Ba Rabama angia Soromo, nga guko nazogorago Yisaraere yo tipa agarã 40. (1 Aba. 11:42) Soromo akpi rogo 997 Mbata fu Batikayo Kristo. Fuani, Rabama aguari Yerusarema yo ki ndu ku Sekeme yo tipa i mbedi ko yo ni bakindo. (2 Peka 10:1) Ya mo mo naberãha nga ko aagunde agunde ka pekafuo Soromo, nga guko aboro ainiko ni gu boro naadu na bakere tatamana ti ni? Wai du ka Rabama arengbe ka bi gupai kumbatayo nga barambeda, gako rengba ka mangapai sa akpakarapai nika du ni asadiasadihe?

Si nawira gupai gbe nga, Rabama abi gupai nga pa apai aarukanga Yisaraere yo te. Fuo bete regbo kusa, agu aboro naarukuba aboro aye fuoko ki pekepa gayo abakabangirise fuko ziazia, i aya: “Bamo amoi gonga ku gorani ni kere he. Awere tie, mo ákpurasi ga bamo kere nyanyaki sunge fu rani, na gu gako rõrõi gonga ko amoi ku gorani, ani nimángi pa ro.”​—2 Peka 10:3, 4.

Si ima rengba kadu nga Rabama aima bi tiko nga ko ima zio ti gbina! Ka ko amangi gupai aboro aaidaha, ka ko na gako aborokporo gbiati agu aboro naadu kua bakindo yo aima rengba ka raka zanga gu kura wene ahe na ki rungburasi agu atindiro nga ga aboro. Berewe a, ka ko aka ka gia gupai aboro apehe fuko, ka aboro aima rengba ka samungu kutiko. Ginipai ko arengbe ka mangaha? Gu vovo bakindo re asana abaakumba mbata nga aguyo naana fu rugute fu Soromo. Ono tie, fuo gure, Rabama agbata rugute be aparanga, nga aguyo garãko adu sa na yo. Rabama agi kina gu rugute nangia ga agu aparanga re na ki diberã ka manga aboro gbegberẽ. Ko akaragapai fu aboro ki ya: “Buba amoi rõrõi gonga ku goroni, ono mi tigimi arõasa gaoni gonga ki susi; buba anata roni ni kpudu, ono mi tigimi atá roni ni kina angerembia.”​—2 Peka 10:6-14.

Ya mo mo bingo pai ane si aida ani awirikihe? Si tie ziazia nga, si dedede ni patatamana kaa gia agu arugute nga ga sosono aboro, nga aguyo naima nyaka rogo toro yo. Mbiko gupai nga i ima du na bakere inohe, si nawira gupai nga i ima rengba ka ino wai rengbe sangbana diaberã kadu, na i ki fu gu rugute furani du ni wenehe.​—Eyo. 12:12.

Fuo bi Rabama gupai nga aboro ima samungu kutiko, ko adungura gako riivura tipa ka sovura kutiyo. Ono Yekova akedi gu nebi nangia Semaya ko ndu ka pe gupai fuyo nga: “Ka oni ndú nga ya, ka oni só nga vura kuti awirinaroni nga awiri aYisaraere a ya. Oni káraga tironi dunduko ku kpuroni yo, bambiko gi pai re ye he be re.”​—1 Aba. 12:21-24. *

Zanga kandara ka sovura? Oni ima rengba ka berãpa wai gupai re arengbe ka fuda Rabama! Ginipai aboro arengbe ka berãha tipa gi bakindo naaserekpo he ka fu mbusa fu agu aboro ko aazoga yo na “angerembia” ono ngbutuko ko ki mbu gi ngbatunga samungu re si mangi? (Oni ringbisinga ha na 2 Pekapai 13:7.) Ono wa si avura duwo, bakindo na gako riivura “agi sangba Yekova . . . ki karaga tiyo ngba gayo agene, wa Yekova agumba ha.”

Ginipai ani awirikaha ti gupai re? Si ni patatamana ka giasangba Mbori ka si vura du vurũ nga pa mangaha wo rengbe ka sa aboro i bisira rani. Ho boro agiasangba Mbori ni, si nasa gupai nga ko idi na ni na ko fu maku funi.​—Pa Rug. 28:2.

Gini sangbanapai Rabama agbiaha? Ko agisangba Mbori na ki mbu gupai ko aasogima ha nga ka sovura kuti gu vovo kindo i asigiraha re na ko adiberã ka dudua agbata rogo agu arago nangia ga Yuda gbiati Benyamina nga gu ko adu kindi ni bazogo kuriihe. Ko ki nyakasi badungu agbata anyakasa “ki susi.” (2 Peka 11:5-12) Gu nyakipaha anyaka gbe nga, ko aima kakuti ga Yekova arugute tipa bete regbo. Wa gu kindo nangia ga aYisaraere naadu na angbatunga bawe Yerobama aazogaha atona kaa irisokpiahe, gu badungu aboro naadu yo ‘anyakasipa Rabama’ watadu asongodi ko ni nunga yo ku Yerusarema yo tipa ndikidi irisombori. (2 Peka 11:16, 17) Sidu, ga Rabama giasangba anyakasi gako kindo.

Ono tie, ho Rabama asigira bara gako zogarago ni nyanyaki, ko amangi gupai boro aaberãnga ha nga ko nika mangaha ya. Ko ambu gu rugute nga ga Yekova na ki tona kaa irisokpiahe! Ono tipagine? Ya mo nako nangia boro Amona du nanangi riko yo? (1 Aba. 14:21) Ka si vura du nga kina gini ndupai du naadu, gupai duho nga ringara dunduko apekefuo ko. Sidu tie, Yekova ambu bakindo Ezipeta nangia Sisaka ko zi badungu agu agbata nangia ga Yuda, wa Rabama avura ka nyakasaha vurũ!​—1 Aba. 14:22-24; 2 Peka 12:1-4.

Apai aye ka gberã kina kumbatayo ho Sisaka aye ni na vura ki da ti Yerusarema, nga gu gbata Rabama aazogarago rogoho. Ti gu regbo re, gu nebi nangia Semaya aye na gu pangbanga nga ga Mbori fu Rabama na fu gako abazogo, ki ya: “Oni mbu re, si du mbu mi roni ti ni ku be Sisaka.” Wai du Rabama amangipai kuti gu rugute re? Ko amangipai ni wenehe! Ziazia Kekeapai nape gupai nga: “Abazogo nga ga aYisaraere yo ki umbasi tiyo na bakindo a i ki ya, ‘Yekova du ni ruru ko.’ ” Sidu, Yekova abatasi Rabama na Yerusarema be gbarasahe.​—2 Peka 12:5-7, 12.

Fuo gure, Rabama andu kumbatayo kaa zoga gu kindo naadu ku sudiyo. Mbata fu ko kpi, ko afuku agamahe kpaima fu gu badungu awiriko nangia akumbagude, wa gopai ayugoho, ko amangihe wo tipa ka i sanga mungu kuti wirinayo nangia Abiya nga guko naandu ka diaba ko ya. (2 Peka 11:21-23) Ho Rabama amangihe ni wo, ko ayugu gupai nga ko aima du na bete dudungurobipai nga gu ko aadunga na ni mbata ya.

Wa Rabama avura ka asada ka manga bete weneapai, Mbori aaidanga na ko te. Ziazia Kekeapai nafura tipa gako zogarago nabaha dũ ki ya: “Ko ki nimangi gu pai nadu ni gbigbita ha.” Tipagine? Bambiko “ko afu nga kpotoko yo ka gbata Yekova te.”​—2 Peka 12:14.

Oni berẽnga kurii gupai si ayugoho: Rabama anaagiasangba Mbori agia ti gu kura aregbo. Na ko aima manga bete weneapai fu ga Yekova aboro. Ono ko aasonosanga mbembedi pagume na Yekova te watadu ko aadunga na kakaka nyemu ka sa ngbarago ti Yekova te. Mbiko gupai re, ko ati ku rogo iraira mangaapai yo gbiati ziree irisombori. Mo ima rengba ka bakabangiro nga: ‘Ho Rabama animangipai ni ni wenehe kuti gu rugute Mbori anaafuhe fuko, ya mo ko anaamangaha mbiko aboro du gbe naana sosoda ko angianga mbiko ndikidi saberã na mbiko nyemu ka sa ngbarago ti Mbori ya?’ (2 Peka 11:3, 4; 12:6) Kusa rogo raka yo, ko ani karagatiko kuti manga gupai du ni gbegberẽhe.  Nairiwo wai ko adu kia ti gu titako nangia Bakindo Davide! Rengo ngaha nga, Davide aima manga aingahe, ono rogo gako raka yo naabaha, ko adu na nyemuse tipa Yekova, futise tipa ndikidi irisombori, na ndikidi saberã ti gako aingapai.​—1 Aba. 14:8; Tam. 51:1, 17; 63:1.

Si nirengo nga ani ima rengba ka wirikapai ti Rabama. Si ni wenepai ho aboro angerani fuo gayo aborokporo na ho i amanga omeni ka manga weneapai fu kura aboro. Ono tipa gupai nga Mbori idi na ani, gu bambatapai nga gu nyakipaha kisusi si aida ani mangihe nga ka songoda ndikidi irisombori na ka kakuti ni.

Si nawira gupai gbe nga ani rengbe kada ti gu sasa re ka ani mangi ome ka banda gaani nyemuse tipa Yekova ni nyanyakihe. Kina wai ani naamaa nyake ku we yo tipa gupai nga we naaki aki kindi, kinawo a si aida ani banda gaani nyemuse tipa Mbori si naaki aki kindi ni wisigo ani Fugoko dedede, kini berẽkurii gupai ani agedaha, na ki kpatagara kuti kparakpee. (Tam. 1:2; Rom. 12:12) Gu nyemuse re tigaha nika fõngbaduraniyo ani sa ngbarago ti Yekova rogo agu apai yo dũ ani amangaha. Na ka si du nga ani mangi ingapai, si nika fõngbaduraniyo ani mangi ndikidi saberã. Kuba gupai nga ani du wa Rabama, ani nika ru nyanyaki rogo ndikidi irisombori yo.​—Yuda 20, 21.