1, 2. (a) Rogo gini gene du du gu maabangirise nga ga aKristano kia ti gu maabangirise du rogo ga Satana zegino? (b) Gini nyanyakipa asanahe ani nika wisigopai tipaha awere?

NANGBA gu wene maabangirise dube ndikidi aKristano re! Ani dunduko singia mbedimbedi aKristano watadu gu “kura akandoro,” namaa bangirani tipa ka bi ga Mbori bambata ringbisapai si ni digisitihe gbiati pa ziasi rimo Yekova. (Yo. 10:16; Mt. 6:9, 10) Ngbatunga agu amaabangirise re nga gu nyanyakipa amaabangirise ani angera kumbatayo tipaha. Ani a nakpinyemu gu kidohe du tipa gbia nyenye unga singia rogo “vovo angbangbaturũ” watadu rogo “vovo kpotosende.” (2 Pet. 3:13) Ti kina gu regbo re, ani namaa bangirani tipa ga Mbori aboro nizugo azugo kindi kumbatayo rogo toro yo.

² Agu aboro a du ni papara ga Satana zegino na kina maabangirise a tigayo, ono i ima rengba ka bakabangiriyo singia gayo maabangirise ada ti rengo. Ni kpiapai, amirioni aba ake namaa bangiriyo tipa ka ba gu marã agbia i amaaha tipa aboro baha, ono i arengbanga kadu na kido nga i abaha te. Ono tipa ndikidi idapase tigaha, si nga “ndikidi he” du ani namaabangirise tipaha nga aKristano. (Eb. 11:1) Ono wa vura duhe wo, oni ima rengba ka bakabangironi nga, wai du rengbe gaoni maabangirise kada nzunzu nirengo? Na gini aundo du ti du na nyanyaki idapase kuti gupai du oni na maabangirise tipaha?

3. Ga ndikidi aKristano idapase naruriipa gini rengo?

 ³ Idapase nga gu sino i avunganga aboro ingapai na ni ya; si akuranga ti boro nisaha a te. Gu idapase nga ga aKristano nga surungba gu mangapai nga ga ga Mbori ziazia toro nga gu namangasunge ti agu aboro du na wene ngbaduyo yo. (Gara. 5:22) Ziazia Kekeapai ayanga wẽ Yekova na idapase watadu si naida ko du na idapase te. Bambiko Yekova du na tanduapai dũ na kidu na tatamana, pai ho rengbe ka ká na ko ti digiso gako ringbisapai te. Gu Barani du ngbangbaturũ yo, ko ima du na kido ka digiso gako kidohe nga ga fu maku fu aboro, na si bangiriko wa ka i ya si ima manga. Sidu, ko naya: “Apai aima nyasa.” (Oni gedi Yugoti 21:​3-6.) Ga Kristano maabangirise naruriipa gu rengo nga Yekova nga “yososo Mbori,” ko namanga agu apai dunduko ko akidohe tipaha.​—Pa Rug. 7:9.

4. Gini maabangirise gu ruru akumba na adee naadu mbata fu regbo aKristano adu na ni?

⁴ AEbere kapita 11 tangara rimo akumba na adee 16 naadu na idapase tiyo. Gu boro ga Mbori toro adu kugii ni ni kehe afura tipa yo na gu kura aboro nga “i adu na adezire tipa yo mbiko gayo idapase.” (Eb. 11:39) I dunduko naadu na ‘ndikidi maabangirise’ nga Mbori nika kusa ‘tita dee’ nga guko nika gbarasa ga Satana samungu kusayo na ki digisi ga Yekova bambata ringbisapai. (Bam. P. 3:15) Gi ruru aboro dunduko re akpiki mbata fu gi ‘tita dee’ nga Yesu Kristo re zaki gene tipa raka ku ngbangbaturũ yo. (Gara. 3:16) Wa si avura duwo, ani na tambuahe tipa gupai nga Yekova ambunga pa gako ringbisapai te, i nika zingisa yo i raki auru kpotosende ane na kpotoyo ni rengberengbehe.​—Tam. 37:11; Yes. 26:19; Osea 13:14.

5, 6. Ginipai Abarayama na gako aborokporo amoi bangiriyo tipaha, na wai du i abanda padu yo na nyanyaki idapase? (Oni bi gu sura du ti tonatonaha.)

⁵ AEbere 11:13 nafura tipa agu aboro naraki mbata fu regbo aKristano nga: “Agi yo re nakpi rogo idapase, ka i adia nga akidohe ya, ono i abi he mbata yo ki nipoi kuti ni tuturũ.” Boro sa dagba agi aboro re angia Abarayama. Ya mo ko akakuti gu maabangirise nga ka raka kutiibe ‘tita dee’ na ngbarago? Yesu aima fu karagapai kuti gu sanahe re ho ko aafura ni na asogoko nga: “Rago angba angba ati baroni nga Abarayama ko bi ragore; ko ki bi he, rago ki ningba angba ti ko.” (Yo. 8:56) Kina gu bangisapai re naadu tipa Sara, Yisaka, Yakobo, na kura dungu aboro namoi berãyo tipa Kindo kumbatayo, “du baduaha nga Mbori ni bamangihe a.”​—Eb. 11:8-11.

⁶ Wai du Abarayama na gako aborokporo abanda pa gayo idapase si du ni nyanyakihe? Si nawira wa i awirikipai tipa Mbori ni dega yo tuyo fu gu ruru aboro naadu mbata, ni gbia yo yuguyugupai be Mbori, watadu geda gu kuru awaraga naafura tipa Mbori. Gu nyakipaha anyaka gbe nga, bangiriyo aagonga ti gupai i awirikihe te ono i abi ga Mbori akidohe gbiati gupai ko akpinyemuhe na nyanyakipaha na kini berẽkuriihe. Mbiko wa gayo maabangirise adu ni ungaha, agi akumba na adee re aima mbakadatiyo tipa ka hi akpakarapai ka nye niruru yo fu Mbori.

7. Gini ahe Yekova nafuhe furani tipa ani sonosi nyanyaki idapase, na ginipai si aida ani mangihe na agu ahe re?

⁷ Tipa ka banda gaani idapase si du ni nyanyakihe, Yekova ima fu Fugoko furani nga Ziazia Kekeapai naabaha. Tipa ani gbia “maku” na “wenepia” watadu kadu na diabese, ani duwa ka ani aageda Fugo Mbori na aʹuru dunduko ka gene du. (Tam. 1:1-3; oni gedi Amokedi 17:11.) Fuo gure, wakina agu airisi Yekova naadu mbata fu regbo aKristano, si naida ani berẽkurii ga Mbori akidohe na kini mangi gupai ko akpinyemuhe. Yekova ima fu maku a furani ni fuko gu bakere riahe nga ga toro furani vurube ‘kangara moyambu du na tatamana.’ (Mt. 24:45) Rogo gi gene re, ka ani abi gupai ani awirikaha na nyanyakipaha, agu ariahe  nga ga toro Yekova afuhe, ani nika du wa kina agu aboro naadu na idapase mbata kusayo na naadu na ‘ndikidi maabangirise’ tipa Kindo.

8. Wai du rengbe kparakpee ka nyakasa gaani idapase?

⁸ Kparakpee a nga gu kura nyanyakipa pai naaundo agu adezire naadu mbata fu regbo aKristano gayo idapase du nyanyaki. Gayo idapase anaanyaka ho Mbori anaakaragapai ni kuti gayo akparakpee. (Nem. 1:4, 11; Tam. 34:4, 15, 17; Dan. 9:19-21) Ani ima rengba ka peka agu apai du ngbaduraniyo a fu Yekova, ki ini gupai nga ko agia rani agia na ki nyakasi rani tipa ani hipai na ngbarago. Na ho ko akaragapai ni kuti gaani akpee, gaani idapase na nyaka ni bakerehe. (Oni gedi 1 Yoane 5:14, 15.) Wa duhe nga idapase nga papara zuzu toro, si naida ani “sána he” tipa ga Mbori toro, a wa Yesu azungodi rani tipa ani mangihe.​—Rk. 11:9, 13.

9. Kupati kpara tipa tirani, ada berewe rengbe ani ka kpara tipa yo?

⁹ Ono tie, si aidanga gaani kparakpee ngia kina sanahe tipa Mbori undo rani sa te. Ani rengbe ka tambua Yekova tipa gako “iiriwo mangaapai” na aʹuru dunduko mbiko ‘ka i gedinga’ ha te! (Tam. 40:5) Na berewe a, si naida gaani kparakpee yugu gupai nga ani ‘natingidapa aguyo du ni vodivodi yo [bambukiso yo], ki du wa ka ani du ni vodivodi rani na yo.’ Na si naida ani kpari tipa agu azingo du awirinarani na ni rogo zegino dunduko, gbe ‘aguyo du ni abazogo rani.’ Kina ngbarani ni naazera ka bi wai Yekova naakaragapai kuti gaani akparakpee rogo zegino dũ!​—Eb. 13:3, 7.

10. Gini kpiapai du berani nga ga ga Mbori amoyambu nga aguyo na ká ka mbupa du yo niruru yo, na ginihe naafu ome fuyo tipa i mangihe wo?

¹⁰ Rogo AEbere kapita 11, gu mokedi nangia Pauro asakipai tipa agu aʹasada dungu ga Mbori amoyambu i ayambanga rimoyo ya ahi he. Ni kpiapai, gu mokedi re afura tipa agu adee naadu na idapase tiyo awiriyo akpiki ono kusa i ki gbiayo fuo i zingisiyo be kpio. Fuani ko afura tipa aguyo nga “i aida nga ka bata be he ya; bambiko i akpi nyemu ka dia wene zingabekpio susi gure.” (Eb. 11:35) Wa vura duhe nga ani arengbanga ka ino gini aboro naadu berã Pauro yo te, a wa si adu tipa Nabota na Zekaraya, i asopodi yo na ambia tipa gia yo sangba Mbori na manga gupai ko akpinyemuhe. (1 Aba. 21:3, 15; 2 Peka 24:20, 21) Daniere na abakureako aima du na momu tipa ka mbupa du yo niruru yo tipa ka ‘ida ka bata.’ Ka pepai ni masaku, gayo idapase kuti ga Mbori ome aundo yo tipa i ‘kisi ngba abahu’ na “ki nibisi gu ome nga ga we.”​—Eb. 11:33, 34; Dan. 3:16-18, 20, 28; 6:13, 16, 21-23.

11. Gini aʹasada bete anebi ahihe mbiko gayo idapase?

¹¹ Mbiko gayo idapase, ngbatunga anebi wa Mikaya na Yeremaya agbiatiyo na asada “wa aboro asawia yo . .  na be bafa yo ku bambukisa yo.” Aguyo wa Eriya, “ata rogo angbakungba na auru abaagangara na rogo asimbia, na rogo asima nga ga sende.” I dunduko nahipai bambiko i adu na gu “ndikidi he, du aboro na maabangirise mbiko ho.”​—Eb. 11:1, 36-38; 1 Aba. 18:13; 22:24-27; Yere. 20:1, 2; 28:10, 11; 32:2.

12. Da nga wene kpiapai rogo hi aʹasada yo, na ginihe naundoko ko mangihe wo?

¹² Fuo Pauro fura tipa akumba na adee nga aidipase, ko afura tipa gu kura boro nyaki gani kpiapai kisusi ga agu aboro re dunduko nga gaani Gbia Yesu Kristo. AEbere 12:2 naya: “Mbiko gu ngbarago nadu fu ko ku mbata yo, [ko] ki basa pa gaha zee, ki ima sunga pati kumbabe gu mbata nga ga Mbori.” Nirengo, si naida ani “mákia” pa ga Yesu kpiapai nga ga idapase ti regbo kere aʹasada wenengaĩ. (Oni gedi AEbere 12:3.) A wa si adu tipa Yesu, agu aKristano naadu mbata nakpidipa gayo idapase wa gu bawiriki nangia Andipa aka ka mbupa du ko niruru ko. (Yugo. 2:13) Si adu nga i nika gbia gu mosoro nga ga ga ku ngbangbaturũ yo  nga gu niima susa “wene zingabekpio” agu aboro idapase naadu mbata anaangera tipaha kumbatayo. (Eb. 11:35) Si nawira wa fuo tona ga Mbori Kindo ka zogarago rogo 1914, gu ngbatunga ruru mbedimbedi aKristano naara rogo kpio re azingi be kpio na ki ga ku ngbangbaturũ yo tipa ka zogarago na Yesu kurii aboro.​—Yugo. 20:4.

13, 14. Gini aʹasada Rudolf Graichen agbiatiko na ni, na ginihe naundoko ko hipai?

¹³ Amirioni airisimbori ti gi gaani regbo re napekafuo ga Yesu kpiapai ni maa yo berãyo fuo gayo maabangirise zanga mbu aʹasada si rungburasi gayo idapase. Ani bingo gu kpiapai naadu tipa Rudolf Graichen, i abatika ko Germani yo rogo gu garã nangia 1925. Ko natingidapa agu asura atingida naafura tipa agu apai du rogo Ziazia Kekeapai yo naadu ti kpoto gayo vurobambu. Ko akepai nga, “sura sa aafura tipa waru na wiri kandoro, gude na mama, wiri bagara na bahu, ami dunduko kidu rogo zereda tooni gude kini nungusi ra. . . . Ngbatunga agu asura re aima du na bakere ome kurii re.” (Yes. 11:6-9) Wa vura duhe nga ani agbia dungu arungosiro be aNazi tipa dungu agarã na kusa be agu asekere nangia ga Germani yo [Communist Stasi of East  Germany], Rudolf akakuti gako nyanyaki idapase tipa gu paradizo ni kadu auru kpotosende ane.

¹⁴ Gu kura nyanyaki asada Rudolf agbiatiko na ni angia pakpio nako, nakpi be gu kaza duwa bakofo rogo gu bataya nangia ga zizi aboro [Ravensbrück], gbiati wai ko abi bako ko nirungbura rogo idapase yo ki dati gu bangiriba nga ka maa fuo beko ti waraga ka yugoho nga ko berewe nga Dezire Yekova te. Tingbafuo i kusi Rudolf bambukiso yo, ko agbia gu sunge nga ga babi adungurati na fuani i ki yambu ko tipa gu Sukuru Nga ga Girada. I ki kedi ko ni mokedi ku rogo gu ringara nga Chile ko ki da yo niba bi adungurati berewe. Ono agu aʹasada Rudolf agbiatiko na ni aadigongo te. Garã sa fuo manga ko rogatise na kura wirina ni mokedi, fogo wiriyo ni degude akpi. Kusa, bawene diako garãri adu nga 43, akpi a. Rudolf aima hi agu aʹasada re dunduko, wa si avura du nga ko agbinza na kini du na kaza, ko aamangasunge kindi ni bazakigene na ni bakumba ti gu regbo gako pangbanga akuru rogo Buza 1, 1997, rogo Ngbaõbambu Sinziri rogo pa-Ingirisi ti akpewaraga 20-25. ^[1]

15. Gini vovo kpiapai duho berani nayugo wai aDezire Yekova ahi arungosiro kidu na ngbarago?

¹⁵ ADezire Yekova nangi kindi tipa gayo maabangirise wa vura duhe nga i narungosi yo kindi. Ni kpiapai, dungu awirinarani du ni zizi yo bambukiso Eritrea yo, Singapore yo, na South Korea yo, na dungu agi awirina re i nazio yo mbiko mangayo pai kuti agu afugo Yesu nazahe ti mangasunge na basape. (Mt. 26:52) Dagba agi akama awirinarani du bambukiso yo re, aguyo nga Isaac, Negede, na Paulos ima raka ku bambukiso Eritrea yo tipa agarã naima susa 20! I aidanga ha fuyo tipa i undo sosono avunguyo na i mangi rogatise te, agi awirina re nye niruru yo wa vura duhe vurũ nga i namanga yo gbegberẽ. Wai i angera na ngbarago kpakpuyo yo, a wa duhe rogo gaani bangiriba nga jw.org, si nayugo ho nga gayo idapase ni nyanyakihe. Zavura kina agu aboro nabanda yo, i nairisa yo airisa tipa du gayo idapase ni nyanyakihe.

16. Wai du rengbe nyanyaki idapase ka banda ro?

¹⁶ Dungu ga Yekova aboro kinaho naagbianga tiyo na kere arungosiro ya. Gu kura apai kia na asadi gayo idapase. Dungu yo aima hi zingo mosoro watadu rungo be agu avura i asoho rogo gayo aringara gbiati agu agberãngo naye be ome zegino. Aguyo wa Moize na atita aYisaraere rogo gu gene nga i aima mbu gu wene raka nga ga gi zegino re watadu taarimo. I nasota nyanyaki tipa ka zanga mbutiyo fu gu raka nga ga agi aũzegino re, nga raka gbangbati. Ginihe du naasa yo i mangi gipai re? Gayo nyemuse tipa Yekova gbiati gu nyanyaki idapase du yo na ni kuti gako kidohe nga ko nika nyasariipa irairaapai dunduko na ki fu mosoro fu gako ruru amoyambu nga nyenye unga rogo gu vovo zegino rurupai nika du rogoho.​—Oni gedi Atambuahe 37:5, 7, 9, 29.

17. Ginipai mo nadiberã tipa ka mangaha, na ginipai ani ka sakapai tipaha rogo gu kekeapai ngbefuo gere?

¹⁷ Rogo gi kekeapai re, ani ima bi wai rengbe berãkurii ga Mbori akidohe gbiati kparakpee dedede narengbe ka nyakasa gaani idapase. Gure rengbe ka sarani ani hi agu aʹasada naasada gaani idapase wa ani nikaa maabangirani tipa gu “ndikidi he, du aboro na maabangirise mbiko ho.” Ono gu gene Ziazia Kekeapai asakapai tipa idapase ngbaha nakoda dungu apai a wa gu kekeapai ngbefuo gere nika yugoho.