:7, 8.

Ho boro ingapai akpi ni, ni natumo kina gani mosoro ingapai; ni arengbanga ka tumo tini te, watadu ka tumo gu ingapai nga ga kura aboro te. (ARomo 6:7) Ani aaida na gu boro adu nga na ingapai tini ya tipa ni fu unga ni, tipa ka tumo rani ti gaani aingapai.​—AEbere 10:1-4.

Gere nzunzu nga gu mbakadapai Mbori amangihe. Ko akedi Wiriko nga Yesu ngbangbaturũ yo ku auru kpotosende ane i batika ko ni boro zanga ingapai tiko. (1 Petero 2:22) Yesu aya ko aye “ka manga pa aboro, ka tumo dungu yo ni ungako.” (Marako 10:45) Ko akpi tipa ka kusa rani be ingapai na kpio wa ka ani du na unga berani.​—Yoane 3:16.

Areme, nibi gupai sangbaanebi agumbaha, ani naraka rogo “gbegberẽ rago” nayugo na ni nga ani naraka rogo “kusa rago” nga ga gi gbegberẽ zegino re. (2 Timoteo 3:1) Gi kusa arago re nika digo na “rago sapangbanga na rago gbarasa azangasinombori.” (2 Petero 3:3, 7) Ono agu aboro nakpinyemu Mbori nika bata abata be gu gbarasahe re na ki gbia “nyenye unga.”​—Matayo 25:46.

Kura amirioni aboro nika gbia gu momu nga ga raka nyeanye kindi ho i nika zingisa yo ni. Yesu azingisi boro be kpio ho ko andu ni ku rogo gu gbata nangia Naina. Bangisa wiri dekurugbo akpi, na “nungari ki nimangi [Yesu] amanga,” ko ki zingisi ko be  kpio. (Ruka 7:11-15) Gu mokedi nangia Pauro aya: “[Mi na]maa bangire koyo du Mbori ni ya ruru aboro azinga be kpio na iraira yo a.” Gi nyanyakipa maabangirise re nga gu bakere gopai nayugopa ga Mbori nyemuse koyo du aboro ni.​—Amokedi 24:15.

Abirioni aboro rengbe kadu na maabangirise tipa ka raka nyeanye kindi. Baibiri naya: “Ruru aboro adía kumbo ringara, ki nye anye kindi.” (Atambuahe 37:29) Ti gu regbo re, aboro nika du na bakere ngbarago gbiati wasa ka bi rengo agu afugo gu mokedi nangia Pauro ko akehe agarã wa 2,000 kusayo nga: “Ako kpio, wari du ga diabese ni? Ako kpio, ga egetera wari?” (1 AKorindo 15:55) Ti gu regbo re, gu bakere vura aboro nga kpio, Mbori nika diabehe kusayo!