“I amoi mbatabakindo ngbangbaturũ yo, gu ko ki sungu auru mbatabakindo. Ngbanya gu ko nasungu adu wa gu mbia nga yasipi na sadio. Wangu adu kengerekengere pati mbatabakindo, si adu bangirise wa kina zumeradi.”​—Yugoti 4:2, 3.

“Imaima imarago ki du kirikiri pati ko. Kpia gu imaima imarago re kirikiri adu wa kpia wangu, nga gu ru nikuru mai yo rago na mai. Were kpia gu taarimo nga ga Yekova adu ni yuguyugu he.”​—Yezekere 1:27, 28.

Gi yuguyuguapai i ayuguhe fu gu mokedi nangia Yoane na gu nebi nangia Yezekere re, nayugopa gu taarimo nga ga gu Mbori nga Behe Kisusi nga Yekova, na agu ahe rengbe ani arengba ka dekpiaha​—kurẽkurẽ ambia, kpia wangu, na bakere mbatabakindo. Si nayugo gupai furani nga, gu ba Yekova araka rogoho nga bawene iiriwo rago, du na ngbarago, gbiati zereda.

Agi akpiapai du tipa Mbori re nandu sa na agu afugo bake papara Atambuahe akehe nga: “Bambiko Yekova nga bahe, rengbe na tambua ko bakere gbe; i ka gunde ti ko susi ambori dunduko. Bambiko ga aboro ambori dunduko nga kina kungba ahe; ono Yekova namangi angbangbaturũ. Irisa du bara bangiriko na bairiwo; ome du rogo gako kparakpara ziazia ba na wene ngbanya.”​—Atambuahe 96:​4-6.

Wa vura duhe nga Yekova nga Bahe Kisusi, ko nayamba rani ani mbedi na ko rogo kparakpee na ko nakido rani nga ko nagia gaani kpee agia. (Atambuahe 65:2) Mbori nakpinyemu rani na kini berẽpa rani nyanyaki, si naasa gu mokedi nangia Yoane ko ke gupai nga: “Mbori nga nyemuse.”​—1 Yoane 4:8.

“[Gu bawiriki nangia Setefano], nahi be Ziazia Toro, ki ningere ku ngbangbaturũ yo kindi, ki bi ga Mbori taarimo na Yesu, ko ru pati kumbabe Mbori. Setefano ki ya, “Oni ngére mi nabi ngbangbaturũ ni zaza ha, Wiri boro ru pati kumbabe Mbori.’ ”​—Amokedi 7:55, 56.

Mbata fu Setefano bi gi yuguyugupai re, kina agu aboro naimi Yesu Setefano aafura fuyo​—ga aYuda abarumbatayo. Gu yuguyugupai re ayugu gupai nga Yesu ni ungako, ko aima zinga be kpio na ki gbia taarimo. Nibipa gipai re, gu mokedi nangia Pauro akepai ki ya: “Ho ko [Yekova] azingisi [Yesu]  ni be kpio dagba akangba. Mbori ki ya ko sungu pati kumbakeko rogo agu arago du ngbangbaturũ yo, tuturũ ri azogoaboro dũ, na asia pa pai, na tandu, na kindo na agu arimo dũ i ayamba, kina rogo gi zegino sa te re, rogo gu a nikaye.”​—AEfeso 1:20, 21.

Kupati ringbisapa gako bakere bangiriba, Ziazia Kekeapai nayugo gupai tipa Yesu nga, wa kina Bako nga Yekova, ko naberãpa aboro dudunguro. Ti gu regbo Yesu aamangasunge tungusapai auru kpotosende ane, ko ahusi akaza, gbiati gbarigbari aboro, na ki zingisi kangba aboro. Ko ayugu gako dudunguro nyemuse tipa Mbori gbiati aboro ni fuko tiko ni motumo. (AEfeso 2:4, 5) Wa ru Yesu pati kumbabe Mbori, ko nika mangasunge barambeda na gako pagbia na ki ye na bakere amaku fu agu aboro du na giasangba rogo arago dunduko.

“Wa mi [gu nebi nangia Daniere] angera, i amoi ambatabakindo gu ko nga Bakuru Ko [Yekova] du ho kindi, asungu ri gako basunga. . . . Aboro wa kutu bawe bara kutu bawe ki ru bara bangiriko.”​—Daniere 7:9, 10.

Rogo gi yuguyugupai du tipa ngbangbaturũ re, Daniere aabingo bangisa maraika gbua te, ono ndurumu amaraika. Nairiwo gu yuguyugupai nangiaha! Amaraika ni iiriwo yo na gu kpoto tiyo nga ga toro, i na tatamana gbiati ome. Ariko yo nakoda aserafa gbiati akeruba. Ziazia Kekeapai fura tipa amaraika susi bara 250.

Anga amaraika nga agu aboro naaima raka mbata auru kpotosende te. Mbori ambakadi yo mbata fu ko kusi aboro. Ho i amoi amburu kpotosende ni, amaraika adu kinaho kini ngbiko ni ngbarago.​—Eyo 38:4-7.

Gene sa dagba agu akuraha amaraika amangasunge areme ngbaha fu Mbori nga, kodayo be kuti gu nyanyakipa sunge nga gu namanga areme rogo zegino​—takapande gu wene pangbanga du tipa ga Mbori Kindo. (Matayo 24:14) Pa kodayo be kuti gi sunge re adu ni yuguyuguhe fu gu mokedi nangia Yoane, nga guko nakepai ki ya: “Mi ki bi kura maraika, ko nigu bebere ngbangbaturũ yo, nyenye pangbanga ki du ngbako yo ka tungusa ha fu agu yo dunduko naraka auru kpotosende, na fu arikaaboro, na ngbatunga aboro, na ngbatunga afugoyo, na aboro.” (Yugoti 14:6) Wa vura duhe nga amaraika afuranga fu  aboro areme wa gu i anaamangaha mbata te, i naundo agu aboro natungusa wene pangbanga i kuru bara agu aboro du na ruru ngbaduyo yo.

“Vura ki du ngbangbaturũ yo, Mikaere na gako amaraika ki so vura na daragona; daragona ki niso vura na gako amaraika a; ka daragona adia nga be he ya. Ka i aida nga fu daragona na gako amaraika i bi ba berewe ngbangbaturũ yo ya. Were i ki ba bakere daragona ku sende yo, nga gu bakuru wo, nga gu ko i aniya ti ko, Bakitingbanga nga Satana, nga banangi aboro kpotosende yo dunduko; i ki niba ko ku sende yo na gako amaraika a.”​—Yugoti 12:7-9.

Ngbangbaturũ ti aregbo dunduko na kina zereda. Ti kina tonatona gu raka nga ga aboro, kura maraika sa akpinyemu i irisiko, ko ki samungu kuti Yekova ki da ni Satana, du rogoyo nga “Vuraboro.” Kusa, kura amaraika akodi tiyo kuti gi samungu re na ki da ni adaimona. Gi gbigbita aboro re nasovura kuti Yekova, na i ima ingisa dungu aboro ngba ga Yekova gene.

Satana na gako adaimona nga kere gbegberẽ sino aboro. I nga avura ngbatunga aboro dunduko na i ima fu bee ni bakerehe kuti agu arungo namanga auru kpotosende. Ni kpiapai, Satana aimi ga gu ruru kumba anya gbiati amoyambu nangia Eyobo. Fuo gure, ko aimi awiri Eyobo dunduko bawe ni ye ko na “bayuge” si kiti gu bambu i adu tiihe kuriyo. Fuoho, Satana ki ukadi Eyobo na “abagita si ki tona kpanduko yo ki da ti riko.”​—Eyobo 1:7-19; 2:7.

Barambeda i nika gberesa Satana. Wa duhe nga i abako ku auru kpotosende no, ko ima inoho nga “kina bete rago nye fu ko.” (Yugoti 12:12) Satana rogo kerepai, na gure nga wene pangbanga furani!

“Mo [Yesu] angbe aboro ni kurero fu Mbori dagba angbatungayo, na angbatunga afugoyo, na aboro, na arikaaboro dunduko, ki sa yo ni abakindo na aboromotumo tipa gaani Mbori; i ki nizogo rago auru kpotosende.”​—Yugoti 5:9, 10.

Kina wai Yesu azingibekpio auru kpotosende ki ga ku ngbangbaturũ yo, kina wo duhe tipa kura aboro a. Yesu aya fu gako ruru amokedi we: “Mi nandu ka mbakada ba fu roni. Ka mi ndu, . . . Mi ayé berewe, ki rogo roni fuo re; ho du mi ni, oni du a ho.”​—Yoane 14:2, 3.

Agu aboro nandu ku ngbangbaturũ yo, nandu na ndupai. I nika koda tiyo na Yesu rogo gu zogarago nga ga Kindo nga gu nika zogarago ku auru  agu aboro dunduko naraka auru kpotosende na ki ye na amaku kuriyo. Gere du nga gu Kindo Yesu aya fu apefuoko i nikpari tipaha rogo kpia kparakpee yo: “Barani du ngbangbaturũ yo, Ani írisi rimoro airisa. Ga ngbi yé, Ani mángi rogo kpotosende wa mo akpi nyemu he, wa du he ngbangbaturũ yo.”​—Matayo 6:9, 10.

“Mi [gu mokedi nangia Yoane] ki gi bakere fugo yo du mbatabakindo ni, naya, “Oni ngére, ga Mbori banye du na aboro, . . . ko awéga aume ti bangiriyo ku sa yo dunduko. Kpio adú nga berewe te, rungo adú nga yo na akpe na ima a te, bambiko bambata apai aima nyasa.’ ”​—Yugoti 21:3, 4.

Gi yuguyugu sangbanebi re nafura tipa gu regbo ga Mbori Kindo, nga gu nakoda Yesu gbiati agu aboro i azingisiyo auru kpotosende nika digiso ga Satana zogarago na ki sa kpotosende ni Paradizo. Agu apai nafu rungo gbiati imisiri fu aboro adunga berewe te. Zavura kpio nika go ago kusayo.

Na ginipai tigaha du tipa agu abirioni aboro naima kpiko nga aguyo i nikaa zingisanga yo tipa i ga ku ngbangbaturũ ya? Kumbatayo, i nika zingisayo na gu maabangirise nga ga raka nyeanye kindi rogo Paradizo kpotosende.​—Ruka 23:43.