1. Bibia nasarani ani mangi gine?

KURA baworimo sa nga bake abia aya: “Ho mo agia fugo ni, si nasa ro mo berẽ. Ho mo agia manzigo ni, si nasa ro mo du na ngbarago. Ono ho mo abibia ni, afugo gu bia re nazio ngbaduro yo azio nzunzu.” Nirengo, wene afugo ho nga gu rengbe ka zio ngbadurani yo kisusi agu afugo nayugo tambuahe na nyemuse tipa gu Barani du ngbangbaturũ yo nga Yekova te. Si airiwongo te nga, bibia nga nyanyakipa papara ndikidi irisombori, singia ani nabihe nisarani, watadu ani nabihe na gu dungurati nga ga ga Mbori aboro.

2, 3. (a) Gini bipai rengbe kura aboro kadu na ni tipa bibia na dungurati? (b) Gini asanahe ani ka sakapai tipaha?

² Gini bipai du mo na ni tipa bibia na fugoro kuari na dungurati? Ya mo zee naazio ro azio? Rogo kura arago, zee nazio akumba azio ka bibia dagba aboro. Gi bipai re rengbe kadu na maapai kurii dungurati, gbe ka si du nga abaakumba namanga ndundu amanga na bibia watadu i namanga kina kura apai ho dungurati abibia ni.—Tam. 30:12.

³ Ka si du nga ani nabi bibia ni papara gaani irisombori a wa duhe ni rengo, ani idinga ka kura ku zegiyo watadu ka kpa gu papara mbakadapai nga ga dunguratise re te. Sidu, boro na boro si aida ni sana tiní nga: ‘Wai du mi abi gupai nga ga bibia ba gaani adunguratise yo nga ga irisombori? Wai du rengbe mi ka diabe ai gu gunde  nga gu rengbe ka ka na mi ti bibia kuari na ngbarago? Na ginipai rengbe mi ka mangaha tipa kaa bibia pusiapusia kpotoreyo?’

4, 5. Gini ambakadapai naadu ho tipa bia ti regbo irisombori Yisaraere yo bakuru kusayo?

⁴ Ruru airisi Yekova aima digo nimangisunge na manzigo ka tambuako. Ho agu aYisaraere naadu mbata aairiso Yekova ni ni ruruyo, bibia angia nyanyakipa papara gayo irisombori. Ni kpiapai, ho Bakindo Davide aamanga mbakadapai ni tipa gu sunge nga ga yekaru, ko asia aRevi nga 4,000 tipa gupai nga i naata manzigo nga ga tambuahe fu Mbori. Dagba agu aboro re, aguyo adu 288 nga aguyo “i arugu yo na pa bibia fu Yekova, nangia agu yo dunduko naadu na birĩ tipa bibia.”—1 Peka 23:5; 25:7.

⁵ Manzigo na bibia adu na nyanyakipaha ti gu regbo i aakpara yekaru. Gu pangbanga re nape gupai furani nga: “Si adu wa gere, abavudi mbanya na abayango adu kina sa, ka manga woro fugoyo kina sa i gi he rogo sambuahe na tambuahe fu Yekova, ho i atumba fugoyo ni, na anambongo na gu sirigi napaa apaa na agu aũworo ahe du tipa tambua Yekova na ni, . . . ga Yekova bambu ki hi ahi be dubo.” Nairiwo gu regbo nanyakasa idapase nangiaha re!—2 Peka 5:13, 14; 7:6.

6. Oni sakingo pai tipa gu kparakpara mbakadapai nga ga bibia nga gu naadu ti gu regbo Nemaya aangbembatayo Yerusarema yo.

⁶ Ho Nemaya aangbembatayo ni fu ruru aYisaraere tipa gupai nga i bungia ngapa Yerusarema, ko ambakadi agu aRevi a nangia ababibia na aũtaka abia dunduko. Ho i aakpara gu ngapa ni i abungia ha re, gu kparakpara manzigo i aatakaha aima fubee ni bakerehe kuti gu ngbarago naadu ti gu regbo re. Ti gu regbo re, “bakere rimbasa aboro ue [adu kaa] fu tambuahe.” Aguyo aandu kubani aguyo kini ndu kubani, gu rimbasa aboro ue re kini gbiatiyo rii ngapa yo mbembedi na gu ba nangia ga yekaru tipa gupai nga ka sa worofugo yo aboro nigihe tuturũ. (Nem. 12:27, 28, 31, 38, 40, 43) Zanga kapa, rago aima ngba ti Yekova ka bi airisiko i nitambua ko pusiapusia rogo bia yo.

7. Wai du Yesu ayugu gupai nga bibia na nyanyakipaha rogo gu irisombori yo nga ga aKristano?

⁷ Ho i asigira gu dungurati ni nga ga aKristano, manzigo aandu kindi kumbatayo kaa du ni nyanyakipa papara ndikidi irisombori. Rogo gu yuru nga gu nangia nyanyakipa yuru rogo gu pangbanga yo nga ga aboro, tingbafuo Yesu sigira Ga Gbia Riahe, ko akodi gupai a ku rogoho nga ga bika abia.—Oni gedi Matayo 26:30.

8. Wai du agu aKristano naadu rogo bambata sa kama agarã amoi wene kpiapai nga ga bibia rogo irisombori yo?

⁸ Agu aKristano naadu rogo bambata sa kama agarã amoi wene kpiapai nga ga tambua Mbori kina sa rogo bia yo. Wa vura duhe nga i anaamanga gayo adunguratise kina rogo akporo, pa zanga du agu akporo re ni bawenehe wa yekaru aazeresanga gu kakaka nyemupai i adu na ni ka bibia fu Yekova te. Ga Mbori toro adu kugii gu mokedi nangia Pauro ko fu gu rugapai fu agu awirinako nangia aKristano nga: “Oni . . . yugu pai fu akuaroni ki nirugu pai rogo abia tambuahe yo, na abia wasa, na agu abia Toro nayugo, nibi he na undahe kpotoroni yo fu Gbia.” (Koro. 3:16) Nirengo, agu abia du rogo gaani bukubia nga “agu abia Toro nayugo, [tipa i] nibi he na undahe.” Agu abia re nga papara gu riahe nga ga toro ‘ruru kangara moyambu’ afuhe.—Mt. 24:45.

9. (a) Ginipai rengbe ka ka na kura aboro ti bibia kuari na ngbarago ti regbo gaani adunguratise gbiati bakere adunguratise? (b) Wai du si aida ani bibia tambuahe fu Yekova, na ada du si aida i ngbembatayo? (Oni bi gu sura duti tonatonaha.)

⁹ Na ka si du nga sinoroni nga ni rogo gaoni  ngbadimokporo, ngbatunga roni yo, watadu rogo gaoni dagbarago kaa bibia te? Mbiko gu vovo ahe i akusaha mbiko sona kumbatayo rogo birĩ-ino-mangaahe yo, mo ima rengba kaa gbia ngbarago ti gia agu abia atabia abikaha. Ono tie, zee ima rengba ka zio ro watadu rago ima rengba ka gberã tiro ho mo aringbisa fugoro ni kuti gayo. Ono wa vura duhe wo, si aidanga gupai re ka na mo ti tinda gu tindiro du kuriro nga ka bibia tambuahe fu Yekova te. Kuba gure, ho mo abibia ni, mo tumba gamo bukubia kuari, ki tumba riro kuari, na kini bibia pusiapusia kpotoroyo! (Ezara 3:11; oni gedi Atambuahe 147:1.) Rogo badungu aBambu Kindo areme, afugo bia nakura ti vuro he mbatayo, si kini sa gupai nga aboro bihe na fugoyo kuari. Si ni wenepai a nga bika agu abia nga ga Kindo ima da ni papara Gu Sukuru Nga ga Sunge Kindo nga gu du tipa abaakumba. Gipai re nanyakasa gupai fu abaakumba nga si naida i naangbembatayo rogo bibia yo rogo dungurati.

10. Ginipai si aida ani tingidihe ka si du nga gunde naka na ani ti bibia na fugorani kuari?

¹⁰ Gu kurapai sa nasa kura aboro ka i binga bia na fugoyo kuari ya nga gunde. Si rengbe kadu nga i nagunde nga fugoyo nika gba rii ga kura aboro watadu gigi fugoyo angbanga ti gu kura aboro te. Ono tie, si naida ani tingidi gupai nga, ho ani afura ni, “ani nakota dunduko rogo dungu apai” yo. (Yak. 3:2) Ono wa vura duhe wo, gure asanga rani ani mbu fugo te. Sidu tie, tipagine si aida ani mbu gu fugorani nga ga bia nga ga zangarengba ti ni si ka na ani ti tambua Yekova rogo bia yo?

11, 12. Gini bete aberãpai du ho tipa ka wirika wai ka bibia wenengai?

¹¹ Isoke ani nagunde agunde ti bibia mbiko ani ainongo wai ka bibia te. Ono tie, ani rengbe ka wirika bibia wenengai nimanga ani pai kuti kura bete aberãpai.

¹² Mo rengbe ka wirika ka bibia na fugoro kuari ni gbida mo wege wenengai. Kina wai karaba asa we si ki, kinawo a pa gbida mo  wege afu ome fu fugoro ho mo afura ni watadu ho mo abibia ni. Si naida mo naabi bia na fugoro kuari wagu mo naafura watadu na fugoro zaatu kuari kisusi ho mo afura ni. * Nibipa gupai zaatu nga ga bibia tambuahe, Ziazia Kekeapai ti gu kura aregbo naruga airisi Yekova nga i “ngbíko” na fugoyo kuari na ngbarago.—Tam. 33:1-3.

13. Oni sakingo pai tipa wai rengbe ani ka bibia zukazuka.

¹³ Ti regbo gu irisombori nga ga aborokporo watadu ho du mo ni nisaro, mo rengbe ka asada gipai re: Mo sia bia sa dagba agu abia yo ngba tiro gbe rogo gaani bukubia yo. Mo gedi afugo gu bia re na fugoro kuari zukazuka. Fuani, na kina gu ngisa woro fugoro re, mo pe agu afugo dunduko du rogo gu gene bia sa re ni ipo. Fuani tie, mo ki bi gu gene bia re na gu ngisa worofugo du kuari re. (Yes. 24:14) Woro fugoro na bia naye ka kio, na gure nga wenepai. Ka mo mbunga fugoro si gundesi ro watadu ka ba zee tiro ya!

14. (a) Wai du pa zaka ani ngbarani wenengai narengbe ka undo rani ho ani abibia ni? (Oni bi gu sanduki nga “ Wai ka Wirika ka Bibia Wenengai.”) (b) Gini aberãpai nibipa diabe gu kpakaraapai nga ga worofugo mo nabihe nga si ni wenehe?

¹⁴ Mo arengbanga ka bibia na fugoro kuari te ka si du nga mo azakanga ngbaro wenengai te. Sidu, kura berãpai nga mo zaki ngbaro kisusi wai mo naazakaha ho mo afura ni. Ginipai si aida mo mangihe ka si du nga mo nabihe nga fugoro ni rurungburaha watadu isoke fugoro napaa ngbeterengbetere? Mo rengbe ka gbia wene aberãpai nibipa gipai re rogo Benefit From Theocratic Ministry School Education, kpewaraga 184, rogo gu sanduki nga “Overcoming Specific Problems.”

15. (a) Gini tingidapai i amangihe rogo 2016 ti regbo gu dunguratise ninaamanga na agarã dunduko? (b) Gini nduapai i akusi gu vovo bukubia re ti ni?

¹⁵ Aboro adu na bakere ngbarago ti regbo gu dunguratise ninaamanga na agarã dunduko nga ga Watch Tower Bible and Tract Society of Pennsylvania nga gu naadu rogo 2016 ho Wiriba Stephen Lett nga guko nga boro Riigbu  Bipasunge amangi tingidapai ni nga vovo bukubia du rimoho nga, “Sing Out Joyfully” to Jehovah nika kura barambeda tipa aboro naabi bia rogoho ti regbo adunguratise. Wiriba Lett agumba gupai nga ndupai sa i afugu agu abia re ti ni nga tipa si naandu sa na gu New World Translation of the Holy Scriptures i afuguhe. Gipai re aakoda dia agu afugo kusayo watadu fugö agu afugo bia nga gu du na agu afugo rogoho i aima diaha kusayo rogo New World Translation ni sangbana fugö yo ho rogo 2013. Kurapai berewe nga, i akodi kura vovo abia tipa gaani sunge tungusapai gbiati agu abia nayugo gaani tambuahe tipa ga Yesu motumo. Berewe a, mbiko gupai nga bibia nga nyanyakipa papara gaani irisombori, Riigbu Bipasunge aaida ka kusa gu wene buku du kpotoho sa na kpoto gu New World Translation i afuguhe.

16, 17. Gini aˈariapai i amangihe rogo vovo bukubia yo?

¹⁶ Tipa gupai nga ka sa gu bukubia nga “Sing Out Joyfully” to Jehovah si du taata ka mangasunge na ni, i tangara abia rogoho ringbisihe kuti riiapai. Ni kpiapai, gu bambata abia du 12 nafura tipa Yekova, agu abia 8 ngbefuo gure kini fura tipa Yesu gbiati motumo tumori na agu akuraha kini fura tipa kura riiapai. Paparaha kinaho nga gu nayugobara riiapai nga gu rengbe ka undo boro, ni kpiapai ho ni agbata bia ni tipa gani gumbapai.

¹⁷ Tipa ka undo aboro dunduko i bibia kina boro kpotoyo yo, i ima fugö kura afugo bia tipa gupai nga agu aberãpai du rogoho duadu ziazia gbe na ka dia agu afugo kusayo aboro amanganga sunge na ni berewe ya. Ni kpiapai, gu riipai naadu mbata nga “Hipai Nigbangaha,” i saha rogo gu bukubia nga ga pa-aNgirisi nga “Oni du na Zerangbaduse,” na i ki aria afugoho si naandu sa na gu riipai re. Gu riipai nga “Mo Nibanda Kpotoroyo” i aˈariaha kuti gu nga “Ani Nibanda Kpotoraniyo” na si angba angba wo. Tipagine? Mbiko gupai nga agu aboro naye tipa gaani adunguratise na bakere adunguratise nga agu awirina gi rengo barambeda, gu kura aboro du na nyemupai, rukutu agude, gbiati agu awirina nga adee, ho i anaabi agu afugo bia ni re, si anidu wa ka i ya i nape gupai fu kura aboro si aida i mangihe. Sidu, i amangi bete ariapai ti rii gu bia re gbiati afugoho.

18. Tipagine si aida ani inidi tirani ti ni na agu abia du rogo gaani vovo bukubia yo? (Oni bi gu rukutu kekeapai du bandu waraga yo.)

¹⁸ Badungu agu abia du rogo “Sing Out Joyfully” to Jehovah wakina kparakpee. Ho mo abi agu abia re ni, mo rengbe ka peka agu apai du kpotoroyo fu Yekova. Gu kura abia “nanyakasa [rani] kuti nyemuse na wene mangaapai.” (Eb. 10:24) Nirengo, si naida ani inidi tirani na woro gaani abia gbiati afugoho. Ka mo awirika agu abia re kporo yo, mo ima rengba ka ino wai ka bikaha zukazuka na pusiapusia kpotoroyo. *

19. Wai du rengbe agu aboro du rogo dungurati nabayo dunduko ka iriso Yekova?

¹⁹ Oni tingidi gupai nga bibia nga nyanyakipa papara gaani irisombori. Si nga nyanyakipa gene ka yugo gaani nyemuse na tambuahe ngbaha fu Yekova. (Oni gedi Yesaya 12:5.) Ho mo abibia ni kuari na ngbarago, mo rengbe ka ngarasa kura aboro i bibia a zukazuka. Nirengo, aboro dunduko rogo dungurati, singia paranga aboro, sosono aboro, gu vovo aboro du na nyemupai rengbe ka iriso Yekova ngba gi gene re. Sidu, ka ndundu mangingo ro ti peka agu apai du kpotoroyo rogo bia yo ya. Kuba gure, mo gisangba gu rugapai ga Mbori toro adu kugii bake papara atambuahe ko kehe nga: “Oni bí . . . bia fu Yekova!” Nirengo, oni bibia kuari na ngbarago!—Tam. 96:1.