1-3. Si nawira wa agu akpakarapai naadu dagba Euodia na Sunduke atona wai, na wai du rengbe ani ka ne ngbatunga agu akpakarapai re? (Oni bi gu sura duti tonatonaha.)

GA YEKOVA amoyambu nabi ga Mbori ziazia buku nga Ziazia Kekeapai na nyanyakipaha. Ani dunduko ninaagbia agu arugute nga ga Ziazia Kekeapai, mbiko ani nga kpakpa aboro. Sidu, wai du ani naamanga pai sa ni? Oni bingo gupai naadu tipa agu aKristano naadu rogo bambata sa kama agarã nangia, Euodia na Sunduke. Akpakarapai kinaho nakuru dagba gi mbedimbedi adee re. Gini akpakarapai du naadu? Ziazia Kekeapai afuranga tipaha te. Ono tipa yugokpiapai, oni bingo gupai narengbe ka manga dagbayo.

² Ka si du nga Euodia ayambu kura awirina ku kpuri yo tipa i sungu na ki ri riahe. Ka ri ayambanga Sunduke ya, ono ri ki ima gia pa gu wene apai namangi koyo. Sunduke aima rengba ka ya: ‘Kina ngbare zere nga Euodia ayambanga re te! Mi naaberã tigimi nga wene abakure ningia ani.’ Sunduke ki tona ka kapa kuti Euodia. Sidu, Sunduke ki mangi mbakadapai ki yambu kina bangisa agu awirina Euodia ayambuyo re, ono zanga yamba ri! Gu kpakarapai naadu dagba Euodia na Sunduke re aima rengba ka gbirisa pa gu  zereda nga ga dungurati dunduko. Ziazia Kekeapai apenga sangbanaha angia gine te, ono si nawira gupai nga agi adee re aima dia gu rugute kugume Pauro afuhe fuyo.​—Frp. 4:2, 3.

³ Ngbatunga gupai re nayeaye na atagbagapai areme rogo agu adungurati nga ga ga Yekova aboro. Ono tie, ani ima rengba ka bandatirani ti ngbatunga apai wa gure ka ani amangapai kuti agu arugute du rogo Fugo Mbori yo nga Ziazia Kekeapai. Na ka ani abi ga Yekova Buku na nyanyakipaha, ani raki araka kuti agu arugute du rogoho.​—Tam. 27:11.

4, 5. Gini arugute Ziazia Kekeapai afuhe furani nibipa bandatirani ti zinga?

⁴ Si taata ani bandatirani ti zinga ho i nape gbegberẽ fugo ni furani watadu ho i namangi ni furani gbegberẽ te. Ani ima rengba kadu rogo gberãrago ho i amanga rani ni gbegberẽ mbikopa wai ani aenge, wai du kpotorani, watadu kura apai. Ani ima rengba kadu rogo kere gberãrago ka sidu nga wirina du namanga rani wa gure! Ya mo arugute ho Fugo Mbori nga Ziazia Kekeapai afuhe si undo rani ka sidu nga ani nagbiatirani na kpakarapai wa gure?

⁵ Yekova aima digo nibi gu pagume du dagba aboro tona kina ti gu regbo i aenge. Ko ima inopa gaani aberã na mangaapai. Ho du ani ni rogo gberãrago watadu rogo zinga, ani ima rengba ka pe gupai watadu ka manga gupai ani nika bira tirani abira ti ni kusa. Sidu, si ni patatamana ka mangapai kuti gu rugute naya furani ani zeresi ngbadurani na ki zanga gba sa zinga! (Oni gedi Asanza 16:32; Batungusipai 7:9.) Si nawira gupai nirengo nga, ani dunduko si aida ani wirikipa wai ka bandatirani ti zinga na kini mbupai fu akuarani. AYekova na Yesu nabi mbupai ni nyanyakipa pai furani. (Mt. 6:14, 15) Ya mo si naida mo du ni gu boro nambupai fu aboro gbe watadu nabanda tini ti zinga?

6. Tipagine si aida ti ni ani bandatirani ti zinga?

⁶ Agu aboro abandanga tiyo ti zinga ya nidu dedede ni zingizingi yo. Ni sangbana gipai re, aboro naaidanga ka mbeda na yo te. Gu boro du ni zingizingi ni ima rengba ka gberesa dungurati. Ni ima rengba ka igo gani zinga watadu sogote, ono gani gbegberẽ aberã nikadu adu “ni yuguyugu he gbayaga ku bangiri rimbasa.” (Snz. 26:24-26) Abaakumba ima rengba ka undo ngbatunga agu aboro re tipa i bi gupai nga agu asino nga zinga, sogote, gbiati kpikopai, baha rogo ga Mbori riigbu te. Ga Yekova Buku ima fura ziazia tipa gipai re. (Pa Mot. 19:17, 18; Rom. 3:11-18) Ya mo mo idi kuti gupai re?

7, 8. (a) Wai du Yekova angbembatayo fu gu papara gako riigbu du auru kpotosende? (b) Gini bete arugapai duho rogo Ziazia Kekeapai yo, na tipagine si aida ti ni ani mangipai kutini?

⁷ Yekova nangbembatayo na kini rigi agu aboro du rogo gu papara gako riigbu du auru kpotosende vurube ‘ruru kangara moyambu’ tii gu rugapai nga ga Kristo, du nga “ri kanisa.” (Mt. 24:45-47; Ef. 5:23) Wakina gu Riigbu Bipasunge naadu rogo bambata sa kama agarã, ruru kangara moyambu nabi Fugo Mbori na nyanyakipaha. (Oni gedi 1 ATesaroniko 2:13.) Gini bete arugapai watadu arugute duho i nafuhe rogo Ziazia Kekeapai yo tipa gaani undo?

⁸ Ziazia Kekeapai naruga rani nga ani naandu kupati adunguratise dedede. (Eb. 10:24, 25) Si nangarasa rani nga gaani ida du kina sa. (1 Kor. 1:10) Fugo Mbori nagumba gupai furani nga ani moi agu apai nga ga Kindo mbatayo rogo gaani raka yo. (Mt. 6:33) Ziazia Kekeapai nanyakasapa gu gaani sunge na gu mamu du ani na ni kaa tungusapai kporo na kporo, rogo agu aba dungu aboro  adunguratiyo ku rogoho na manga dezirepai angianga kuti asino mangaha ya. (Mt. 28:19, 20; Amo. 5:42; 17:17; 20:20) Ga Mbori Buku naruga abaakumba nga i banda gako riigbu ni gigirihe. (1 Kor. 5:1-5, 13; 1 Tim. 5:19-21) Na Yekova nape gupai nga agu aboro dunduko du rogo gako riigbu, si naida i du ni gigiri yo ti kpotoyo na rogo toro yo.​—2 Kor. 7:1.

9. Gini yangara gene sa Yesu amangasunge ngbaha ka undo rani ani girogo Fugo Mbori yo?

⁹ Kura aboro ima rengba ka berã gupai nga i ima rengba ka saka rogo Ziazia Kekeapai yo nitiyo. Ono tie, Yesu amoi ‘ruru kangara moyambu’ ni gu yangada gene du tipa fu gu riahe nga ga toro. Natona rogo 1919, Yesu Kristo namangasunge na gi moyambu re ka undo apefuoko i girogo ga Mbori Buku yo na ki mangipai kuti gaha arugapai. Ka ani agia sangba agu arugute du rogo Ziazia Kekeapai yo, ani nika sa dungurati si du gigiri, kidu na zereda gbiati kodatise. Ani dunduko ni basasa si aida ani sana tirani nga, ‘Ya mo mi ni ruru re fu ruru kangara moyambu nga aguyo Yesu amangasunge na yo areme?’

10. Wai du i nasakipai tipa gu papara ga Yekova riigbu du ngbangbaturũ yo rogo gu buku nga ga Yezekere?

¹⁰ Fugo Yekova naundo rani ani inidi tirani na gu papara gako riigbu du ngbangbaturũ yo. Ni kpiapai, gu nebi nangia Yezekere abi yuguyugupai nga gu naayugo ngbagida ngbangbaturũ yo nga guru narukuba gu papara ga Yekova riigbu du ngbangbaturũ yo. (Yeze. 1:4-28) Yekova nazubo rii gu ngbagida re, na u nandu kina kuho gako toro aida u ndu kuhoni. Gu papara gako riigbu du ngbangbaturũ yo tigaha, si na ome kurii gu paparaha du auru kpotosende ane. Nirengo, gu ngbagida re naandu kina kumbatayo! Oni berãnga kurii gu dungu aʹariapai nga ga riigbu mangi vuru gu bawe agarã yo susi kusayo re, na oni ki moi gupai ku berãroni yo nga Yekova du du kugii agu aʹariapai re. Wa Kristo na ziazia amaraika naima mbeda ka gberesa gi gbegberẽ zegino re, ga Yekova ngbagida nandu ni kina boro ipo kumbatayo tipa ka dia gbarasarimo kusayo ti gako bakerepa gbia na ka ziasi ziazia rimoko!

11, 12. Gini apai duho ga Yekova riigbu amangaha?

¹¹ Oni berãnga kurii agu apai gu papara ga Mbori riigbu du auru kpotosende ane aima digo nimangihe ti gi yangara arame re. Meka abambu. Badungu akama aboro aamangasunge me vovo bakere basunge nga ga zegino nga ga aDezire Yekova Warwick, New York yo du Amerika yo. Tii gu rugapai nga ga gu basunge nga ga meka abambu rogo zegino dũ, dungu akutu amangisunge nafutiyo tipa meka vovo aBambu Kindo gbiati abe-basunge. Nairiwo gu tambuahe du ani na ni fu agu awirina nafutiyo kaa mangasunge meka abambu wa gure! Oni tingidi gupai nga Yekova nafu maku afu fu agu atakipande pa Kindo  du auru kpotosende ane nga aguyo nafu agamahe si undo agu asunge re.​—Rk. 21:1-4.

¹² Wirikapai. Oni berẽnga pa agu asukuru duho areme naundo aboro i yugupai tipa Mbori. (Yes. 2:2, 3) Gu Sukuru Nga ga Abazakigene, gu Sukuru Du Tipa Abatungusipa Kindo, Sukuru Nga ga Girada, gu Sukuru Du Tipa Vovo Aboro Betere, gu Sukuru Du Tipa Ababi Adungurati na Adiayo, gu Sukuru Du Tipa Abaakumba, gu Sukuru Nga ga Sunge Kindo, na gu Sukuru Du Tipa agu Awirina Du Rogo gu Rondo Nga ga Be-basunge na Adiayo. Nairiwo wai Yekova akpinyemu ka yugopai fu gako aboro! Gaani bangiriba nga ga Internet nga jw.org nasonosa gu yugopai a nga ga Ziazia Kekeapai, gu bangiriba re na gaani awaraga rogoho rogo dungu akama afugo. Paparaha kinaho tipa agude na tipa aborokporo gbiati gu a du tipa apangbanga. Ya mo mo naamangasunge na jw.org gene tungusapai yo na ti regbo gaoni irisombori nga ga aborokporo?

13. Gini tindiro du kurirani wangia ani ga Yekova ruru amoyambu?

¹³ Nairiwo gu pa mamu ngaha re kadu ni papara ga Yekova riigbu! Wa ani naima ino gupai Yekova aidaha berani gbiati gako arugute, si naida ani naamanga rurupai na kini songodi gako bakere pagbia. Wa gi zegino re agbera kina kumbatayo be gbegberẽ apai, si naida ani “sógo gbigbitapai,” wa gu Yekova asogaha. (Tam. 97:10) Ani aidanga ka kodatirani na agu azanga sinombori naya “ti gbigbitapai, wenepai, na ti wenepai, gbigbitapai” te. (Yes. 5:20) Bambiko ani naida ka sa ngbarago ti Mbori, ani namanga asadatise ka nye gigiri ti kpotorani, rogo mangaapai yo, na rogo toro yo. (1 Kor. 6:9-11) Ani nakpinyemu Yekova na kini kido kutiko; na ani nayugopa gaani du ni ruruse fuko ni raka ani ringbisihe kuti gu gako arugute du rogo gako Buku yo. Ani namanga ome a kaa mangapai ringbisihe kuti agu arugute re kpurani yo, rogo dungurati, basunge yo, sukuru yo na rogo kura aba a. (Snz. 15:3) Oni bingo kura agene ani ayugoho ngbaha nga ani ni rururani fu Mbori.

14. Wai rengbe agu avunguagude nga aKristano kadu ni ruruyo fu Mbori?

¹⁴ Sonosa gude. Agu avunguagude nga aKristano nayugopa du ni ruruse fu Yekova ni rabayo awiriyo ringbisihe kuti Fugoko. Agu avunguagude nagunde ti Mbori aruganga awiriyo ringbisihe kuti gu sino du aboro na ni rogo gayo dagbarago te. Ba rogo gu kporo nga ga Kristano tipa gu toro nga ga zegino te. (Ef. 2:2) Gu bagude nga Kristano arengbanga ka ya, ‘Rogo gaani ringara tigaani, adee du ninaayugo pai fu agude’ te. Ziazia Kekeapai ima fura ziazia rii gipai re ki ya: “Oni, aba, . . . [oni nimbu ti awironi] ni ga Gbia rabahe na rugahe.” (Ef. 6:4.) Agu abaagude na anaagude nagunde ti Mbori naida awiriyo duwa Samuere, nga guko Yekova adu na ko ho ko aasona ni.​—1 Sam. 3:19.

15. Wai du ani ayugopa gaani du ni ruruse fu Yekova ho ani amanga nyanyaki adiaberã ni?

¹⁵ Manga adiaberã. Gene sa rengbe ani ka yugopa du ni rururani fu Mbori ngbaha nga, ka ngera ku rogo Fugoko yo gbiati gako riigbu tipa undo ho ani amanga nyanyaki adiaberã ni rogo raka. Tipa ka yugopa gu ndupai nyakipa mangaha ti ni wo, ani makianga pa pai sa nga gu nafuda badungu avunguagude areme. Si nga gu sino agu aboro nandu ku rogo kura ringara amangaha, nga kaa keda rukutu awiriyo fu agumeyo ku kporo yo i naangerafuo yo i ki nye tigayo kina rogo kura ringara kaa ndu kindi kumbatayo na sunge marã. Gere nga gu diaberã nga ga boro nitini, ono si naida ani moi gupai ku berãrani yo nga ani aringbisa pa tirani aringbisa fu Mbori tipa agu adiaberã ani amangaha. (Oni gedi ARomo 14:12.) Ya mo si ni patatamana  ka manga nyanyaki adiaberã tipa gaani aborokporo na agu apai du tipa raka rani zanga ngera ku rogo Ziazia Kekeapai yo tipa undo? Wagusa te! Ani naida na gu undo nga ga gu Barani du ngbangbaturũ yo bambiko ani arengbanga ka ruga gaani apai nitirani te.​—Yere.10:23.

16. Ho kura dee sa avungu wiiri ni, gini siapai si aaida ri mangihe, na ginipai naundo ri ri mangi gu naadu ni ruruhe?

¹⁶ Dee sa navungu kumbagude ho ri araka ni rogo kura ringara kia aida ka keda gu gude re ku rogo gari ringara tipa atitaru naangera fuoru. Ho ri avungu ni, boro sa dagba aDezire Yekova atona ka wisigo Ziazia Kekeapai na ri. Ri amangi wene sonakumbatayo na ki wiriki gupai nga gari sunge du ngaha ka sonosa wiiri u irisi Yekova. (Tam. 127:3; Snz. 22:6) Gu paranga dee re akusuko kpotori yo fu Yekova, a wa Ziazia Kekeapai aya furani ani mangihe. (Tam. 62:7, 8) Ri apeke agu apai a naadu kpotori yo fu gu boro ri aawirika Ziazia Kekeapai na ni na fu gu kura aboro rogo dungurati a. Wa agumeri gbiati abakureari avura sosoda ri vurũ ri kedi wiiri fu atitaru, ri abihe nga si arẽnga ri mangihe wo te. Rago aima ngba ti kumbari ka bi wai dungurati adu ni bagbuko furi na gu gude re na si ki sako ko idi ka wirika Ziazia Kekeapai na ki tona nduge tipa adunguratise na diako gbiati wiriyo. Ya mo mo naberãha nga gi nagude re aima bihe nga Yekova akaragapai sa gari kparakpee? Zanga kapa, ri aima bihe wo.

17. Gini rugapai ani nagbiaha nibipa abawiriki Ziazia Kekeapai?

¹⁷ Pekafuo rugapai. Gu nyanyakipa gene ani ayugo gaani du ni ruruse ngbaha fu Yekova nga ka pekafuo agu arugapai ani agbiaha rogo gako riigbu. Ni kpiapai, ani makianga pa agu aberãpai i nafuhe furani nibipa agu aboro ani awirika Ziazia Kekeapai na yo. I naape gupai furani nga nibasa fuo tona ani wirika gu buku nga Gini Apai Nzunzu Ziazia Kekeapai Ayugoho? na boro, si naida ani nidi bete aminiti tingbafuo wirikapai ka undo gu boro ani awirikapai na ni re ni inipai tipa ga Yekova riigbu. Ani rengbe ka manga gipai re ni manga ani sunge na gu vidio nga Ginipai Ninaamanga Bambu Kindo Yo? gbiati gu burosua nga Ada Namanga Gupai Yekova Akpinyemuhe Areme? I aima fu gu berãpai a furani nga ho ani anyasa wirika gu buku ni na boro nga Ziazia Kekeapai Ayugoho, si naida ani tona wirika gu buku na ni nga “Oni Bánda Tironi Rogo ga Mbori Nyemuse Yo” ka si vura du vurũ nga ni ima zio bapatiza ti gu regbo re. Riigbu fu gi rugapai re tipa vovo abawiriki ‘ru nyanyaki rogo idapase’ yo. (Koro. 2:7) Ya mo mo napekafuo ngbatunga agi aberãpai ga Yekova riigbu afuhe re?

18, 19. Gini nduapai duho si aida ani fu tambuahe ti ni fu Yekova?

¹⁸ Badungu nduapai duho si aida ani fu tambuahe ti ni fu Yekova! Raka rani kina kubeko, ka ani rakingo zanga ko te. (Amo. 17:27, 28) Ko ima fu bawene gamahe furani nga Ziazia Kekeapai. Ani nadiaha kugume ni fugo Mbori, a wakina wai agu aKristano naadu Tesaronike yo adi fugo Mbori kugume.​—1 Tesa. 2:13.

¹⁹ Mbiko gupai nga Fugo Mbori kina berani, ani ima mbeda na Yekova na ko ki mbedi na ani a. (Yak. 4:8) Gu Barani du ngbangbaturũ yo ima fu gu bawene mamu furani nga ga du ni papara gako riigbu. Nairiwo gu tambuahe du ani na ni tipa agu amaku re! Bake papara Atambuahe amoi gipai re wenengai ho ko abibia ni nga: “Ako oni fú atambuahe fu Yekova, bambiko ko ni wene ko, bambiko gako weneringise nye anye kindi.” (Tam. 136:1) Ani nabi agu afugo nga “gako weneringise nye anye kindi” rogo Atambuahe kapita 136 bara ue bawe na sita. Ka ani nye ni rururani fu Yekova na gako riigbu, ani nika bi gi wene afugo re si nada ti rengo bambiko ani nika raka nyeanye kindi!