Ya Mo Yekova Nga Gamo Bagbuko?
“Yekova natumo unga avuruko; a nga gu ni sa nafu tini ku be ko i ka gbarasa ngbanga fu ni te.”—TAM. 34:22.
ABIA: 49, 32
1. Mbiko du ani ni aboro ingapai, gini ngbatunga bipai naima kio dagba ga Yekova ruru amoyambu?
“RUNGORUNGO boro nga mi!” (Rom. 7:24) Badungu ga Mbori ruru amoyambu aima gumba agu afugo gu mokedi nangia Pauro agumbaha re. Ani dunduko nambu be gu ingapai ani adihe ti atitarani, na ho gaani mangaapai andunga ni sa na gu nyemupai du tirani ka sa ngbarago ti Yekova ya, ani nadu ni rungorungo rani watadu na gberãrago. Gu kura aKristano nga aguyo namangi kere ingapai aima bihe nga ka Mbori mbunga pai berewe fuyo te.
2. (a) Wai du Atambuahe 34:22 ayugo gupai nga si aidanga ga Mbori amoyambu du ni fudifudiyo kisusi be sangbakpotoyo yo te? (b) Gini apai gi kekeapai re nika fura tipaha? (Oni bi gu sanduki nga “ Awirikapai watadu Asangbanebi?”)
2 Ono wa vura duhe wo, Ziazia Kekeapai nafu gu kido furani nga agu aboro du Yekova ni gayo bagbuko, si aidanga i du ni fudifudiyo kisusi be sangbakpotoyo yo te. (Oni gedi Atambuahe 34:22.) Du Yekova ni bagbuko nakoda gine? Gini adiandue si aida ani dihe tipa ka gbia ga Yekova inapai gbiati mbupai? Ani rengbe ka ino akaragapai kuti agu asanahe re ni wisigo ani pa gu mbakadapai nangia ga abaakporo bagbuko rogo gu ringara aYisaraere naadu mbata. Rengo ngaha nga, gu mbakadapai re adu tii gu mozunga nga ga aNdiko, nga gu i amoi kurapai kubaha ti regbo Pendekote rogo gu garã nangia 33 Fuo Batikayo Kristo. Ono tie, oni tingidi gupai nga, agu aNdiko re aye be Yekova. Sidu, gu mbakadapai nangia ga abaakporo bagbuko naundo rani ani ini ga Yekova bipai tipa ingapai, aboro ingapai gbiati saberã. Ni bambataha tie, ani bingo ndu gupai abaakporo bagbuko adu ti ni Yisaraere yo na wai si aamangasunge.
‘ONI KPARA ABAAKPORO BAGBUKO’
3. Ginipai aYisaraere anaamangaha na gu boro naata ino aino kini imi boro?
3 Yekova aabi pa ai uka-kure rogo gu ringara aYisaraere naadu mbata ni nyanyaki pai. Gu boro naata ino aino kini imi boro, mbembedi gume gu boro ni aniimi ni re ni kumba nga guni i anaayamba ni nga “bairibape,” aniˈimi ni kusayo. (Geda 35:19) Rogo gi gene re, gu imi boro re aniizanga unga ni a tipa wa ni aimi gu boro wenesa re. Imo gu boro re ni ipo anaabanda Ringara Mokido tipa ka si gberẽnga ya, sidu, Yekova afu rugute ki ya: “Si du oni agbárasa nga gu ringara du oni rogo ho te; bambiko [uka kure boro] nga gu he nagbarasa ringara agbarasa.”—Geda 35:33, 34.
4. Ginipai nanaamanga Yisaraere yo ho boro aniˈimi boro ni ka ni ainongo aino ya?
4 Ono wai tie du aYisaraere anaamangapai na gu boro naaniˈimi boro ka ni ainongo aino ya? Wa si avura du nga ni anaainongo aino ka imo boro te, ni anidu adu kindi na bape ukakure kurii ni. (Bam. P. 9:5) Ono tie, i aniyugu inapai funi, ki mbu ni ni zubo be bairibape ku rogo bakporo sa dagba agu abaakporo naadu sita nga ga bagbuko. Yo ni anidu ni ni bandabanda ni. Si anidu nga gu baimi boro ni béno re nika nye rogo gu bakporo bagbuko re dakuho gbiamotumo nika kpi ni.—Geda 35:15, 28.
5. Wai rengbe gu mbakadapai nangia ga abaakporo bagbuko ka undo rani ani rugutirani wenengai na Yekova?
5 Gu mbakadapai nangia ga abaakporo bagbuko re angianga ga aboro berãpai te. Kina boro Yekova nitiko narugu Yosua ki ya: “Mo yá fu awiri aYisaraere, ‘Oni [kpara] abaakporo bagbuko.’” Agu abaakporo re adu ‘ni ziaziaha.’ NW (Yos. 20:1, 2, 7, 8) Wa duhe nga Yekova du nitiko naasia agi abaakporo re tipa kparakpara ndupai, ani rengbe ka sanahe nga: Wai du gi mbakadapai re aundo rani ani inipai wenengai tipa ga Yekova inapai? Na ginipai si ayugoho furani nibipa wai rengbe Yekova kadu ni gaani bagbuko?
“NI . . . GUMBA GANI NGBANGA FU ABAAKUMBA”
6, 7. (a) Oni sakingo pai tipa wai abaakumba anaasarangbanga gu boro naaniˈimi boro ka ni ainongo aino ya. (Oni bi gu sura duti tonatonaha.) (b) Tipagine si anidu ti ni ni patatamana gu boro re ndu fuo abaakumba?
6 Ho boro Yisaraere aniimi boro ni ka ni ainongo aino ya, si anidu nga ni “gumba gani ngbanga fu abaakumba” mbata ngbadimo gu baakporo ni azubo ku rogoho. Si anidu nga i di ni kugume wenengai. (Yos. 20:4) Fuo bete regbo kusa, i anikedi ni berewe kusayo fuo agu abaakumba nga ga gu baakporo ni aimi boro rogoho re, na agu abaakumba re ki sari gani ngbanga. (Oni gedi Pa Geda Aboro 35:24, 25.) I animbu ni ni karaga tini ku rogo baakporo bagbuko kinaho sa i anisaringbanga ni ni nga ni aimi boro ka ni ainongo aino ya.
7 Tipagine i anaarimiso abaakumba ti ni ku rogo gupai re? Si adu nga i banda gu dungurati nga ga aYisaraere ni gigirihe na ki undo gu boro naaniˈimi boro ka ni ainongo aino re ya ni gbia undo ti ga Yekova inapai. Wene bawiriki Ziazia Kekeapai sa akepai nga ka gu boro re aka ka ndu fuo abaakumba, “ka ni adu rogo kerepai.” Ko agbia kurapai berewe nga: “Ka kure ni adu kina kurii ni, bambiko ni aaidanga ka gbia undo ti gu mbakadapai Mbori amangihe tipa ni te.” Undo adu kinaho tipa gu boro naaniˈimi boro ka ni ainongo aino re ya, ono si adu nga ni gbataha agbata, na ki dihe kugume. Ka ni anizanga gbata bagbuko rogo baakporo sa dagba agu abaakporo Yekova akparaha, ka mbembedi gume gu boro ni aimi ni re aimi ni ka si adunga na pai ya.
8, 9. Tipagine si aida gu Kristano mangi kere ingapai ndu ti ni fuo abaakumba?
8 Areme, gu Kristano mangi kere ingapai, si naida ni ndu fuo abaakumba nga ga dungurati i undo ni tipa ni du wenengai berewe kubani. Tipagine du gipai re ti ni na nyanyakipaha? Bambatapai nga, Yekova du mangi gu mbakadapai nga abaakumba naaundo agu aboro mangi kere ingapai, a wa duhe rogo Fugoko yo. (Yak. 5:14-16) Uepai nga, gi mbakadapai re naundo gu boro ingapai saberã ni ni nye rogo ga Mbori bandahe na ki ne gu sino nga kaa manga ingapai amanga kindi. (Gara. 6:1; Eb. 12:11) Biatapai nga, i raba abaakumba na ki fu gu sunge fuyo nga ga ngarasa agu aboro ingapai saberã, na kini undo yo ka i dunga ni fudifudiyo be sangbakpotoyo yo ya. Yekova nayamba agi abaakumba re nga “okooko ba be gugugu yuge.” (Yes. 32:1, 2) Ya mo mo arengbanga ka ida kuti gupai nga gi mbakadapai re nayugo ga Mbori inapai te?
9 Badungu ga Mbori amoyambu ima inopa gu zereda berãseyo naye mbiko gbata undo be abaakumba na kini dihe kugume. Ni kpiapai, wirina du rimoko nga Daniere amangi kere ingapai, ono tipa dungu adiwi ka ko aidanga ka ndu fuo abaakumba ya. Ko ape gupai nga, “Fuo susa dungu adiwi, mi aberẽhe nga pai aadunga ho ka abaakumba mangihe tipa re berewe te. Ono wa si avura duwo, mi anaabihe ti aregbo dũ nga pai nika manga re amanga, sidu, mi anaasungo kini pidi sangbana gimi ingapai kumbatayo. Na ho mi anaakpara ni fu Yekova, mi anaatona ha na kina hõ mbupai tipa gu ingapai mi amangihe.” Ni yangaraha, Daniel andu fuo abaakumba tipa i undo ko. Ho ko angera ni kusayo ko nagumba gupai nga: “Nirengo, mi anaagunde agunde tipa ka ndu fuo yo. Ono fuo ndu mi fuo yo, si adu wa ka i ya boro ima dia rõrõi tindiro kusayo pagore. Awere, mi nabihe nga mi ima rengba ka fura na Yekova zanga he du ho naka na gene bere.” Areme, Daniel na sangbakpotokoyo ni gigirihe, na i amoiko ni mounda abaakumba bambeda kusayo.
“NI . . . ORO KU ROGO GU BAKPORO SA DAGBA AGI ABAAKPORO YO RE”
10. Gini pai si aaida gu boro naaniˈimi boro ka ni ainongo aino ya mangihe tipa ka gbia inapai?
10 Si aaida gupai nga gu boro imi boro ka ni ainongo aino ya mangipai amanga tipa Yekova inipai funi. Si adu nga ni oro ku rogo gu bakporo bagbuko naadu mbembedi gbe. (Oni gedi Yosua 20:4.) Gu boro re aarengbanga kaa bi gipai re gbua kpasiaka te; pa nye ni ni unga ni aaru riipa ndu ni ku rogo gu baakporo re ni kina boro ipo na ki nye yo! Gipai re aaida gupai nga ni mbupa kura gani apai ambu. Si aaida ni mbu gu gani sunge marã ni aamangaha, bawene kpuni, gbiati gu ranirii ni adu na ni ka ta, da kuho gbiamotumo ka kpi ni. * (Geda 35:25) Ono mbupa gu gani apai re adu tipa kina gani wenepai. Ka gu boro naimi boro ni béno re aguari rogo gu baakporo re, ka si ayugu gupai nga pa gu boro ni aimi ni re bangirini ni he te, na ka raka ni adu ngbapai yo.
11. Gini mangaapai nga ga gu Kristano saberã ni nayugo gupai nga ni na tambuahe tipa ga Mbori inapai?
11 Areme a, tipa ka gbia undo ti ga Mbori inapai, si naida agu aboro ingapai saberãyo mangipai amanga wakina gure a. Si naida ani mbu manga ingapai, kini zubo angianga be kina kere aingapai ya, ono be gu rukutu aingapai a ninaandu na boro dedede sa kere aingapai. Ga Mbori toro adu kugii gu mokedi nangia Pauro ko ki pekepa gu mangaapai nangia ga agu aKristano naasaberã yo Korinda yo. Ko akepai ki ya: “Kina boro gi pai re, nga ba rungo ti roni wa du pa Mbori, gu kakaka bandatise si amangi rogo roni yo, ii, na mbakada tironi, ii, na imisiringbaduse, ii, na gunde, ii, na nyemu he, ii na nyaka, ii, rogo pa sapangbanga!” (2 Kor. 7:10, 11) Manga bakere asadatise ka mbu manga ingapai nayugo gupai fu Yekova nga ani nabaka bangirani abaka tipa gupai du ani rogoho, na ani aberãnga ha nga ani rengbe arengba ka gbia ga Mbori inapai kini ingipai zanga pai gbia rani te.
12. Gini apai rengbe Kristano ka mbupaha tipa kaa gbia inapai kindi be Yekova?
12 Gini apai rengbe Kristano ka mbupaha tipa kaa gbia ga Mbori inapai kindi? Si naida ni du regerege ka mbupa guhe zaatu naima ngba tini ni kerehe ka si du nga si ima rengba ka ba ni ku rogo ingapai. (Mt. 18:8, 9) Ka si du nga kura abakureamo kinaho du namaapai kurii ro mo mangi agu apai naba gberãrago ti Yekova, ya mo mo ambu koda tiro na yo? Ka si du nga si ni mbumbuhe foro kaa mbira buda rengbearengba, ya mo mo na nyemu ka banda tiro ti agu apai rengbe ka asada ro mo mbiri bakere buda? Ka si du nga mo nabihe ni ba mbumbuhe ka banda tiro ti gbegberẽ nyemu kodaba, ya mo mo nane agu avidio, agu abangiriba nga ga internet, watadu gu mangapai rengbe ka ye na gbegberẽ aberã kuriro yo? Mo tingidi gupai nga, ai guhe mo ambupaha tipa ka nye ni ruru ro fu Yekova, si tipa kina gamo undo. He ho igirã wa gu igirã boro agbiaha ho Yekova ambu ni ni te. Na he ho ngba kisusi gu ngbarago boro agbiaha ti gako “nyenye weneringise” a te.—Yes. 54:7, 8.
“SI KI DU NI GAONI ABAGBUKO”
13. Oni sakingo pai tipa wai gu boro naaniˈimi boro ni béno arengbe kadu ni bandabanda ni na kidu na ngbarago rogo raka yo bakporo bagbuko yo.
13 Gu boro naaniˈimi boro ka ni ainongo aino ya anidu ni bandabanda ni bakporo bagbuko yo. Nibipa agu abaakporo re, Yekova aya: “Si ki du ni gaoni abagbuko.” (Yos. 20:2, 3) Yekova aaidanga gupai nga i saringbanga gu boro re berewe tipa kina gu ngisapai re te; na bairibape aarengbanga a ka rimo ku rogo gu bakporo re ka imo ni te. Sidu, si aaidanga gu boro re naagunde nga i nika irabape kurini te. Ho ni anidu ni rogo gu bakporo re, ni adu ni bandabanda ni tii be Yekova. Si aadunga ni bambukiso te. Ni aima du na momu beni rogo gu bakporo re ka mangasunge, ka undo aboro, na ka iriso Yekova rogo zereda. Nirengo, ni aima rengba kadu na ngbarago rogo raka yo!
14. Gini kido rengbe gu Kristano saberã ni kadu na ni?
14 Kura gu ga Mbori amoyambu namangi kere aingapai ono ki ima saberã naabitiyo “ni zizi yo” kindi be fudifudi sangbakpotoseyo, na kini berẽ gupai a nga Yekova nikaa biyo kindi nga i ni bibiriko yo be gu kere ingapai i amangihe. Ka mo aabi tiro wa gure, mo du na gu kido nga ho Yekova ambupai ni foro, ko ima mbupa gupai re kusayo! Daniel i nipepa ko mbata kusayo abi gipai re ni rengo. Fuo abaakumba rugu ko na ki undo ko ko du na gigiri sangbakpotoseyo, ko aya: “Mi abi tire wa ka i ya onga re ima yego kubaha. Fuo peka ani gupai re si ki nyasi wenengai, mi aadunga berewe ni fudifudi re be sangbakpoto re yo te. Ho i avu boro ni ti gaani ingapai, si berewe kurini te. A wa gu Yekova agumbaha, ko nadia agu apai nafuda ro kusayo ki moi he tuturũ tiro kusayo. Mo abingo ho berewe te.” Ho gu boro naaniˈimi boro ka ni ainongo aino ya anidu ni bakporo bagbuko yo, ni arengbanga kadu na gunde nga bairibape nika ye ka imo ni te. Wakina gure a, ho Yekova ambupai ni furani ti gaani aingapai, si aidanga ani naagude nga ko nika kusaha berewe kuti rani ka sarangbanga rani tipaha te.—Oni gedi Atambuahe 103:8-12.
Mo du na kido kuti ga Yekova mbupai (Oni bi genewaraga 14-16)
15, 16. Wai rengbe ga Yesu sunge ni Batumorii gbiati Gbiamotumo ka nyakasa gamo kido kuti ga Mbori inapai?
15 Ani zaatu na bakere ndupai kisusi aYisaraere kadu na kido kuti ga Yekova inapai. Fuo Pauro pepa gako gberãrago mbiko zanga ko giasangba Yekova ngba rengberengbe gene, ko aya: “Mi natambua Mbori mbiko Yesu Kristo gaani Gbia!” (Rom. 7:25) Wa Pauro avura kaa sovura kuti ingapai gbiati gu gbegberẽ apai ko aamangaha mbata kusayo, nga gu ko aima saberã ko ti ni, ko aima du na kido kuti ga Mbori mbupai rogo Yesu yo. Gaani Batumorii nga Yesu nagiriso sangbakpoto rani yo na kini fu zereda ku berãrani yo. (Eb. 9:13, 14) Nidu ko ni gaani Gbiamotumo, “ko rengbe a na batasa agu yo nambeda na Mbori mbiko ko, wa du he ya ko ni ungako kindi tipa kpara tipa yo.” (Eb. 7:24, 25) Ka si du nga gu sunge nangia ga gbiamotumo aafu gu kido fu aYisaraere nga Yekova nika mbupai ambu fuyo ti gayo aingapai, ani ima rengba kadu na bakere kido nga mbiko gu sunge nga ga gaani Gbiamotumo nga Yesu, ‘ani ima rengba ka gbia inapai , ki bi undahe si unda rani rogo rago zingo.’—Eb. 4:15, 16.
16 Tipa Yekova du ni gamo bagbuko, si naida mo du na idapase kuti ga Yesu motumo tumorii. Ka mo berẽnga kina pa wai gbua motumo tumorii aundo badungu aboro ya. Kuba gure, mo du na idapase kuti gupai nga motumo tumorii tipa ro. (Gara. 2:20, 21) Mo du na idapase kuti gupai nga motumo tumorii nga mburu mbupai foro ti gamo aingapai. Mo du na idapase kuti gupai nga motumo tumorii nafu gu maabangirise foro nga ga nyenye unga. Ga Yesu motumo tumorii nga ga Yekova gamahe foro.
17. Tipagine si aida Yekova du ti ni ni gamo bagbuko?
17 Abaakporo bagbuko nayugokpia ga Yekova inapai. Vurube gi mbakadapai re, anga Mbori nanyakasa kina pa wai du unga ni ziaziaha sa te, ono ko nayugo wai furani a abaakumba aundo rani, gupai ndikidi saberã akodaha, gbiati ndu gupai si aida ani du ti ni na bakere kido kuti ga Yekova mbupai. Ya mo Yekova nga gamo bagbuko? Kura bagbuko ho ngba kisusi Yekova te! (Tam. 91:1, 2) Rogo gu kekeapai naye fuo gere, ani nika bi wai abaakporo bagbuko narengbe ka undo rani ani wiriki ga Yekova bakere kpiapai nga ga ruru sarangbanga gbiati inapai.
^ genewaraga 10 Ringbisihe kuti kura buku sa nga ga aYudo, si nawira gupai nga mbembedi agume gu boro naaniˈimi boro ka ni ainongo aino ya anaaga aga fuoni ku rogo gu bakporo bagbuko re.
