1. Gini kparakpara ndupai du ani na ngbarago ti ní?

NAIRIWO wai duhe ni pangbarago ka giapa wai ga Yekova aboro ange kina kumbatayo! Rogo gu garã nasusi, ani awiriki Ziazia Kekeapai na aboro bangeyo naima susa amirioni bawe. Gipai re nirengo nayugo gupai nga ga Mbori amoyambu nasa imayo si hasirago! Na oni berẽnga pa agu amirioni aboro du na nyemupai ani adiyo kugume ti regbo Tingida Pakpio Kristo. Rogo gi gene re, i arengbe ka wirikapai tipa gu nyemuse Mbori ayuguhe ho ko afu motumo tumorii ni.​—1 Yo. 4:9.

2, 3. (a) Ginipai aka nga na ani ti hasa rago “wa aimahe” ya? (b) Nibi agu afugo Yesu du rogo Matayo 5:14-​16, ginipai ani nika wisigoho?

² Rogo zegino dunduko, ga Yekova aboro nafura rogo dungu afugo ni bakiakia. Wa vura duhe wo, gipai re akanga na ani ti tambua Barani nga Yekova kina sa te. (Yugo. 7:9) Ka ani vura kaa pe kina gini fugo watadu kaa raka kina rogo gini ba vurũ, ani ima rengba ka hasa rago ‘wa aimahe auru kpotosende.’​—Frp. 2:15.

³ Gu sonakumbatayo ani abihe si nimangi, gu kodatise du dagbarani, na gu sino nga kaa ngera angera kindi nga gu ani aˈasada ka kakuti ni nafu taarimo fu Yekova. Rogo gi kekeapai re, ani nika sakapai tipa wai ani amanga agu apai re.​—Oni gedi Matayo 5:14-​16.

4, 5. (a) Kupati sunge tungusapai, wai du rengbe ani ka mbu imarani si hasi rago? (b) Gini wene asangbanapai rengbe ka ye mbiko manga ani apai ngba wene gene? (Oni bi gu sura duti tonatonaha.)

⁴ “Boro ho rengbe kadu ni ruru ni fu Gbia rogo gi yangara arame re te . . . kina gu sa ka ni mangisunge na gu momu nga ga mbu imani si hasi rago.” Gure nga gupai naadu ni kekehe rogo gu kekeapai riihe angia “Light in the Darkness,” rogo gu Ngbaõbambu Sinziri i akusihe rogo Banzinga 1, 1925. Fuo gure, gu kekeapai re asakipai ki ya: “Si naida ni mangi gipai re ni peka ni wene pangbanga fu aboro auru kpotosende, na ni raka ni ringbisihe kuti ga Yekova ruru arugute.” Si tie ziazia nga, gene sa dagba agu akuraha yo ani ambu imarani si hasi rago ngbaha nga ni tungusa ani wene pangbanga na ni sa ani aboro ni abawiriki. (Mt. 28:19, 20) Kurigure, ani rengbe ka taasa rimo Yekova na gaani sino mangaapai nga ga aKristano. Agu aboro ani agbiayo rogo akporo na aguyo nasusa ti agene nabi gaani mangaapai abi. Gu ngbarago du kpakpuraniyo na gu dawedawe sene ani afuhe fu aboro nayugo badungu apai tipa gu ngbatunga aboro nga ani na tipa gu ngbatunga Mbori ani airisoko.

⁵ Yesu ape gupai fu gako abawiriki nga, “Oni ki ta rima ku bambu yo, nipoi kuti aboro.” (Mt. 10:12) Rogo agu arago Yesu na gako amokedi anaatungusapai rogoho dedede, si anidu ni sino aboro kaa dia agu aboro kugume ku kpuyo i ainongo yo ya. Areme, si nga sino aboro rogo dungu aba te. Ono wa vura duhe wo, ka mo du wesewese na ki saki gu ndupai fu irakporo mo naye ti ni ku kpuni, si ima rengba ka dia gu bakabangirise kusayo du ni na ni watadu ka zeresa bete gani zinga. Wene mongo ti ngbase nga wene gene dedede ka tona fugo na boro. Gipai re ima du a nirengo ho awirina amanga dezirepai ni rogo gu ba du dungu aboro rogoho nimanga yo sunge na ũgbaraga awaraga. Wa mo nikaa manga gu ngbatunga sunge tungusapai re, mo rengbe ka bi gupai nga aboro dedede nakaragapai ngba wene gene ho i amoma ni fuyo na ki fu sene fuyo wesewese. Si ima rengba ka sayo i ye fuo rani na ki di gaani waraga. Wai mo amanga apai ngba wene gene ima rengba ka undo ro mo tona fugo na aboro.

6. Wai du kura sosono arogotise sa akiisi gayo sunge tungusapai?

⁶ Gu kura sosono arogotise sa ringara aNgirisi yo atungusanga pai berewe kporo na kporo wagu i anaamangaha mbata te mbiko ngbanga kpotoyo te. I adiberã ka mbu imayo si hasi rago kina pangba kpuyo. I naagbaraga agu awaraga du mburuhe rii Ziazia Kekeapai rii mbisa ho avunguagude aye ni ka dia awiriyo rogo sukuru nga gu du mbembedi na kpuyo. Nyemu inopai sa gipai re ima sa badungu avungugude i di agu awaraga nga Questions Young People Ask​—Answers That Work, Volumes 1 na 2, kodihe na aburosua. Kura nazakigene sa rogo gayo dungurati naandu fuoyo dedede tipa gi ngbatunga dezirepai i amangaha re. Wai du ri na aboro wenengai na gu ndikidi ome agu arogotise re amangaha asa kura bagude sa ko idi ka wirika Ziazia Kekeapai.

7. Wai du rengbe mo ka undo gu vovo aboro yego ku rogo gaoni rago?

⁷ Vuru agu agarã susi bambeda kusayo, badungu aboro zubo rogo gayo arago ku rogo gu kura badungu aringara. Ginipai rengbe mo ka mangaha ka undo gu ngbatunga aboro re i ye ka ino Yekova na gako ringbisapai? Tipa ka tonaha, si adu ni wenepai ka mo wiriki sene rogo agu afugo yo badungu gu vovo aboro ye ku rogo gaoni dagbarago apehe. Gu mbakadapai nga JW Language app rengbe ka undo ro mo mangi gupai re. Kurigure, si adu ni wenepai ka mo wiriki bete afugo rogo fugoyo yo nga gu rengbe ka sayo i du na nyemu ka fura na mo. Fuani tie, mo rengbe ka yugo gu badungu ngbatunga avidio na awaraga fuyo du ho rogo fugoyo yo rogo jw.org.​—Pa Rug. 10:19.

8, 9. (a) Gini aundo ani agbiaha ti gu gaani adunguratise nga ga bebere poso? (b) Wai du rengbe avunguagude ka undo awiriyo i naafu akaragapai ti regbo adunguratise?

⁸ Yekova ima fu gu Dunguratise Nga ga Gaani  Raka na Sunge tipa ani ini ka tungusapai wenengai. Agu apai ani awirikaha rogo gu dunguratise re naundo badungu rani ani du na bakere wingbaduse tipa kaa karagatirani fuo agu aboro ani atungusapai fuyo na kaa wisigo Ziazia Kekeapai na aboro.

⁹ Badungu vovo aboro ima bi gupai nga gaani rukutu agude nafuka akaragapai afuka ti regbo adunguratise. Avunguagude, oni undo awironi imayo hasi rago ni yugo oni pai fuyo i naafu akaragapai kina boro kpotoyo yo. Gayo taata akaragapai nga gu naye kina boro kpotoyo yo ti kura aregbo aima sa vovo aboro i ini rengo.​—1 Kor. 14:25.

10. Wai du rengbe gu irisombori nga ga aborokporo ka sa yo i du ni kodikodi yo?

¹⁰ Gu kura gene rengbe oni ngbaha ka sa ima roni si hasi rago nga ni sonosa oni kodatise rogo gaoni ngbadimokporo na rogo gaoni dungurati. Gene sa dagba agu akuraha yo rengbe avunguagude ka manga gipai re ngbaha nga ni manga yo mbakadapai kaa manga Gu Irisombori Nga ga Aborokporo dedede. Ti kura aregbo vuru diwi yo, dunguyo naakoda bi JW Broadcasting ti regboho. Tingbafuo bi oni gu mbakadapai re, si adu ni wenepai ka oni di regbo ka sakapai tipa wai rengbe oni ka mangapai kuti agu apai du rogo yo. Ho vunguagude anungusa gu irisombori ni nga ga aborokporo, si naida ni tingidi gupai nga, gu wirikapai tooni gude aidaha ima rengba kadu kia ti gu sosono gude aidaha. Oni mangi gaoni irisombori nga ga aborokporo rogo gu gene nika sa gupai nga aboro dunduko gbia undo ti ni.​—Tam. 148:12, 13.

11-13. Wai du rengbe ani dunduko ka sonosa kodatise rogo dungurati na ki undo kura aboro imayo hasi rago?

¹¹ Wai du rengbe paranga aboro ka sonosa kodatise rogo dungurati na rogo gu gene re i ki ngarasi kura aboro imayo hasi rago? Kangia paranga Kristano nga mo, si adu ni wenepai ka mo moi he ni gamo sasa ka zio bakure na sosono awirina. Mo ima rengba ka sana yo rogo irisa yo i peke pa agu apai namangi fuyo vuru gu badungu agarã yo i namangihe kuti ngba ga Yekova sunge. Mo ni ka bi gipai re ni pa ngarasaro, na gipai re nika fõngbaduroniyo dunduko oni sa ima rengo si hasi rago. Na ani dunduko rengbe ka maaha ni gaani sasa kaa dia agu aboro kugume naye tipa adunguratise ku Bambu Kindo yo. Pa manga oni he wo nika sonosa kodatise na si ima rengba ka fõngbadu gu vovo aboro yo naye tipa gaani adunguratise i idi ka sa imayo si hasi rago. Gu nyanyaki asadatise mo amangaha rengbe ka koda fu sene na mongo ti ngbaro fu agu aboro naye tipa dunguratise, isoke zavura ka undo vovo aboro i gbia basungo. Mo asadi  ka yugo yo fu kura aboro, rogo gi gene re, mo kini sa vovo aboro ka i naagundenga ya.

¹² Ka i fu gu sunge foro nga ga nungusa gu dunguratise du tipa tungusapai, mo rengbe ka undo sosono awirina bakere gbe i tungusipai. Ya mo wene dagbarago ho nga gu rẽarẽ nayo? Ti kura aregbo, mo ima rengba ka kusa yo i tungusipai na gu paranga aboro rengbe ka songoda yo. Mo ima rengba ka yugo gupai a nga mo ima rugatiro na gupai du tipa agu aboro kpotoyo gbiati agu apai du tipa yo ambunga gene fuyo i tungusipai gbe ya. Nirengo, gamo berãpa aboro na gamo rugatinapai rengbe ka undo paranga aboro na sosono yo, aguyo du na bakere inohe na aguyo adunga na bakerehe ya, i tungusi wene pangbanga zaaza na nyemuhe.​—Pa Mot. 19:32.

¹³ Bake papara Atambuahe agumba gupai nga: “Nga gu wenepai na wenerago a ka awirina sungu sa na berã sa!” (Oni gedi Atambuahe 133:1, 2.) Ho aYisaraere anaasungo ni kina sa, i anaagbia bakere undo ti gu wene maapai kurii nga ga agu akurayo i anaairiso Yekova na yo sa. Si adu wakina nzeme mbeda nga gu naanidu ni wenehe na kini zambuasi boro. Si adu ni wenepai ka mo diberã kadu na wene maapai kurii na kini sonosi kodatise dagba awirinamo. Kangia si nga gupai mo amangaha amanga, si ni wenepai. Ya mo mo rengbe ka asada ka ino awirinamo rogo dungurati bakere gbe kisusi?​—2 Kor. 6:11-​13.

14. Ginipai rengbe mo ka mangaha ka sa imaro si hasi rago rogo gu dagbarago mo araka rogoho?

¹⁴ Ginipai rengbe mo ka mangaha tipa ka kiiso gu ome mo amangaha ka sa ima rengo nga ga Ziazia Kekeapai si hasi rago rogo gu dagbarago mo araka rogoho? Gamo wene afugo na mangaapai ima rengba a ka sa gamo murakporo ni ye ku rogo rengo. Mo sananga tiro nga: ‘Wai du gimi amurakporo naabi re? Ya mo mi naabanda kpure na gimi ahe ni gigirihe, rogo gu gene re, si kini sa gu dagbarago mi araka rogoho bibihe du ni wenehe? Ya mo mi naamanga diandue ka undo kura aboro? Ho mo afura ni na kura aDezire Yekova, si adu ni wenepai ka mo sasana yo tipa ka ino wai gayo wenesino na wene mangaapai nadu na maapai kurii agumeyo, gayo amurakporo, agu aboro du yo na yo basunge yo, watadu akurayo sukuru yo. Si nawira gupai gbe nga mo nika gia wene apangbanga agia.​—Ef. 5:9.

15. Tipagine duhe ti ni ni nyanyakipa pai kaa ngera angera kindi?

¹⁵ Ka ani aida ka banda imarani si naahasa rago wenengai, si naida ani inipa gu regbo ani araka ti ni. Yesu angarasi gako abawiriki bara dunguhe nga: “Oni ngére.” (Mt. 24:42; 25:13; 26:41) Si tie ziazia nga, ka ani aberã gupai nga “bakere gberãngbi” ata mbedanga te, ya si ayengo ti gi regbo ani araka ti ni re te, ani adunga na gu bipai nga si naida ani tungusipai atungusa ni ipiˈipihe te. (Mt. 24:21) Kuba gupai nga imarani naaki aki wenengai rogo gaani dagbarago, si nikaa manga pidopido na zavura si ima rengba ka biso.

16, 17. Ginipai rengbe mo ka mangaha tipa kaa ngera angera kindi?

¹⁶ Wa apai agbera kina kumbatayo rogo zegino, ani dunduko si aida ani naangera angera kindi. Ho Yekova nika mangapai ni tipaha, ko nika mangaha ti kina boro regboho. Kango ti ni te. (Mt. 24:42-​44) Ono wa du rago tie re, oni du na zerangbaduse, kini ngere angera kindi. Oni naageda Fugo Mbori na aˈuru dũ, na kini kparikpee kakaka. (1 Pet. 4:7) Oni wiriki gu wene akpiapai nga ga agu awirina du na ngbarago rogo raka yo mbiko i nangera angera kindi na kini mbu ima yo si naahasa rago. Wene kpiapai sa nga gu pangbanga du rogo gu kekeapai nga “Seventy Years of Holding On to the Skirt of a Jew,” nga gu du rogo gu Ngbaõbambu Sinziri nangia ga Zerekpe 15, 2012, kpewaraga 18-21.

¹⁷ Mo naamanga agu apai nangarasa boro na kini kodi tiro na awirina. Gipai re nika ye na bakere ngbarago foro na si nika saro mo bi gupai nga regbo nasusa ni kina boro ipo. (Ef. 5:16) Agarã kama kusayo, awirinarani aima manga  bakere sunge. Ono Yekova nangbe kumbatayo furani ani naamanga bakere sunge areme kisusi. Ani nasa imarani si naahasa rago kisusi wai ka boro arengbe ka berãha mbata.

18, 19. Wai du rengbe abaakumba rogo dungurati ka undo rani ani naangera angera kindi na ka ani azeranga ya? Oni funga kpiapai tipa gipai re.

¹⁸ Si nanyakasa gaani idapase ka ino gupai nga gaani zangarengba akanga na ani ti mangasunge fu Yekova te. Nisangbana gupai re, oni bi gu gamahe na nyanyakipaha Yekova nafuhe nga “agamahe rogo aboro yo,” NW, du nga abaakumba nga ga dungurati. (Oni gedi AEfeso 4:8, 11, 12.) Gu regbo ka bakumba ye berewe ka bi ro, mo di gu momu re ka wirikapai ti gani tatamana na ki gbia undo ti gani rugute.

¹⁹ Abaakumba ue ringara aNgirisi yo aye ka bi arogotise nayambu yo ho i adu ni na kpakaraapai rogo gayo rogatise. Nairakporo abi gupai nga kumbari aangbenga kumbatayo fuyo rogo agu apai yo nga ga toro te. Kumbari ki idi gupai nga wene bayugupai nangia ko te na ko aamanganga mbakadapai kaa manga gu irisombori nga ga aborokporo dedede te. Agu abaakumba re ayugu gu kpiapai nga ga Yesu fu agu arogotise re. Ko angere fuo gako abawiriki na kini berãpa gayo azingo. Agu abaakumba re angarasi kumbari ko wiriki gu kpiapai nga ga Yesu. I ki ngarasi diako ri du na zerangbaduse. Agu abaakumba re afu aberãpai a fuyo nibipa wai rengbe yo ka mangapai sa tipa ka manga gu irisombori nga ga aborokporo na awiriyo du ue. (Ef. 5:21-​29) Kusa, agu abaakumba re atambua gu bairakporo re tipa gako nyanyaki asadatise. I angarasiko ko kpatagara kutini na kini kido kuti ziazia toro si undoko tipa ko da ni wene bariikporo rogo toro yo. Gayo nyemuse na gayo undo ima undo agu aborokporo re imayo hasi rago.

20. Ka mo mbu imaro si naahasa rago, sangbanaha nika ngia gine?

²⁰ Bake papara Atambuahe abibia ki ya, “Aboro maku nga agu yo dunduko nagunde ti Yekova, nata ngba gako agene.” (Tam. 128:1) Ka mo mbu imaro si hasi rago, ni yamba mo kura aboro i ye ka mangasunge fu Mbori, ni manga mo agu apai nga gu nasonosa kodatise, na ni nye mo kaa ngera angera kindi, gamo ngbarago nika kio kina kumbatayo. Kura aboro nika bi gu wene apai abi mo amangaha, na si nika sa dunguyo i fu taarimo fu Barani.​—Mt. 5:16.