“Oni ki Nifu He Afu . . . Mbiko gu Pai Re Yekova Gaoni Mbori ka fu Maku ti ni fu Roni”

SI TONA MANGASUNGE

FU AMOTUMO aima digo nidu ni nyanyakipa paparaha ndikidi irisombori. AYisaraere anaafu anya ni motumo, na aboro ima ino aKristano wenengai ti gayo “motumo tambuahe.” Ono tie, kura amotumo kinaho berewe ngba ti Mbori. (Eb. 13:15, 16) Agi amotumo re naye na ngbarago gbiati amaku, a wa agi akpiapai du kusende re ayugoho.

Ana nangia ga Yekova ruru moyambu bakuru kusayo adu na nyemu ka vunga gude, ono ri angia irazangada. Ri amangi mozunga fu Yekova rogo kparakpee yo nga ka ri vungu kumbagude, ri nika fuko “fu Yekova ti arago ungako dunduko.” (1 Sam. 1:10, 11) Fuo bete regbo kusa, Ana adu na gude, na ri ki batika kumbagude rimoko angia Samuere. Fuo Ana mbu Samuere ti mai, ri andu na ko ku banye yo, ringbisihe kuti gu gari mozunga ri amangihe. Yekova afu maku fu Ana tipa gari toro nga ga gamahe. Ri agbia gu momu nga ga vunga kura agude berewe bisue, na Samuere ki da ni nebi na ni bake Ziazia Kekeapai a.—1 Sam. 2:21.

Wakina Ana na Samuere, agu aKristano du areme ima du na momu beyo ka fu raka yo tipa ka mangasunge na ni fu Bakusiyo. Yesu akidohe nga ani nika gbia bakere mosoro agbia tipa ai gu futise ani nika mangaha tipa ka iriso Yekova.—Mk. 10:28-30.

Rogo bambata sa kama agarã, aboro aini gu Kristano rimori angia Doruka ti “wene sabe na inapai,” nga agu apai ri aamangaha tipa ka undo aboro. Ono tie, si nafu kina gberãrago nga, ‘ri akaza ki kpi,’ dungurati kidu rogo imisiri. Ho abawiriki agi gupai ni nga Petero adu kina rogo gu rago re, i azungodi ko ko ye nibasa. Oni berẽnga pa gu ngbarago i adu na ni ho Petero aye ni ki zingisi Doruka be Kpio, na gure nangia bambata regbo mokedi zingisi boro be kpio! (Amo. 9:36-41) Bangiri Mbori aagonga ti gu wene apai Doruka aamangaha te. (Eb. 6:10) I abanda gari pangbanga gamahe rogo Fugo Mbori yo tipa si du ni gu wene kpiapai si aida ani wirikihe.

Gu mokedi nangia Pauro amoi wene kpiapai a nga ga fu gako regbo tipa ka undo aboro, na kini degetuko fuyo. Ho Pauro aakepai ni fu agu aKristano naadu Korinda yo, ko aya: “Mi abaga tire abaga zaza dati digida ha tipa mbisimoroni. Ka mi akpi nyemu roni bakere susi i ki nikpi nyemu re ni umba ha?” (2 Kor. 12:15) Pauro aima ino gupai rogo gako raka yo nga futise tipa ka undo kura aboro ayengo sa na kina ngbarago fu boro te, ono si nasa gupai a nga Yekova fu maku fu boro na ki idi na ni.—Amo. 20:24, 35.

Si tie ziazia nga, Yekova na ngbarago ho ani amangasunge ni na gaani regbo gbiati omerani ka songoda agu apai nga ga Kindo na ka undo akuarani aidipase. Ono ya mo kura agene ho berewe rengbe ani ka songoda sunge tungusapa Kindo ngbaha? Ii! Kupati gu nga mangasunge na gaani regbo gbiati omerani, ani rengbe ka irisa Mbori na gaani agamahe. I namangasunge na agu agamahe re ka kiiso gu sunge tungusapai namanga rogo zegino dunduko, nga gu nakoda undo amokedi gbiati gu kura kparakpara amangisunge Kindo ti aregbo dũ. Kurigure, agu agamahe ani afuhe du naundo agu ambakadapai du tipa kusa gaani avidio, safugo awaraga, agu aboro nagbiatiyo na gu gberãngo naye ni sangbana gu mangaapai nga ga ome zegino, gbiati dua aBambu Kindo. Ani ima rengba kadu na gu kido nga ho ani ‘afuhe ni, Yekova gaani Mbori nika fu maku afu fu rani.’ Kurigure, ho ani afu gu gaani ahe ni kiipaha fu Yekova, ani nafu irisa fuko.—Pa Rug 15:10; Snz. 3:9.

Gu Gene Aboro Asia Ka Fu Gamahe Ngbaha Tipa Gu Sunge Namanga Rogo Zegino Dunduko

A wa si adu ti rago gu mokedi nangia Pauro, dungu aboro ‘naigo he’ watadu namaa bete marã areme tipa ka maaha ku rogo gu sanduki nga ga dungurati du tipa gu tungusapai namanga “Rogo Zegino Dunduko.” (1 Kor. 16:2) Rogo adiwi ni basasa, dungurati nakeda gu marã re fu gu be-basunge nga ga aDezire Yekova du rogo gayo ringara. Mo ima rengba a ka keda gamo gamahe ku rogo gu basunge nga ga aDezire Yekova du rogo gamo ringara. Ka mo aida ka ino gu adresi nga ga gamahe aDezire Yekova amangasunge na ni rogo gamo ringara, mo sana gu be-basunge du rogo gamo ringara. Mo ima rengba ka gbia agu adresi nga ga abe-basunge rogo gaani bangiriba nga ga Internet nga www.pr418.com. Agu angbatunga agamahe rengbe mo ka kedaha ringbisihe kuti wai du apai rogo gamo dagbarago nakoda:

MARÃ

Oni rengbe ka fu marã watadu ka keda tieke nga ga marã. Rogo gu kura abe-basunge, si taata tipa aboro kedihe a rogo gaani bangiriba nga ga Internet nga jw.org watadu gu kura abangiriba nga ga Internet.
Oni ima rengba kafu nyanyakipa ahe wa kikiipa afongo, dagbangua, na gu kura ahe. Si naida oni kedihe na waraga nayugo gupai nga oni du fu gu he re ni gamahe.

GU GAMAHE MO AFUHE NI BAPE

Si nga marã mo afuhe tipa riigbu mangisunge na ni, ono mo ima rengba ka sanahe tipa i karagaha foro ka mo aidaha.
Mo nakedaha na gu waraga nika yugo gupai nga gi gamahe re nga bape.

GU GAMAHE MO AFUHE NI UNDO

Kupati gu gamahe nga ga marã na gu kura nyanyakipa ahe, gu kura agene kinaho rengbe oni ka fu gamahe ngbaha tipa ka undo gu sunge tungusapa Kindo namanga rogo zegino dunduko. Agu agene re gudu kusende re. Kangia gini ngbatungaha oni aida ka mangasunge na ni, oni sana gu be-basunge du rogo gaoni ringara tipa ka ino gini gu rengbe oni ka mangaha. Wa duhe nga gu ndiko du tipa ngbatunga agi apai re gbiati marã-ngbeti ni bakiakia, si adu ni wenepai ka oni sana gu boro inipai wenengai tipa ngbatunga agi apai re ni undo roni.

Basunge-igo-marã na gu Mbakadapai Nga ga Fu Marã fu Boro fuo Mbu Ni Sunge: Si nga gu basunge-igo-marã nga gu nangerafuo boro ti regbo kerepai. Boro ima rengba ka fu gu marã re fu gu riigbu nga ga aDezire Yekova watadu gu marã basunge afuhe fu boro fuo mbu ni sunge.

Gu Marã du Beenge yo: Boro ima rengba ka keda gu waraga nayugo pa gani marã beenge yo fu gu riigbu nga ga aDezire Yekova nga gu rengbe beenge ka fuhe fuo kpio ni ringbisihe kuti agu andiko beenge du rogo gaoni dagbarago.

Gu Marã Ababagaahe Afuhe fu Boro: Boro ima rengba kafu gamahe fu gu riigbu nga ga aDezire Yekova nga gu marã ababagaahe afuhe funi, watadu ni ima rengba ka ke waraga nga i fuhe fu riigbu fuo kpio ni.

Mekemeke Abambu: Boro ima rengba kafu gu mekemeke abambu du beni ni gamahe fu gu riigbu nga ga aDezire Yekova, na ki pe gupai nga i rengbe ka diaha kina fuo kpio ni.

Ke Waraga na pa Gupai Mo Aidaha: Boro ima rengba kafu marã watadu dagbangua fu gu riigbu nga ga aDezire Yekova ni ke ni waraga ku bangiri agbia ngbii nga ni ima fu guhe re fu riigbu watadu ka pehe nga i fuhe fu riigbu fuo kpio ni. Gipai re naundo boro ka ni nitumongo marã-ngbeti ya.

A wa gi fugo nga ‘gu gamahe mo afuhe ni undo’ ayugoho, si naida boro berẽ aberã wenengai mbata fu ni fu gu gamahe re. Tipa ka undo agu aboro naida ka undo gu sunge tungusapai du rogo zegino dunduko nga ga aDezire Yekova, burosua kinaho i nakusihe nga Charitable Planning to Benefit Kingdom Service Worldwide rogo pa-Ingirisi na pa-Sepania. I akusi gu burosua re tipa ka undo aboro i rugutiyo na pa agu aundo rengbe yo ka fuhe awere na gu rengbe yo ka fuhe ono i ki dihe fuo kpio yo. Si rengbe kadu nga agu apai du yo amanganga sunge rogo gaoni ringara te. Dungu aboro niima mangasunge na ngbatunga agu aundo re tipa ka songoda gu sunge ani amangaha rogo zegino dunduko. Kangia ngbatunga agu aundo re kina rogo gaoni ringara, oni ima rengba ka sanahe tipa gu burosua re be gaoni bakeapai nga ga dungurati tipa i kedihe furoni.

Ka oni aida ka ino dungu apai tipa gipai re, oni noro gu kekeapai du kusende nga “Mo Fu Gamahe Si Undo Gaani Sunge” rogo gaani bangiriba nga ga Internet nga jw.org/zne watadu mo ke waraga fu gaani be basunge.

Gere Ima Rengba a ka Ngba Tiro

Making Donations Electronically

NGBAÕBAMBU SINZIRI—AGU DU TIPA DUNGURATI