1, 2. Pa maa ani bangirani koyo du Yekova ni nakoda ginipai?

ANI NARAKA “rogo kusa rago” nga gu du ni ‘gbegberẽhe’ na raka nika du ni kere kpakarakpakaraha mbata fu Yekova gbarasi gi gbegberẽ zegino re na ki ye na ndikidi zereda ku auru kpotosende. (2 Tim. 3:1) Sidu, si naida ani sana tirani nga, ‘Wari gu mi angera kuhoni tipa undo na rugaapai?’ Gaani karagapai ima rengba kadu nga, “Koyo du Yekova ni,” na si nga bawene karagapai kisusi.

² Ngera koyo du Yekova ni nakoda ginipai? Na wai rengbe ani kadu na gu kido nga bangirani kina koyo du ko ni ho ani agbiatirani ni na gu kere kpakaraapai nga ga raka? Akama agarã kusayo, bake papara Atambuahe aima rugatiko na gupai nga si naida bangirani du kina koyo du Yekova ni tipa undo ti regbo zingo. (Oni gedi Atambuahe 123:1-4.) Ko aringbisi pa wai ani angera koyo du Yekova ni kuti wai moyambu ninaangera koyo du bairani ni. Ginipai bake papara Atambuahe aaida ka gumbaha na gipai re? Sidu, anga moyambu ninaangera koyo du bairani ni tipa kina riahe gbiati bandahe sa te, ono ni naangana bairani angana kindi tipa ka ino gupai ni aidaha na ni ki mangi  gupai re. Wakina gure, si naida ani naaweteka Fugo Mbori na aʹuru dunduko tipa ka ino gupai Yekova akpinyemu ani mangihe na ani ki mangihe. Si nga gu yangara gene rengbe ani ka du na gu kido ngbaha nga Yekova nika undo rani aundo ho ani kaa ida undo ni.​—Ef. 5:17.

3. Ginipai rengbe ka gbeberã rani kusayo ti ngera koyo du Yekova ni ya?

³ Wa vura duhe nga ani ima ino pa nyakapa maa ani bangirani koyo du Yekova ni, ani ima rengba ka du ni fudifudi rani be apai ti kura aregbo. Kina boro gupai re namangi mbembedi nakurea Yesu nangia Marata. Ri adu “ni fudifudi ri be bakere mangapai.” (Rk. 10:40-42) Ka si du nga gu ruru boro nangia Marata adu ni fudifudi ri Yesu ki vura duho vurũ, si airiwongo tirani ka ngbatungapai wa gure mangi rani te. Ginipai rengbe ka gbe berãrani ti ngera koyo du Yekova ni? Rogo gi kekeapai re, ani nika wisigo wai rengbe gu mangaapai nga ga kura aboro ka gbe berãrani kusayo. Ani nika wirika wai awirika a rengbe ani ka nye kindi kaa ngera koyo du Yekova ni.

4. Tipagine rengbe gupai ka iriwo tirani ti ni nga Moize aima zanga gu momu nga ga rimo ku Ringara Mokido yo?

⁴ Moize anaangera koyo du Yekova ni tipa rugapai gbiati ngbembatayo. Nirengo, “ko aru nyanyaki, nibi gu ko ka bangirise abi nga ko ya.” (Oni gedi AEbere 11:24-27.) Agu apangbanga du rogo Ziazia Kekeapai yo nape gupai furani nga “nebi ho sa nadu dagba aYisaraere wa Mose, Yekova aini ko i ki ningere bangiriyo te.” (Pa Rug. 34:10) Ono wa si avura du vurũ nga Moize adu na ngbatunga gu mbembedi pabakure re na Yekova, ko aima zanga gu momu nga ka rimo ku Ringara Mokido yo. (Geda 20:12) Ginipai nasa Moize ko koto?

5-7. Gini kpakarapai naakuru ngbutuko fuo aYisaraere kuru Ezipeta yo, na waigu Moize amangipai kuti ni?

⁵ Mbata fu diwi ue fuo aYisaraere kuru Ezipeta yo, kere kpakarapai akuru​—zavura mbata fu i da Bagangara Sinai yo. Aboro atona ka kpakanahe tipa zingo ime. I atona kpakana Moize, na gupai re aima du ni kerehe si ki sa Moize ko kpari kuari fu Yekova nga: “Gini pai mi ka manga fu agi aboro re? I ima mbeda ka zumuda re na mbia!” (Gate 17:4) Yekova afu zukazuka arugapai fu Moize. Yekova aya fuko ko di gako ngbondo na ki nari gu mbia naadu Orebe yo, na ime ki gbadi ti ni. Ani nageda gupai nga: “Moize ki mangi wo ku bangiri ga aYisaraere abaakumba.” AYisaraere ambiri ime ki rengbe behe, na gu kpakarapai re ki nyasi.​—Gate 17:5, 6.

⁶ Ziazia Kekeapai nagumba gupai furani nga Moize “ki yambu rimo gu ba re nga Masa na Meriba bambiko ga awiri aYisaraere kpakanahe na bambiko wa i aasadi Yekova, niya: ‘Yekova dagba rani watadu ko ho te?’” (Gate 17:7) Arimo gu ba re arẽarẽ mbiko rogoyo nga “Asada” na “Kpakanahe.”

⁷ Waigu Yekova abi gupai namangi Meriba yo re? Ko abi gu mangaapai nangia ga aYisaraere re nga si angia soapai kuti gako pagbia, angianga kungbo samungu kuti Moize ya. (Oni gedi Atambuahe 95:8, 9.) Gupai aYisaraere amangihe re angia kere gbegberẽpai. Ono ti gu regbo re, Moize amangi gupai naadu ni ruruhe. Ko angere koyo du Yekova ni na ki pekefuo gako arugapai.

8. Gini kparakapai naakuru mbembedi kuti digido gu nduge naadu ngbakungba yo tipa agarã 40?

⁸ Ono ginipai tie namangi ho kina gu bangisapai re amangi ni fuo agarã 40 kusa, mbembedi kuti digido ga aYisaraere nduge ngbakungba yo? Awiri aYisaraere abi tiyo  berewe rogo ba i aye ka yambaha nga Meriba. Ono gi ba re adu kia, si adu mbembedi na Kadesa, mbembedi kuti ngbanda Ringara Mokido. * Awiri aYisaraere akpakanahe berewe tipa zingo ime. (Geda 20:1-5) Ono ti gi regbo re, Moize amangi kere ingahe.

9. Gini arugapai Yekova afuhe fu Moize, ono ginipai ko amangihe? (Oni bi gu sura duti tonatonaha.)

⁹ Waigu Moize amangipai kuti gi samungu re? Berewe a, ko angere koyo du Yekova ni tipa rugapai. Ono ti gi regbo re Yekova aayanga fuko ko nari mbia te. Ko aya fu Moize ko di gako ngbondo, ki dungura aboro ku pati mbia, na ki gumbapai fu mbia. (Geda 20:6-8) Ono tie, Moize aagumbanga pai fu mbia te. Kuba gure, ko adu na bakere zinga na ki poi kuari fu agu aboro nadunguratiyo kupati mbia nga: “Oni gí he awere, oni airasamungu;! Ani kusi ime fu roni ti gi mbia re?” Fuoho ko ki tumba beko kuari ki nari mbia bara ue angianga bara sa ya.​—Geda 20:10, 11.

10. Waigu Yekova amangipai kuti gupai Moize amangihe?

¹⁰ Yekova azingi ni kerehe na Moize. (Pa Rug. 1:37; 3:26) Tipagine Yekova azingi ti ni wa gure? Si rengbe kadu nga badungu nduapai kinaho ko azingi ti ni. A wa gu i nagumbaha kuari, si rengbe ka du nga Yekova azingi mbiko Moize aandunga kuti gu vovo rugaapai ko afuhe fuko te.

11. Ho Moize anari mbia ni, tipagine ko arengbe ti ni ka sa aYisaraere i berẽ gupai nga Yekova aamanganga iiriwopai te?

¹¹ Si ima rengba kadu nga kura ndupai kinaho Yekova azingi ti ni. Gu ngbatunga ambia du pati bambata Meriba ni nyanyakihe. Ka boro vura nara ha anara wai vurũ, ka ime kurunga ti ni te. Ono tie, gu ngbatunga ambia du pati ue Meriba kia, si dedede na rurungbura ha rogoho. Bambiko gi ngbatunga ambia re na rukutu ayaro ti ni, rogo gu ngbatunga arago re, ime naadungura tihe dedede ku sende yo na aboro rengbe ka gbia gi ime re ni ge yo ayaro ti gu mbia re. Sidu, ho Moize anari mbia ni bara ue kuba gupai nga ko fura fuhe, ya mo si rengbe kadu nga aYisaraere aberẽ gupai nga ime akuru nisaha anginga mbiko gupai nga iiriwopai du Yekova amangihe ya? * Ani ainongo gini gu nga rengo nzunzu te.

12. Si rengbe kadu nga gini kura ndupai Yekova azingi ti ni na Moize gbiati Arona?

¹² Gu kura ndupai kinaho Yekova azingi ti ni na aMoize na Arona. Oni bingo gupai Moize agumbaha fu aboro nga: ‘Ani kusi ime fu roni ti gi mbia re?’ Ni manga Moize sunge na gu fugo nga “ani,” si nawira gupai nga ko aafura tipa tiko na Arona. Agu afugo re ayugu bakere zanga irisa fu Yekova nangia ndikidi Mburu gu iiriwopai re. Gupai nasongoda gupai nga gipai re ima rengba kadu nirengo nga gupai ani agedaha rogo Atambuahe 106:32, 33 nga gu naya: ‘I azingisi gako erã pati aime Meriba, si du pai angbanga ti ni fu Mose tipa gayo pai ya. Bambiko i azingisi toroko, si du ko agumba pai ti ni ni gba sa pai.’ * (Geda 27:14)  Ka si vura du nga kina ginipai naadu, ga Moize mangaapai aima gbe berã aboro kusayo ti gu taarimo si aaidaha fu Yekova. Ho Yekova aafura ni fu aMoize na Arona, ko aya: “Oni asa mungu kuti gi pai.” (Geda 20:24) Si angia kere ingaapai ni rengo!

13. Tipagine gu gene Yekova asapungbanga Moize ngbaha aruaru ti ni na ki rẽarẽ?

¹³ Wa aMoize na Arona angia abangbembatayo fu ga Yekova aboro, Yekova aaida i mangipai ni bakere he gbe. (Rk. 12:48) Kusayo, Yekova aká fu gu ngbatunga arikaaboro nangia aYisaraere ka i rimingo ku ringara Kanana yo ya mbiko gayo samungu. (Geda 14:26-30, 34) Sidu, si aruaru na ki rẽarẽ Yekova sapungbanga Moize wakina gure mbiko gako mangapai nga ga samungu. Wakina gu kura abasamungu re, Yekova aambunga ko ko rimi ku Ringara Mokido yo te.

14, 15. Ginipai nasa Moize ko samungu?

¹⁴ Ginipai nasa Moize ko samungu kuti Yekova? Oni bingo gupai berewe du rogo Atambuahe 106:32, 33 nga gu naya: ‘I azingisi gako erã pati aime Meriba, si du pai angba nga ti ni fu Mose tipa gayo pai ya. Bambiko i azingisi toroko, si du ko agumba pai ti ni ni gba sa pai.’ Wa si avura du nga aYisaraere du naimisi ngbadu Yekova, kina Moize nazingi. Zanga zatise asa Moize ko fura zanga berẽkurii gu sangbanapai si nika ye na ni.

¹⁵ Moize ambu gu mangaapai nga ga aboro si gbe berãko ti ngera koyo du Yekova. Ti gu bambata regbo aYisaraere akpakanahe tipa ime, Moize aima mangapai ni ruruhe. (Gate 7:6) Ono tie, fuo mangako sunge na agi asamungu re tipa dungu bawe agarã, ko aima mbu beyo na ki du na gberãrago. Ya mo si rengbe kadu nga Moize aaberã kina pa gu gberãrago ko adu na ni kuba gupai nga ka fu taarimo fu Yekova?

16. Tipagine si aida ani berẽ ti ni kurii gupai Moize amangihe?

¹⁶ Ka si du nga ruru nebi wa Moize were aima rengba ka ingapai, si taata gu bangisapai re mangi tipa rani. Wakina wai Moize aima mbeda ka rimo ku Ringara Mokido yo, ani ima mbeda a ka rimo ku rogo gu vovo zegino Yekova nakido paha fu rani. (2 Pet. 3:13) Anga boro sa dagbarani yo naida ka zanga gi kparakpara mamu re te. Ono tipa ka rimo ku rogo vovo zegino, si naida bangirani nye kaa ngera kindi koyo du Yekova ni na kini mangi gupai ko akpinyemuhe ti aregbo dũ. (1 Yo. 2:17) Gini apai rengbe ani ka wirikaha ti ga Moize ingahe?

17. Ginipai nika undo rani ani du na zatise ho du ani ni na gberãrago?

¹⁷ Ka oni zanganga zatise ho du oni ni na gberãrago ya. Ka ani vura kaa gbiatirani na kina bangisa kpakarapai dedede, “ka ani mbú nga be manga rurupai ya, bambiko ka he amáka nga rani ya ani aké ahe ho regboho ka da ni.” (Gara. 6:9; 2 Tesa. 3:13) Ho pai watadu boro aba gberãrago ni tirani dedede, ya mo ani ninaaza tirani ti fugo watadu zinga? (Snz. 10:19; 17:27; Mt. 5:22) Ho aboro asa rani ni ani zingi, si naida ani “ongo aonga fu zinga,” watadu ani mbu Yekova ko yugu gako zinga. (Oni gedi ARomo 12:17-21.) Rogo gupai yo re nga gine? Kuba gupai nga ani zingi, si naida ani du na zerangbaduse kini pidi Yekova tipa ko mangipai kuti gaani kparakapai ti gu regbo rẽarẽ bangiriko. Ka ani asadi ka ira bape kuba gupai nga ani ngere koyo du Yekova ni, gure nga ani nayugo zanga irisa fu ko.

18. Ginipai si aida ani tingidihe nibipa pekafuo arugapai?

 ¹⁸ Oni pekefuo gu vovo rugaapai duho sirisiri. Ya mo ani napekafuo gu vovo rugaapai Yekova nafuhe furani? Si aidanga ani naamanga apai ti aregbo dunduko kina wai ani anaamangaha mbata kusayo te. Kuba gure, si naida ani du zaaza ka pekafuo gu vovo arugapai nga gu Yekova afuhe vurube gako riigbu. (Eb. 13:17) Ti kina gu bangisa regbo re, si naida ani du na rubangirise tipa ka zanga ‘susa ri agu apai du ni keke he.’ (1 Kor. 4:6) Ka ani mangihe wo, si nika sa gupai nga ani ningere angera kindi koyo du Yekova ni.

19. Waigu rengbe ani ka zanga mbu agu aingahe nga ga aboro ka si gbarasingo gaani pagume na Yekova ya?

¹⁹ Ka oni mbunga agu aingahe nga ga aboro si gberesi pa gaoni pagume na Yekova ya. Ka ani nye kindi kaa ngera koyo du Yekova ni, ani mbunga gu mangaapai nga ga aboro si sa rani ani zingi watadu si gbarasi pa gaani pagume na Yekova te. Gipai re na nyanyakipaha gbe ka si du nga ani na asunge berani rogo ga Mbori riigbu wa gu naadu be Moize. Wa vura duhe nga si ni rengo nga ani ni basasa si aida ‘ani mangi pa gaani bata tigaani ni gunde na kio,’ si naida ani tingidi gupai nga Yekova amaanga rugute amaa ho sa ko asapangbanga rani kuti ni te. (Frp. 2:12) Kuba gure, ho du ani ni na bakere asunge berani rogo ga Yekova riigbu, ko naida bakere apai a berani. (Rk. 12:48) Ono ka ani kpinyemu Yekova nzunzu pai ho sa nika kotosa rani watadu ka kpara rani ti gako nyemuse te.​—Tam. 119:165; Rom. 8:37-39.

20. Si naida ani diberã ka manga ginipai?

²⁰ Ti gi kpakarakpakara aregbo re, si ni nyanyakipa pai tipa ani naangera kindi koyo du Yekova ni nga gu ko “nasunga rogo angbangbaturũ!” tipa ka ino gupai ko aida ani mangihe. Ka ani ya mbunga gu mangaapai nga ga aboro si gbarasi gaani pagume na Yekova ya. Gupai namangi tipa Moize nayugo pa nyakapa gipai re furani. Kuba gupai nga ka zinga ho aboro amanga aingahe ni, si naida ani diberã “bangirani du kina . . . koyo du Yekova ni nga gaani Mbori, da kina ho ko ka aina pai ni fu rani.”​—Tam. 123:1, 2.