Ya mo mo agedinga agu aNgbaõbambu Sinziri kuru barambeda kusayo? Mo bingoho singia mo rengbe ka karagapai kuti agi asanahe re:

Gini apai biama rengbe ani ka mangaha tipa kaa bibia wenengai?

Ani rengbe ka ru wenengai ki zadi gaani waraga bia kuari. Si naida ani naagbida wege wenengai. Ho ani azaka ngbarani ni wenengai ka bibia, ani nabibia kuari.​—w17.11, kpe. 5.

Ginipai si aida si ngba tirani nibipa agu aba abaakporo bagbuko adu rogoho Yisaraere yo na agu agene nanaandu koyo?

Abaakporo bagbuko adu sita rogo gu ringara re, na agenehe kidu ni wenehe. Sidu, boro aima rengba ka da yo ni ipo wenengai ka gbu.​—w17.11, kpe. 14.

Tipagine du du gu ga Mbori gamahe nga ga motumo tumorii ti ni ni gu yangara bawene gamahe rengbe ani ka gbiaha?

Si nambiisa gu nyemupai du ani na ni kaa raka araka kindi, na si nasarani ani du na ranirii be ingapai na kpio. Mbiko gupai nga Mbori adu na nyemu atita Adamu tiko, ko afu Yesu tipa rani wa ani adu ni aboro ingapai.​—wp17.6, kpe. 6-7.

Wai du Atambuahe 118:22 ayugupa ga Yesu zingabekpio?

I aka Yesu nga Masiya nga ko te na ki imiko. Tipa gupai nga ko da ni “mbia tukpu he,” si aaida ko zingi azinga be kpio.​—w17.12, kpe. 9-10.

Ya mo gu ngbatunga Masiya aye rogoho anaaye kina rogo bambata vungu yo sa?

Kura aregbo kinaho ngbatunga Yesu anaaye rogo bambata vungu yo, ono angianga ti aregbo dunduko ya. Davide aangianga bambata wiri Yisai te; ono tie, Masiya aye rogo ngbatunga Davide yo.​—w17.12, kpe. 14-​15.

Gini arugute duho rogo Ziazia Kekeapai yo nibipa ziga?

Ndiko aniidi gupai nga i nikpara agu aboro akpara du na kura ngbatunga akaza ti yo ti aboro. Si aniidi aboro naazunda beyo fuo zada yo kangba boro. Ndiko aniidi gupai nga i naakpisido gbegberẽrago wenengai. Si aniidi i naayera gude rogo muambe uru fuo batikayo ru, na mangaha wo angbaangba mbiko si anaasa gupai nga kure ugu ki mbu ga.​—wp18.1, kpe. 7.

Tipagine rẽhe arẽ ti ni fu Kristano ni du na bete nyemuse tipa ti ni?

Si naida ani kpinyemu akuarani wa ani akpinyemu tirani. (Mk. 12:31) Si naida akumbakuadee “kpí nyemu adiayo a wa boroyo.” (Ef. 5:​28) Rengo ngaha nga, kpinyemu tise ima rengba kadu rogo gu gene adunga ni ruruhe ya.​—w18.01, kpe. 23.

Gini bete adiandue duho si aida ani dihe tipa ka manga sonakumbatayo rogo toro yo?

Si naida ani naawisigo Ziazia Kekeapai kini berẽkuriihe na kini moi gupai ku rogo mangapai yo ani awirikaha. Si naida a ani mbu berãrani gbiati kpotoraniyo ni zazaha fu gu maapai kurii nga ga ziazia toro na kini di gu undo kugume aboro afuhe furani.​—w18.02, kpe. 26.

Tipagine adunga birĩ soroka na akerekuru gbiati abinza ni agene tipa ino agu apai nika manga kumbatayo ya?

Badungu nduapai duho, ono bangua ndupai nga Ziazia Kekeapai aidanga na gu mangaapai re te.​—wp18.2, kpe. 4-5.

Ho boro ayamba rani ni tipa riahe ku kpuni yo ani ki ima idaha, wai du si aida ani bi gu yambahe re?

Ka si du nga boro yambu rani ku kpuni yo tipa riahe ani ki ima idaha, si naida ani mangi ome ki nduandu. (Tam. 15:4) Si aidanga ani sungu asungo gbua kini aria berãrani nga ani andunga te te. Si nawira gupai gbe nga gu boro yambu rani re ima manga bakere ome ka manga gu riahe re.​—w18.03, kpe. 18.

Abaakumba na amoundo abaakumba rengbe ka wirika ginipai be Timoteo?

Nirengo, Timoteo anaaberãpa aboro aberã, na kini moi pa agu apai nga ga toro mbatayo. Ko anaamanga ziazia sunge nyanyaki. Ko anaaraba tiko araba kindi na kini kido kuti ga Yekova toro. Abaakumba na kura aboro ima rengba ka wirika gako kpiapai.​—w18.04, kpe. 13-14.