1-2. Gini ngbanya du dagba Batungusipai 11:6 na pa tungusa gu wene pangbanga nga ga Kindo?

ROGO gu kura aringara, dungu aboro nidu na nyemu ka ino kura apai ho i agia wene pangbanga ni. Si rengbe kadu nga gure nga gupai i aima digo nisungudihe! Rogo gu kura aringara, dungu aboro na nyemu ka ino kura apai tipa Mbori watadu Baibiri te. Ga aboro karagapai nidu wai kuti wene pangbanga rogo gamo dagbarago? Singia aboro nakaragapai wenengai watadu i akaraganga pai wenengai te, Yekova naida gupai nga ani naatungusapai kindi da kinaho ko nika gumba gupai ni nga si nyasi.

² Ti gu regbo Yekova nasiaha, sunge tungusapai nika nyasa anyasa na ‘ragoho ki digi.’ (Mt. 24:14, 36) Ono waigu tie rengbe ani ka mangapai kuti gu fugo nga ‘ka mo mbú nga rũ he ya,’ mbata fu gu regbo re da? *—Oni gedi Batungusipai 11:6.

3. Gini apai ani nika sakapai tipaha rogo gi kekeapai re?

³ Gu kekeapai naadu mbata fu gere afura tipa apai biama si aida ani mangihe tipa kadu ni wene “abaziaboro.” (Mt. 4:19) Gi kekeapai re nika fura tipa agene biata rengbe ani ka nyakasa gaani diaberã ngbaha tipa kaa tungusapai kindi ani ki vura kaa gbiatirani na kina gini akpakarapai vurũ. Ani nika wirikapai tipa ndu gupai duhe ti ni ni nyanyakipa pai (1) ka maaberã rani fuo sunge tungusapai, (2) kadu na zerangbaduse, na (3) kadu na nyanyaki idapase.

4. Tipagine si aida ani moiberãrani ti ni gbe kuti gu sunge Yekova nafuhe furani ani mangihe?

⁴ Yesu agumbapa wai fu gako abawiriki aboro nika du ti yangara arame gbiati agu apai nika manga ti gu regbo re. Ko aima ino  gupai nga agi apai re ima rengba ka sa apefuoko i mbu maaberã yo kuti sunge tungusapai. Ko ape gupai fu gako abawiriki nga i ‘naangera angera’ kindi. (Mt. 24:42) Areme, apai kinaho rengbe ka gbeberã rani kusayo nga gu du wakina agu apai naasa gupai nga ka agu aboro naadu ti rago Noa moingo berãyo kuti gu zahe ko aafuhe fuyo ya. (Mt. 24:37-39; 2 Pet. 2:5) Si du nga ndu gupai si aida ani moiberãrani ti ni gbe kuti gu sunge Yekova nafuhe furani ani mangihe.

5. Waigu Amokedi 1:6-8 asakapai tipa bakio wai si adu nga wene pangbanga nika du ni tungusi tungusihe?

⁵ Areme, si naida ani moiberã rani gbe kuti sunge tungusa gu wene pangbanga nga ga Kindo. Yesu ape gupai kumbatayo nga apefuoko nikaa ndu kindi kumbatayo kaa tungusapai tingbafuo kpioko, na i nika tungusapai kisusi gu ko atungusihe. (Yo. 14:12) Tingbafuo kpio Yesu, kura gako abawiriki aima karagatiyo kuti sunge atĩo. Tingbafuo Yesu zingi be kpio, ko amangi iiriwopai ki undo kura gako abawiriki i zi badungu atĩo. Tingbafuo gu iiriwopai re, Yesu anyakasi gupai nga tungusapai gbiati sunge sa aboro ni abawiriki adu na nyanyakipaha kisusi ai kura sunge. (Yo. 21:15-17) Mbata fu Yesu ga ku ngbangbaturũ yo, ko ape gupai fu gako abawiriki nga, gu sunge tungusapai ko atonaha nika kio kumbatayo kisusi agu angbandarago nga ga Yisaraere. (Oni gedi Amokedi 1:6-8.) Fuo susa agarã kusa, Yesu ayugu yuguyugupai fu gu mokedi nangia Yoane tipa ka yugo agu apai fuko nika manga ti “rago Gbia.” * Pai sa dagba agu apai yo Yoane abihe angia iiriwo yuguyugupai nga ga maraika nga guko nyenye pangbanga adu ngbako yo ka tungusa ha fu “arikaaboro, na ngbatunga aboro, na ngbatunga afugoyo, na aboro.” (Yugo. 1:10; 14:6) Si tie ziazia nga, gupai Yekova akpinyemuhe berani areme nga ani mangi gu sunge tungusapai namanga rogo zegino dunduko daho si nika nyasa ni.

6. Waigu rengbe ani ka maaberã rani gbe kuti sunge tungusapai?

⁶ Ani rengbe ka maaberã rani gbe kuti sunge  tungusapai ka ani berẽkurii agu apai dunduko Yekova amangaha tipa ka undo rani. Ni kpiapai, ko nafu agu ariahe furani nga ga toro ni bakerehe wa gu nga awaraga, dede afugo, avidio gbiati agu apai du rogo gaani bangiriba nga ga Internet nga jw.org. Mo berẽnga kurii gipai re: Agu apai du rogo gaani bangiriba nga ga Internet, si rogo afugo naima susa 1,000! (Mt. 24:45-47) Agu aboro du rogo zegino ni kparakakparaka yo mbiko i nasongoda agu apai nga ga birĩ-zogarago na i nandu ku rogo apambori ni bakiakia, na berewe a, agu akurayo ni kumukokumuko yo na aguyo kidu ni rungorungo yo. Ono ga Yekova amoyambu nga aguyo naima susa amirioni muambe ni kodikodi yo rogo zegino dunduko. Ni kpiapai, Rago Bisue, Zerekpe 19, 2019, aDezire Yekova adu ni kodikodi yo mbiko i dunduko naadu na rengba ka bi gu vidio naadu tipa gu wisigo Ziazia Kekeapai nga ga gu uru re. Rogo gu nyemu re, aboro adunguratiyo ku pati Tingida Pakpio Kristo bangeyo adu nga 20,919,041. Pa berã ani kurii gu momu du ani na ni kaa bi agi apai re na kini fubee kutini nafõngbadurani yo ani naatungusapa Kindo kindi.

7. Waigu ga Yesu kpiapai aundo rani ani naamaaberã rani kindi kuti sunge tungusapai?

⁷ Gu kura gene rengbe ani ka maaberã rani gbe kuti sunge tungusapai ngbaha nga ni peka ani fuo ga Yesu kpiapai. Ko aambunga ai pai zi gbeberã ko kusayo ti du ko ni dezire rengo te. (Yo. 18:37) Ko aatinga ku rogo asada ho Satana afu ‘angbi ni fu ko zegino dunduko, na gaha taarimo’ te; na ko aatinga a ku rogo asada ho kura aboro aaida ka maa ko ni ni bakindo te. (Mt. 4:8, 9; Yo. 6:15) Yesu aameranga fuo aũkumuko te; na ko aadunga na gunde ho ko anaagbia tiko ni na kere sogote te. (Rk. 9:58; Yo. 8:59) Ho du gaani idapase ni ni asadiasadihe, ani rengbe kaa maaberã rani kindi kuti sunge tungusapai ka ani tingidi gu rugute gu mokedi nangia Pauro afuhe. Ko angarasi aKristano i pekefuo ga Yesu kpiapai tipa gupai nga ka zanga ‘du na mbugo, gbiati rungbura rogo gayo aberã’ yo!—Eb. 12:3.

8. Ginihe nga zerangbaduse, na tipagine si aidaha ti ni gbe awere?

⁸ Zerangbaduse nga kadu na rengba ka sungudo pai zezeredi si ariatihe. Si ngia ani nangera kumbatayo tipa gupai nga gbegberẽpai digi, watadu tipa gupai nga gupai ani aima digo nidu na nyemuhe mangi, si naida ani du na zerangbaduse. Gu nebi nangia Abakuka adu na nyemu gupai nga gu gbegberẽ mangaapai nangia ga zuu aboro aamangaha Yuda yo digi. (Abak. 1:2) Ga Yesu abawiriki adu na gu maabangirise nga Kindo nika ye “ni ba sa” na ki fu ranirii fuyo be gu zogarago nangia ga aRomo. (Rk. 19:11) Ani na nyemu gupai nga ga Mbori Kindo ye ka dia gbegberẽ mangaapai kusayo ki kusi rani ku rogo gu vovo zegino ruruapai nika du rogoho. (2 Pet. 3:13) Ono tie, si naida ani du na zerangbaduse na kini pidi gu regbo Yekova nasiaha tipa ka manga gipai re ti ni. Oni bingo bete agu agene Yekova ayugopai furani ngbaha tipa ani du na zerangbaduse.

9. Gini akpiapai nayugopa ga Yekova zerangbaduse?

⁹ Yekova nga bawene kpiapai kisusi nga ga du na zerangbaduse. Ko ambu regbo fu Noa rengbe arengba tipa ko me kurungba na kini mangisunge ni “batungusi rurupai.” (2 Pet. 2:5; 1 Pet. 3:20) Yekova adegetuko fu Abarayama wa ko aasasana ko tipa gu gako diaberã naadu tipa gberesa gu gbegberẽ aboro naadu rogo agu agbata nangia Sodomo na Amora. (Bam. P. 18:20-33) Tipa bagbanga regbo, Yekova ayugu bakere zerangbaduse koyo du gu rikaaboro ni nangia aYisaraere. (Nem 9:30, 31) Ani nabi ga Yekova zerangbaduse areme wa ko nambu regbo ni bakerehe fu agu  aboro dunduko ko aida i da ni abakureako tipa i “da ti zungadi tiyo dunduko.” (2 Pet. 3:9; Yo. 6:44; 1 Tim. 2:3, 4) Ga Yekova kpiapai nafu gu wene ndupai furani si aida ani du ti ni na zerangbaduse wa ani andu kindi kumbatayo na sunge tungusapai gbiati yugupai. Ko nayugo wai furani a rengbe ani kadu na zerangbaduse vurube kpiapai sa nga gu du rogo Fugoko yo.

10. Ginipai gu kpiapai nga ga basopobino du paha rogo Yakoba 5:7, 8 ayugoho furani?

¹⁰ Oni gedi Yakoba 5:7, 8. Gu kpiapai nga ga basopobino nayugo wai kadu na zerangbaduse furani. Si nirengo nga kura kurukuru ahe kinaho nasona ni ipo. Ono tie, badungu kurukuru ahe, gbe gu nakusa zuzuhe nadia regbo ni gbangaha tipa ka nyaka. Regbo rũ ahe anidu tipa adiwi wa sita rogo ringara aYisaraere. Basopobino anirũ gani tunga fuo na bambata mai na kini ke gani zuzuahe tifuo na yangara mai. (Mk. 4:28) Si adu ni patatamana ka ani wiriki gu zerangbaduse nga ga basopobino. Ono tie, gipai re arengbanga kadu ni taatapai te.

11. Waigu zerangbaduse nika undo rani tingba gaani sunge tungusapai?

¹¹ Dedede, kpakpa aboro ninaaida ka bi surungba gupai ni ipo i namangihe. Ono ka ani aida ka rũ ahe na ki kehe, si naida ani naangerafuoho ti aregbo dũ. Si naida ani sopo bino, ki rũ he, kini kombiraha, na kini tudihe. Wakina gure a, si naida ani naamangasunge kindi nyanyaki ka ani aida ka sa aboro ni abawiriki. Si nadia rani adia na regbo tipa ani undo gaani abawiriki Ziazia Kekeapai tipa i wiriki wai ka zanga du na kparakaro na wai ka yugo nyemuse. Padu ani na zerangbaduse nika undo rani ka rago gberẽnga tirani ho aboro adeganga tuyo ni fu rani ya. Ho ani abi agu aboro ni du na nyemu ka degatuyo, si naida ani du kindi na zerangbaduse. Ani arengbanga ka manga gaani abawiriki Ziazia Kekeapai ngbaome tipa i sonosi idapase te. Ti kura aregbo, zavura ga Yesu abawiriki anaagianga rogo agu apai yo ni ipo Yesu anaayugoho te. (Yo. 14:9) Si naida ani tingidi gupai nga, ani ima rengba ka rũhe na ki tudihe, ono Mbori du nasonosaha.—1 Kor. 3:6.

12. Waigu rengbe ani ka yugo zerangbaduse ho ani amanga dezirepai ni fu agu agumerani angianga aDezire Yekova ya?

 ¹² Bangiriba sa si narengbe kadu ni kpakarakpakaraha furani tipa kadu na zerangbaduse rogoho nga ho ani atungusapai ni fu agu agumerani angianga aDezire Yekova ya. Gu rugute du rogo Batungusipai 3:1, 7 ima rengba ka undo rani. Si naya: “Rago du ho tipa . . onga kii, na rago fura.” Gaani wene mangaapai ima rengba ka undo agumerani i kpinyemu ka degatuyo kuti gaani pangbanga. Ti kina gu bangisa regbo re, si naida ani du ti aregbo dunduko regerege ka fura fuyo tipa Yekova. (1 Pet. 3:1, 2) Si naida ani mangi sunge tungusapai gbiati yugopai kakaka, ono si naida ani du ti aregbo dũ na zerangbaduse koyo du aboro ni dunduko kodihe na gaani aborokporo.

13-14. Gini akpiapai duho nga ga zerangbaduse nga gu rengbe ani ka wirikaha?

¹³ Ani rengbe ka wirika wai kadu na zerangbaduse ti agu akpiapai nga ga gu ruru aboro du payo rogo Ziazia Kekeapai yo kodihe na aguyo du ti gi gaani regbo re. Abakuka aaida gupai nga gbegberẽ apai nyasi, ono ko ayugu zerangbaduse ho ko aya ni wẽ: “Mi nikaa ru kindi rogo gimi ba sinziri.” (Abak. 2:1, NW) Gu mokedi nangia Pauro ape gupai nga ko aaida ka “digisa” gako sunge tungusapai. Ono tie, ko aandu kindi kumbatayo kaa ‘tungusa wene pangbanga’ ni zerangbaduse.—Amo. 20:24.

¹⁴ Oni bingo kpiapai nga ga kura arogotise nga aguyo naamangi gu Sukuru Nga ga Girada na i ki kedi yo ku rogo gu ringara aDezire Yekova aangenga rogoho ya na nga gu badungu aboro aadunga rogoho ni aKristano ya. Aboro ni beteyo gbua naaida ka wirika Ziazia Kekeapai. Ono tie, agu akurayo i adu na yo ba gu sukuru yo nga ga Girada nga aguyo naadu rogo kura aringara aakekeda pa wai fuyo i aawirikapai na badungu aboro na kini undoyo i da ni aDezire Yekova. Ono agu arogotise re aandu kindi kumbatayo kaa tungusapai ni zerangbaduse, si ki vura du vurũ nga badungu aboro anaadeganga tuyo kuti wene pangbanga rogo gayo dagbarago te. Tingbafuo tungusa yo pai tipa agarã muambe rogo gu dagbarago kina bete aboro gbua aadegatuyo kuti wene pangbanga rogoho re, i aye ni yangaraha kadu na gu ngbarago nga ga bi boro sa dagba gayo abawiriki Ziazia Kekeapai yo ni nizi bapatiza. Ginipai agi akpiapai naamangi bakuru kusayo gbiati gu namanga awere re ayugoho furani? Gi ruru aKristano re aambunga tungusapai kakaka te, na Yekova aima fu mosoro fuyo tipa gayo zerangbaduse. Ani dunga adu “ni awiriki agu yo du ni adikumbo akidohe mbiko idapase na hipai.”—Eb. 6:10-12.

15. Gini gene idapase anyakasa gaani diaberã ngbaha tipa ka tungusapai?

¹⁵ Ani na idapase kuti gu pangbanga ani atungusaha, sidu, ani na nyemu ka tungusaha fu badungu aboro wa rengbe omerani na ni. Ani ima du na kido kuti agu akidohe du rogo Fugo Mbori yo. (Tam. 119:42; Yes. 40:8) Ani ima bi asangbanebi nga ga Ziazia Kekeapai si nidigisi tihe ti gi gaani regbo re. Ani ima bi wai raka aboro aˈariatihe ni wenehe ho i atona mangapai ni kuti agu arugute du rogo Ziazia Kekeapai yo. Gi goapai re nasarani ani du na bakere kido kuti gupai nga gu wene pangbanga nga ga Kindo nga gu pangbanga si aida ai boro gihe.

16. Ringbisihe kuti Atambuahe 46:1-3, waigu padu ani na idapase kuti Yekova anyakasa gaani diaberã tipa ka tungusapai? Waigu padu ani na idapase kuti Yesu aundo rani a?

¹⁶ Ani ima du na idapase a kuti Yekova nga Baenge gu pangbanga ani atungusaha, na kuti Yesu nga guko Yekova nafu pagbia fuko tipa ko zogorago ni bakindo Gako Kindo. (Yo. 14:1) Ka ani vura kaa gbiatirani na kina gini akpakarapai vurũ, Yekova kinaho ti aregbo dũ ni gaani bagbuko na gaani ome. (Oni gedi Atambuahe 46:1-3.) Kurigure, ani na gu kido nga Yesu nga guko  du ngbangbaturũ yo nanungusa sunge tungusapai, kini mangisunge na gu ome gbiati pagbia Yekova nafuhe fuko.—Mt. 28:18-20.

17. Oni funga kpiapai tipa ndu gupai si aida ani naatungusapai ti ni kindi.

¹⁷ Idapase nasarani ani du na gu bakere kido nga Yekova nika fu maku afu kurii gu bakere asadatise ani amangaha, ti kura aregbo, rogo agu agene ani aberãnga paha ya. (Batu. 11:6) Ni kpiapai, aˈuru dunduko akutu aboro asusa kini bi gaani awaraga ho ani atungusapai ni na ni ni gbaraga ani he rii mbisa watadu rogo ũtura awaraga. Ya mo gi gene tungusapai re ni wenehe? Ii! Gu Gaani Sunge Nga ga Kindo nangia ga Ngbangba 2014 afura tipa degude sukuru nga ga yunivasiti ri nga guri naaida ka ke pangbanga tipa aDezire Yekova. Ri aarengbanga ka ino bara Bambu Kindo te, ono ri kini bi gaani awaraga i nagbaragihe rii mbisa pati yunivasiti, na ri kini bi apai a tipa ka kehe rogo gari pangbanga yo. Niyangaraha, ri aye ki da ni Dezire Yekova na ri namangasunge awere ni nazakigene. Ngbatunga agu apangbanga re nafõngbaduraniyo tipa ani naatungusapai kindi bambiko si nayugo gupai nga aboro kindi kinaho si aida i gi gu pangbanga nga ga Kindo.

18. Tipagine du ani ti ni na gu kido nga sunge tungusapa Kindo nika nyasa kina wai Yekova aidaha?

¹⁸ Ani ima rengba kadu na gu kido nga sunge tungusapai nika nyasa anyasa kina ti gu regbo Mbori nasiaha. Oni bingo gupai namangi ti rago Noa. Yekova ayugu gupai nga ko nga wene Babanda Regbo kisusi. Agarã wa 120 mbata fu Ime Akangbii, Yekova aima diaberã tipa gu regbo gu Ime Akangbii re nika tona ti ni. Fuo dungu bawe agarã kusa, Yekova aya fu Noa ko mbakadi kurungba. Tipa agarã wa 40 watadu 50 mbata fu Ime Akangbii tona, Noa aandu kindi kumbatayo kaa mangasunge nyanyaki. Wa si avura du vurũ nga aboro aadeganga tuyo fuko te, ko aandu kindi kumbatayo kaa tungusa pangbanga zahe daho Yekova aya ni wẽ regbo ima da tipa ka ye na anya ku kurungba yo. Fuo gure, ti gu regbo narẽarẽ, ‘Yekova kini kisi’ ngbadimo kurungba.—Bam. P. 6:3; 7:1, 2, 16.

19. Ginipai rengbe ani ka ngera kumbatayo tipaha ka ani ambunga rũhe ya?

¹⁹ Barambeda, Yekova nika pe gupai nga ani ima nyasa sunge tungusa gu wene pangbanga nga ga Kindo. Fuo gure, ko nika nyasariipa ga Satana sino raka kusayo na ki ye na vovo zegino nga gu nika hi be agu aboro nagiasangba Mbori. Da kina kuti gu regbo re, ani wirikinga Noa awirika gbiati Abakuka, na gu kura aboro a ata mbunga rũhe watadu sunge tungusapai ya. Ani naamaanga berãrani amaa kindi gbe kuti sunge tungusapai, kidu na zerangbaduse, na kidu na nyanyaki idapase kuti Yekova gbiati gako akidohe.