1, 2. (a) Ginipai Yekova nayuguhe furani? (b) Gini kidohe ani agbiaha rogo Yesaya 46:10, 11 na 55:11?

GU BAMBATA afugo nga ga Ziazia Kekeapai ni taataha ono kidu na bakere rogoyo ti ni, si naya: “Ho rago aenge ni Mbori afu ngbangbaturũ na kpotosende.” (Bam. P. 1:1) Rengo du nga ani na tooni inohe gbua tipa gu dungu ahe Mbori akusihe, wa agu nga haurago, timarago, gbiati ome gbeahe, na ani bi kina wiri papara zegino gbua. (Batu. 3:11) Ono wa vura duhe wo, Yekova ima yugo gako ringbisapai furani tipa kpotosende gbiati ngbatunga aboro dunduko. I ambakadi kpotosende tipa si du ni bawene kporo fu agu akumba gbiati adee i ambakadiyo rogo kpia Mbori yo. (Bam. P. 1:26) Si adu nga i nika du ni awiriko, na Yekova kidu ni Bayo.

² A wa saki yo ho rogo gu biata kapita nga ga Bambata Pai, ga Yekova ringbisapai agbiatihe na kpakarapai. (Bam. P. 3:1-7) Ono tie, gu kpakarapai re aadunga ni gupai ka i adianga behe ya te. Boro ho rengbe ka ru gene Yekova te. (Yes. 46:10, 11; 55:11) Sidu tie, ani ima rengba kadu na gu kido nga, gu ga Yekova ringbisapai naadu ti tonatonaha nika digiso tihe kina boro bangiri regbo yo!

3. (a) Gini arengo du na nyanyakipaha tipa ani girogo gu pangbanga yo nga ga Ziazia Kekeapai? (b) Tipagine ani afugö gu ngbatunga arengo re ti ni awere? (d) Gini asanahe ani ka wisigoho?

³ Zanga kapa, ani ima ino gu rengo du rogo Ziazia Kekeapai yo tipa  ga Mbori ringbisapai tipa kpotosende na tipa ngbatunga aboro dunduko na gu nyanyakipa sunge Yesu Kristo amangaha tipa gu ga Mbori ringbisapai re digisitihe. Agu arengo re na nyanyakipaha na si nawira wa si du dagba gu bambata arengo yo ani ainihe ho ani atona wirika Fugo Mbori ni. Ani tigaani naida ka undo agu aboro du na nyemu rengo tiyo i ini gi nyanyakipa ayugopai re. Wa ani awisigo gi kekeapai re rogo gaani dungurati wa du rago re, ani namanga bakere ome tipa ka yamba badungu aboro tipa Tingidapa Kpio Kristo. (Rk. 22:19, 20) Agu aboro nika ye tipaha nika wirika badungu apai tipa ga Mbori ringbisapai. Sidu, gi wiri yangara aʹuru nye koyo mbata fu Tingida Pakpio Yesu re nga wene regbo tipa ani berẽpa gu sanahe rengbe ani ka sanaha ka zingisa gu nyemupai tipa gu nyanyakipa uru re nga ga agu aboro ani awirika Ziazia Kekeapai na yo gbiati gu kura aboro du na nyemu rengo. Ani nika wisigo asanahe biata nga: Ga Mbori ringbisapai ti tonatonaha tipa kpotosende gbiati ngbatunga aboro dunduko angia gine? Ginipai tie naamangi ka si digisinga tihe ya? Na tipagine du du ga Yesu motumo ti ni ni gu wiri rifungura nazaka ngbadimo tipa ga Mbori ringbisapai digisitihe?

4. Wai du kusikusiahe atakapande ga Yekova taarimo?

⁴ Yekova nga gu Bakusiahe du na kiki ko ti ni. Agu ahe dunduko ko akusaha du ni bawenehe. (Bam. P. 1:31; Yere. 10:12) Ginipai rengbe ani ka wirikaha ti wai du kusikusiahe ni bawenehe na kidu kina ti genehe? Ho ani abi kusikusiahe ni, kina iriwo rago nati tirani ka bi gupai nga agu ahe dunduko Yekova akusihe singia kikindigihe watadu rukutuhe, si dunduko na kina undo ti ni. Da iriworago atinga ti ni ya ka bi wai du akerekuru ngbangbaturũ yo, wai du fogogude, watadu wai du bibi uru ni bawenehe ho ti ati ni? Bibi gi kusikusiahe re nangba tirani mbiko Mbori akusi rani na tandu ino guhe nzunzu du ni bawenehe.—Oni gedi Atambuahe 19:1; 104:24.

5. Ginipai Yekova amangihe tipa kusikusiahe dunduko naamangaapai kina sa?

⁵ A wa duhe gbayaga rogo kusikusiahe yo, Yekova namaa angbanda mbiko gako nyemuse. Ko akusi zegino na gaha andiko na ki kusi ndiko tipa ga aboro mangaapai a tipa gupai nga apai naamanga dunduko kina sa. (Tam. 19:7-9) Sidu, ahe dunduko rogo zegino na kina gaha abangiriba ti ni na si namangasunge ringbisihe kina kuti gaha bangiriba rogo ga Mbori ringbisapai yo. Yekova ima maa andiko tipa wai si aida gako kusikusiahe naamangapai kina sa. Rogo gi gene re, gu ndiko nga ga ome gbeahe nazio gu wege ani agbidaha si du mbembedi na kpotosende, kini sa ime si naasungburo kubani na kubani na bariwara-baime, na kini fubee tipa gu rugapai nga gu du na nyanyakipaha tipa raka auru kpotosende. Kusikusiahe dunduko kodihe na aboro nata na kini mangiapai zanga gu rii agu angbanda re. Si tie ziazia nga, wai Mbori akusi ahe kina ti genehe nayugo gupai nga ringbisapai kina beko tipa kpotosende na ngbatunga aboro dunduko. Ho ani atungusapai ni, anga si naida ani undo aboro i ini Baenge gi iʹiriwo rugapai re te?—Yugo. 4:11.

6, 7. Gini kura agamahe Yekova afuhe fu Adamu na Eva?

⁶ Ga Yekova ringbisapai tipa ngbatunga aboro dunduko ti tonatonaha angia i raki nyeanye kindi auru kpotosende. (Bam. P. 1:28; Tam. 37:29) Ko agamu badungu bawene agamahe fu Adamu na Eva nga gu nasayo i naagbia ngbarago rogo raka yo. (Oni gedi Yakoba 1:17.) Yekova akusiyo na ranirii ka siapai, tandu berãpai, na i rengbe ka kpinyemu kura aboro na ka gbia ngbarago ti pabakure. Bakusiahe afura na Adamu na ki fu arugute fuko tipa wai kadu na giasangba. Adamu aima wirika wai a ka ngerafuo gako azingo na wai ka ngerafuo anya gbiati kpotosende. (Bam. P. 2:15-17, 19, 20) Yekova  akusi Adamu a na agu abarapa boro ní aino apai na ni wagu nga ga ia he, zada he, bi he, gia woro he, gbiati gia fuo he. Rogo gi gene re, i arengbe ka gbia ngbarago ni bakerehe ti wai gu kpuyo nga Paradizo adu ni bawenehe na ni bakiki he. Gu bambata aboro naadu ue re arengbe kaa manga wene asunge na kini kuru bara vovo apai nyeanye kindi.

⁷ Gini kurapai berewe nangia papara ga Mbori ringbisapai? Yekova akusi Adamu na Eva na gu tandu nga ka vunga rengberengbe agude. Mbori aaida awiriyo vungu gayo agude a daho ka kpotosende dunduko ahi ni be aboro. Ko aaida Adamu na Eva gbiati gu kura avunguagude dunduko kaa du tingbafuo yo kpinyemu awiriyo kina wai Yekova akpinyemu bambata awiriko nangia rengberengbe aboro. Kpotosende na agu ahe du rogoho dunduko si adu nga si nika du ni kpuyo nyeanye kindi.—Tam. 115:16.

8. Gu ndiko du rogo Bambata Pai 2:16, 17 adu tipagine?

⁸ Apai aamanganga nibasa kina wai Mbori aringbisihe te. Tipagine si aamanganga ti ni wo ya? Yekova afu taata ndiko fu Adamu na Eva nga gu naadu tipa ka yugo singia i aidipa gu ngbanda kuti gayo ranirii ko amoihe. Ko aya: “Agu angua du ati yo dunduko mo nirí zuzuhe ari a wa mo akpi nyemu he; ono gu ngua nga ngua ina wenepai na gbegberẽpai ka mo rí nga zuzuhe ya, bambiko ni gu rago ka mo ri zuzuhe mo akpí akpi ni rengo.” (Bam. P. 2:16, 17) Si aambunga fu Adamu na Eva i girogo gi ndiko yo re te; si aadunga a fuyo ni kpakarakpakaraha ka irisa gu ndiko re te. Gu garakaha agaraka berewe nga, i aima du na bakere riahe beyo ka i aarengbanga ka rita ha ya.

9, 10. (a) Gini apai Satana akitingbanga Yekova na ni? (b) Ginipai Adamu na Eva adiberã ka mangaha? (Oni bi gu sura duti tonatonaha.)

⁹ Satana Bakitingbanga amangisunge na woo ka nanga Eva ri basasangba Bari nga Yekova. (Oni gedi Bambata Pai 3:1-5; Yugo. 12:9) Satana akusi kango kuti gu rengo nga Mbori aaidanga awiriko nga aboro ri “agu angua du ati yo dunduko” te. Si adu wa ko aaya: ‘Mo naida ka ya fere mo arengbanga ka manga gupai mo aidaha te?’ Fuani, ko ki pe gu ziree nara kporo na kpio nga: “Oni akpí nga wa sa te.” Fuani, ko asadi ka sa Eva ri idi kuti gupai nga ndupai ho ri gisangba Mbori te ni ya ko: “Mbori ini ya ni gu rago ka oni ri zuzuhe bangironi azá aza.” Gupai Satana aaida ka gumbaha nga, Yekova aaidanga i ri gu zuzungua re te mbiko ka si asayo i du na inohe. Kurigure, Satana ki mangi gu ziree kidohe fuyo nga: ‘Oni adu wa kina Mbori, niini wenepai na gbegberẽpai.’

¹⁰ Si aaida Adamu na Eva mangi diaberã tipa gupai i ka mangaha. Ya mo i agiasangba Yekova, watadu i nika giasangba woo? I adiberã ka basasangba Mbori. Ni mangayo ho wo, i arimisitiyo ku rogo ga Satana samungu. I aká nga i aidanga Yekova ni Bayo te na ki kparatiyo kusayo ti gu bandahe padu yo tii gako pagbia aye na ni.—Bam. P. 3:6-13.

11. Tipagine du Yekova abingo samungu ti ni na paha taata ya?

¹¹ Ho Adamu na Eva asamungu ni kuti Yekova, i aadunga berewe ni rengberengbe yo te. Kurigure, gayo samungu asayo i du tuturũ ti Yekova mbiko ‘bangiriko ni gigiri he ka si bi nga gbigbitapai’ te. Sidu tie, ko “arengba nga ka ngera ku ri fudifudipai” te. (Abak. 1:13) Ka ko ambuhe si naamanga amanga, ka padu gako kusikusiahe dunduko ngbangbaturũ yo na auru kpotosende wenengai adu ngbapai yo. Gu nyakipaha anyaka gbe nga, ka Mbori aamanganga pai tipa gu ingapai naamangi ati Edene yo re ya, ka ko adunga ni gu boro ka i kido kuti ni te. Ono Yekova ni ruruko fu gako andiko; ka ko basanga ha te. (Tam. 119:142) Rogo gi gene re, padu Adamu gbiati Eva na ranirii ka siapai aafunga rengo fuyo i basa ga Mbori andiko te.  Ni sangbana gayo samungu kuti Yekova, i akpiki na ki karagatiyo ku rogo gu sende i akusiyo rogoho.—Bam. P. 3:19.

12. Ginipai namangi awiri Adamu?

¹² Ho Adamu na Eva ari gu zuzungua ni re, i amoi tiyo rogo gu bangiriba i aarengbanga berewe kadu ni papara ga Mbori aborokporo ya. Mbori ado yo kusayo Edene yo, na i aadunga berewe na maabangirise ka karagatiyo koyo te. (Bam. P. 3:23, 24) Ho Yekova amangihe ni wo, ko asayo i gbia sangbana gayo diaberã. (Oni gedi Pa Fu Rugute ni Ue he 32:4, 5.) Wa aboro aadunga berewe ni rengberengbeyo ya, i aarengbanga ka yugo agu asino nga ga Mbori teketeke te. Anga Adamu azanga kina bawene raka sa tipa tiko kumbatayo te ono ko afu zangarengba, ingapai na kpio fu awiriko. (Rom. 5:12) Ko agbarasipa gu maabangirise be awiriko nga ga raka nyeanye kindi. Kurigure, Adamu na Eva aarengbanga berewe ka vunga rengberengbe gude te; wiriyo ho narengbe ka vunga rengberengbe gude a te. Tingbafuo Satana Bakitingbanga nangi Adamu na Eva kusayo ti Mbori, ko nananga ngbatunga aboro dunduko kindi da ku areme.—Yo. 8:44.

13. Ginipai Yekova aidaha tipa ngbatunga aboro dunduko?

¹³ Ono tie, ga Mbori nyemuse tipa aboro adigongo te. Wa Adamu na Eva avura samungu vurũ, Yekova naida ngbatunga aboro dunduko du na wene pagume na ko. Ko aidanga boro kpi te. (2 Pet. 3:9) Sidu, tingbafuo gu samungu re, Mbori amangi mbakadapai tipa ka sa aboro i du berewe na wene pagume na ko na ti kina gu ngisa regbo re, ko kini banda gako arugute du ni ruruhe. Wai du Yekova amangi gipai re?

14. (a) Ringbisihe kuti Yoane 3:16, ginipai Mbori amangihe tipa ka batasa ngbatunga aboro dunduko? (b) Gini sanahe rengbe ani ka wisigoho na agu aboro du na nyemupai?

¹⁴ Oni gedi Yoane 3:16. Badungu agu aboro ani ayambayo tipa Tingida Pakpio Yesu ima ino gi veresi re ngbariyo. Ono gu sanahe duho nga, Wai du ga Yesu motumo asaha taata fu aboro i raki nyeanye kindi? Gu tua du tipa ka yamba aboro tipa Tingida Pakpio Yesu, Tingida Pakpio Yesu nitihe, na ho ani akaraga tirani ni kusa fuo agu aboro naaye ima rengba kadu ni momu furani ani undo agu aboro nagbata rengo i ini gu karagapai du kuti gu nyanyakipa sanahe re. Gu ngbatunga aboro re ima rengba kadu na ngbarago ho i atona ka giarogo wai ni wenengai du ga Yekova nyemuse gbiati tatamana ni yuguyuguhe rogo gu motumo tumorii ko afuhe. Gini memeapai tipa motumo tumorii rengbe ani ka nyakasapaha?

15. Wai du gu kumba nangia Yesu adu kia ti gu kumba nangia Adamu?

¹⁵ Yekova afu rengberengbe kumba nga guko narengbe kadu nga bafu motumo tumorii. Si aaida gu rengberengbe kumba re du ni ruruko fu Yekova na kidu na nyemu ka kpi kuba aboro. (Rom. 5:17-19) Yekova akedi gako bambata kusikusihe ngbangbaturũ yo ku auru kpotosende no. (Yo. 1:14) Rogo gi gene re, Yesu adani rengberengbe boro kina wai Adamu adu mbata. Ono Yesu aadunga wa Adamu te, ko apekefuo agu arugute dunduko Yekova aidaha be rengberengbe boro. Zavura ho Yesu adu ni tii kere asada, ko aainganga pai watadu ka kuo ga Mbori andiko te.

16. Tipagine du du ga Yesu motumo ti ni ni bawene gamahe?

¹⁶ Wa Yesu angia rengberengbe boro, ko arengbe ka batasa ngbatunga aboro dunduko be ingapai na kpio ni kpiko kubayo. Ko adu teketeke kina wai si aaida Adamu du, nga rengberengbe kumba, kidu ni ruruko na kini gisangba Mbori. (1 Tim. 2:6) Yesu adani gu motumo tumorii nazaki gene tipa nyenye unga fu “dungu” aboro nga akumba, adee, gbiati rukutu agude. (Mt. 20:28) Nirengo, motumo tumorii nga gu wiri rifungura nazaka ngbadimo tipa gupai nga ga Mbori ringbisapai nga gu naadu ti tonatonaha digisitihe.  (2 Kor. 1:19, 20) Ga Yesu motumo nafu maabangirise tipa nyenye unga fu ruru aboro dunduko.

17. Gine ga Yesu motumo asaha taata?

¹⁷ Yekova afu guhe ni motumo tumorii naadunga taata fuko tipa ko fuhe ya. (1 Pet. 1:19) Ko nabi aboro dunduko na nyanyaki payo si du ko afu bangisa Wiriko ti ni ko ye ka kpi tipa rani. (1 Yo. 4:9, 10) Ka pepai ngba kura gene, Yesu adiba gu barani nangia Adamu. (1 Kor. 15:45) Ho ko amangihe ni wo, anga kina raka rani sa ko abatasi he te; ko afu momu furani tipa ani karaga tirani niyangaraha ku rogo gu ngbadimokporo nga ga Mbori. Nirengo, riimburu gu motumo tumorii nga ga Yesu, Yekova rengbe ka ida aboro karagatiyo ku rogo gako ngbadimokporo zanga mbupa gako ruru mangaapai. Ya mo si afunga ngbarago furani ka berãpa gu regbo ruru aboro dunduko nika du ni rengberengbe yo te? Gu papara gako ngbadimokporo du ngbangbaturũ yo na gu du auru kpotosende ane nika du ni kpamiakpamiaha. Gu regbo re du nzunzu ani nika da dunduko nga awiri Mbori.—Rom. 8:21.

18. Gini regbo du Yekova nika “du adu mbata yo fu ahe dunduko”?

¹⁸ Ga Satana samungu aasanga Yekova ko mbu yugo nyemuse tipa ngbatunga aboro dunduko te, na si arengbanga ka ká na kpakpa aboro ti du yo ni ruruyo fu Yekova a te. Riimburu gu motumo tumorii Yekova afuhe, ko nika undo awiriko dunduko i da ni rengberengbeyo. Oni berẽnga pa wai raka nika du ho agu aboro dunduko “ka bi Wiri, ki idi pa ko” nika gbia nyenye unga ni. (Yo. 6:40) Mbiko ga Yekova bakere nyemuse na tatamana, ko nika sa aboro dunduko i da ni rengberengbeyo kina wai gako ringbisapai adu ti tonatonaha. Ti gu regbo re, Yekova gaani Mbori nika “du adu mbata yo fu ahe dunduko.”—1 Kor. 15:28.

19. (a) Si naida gaani tambuahe tipa ga Yesu motumo fõngbaduraniyo ani mangi gine? (Oni bi gu sanduki nga “Ani Gbata Agu Aboro Agbata Kindi Rengbe ka Giapai.”) (b) Gini papara ga Yesu motumo ani ka wisigoho rogo gu kekeapai ngbefuo gere?

¹⁹ Si naida gaani tambuahe tipa ga Yesu motumo fõngbaduraniyo ani mangi bakere ome tipa ka undo kura aboro i ini gupai nga i rengbe arengba ka gbia undo ti gu bawene gamahe re. Si naida aboro ini gupai nga vurube ga Yesu motumo du Yekova nafu maabangirise fu aboro tipa nyenye unga. Berewe a, ga Yesu motumo namanga bakere apai kisusi gure. Gu kekeapai ngbefuo gere nika sakapai tipa wai ga Yesu motumo akaragapai a kuti gu kango nibipa mangaapai Satana akusihe ati Edene yo.