“SENE! Ginipai na mo areme?”

Zanga kapa, mo naafu ngbatunga sene afu wa gure dedede. Na zavura si rengbe kadu nga mo aima fu sene wa gure, ki zi be boro watadu ki dungo ni. Sino fu sene gbiati agu afugo aboro apehe ho i afu sene ni ni bakiakia ringbisihe kuti gu ba du boro rogoho, ono gupai fu sene amangaha kina sa. Zaatu gu boro afunga sene fu aboro ya watadu aidanga ga aboro sene ya, aboro nabi ni nga nyemu aboro tiní te, watadu ni nga gbegberẽ sino boro.

Ono anga aboro dunduko du na nyemu ka fu sene fu aboro te. Aguyo na ndundu ka fu sene mbiko zee namanga yo amanga watadu i nabi tiyo na payo kusende. Agu akurayo nabihe ni mbumbuhe ka fu sene fu agu aboro du tunga yo gbiati gayo sino mangaapai kia, na watadu du gayo abangiriba kia. Ono tie, zavura fu guru sene ima rengba kadu na wene asangbanapai kurii gu boro i afuhe fu ni.

Mo sananga tiro nga: ‘Ginipai rengbe fu sene ka mangaha? Na ginipai rengbe Fugo Mbori ka yugoho fere tipa fu sene?’

Ho gu mokedi nangia Petero adi gu Gendiria ni nangia Korunerio kugume ku rogo gu dungurati nga ga aKristano, ko aya: “Mbori akpara nga aboro te.” (Amo. 10:34) Kusa, Petero ake gupai nga Mbori “nakpi nyemu aboro da ti zungadi tiyo dunduko.” (2 Pet. 3:9) Ani rengbe ka berã gupai ti bambata regbo nga agu averesi re nafura tipa gu boro nawirika rengo. Ono Petero angarasi aKristano a ki ya: “Oni írisi aboro dunduko. Oni kpí nyemu awirina.” (1 Pet. 2:​17) Ya mo si arengbanga kadu tie ni wenepai ani fu sene fu aboro zanga bipa ngbatunga yo, gayo sino mangaapai, watadu gu gene i asono ngbaha te? Mangaha wo nika ngia gaani papara yugo irisa gbiati nyemuse fuyo.

Gu mokedi nangia Pauro angarasi agu aboro naadu rogo dungurati ki ya: ‘Oni di akuaroni ku gume wa di Kristo roni a ku gume.’ (Rom. 15:7) Pauro aima pepa agu awirina “nga agu yo nangarasi” ko. Nairiwo wai agu awirina du areme aida ngarasaro wa Satana azubo ga Mbori aboro na bakere zubohe.​​—Koro. 4:​11; Yugo. 12:​12, 17.

Agu akpiapai du rogo Ziazia Kekeapai yo nayugo gupai nga fu sene ima rengba ka mangapai kisusi gu nga ga sa aboro i bihe nga ani ima dia yo kugume.

Ho regbo ada ni tipa i aria raka Wiri Mbori ku rukumbu Maria yo, Yekova akedi maraika ko fura furi. Gu maraika re atona gako afugo ki ya, “Ako [watadu sene foro], mo gu Gbia du na mo, ki fu maku foro.” Ngbadu Maria ‘ki kua akua,’ ka ri ainongo ndu gupai maraika aafura ti ni furi ya. Ho maraika abi gipai re ni, ko aya: “Ka mo gunde nga ya, Maria, bambiko Mbori ngba na mo.” Ko ape gupai nga ga Mbori ringbisapai du naadu nga ri vungu Masiya. Kuba gupai nga ngbadu Maria naakuo kindi, ri akaragapai ki ya: “Mo ngére, ga Gbia kanga nga mi; i mángi he fere wa gu mo agumba.”​​—Rk. 1:​26-​38.

Si adu ni pa momu fu gu maraika re Yekova kedi ko; ono wa si avura duwo, ko aabingo ho nga si arẽnga ko fu sene fu kpakpa boro te te. Ko atona gako afugo na fu sene. Ya mo ani rengbe ka wirikapai ti gu kpiapai re? Si naida ani du regerege ka fu sene fu aboro na ka ngarasa yo. Na kina guru afugo gbua, ani ima rengba ka undo aboro na ka fu gu kido fuyo nga i nga gu ga Mbori aboro payo naima nyaka bangiriko.

Pauro aima ye ka ino dungu aboro rogo agu adungurati naadu Asia Minor yo na Putu yo. Agu awaraga ko akekehe na dungu asene rogoho fu aboro. Ani nabi gipai re rogo ARomo rogo kapita 16. Pauro akedi  sene fu dungu akurako aKristano. Ko apepa Foibe ki ya ri “nga dawirani,” na ko angarasi awirina i “dí ri ku gume rogo Gbia, re are ni ga Mbori aboro, [i] únda ri aunda na pa gu pai ka zingo ho amanga ri.” Pauro akedi sene fu Puriseka na Akuira ki ya, “kina re natambua yo sa te, akanisa dagba aGendiria a dunduko.” Ko aima fu sene fu kura aboro nga aguyo aboro ainongo pa yo areme gbe ya, ko aya, “Epaineto badiangbare” gbiati “aTurufaina na Turufosa, i namanga sunge rogo Gbia.” Nirengo, Pauro adu na nyemu kaa fu sene fu awirinako.​​—Rom. 16:​1-​16.

Oni berẽnga pa gu ngbarago i adu na ni ho i aini gupai ni nga ko anaaberã payo aberã. Si nawira gupai gbe nga gayo nyemuse tipa Pauro gbiati akurayo aima ye ki dunguro! Na pa gia agu asene re aima ngarasa kura aKristano nirengo, na si ki undo yo i nye nyanyaki rogo idapase yo. Nirengo, gu sene boro afuhe fu kurani ki yugu gupai funi nga ni na ndikidi nyemu ni tini na ki fu ndikidi tambuahe funi, si nanyakasapa bakure na kini kodi ga Mbori ruru amoyambu sa.

Ho Pauro ada ni rogo gu barugusa akurungba nga ga Puteori, na ki ndu bara ku Roma yo, agu awirina naadu rogo gu rago re aye ku Sudiyo ka gbiako. Ho Pauro abiyo ni tuturũ i niye, ko “ki tambua Mbori ki ngarã.” (Amo. 28:​13-​15) Ti kura aregbo, ani ima rengba ka fu sene fu boro gbua ni moma ani ti ngbarani funi watadu ni ya ani berani koyo du ni ni. Ono tie, zavura gupai re ima rengba ka ngarasa boro, wa gu boro du rogo gberãrago.

Gu bawiriki nangia Yakoba aaida ka fu nyanyaki rugute. Kura aKristano aada ni airabäri rogo toro yo ni zioyo bakure na zegino. (Yak. 4:4) Ono oni bingo wai Yakoba atona ke gako waraga:

“Yakoba nga ga Mbori moyambu, na ga Gbia Yesu Kristo moyambu a, nasanango gu rika aboro du bawe na ue du ni gbandakagbandaka yo!” (Yak. 1:1) Zanga kapa, agu aboro nagedi gako waraga aima bihe taata ka dia gako rugute kugume ho i abi gupai ni ti gako sene nga i kina sa na ko bangiri Mbori. Nirengo, sene ima rengba ka zaka gene zavura tipa nyanyaki sakapai.

Ono tie, ka sene vura du ni kina guruhe, si naida si du ni ndikidihe na si yugukpia ndikidi nyemuse. Gipai re nga rengo a zavura ho duhe ni wa ka i ya gu boro ani nafu sene funi amaanga berãni sa gu sene re te. (Mt. 22:39) Kura wirina sa Ireland yo ada Bambu Kindo yo ti kura regbo sa ho dunguratise aambeda ambeda ka tona ni. Ho ri aarimo ni ni ipo ku Bambu Kindo yo, kura wirina sa ni kumba aˈaria tiko, ki momu ti ngbako ki ya: “Sene. Si ni wenepai ka biro.” Gu wirina re andu ki sungu zanga karagapai fuko.

Fuo bete aposo kusa, ri aye fuo gu wirina re ki pe gupai fuko nga pai kinaho ninaafuda ri were kporo yo. Ri aya, “Mi adu rogo bakere gberãrago ni gu nyemu re, mi ki mbedi ka zanga ye ku Bambu Kindo yo. Mi atingidanga badungu agu apai naadu ba dunguratise yo te, kina gu sene sa mo afuhe fere. Si asa re mi biti re nga i ima diare kugume. Tambuahe foro.”

Gu wirina re aainongo pa gu bakere sangbanapai gako guru sene adu na ni te. Ko aya, “Ho ri ape pa wai ni fere gu guru afugo re amangipai na ri, rago aima ngba tire nga mi amangi ome ka fu sene furi. Gupai ri apehe re aima fu ngbarago fere a.”

Soromo akepai ki ya: “Mo fú bero afu fu aboro, bambiko si ayéga ayega berewe.” (Batu. 11:1) Ho ani ainopa wai ni du gaani sene na nyanyakipaha, gbe fu akuarani aKristano, ani nasa akuarani i du wenengai gbiati tirani a. Sidu tie, ka ani ya bingo gu ome du ti fu sene na paha kusende ya.