1-2. Ringbisihe kuti 1 Timoteo 6:20, ginihe i afuhe fu Timoteo?

DEDEDE, ani ninaambu agu ahe du na nyanyakipaha furani kisusi fu kura aboro i naangerafuoho. Ni kpiapai, ani ima rengba ka maa gaani marã ku beenge yo. Ho ani amaa ru ni ku beenge yo, ani nadu na kido nga u nika du yo ni bandabanda ru na ka u ainganga watadu ka iradĩ adĩnga ru ya. Sidu, ani ima rugatirani na rogo gupai yo nga ka fu guhe ani abihe na nyanyakipaha fu kura boro.

² Oni gedi 1 Timoteo 6:20. Gu mokedi nangia Pauro atingidi Timoteo na gupai nga i aima fu nyanyakipa he fuko—nga ndikidi inohe tipa ga Mbori ringbisapai tipa aboro. Yekova aima fu gu momu a fu Timoteo nga ga ‘manga sunge batungusipai.’ (2 Tim. 4:2, 5) Pauro angarasi Timoteo tipa ko banda guhe i afuhe fuko. Wakina Timoteo, i ima fu nyanyakipa ahe furani. Gini ahe du ngaha? Na tipagine si aida ani banda gu nyanyakipa ahe ti ni Yekova nafuhe furani?

3-4. Gini kura nduapai duho du agu arengo ti ni nga ga Ziazia Kekeapai na nyanyakipaha?

³ Yekova ima fu ndikidi inohe furani nga gu nyanyakipa arengo du rogo Fugoko yo nga Ziazia Kekeapai. Agi arengo re na nyanyakipaha mbiko si nayugo wai furani rengbe ani kadu na wene pagume na Yekova na si nasakapai tipa agu apai rengbe ka ye na ndikidi ngbarago rogo raka yo. Ho ani aida ni kuti agu arengo re, ani nakura tii gu sunge akanga nga ga ziree yugopai gbiati wasiwasi mangaapai.—1 Kor. 6:9-11.

⁴ Gu kura ndupai du agu arengo du rogo Fugo Mbori yo ti ni na nyanyakipaha nga, Yekova nayugoho sa fu kina aboro umbasitise nga aguyo “i aima ringbisa yo,” naida ka ya, agu aboro dunduko du na nyemuhe. (Amo. 13:48) Aboro umbasitise ima ida  kuti gupai nga ruru kangara moyambu nga agu aboro nayugo agu arengo furani nga ga Ziazia Kekeapai ti gi regbo re. (Mt. 11:25; 24:45) Ka ani wirikinga agi arengo re nitirani te, na he ho nyakipaha kisusi pa gia ani rogo agu arengo re yo te.—Snz. 3:13, 15.

5. Ginihe berewe Yekova nafuhe furani?

⁵ Yekova ima fu gu momu furani nga ga yugo rengo fu aboro tipa ko gbiati gako ringbisapai. (Mt. 24:14) Gu pangbanga ani atungusaha na nyanyakipaha, bambiko si naundo aboro tipa i da ni papara ga Yekova aborokporo na si kini fu gu momu fuyo nga ga gbia nyenye unga. (1 Tim. 4:16) Singia ani natungusapai ni bakerehe watadu ni betehe, ani nasongoda gu nyanyakipa sunge namanga ti gi regbo re. (1 Tim. 2:3, 4) Nairiwo gu bakere pa momu nga ni re kadu ni ga Mbori abadiasunge!—1 Kor. 3:9.

6. Ginipai namangi gu kura aKristano nga agu yo naadunga na rubangirise ya?

⁶ Ti regbo Timoteo, gu kura aKristano aabingo gu momu naadu beyo nga ga du ni abadiasunge na Mbori na nyanyakipaha te. Mbiko gupai nga Dema akpinyemu gi zegino re ni kerehe, ko ambupa gu momu naadu beko nga ga mangasunge na Pauro. (2 Tim. 4:10) Si nawira gupai nga aFugero na Erumonege ambu tungusapai mbiko i aagunde agunde nga i nika rungosiyo kina wai i arungosi Pauro. (2 Tim. 1:15) Umenaio, Aregizanda, na Fireto ada ni abasamungu kuti ndikidi pambori na ki mbu iriso Yekova. (1 Tim. 1:19, 20; 2 Tim. 2:16-18) Agi aboro re dunduko anaakpinyemu Yekova akpi, ono i aima mbu berãkurii gupai nga agu ahe ko afuhe fuyo adu na nyanyakipaha.

7. Gini abirĩ Satana amangasunge na ni kuti rani?

⁷ Waigu Satana aˈasada ka sarani ani mbu gu nyanyakipa ahe Yekova nafuhe furani? Ani bingo bete ga Satana abirĩ. Ko namangasunge na aũngbarago gbiati Internet tipa ka sa rani ani naaberã na kini mangipai ngba gu gene nga gu rengbe ka sa gupai nga ani tona mbu kpinyemu Yekova watadu gako arugute yeeye. Ko naˈasada ka gundesi rani nimanga ko sunge na sosodahe be akurase watadu arungosiro tipa gupai nga ani mbu tungusapai. Na ko naˈasada ka sosoda rani tipa ani degeturani kuti gu “zire inahe ” nga ga abasamungu kuti ndikidi pambori tipa gupai nga ani mbu rengo.—1 Tim. 6:20, 21.

8. Ginipai mo nawirikihe ti gu kpiapai nga ga Daniel?

⁸ Ka ani adunga na rubangirise ya, ani ima rengba ka tona mbu rengo yeeye. Oni bingo gu kpiapai nga ga Daniel, * nga gu ko ngi agu ambaro nga ga vidio aima ngba tiko. Ko aya: “Mi atona ngi agu ambaro nga ga vidio ho garãre adu ni wa bawe. Ti tonatonaha, mi anaangi agu ambaro naadunga adu ni gbegberẽhe kisusi ya. Ono yeeye, mi atona ngi agu ambaro naadu na  zuu gbiati pa adaimona rogoho.” Niyangaraha, ko anadia asa wa 15 kuti ngi agu ambaro nga ga vidio na aˈuru dũ. Daniel aya, “Mi aima ino gupai kpotore yo nga gu ngbatunga ambaro mi aangi he na gu bakio regbo mi aadia ha kuti ngi he aaturuso re aturuso kusayo ti Yekova. Ono tie, mi ada kuti gupai nga si aidanga mi mangi gupai Ziazia Kekeapai agumbaha te.” Sidu, ka ani adunga na rubangirise ya, aũngbarago ima rengba ka sa rani ani naaturo kusayo ti rengo. Ka ngbatungapai wa gure mangi, ani ima rengba ka zanga gu nyanyakipa ahe Yekova nafuhe furani.

9. Ringbisihe kuti 1 Timoteo 1:18, 19, Pauro aringbisi Timoteo kuti da?

⁹ Oni gedi 1 Timoteo 1:18, 19. Pauro aringbisi Timoteo kuti banzengere na ki ngarasi ko ko ‘so wene vura.’ Pauro aafuranga tipa sovura na agu abanzengere nga aboro te ono ko aafura tipa so gu vura nga ga toro. Ngba gini agene du aKristano wakina abanzengere ti regbo sovura? Gini asino si aida ani sonosihe wa ngia ani ga Kristo abanzengere? Ani bingo apai bisue nga gu rengbe ani ka wirikaha ti gu kpiapai Pauro amangisunge na ni. Agi apai re ima rengba ka undo rani ani kakuti rengo.

10. Ginihe nga kakuti sinombori, na tipagine ani aidaha ti ni?

¹⁰ Mo sonosi pa kakuti sinombori. Gu banzengere du niruru ni nga wene banzengere. Ni nasovura nyanyaki tipa ka banda gu boro ni nakpinyemu ni watadu guhe ni abihe na nyanyakipaha. Pauro angarasi Timoteo tipa ko sonosi pa kakuti sinombori—du nga ruru nyemuse koyo du Mbori ni. (1 Tim. 4:7) Ka ani du na dudunguro nyemuse koyo du Mbori ni, kinawo a ani nika du na bakere nyemu ka kakuti rengo.—1 Tim. 4:8-10; 6:6.

11. Tipagine si aida ani raba tirani ti ni?

¹¹ Mo raba tiro tipa ka manga gupai du ni ruruhe. Si naida banzengere raba tini araba tipa kadu regerege tipa vura. Timoteo aima rengba ka sovura kuti gu maapai kurii nga ga Satana bambiko ko apekefuo gu rugute Pauro afuhe na ki mangisunge nyanyaki tipa ka sovura kuti gbegberẽ nyemuapai, ka sonosa wene asino, na kaa dia regbo na awirinako aKristano. (2 Tim. 2:22) Tipa ko mangi agu apai re, si aaida ko raba tiko. Si naida ani raba tirani araba tipa kadu na diabese rogo gu vurayo ani asoho kuti gaani gbegberẽ nyemuapai. (Rom. 7:21-25) Kurigure, si naida ani raba tirani araba tipa ka aria gaani asino na ki sonosi wene asino. (Ef. 4:22, 24) Na ho du ani ni na mbugo tingbafuo gbanga uru, si ima rengba ka ida gupai nga ani mangi asadatise amanga ka ndu tipa dunguratise.—Eb. 10:24, 25.

12. Ngba gini agene rengbe ani ka mbakada gu gene ani amangasunge na Ziazia Kekeapai ngbaha?

¹² Si naida banzengere inidi tini ainido na mangasunge na gani aũvura. Na ka ni aida kaa mangasunge na gani aũvura wenengai, si naida ni wiriki wai awirika kaa mangasunge na ni. Wakina gure a, si naida ani wiriki wai ka mangasunge na Fugo Mbori wenengai. (2 Tim. 2:15) Ani rengbe ka wirika wai rengbe ani ka manga gipai re ba gaani adunguratise yo. Ono ka ani aida ka undo kura aboro a tipa i idi kuti gupai nga gu rengo nga ga Ziazia Kekeapai ima rengba ka undo yo, si naida ani naawisigoho dedede. Si naida ani mangisunge na Fugo Mbori ka nyakasa gaani idapase. Gere nayugo gupai nga si aidanga ani naageda kina gedigedi Ziazia Kekeapai sa te. Si naida gupai nga ani naaberãkurii agu apai ani agedaha na kini mangi wetekapai rogo gaani awaraga yo tipa gupai nga ani gitirani wenengai na agu apai du rogo Ziazia Kekeapai yo na kini mangipai kutini. (1 Tim. 4:13-15) Si du nika sa gupai nga ani rengbe ka mangasunge wenengai na Fugo Mbori tipa ka yugopai fu aboro. Gere nayugo gupai nga si aidanga ani  naageda kina averesi rogo Ziazia Kekeapai yo gbua fuyo te. Si naida ani undo agu aboro nadegatuyo furani i gi rogo agu averesi yo ani agedaha fuyo na wai si narengbe ka undo yo. Sidu, ka ani awisigo Ziazia Kekeapai dedede, ani ima rengba ka da ni wene abayugupai.—2 Tim. 3:16, 17.

13. Ringbisihe kuti AEbere 5:14, tipagine si aida ani du ti ni ni agu aboro nakparia pa apai?

¹³ Mo du ni gu boro nakparia pa apai. Banzengere ima rengba ka bi kerepai kumbatayo na ki nehe. Si naida ani wiriki wai a ka bi agu apai rengbe ka ye na kerepai kuti rani na ki mangipai tipa ka nehe. (Snz. 22:3; oni gedi AEbere 5:14.) Ni kpiapai, si naida ani sia gaani aũzambuasitise na aũngbarago na tatamana. Dedede, agu ambakadapai nga ga terevizioni na ga asinima ninaayugopa wasiwasi mangaapai. Ngbatunga gu mangaapai re naba gberãrago aba ti Mbori na ka si zanganga ye na kpakarapai kuti boro te. Mbiko gipai re, ani nane agu aũngbarago rengbe ka rungburasi gu nyemuse du ani na ni tipa Mbori yeeye.—Ef. 5:5, 6.

14. Waigu pa kpariapa apai aundo Daniel?

¹⁴ Daniel i nifura tipa ko kusayo atona ka kparia gupai nga, gako kpakarapai angia ngi agu ambaro nga ga vidio du na zuu gbiati pa adaimona rogoho. Ko amangi wetekapai rogo Watchtower Library yo tipa agu apai rengbe ka undo ko ko mangipai kuti gako kpakarapai. Wai du pa manga ko ho wo adu na sangbanaha kuriko? Ko ambu ngi gbegberẽ ambaro nga ga vidio. Daniel aya, “Kuba gupai nga kaa ngi agu ambaro nga ga vidio, mi atona dia regbo kaa manga kuraapai watadu kaa koda tire na abakureami rogo dungurati.” Daniel namangasunge awere ni bazakigene na ni bakumba.

15. Tipagine du ziree apangbanga ti ni ni kerepai?

¹⁵ Wakina Timoteo, si naida ani kpariapa gu kerepai a rengbe ka ye ti agu aziree apangbanga abasamungu kuti ndikidi pambori agbandakaha. (1 Tim. 4:1, 7; 2 Tim. 2:16) Ni kpiapai, i ima rengba ka asada ka gbandaka ziree apangbanga tipa awirinarani watadu ka sarani ani tona du na kapa kuti ga Yekova riigbu. Ngbatunga gu ziree apangbanga re ima rengba ka rungburasi gaani idapase. Si aidanga ani idi kutini te. Tipagine? Bambiko agu aboro nagbandaka ngbatunga agi apangbanga re nga ‘agu aboro gberẽ rogo gayo berã ki zanga rengo.’ Gayo sasa nga ka tona ‘sakapai na kangu.’ (1 Tim. 6:4, 5) I naida gupai nga ani tona ida kuti gayo aziree na ki mbu kido kuti awirinarani.

16. Gini apai rengbe ani ka nehe nga gu rengbe ka gbeberã rani kusayo?

 ¹⁶ Mo ne gupai rengbe ka gbeberã ro kusayo. Wa Timoteo angia “ga Kristo Yesu wene banzengere,” si aaida ko ni moiberãko kuti sunge tungusapai kuba maaberãko gbe tipa aũkumuko na gu kura asasa rogo raka yo. (2 Tim. 2:3, 4) Wakina Timoteo, si aidanga ani mbupa tirani kaa kpinyemu bakere aũzegino te. ‘Gu nanga he nga ga aũkumuko’ ima rengba ka sarani ani zanga gaani nyemuse tipa Yekova, gaani tambuahe tipa Fugo Mbori, na gaani nyemupai ka pe agu apai du rogo Fugo Mbori yo fu kura aboro. (Mt. 13:22) Si naida ani mbu gaani raka si du taata na kini mangisunge na gaani regbo gbiati gaani ome tipa kaa “gbáta [ga Yekova] ngbi” mbata.—Mt. 6:22-25, 33.

17-18. Ginipai rengbe ani ka mangaha tipa ka banda gaani pabakure na Yekova?

¹⁷ Mo mbakadi tiro tipa ka mangapai ni ipo. Si naida banzengere mangi mbakadapai tipa gupai ni nika mangaha tipa ka banda tini. Ka si du nga ani naida ka banda agu ahe Yekova nafuhe furani, si naida ani mangipai ni ipo ho ani nabi kerepai ni. Ginipai rengbe ka undo rani ani mangipai ni ipo? Si naida ani mbakaditirani mbu regbo koyo kindi tipa wai ani nika mangapai kuti kerepai.

¹⁸ Tipa ka yugoho na kpiapai, ho aboro ninaandu ni tipa sungo, i naagumba gupai fuyo nga mbata fu sungo tona, si naida i ngere tipa gu ngbadimo rengbe yo ka kura ti ni ku zegiyo nga gu du mbembedi na yo. Tipagine? Tipa gupai nga i du na rengba ka kura ti ni ni ipo ka tunguotunguopai mangi. Teketeke a, ani ima rengba ka mbakadatirani mbu regbo kumbatayo tipa gupai ani narengbe ka mangaha ka wasiwasi mangaapai, gu mangaapai nga ga zuu, watadu agu ahe nga ga abasamungu kuti ndikidi pambori kuru ho ani amangasunge ni na Internet watadu ho ani abi terevizioni ni. Ka ani mbakaditirani tipa gupai rengbe ka manga kumbatayo, ani ima rengba ka mangapai ni ipo tipa ka banda gaani pabakure na Yekova na ki nye ni gigiri rani bangiriko.—Tam. 101:3; 1 Tim. 4:12.

19. Gini amaku ani nika gbiaha ka ani banda gu nyanyakipa ahe Yekova nafuhe furani?

¹⁹ Si naida ani banda gu nyanyakipa ahe Yekova nafuhe furani—gu nyanyakipa arengo du rogo Ziazia Kekeapai yo na gu momu nga ga yugoho fu kura aboro. Ka ani mangihe wo, ani nika du na gigiri sangbakpotoseyo, gu raka du na ndikidi rogoyo ti ni, gbiati gu ngbarago nga ga undo aboro i ye ka ino Yekova. Na gu undo nga ga Yekova, ani nika duadu na rengba ka banda guhe i afuhe furani.—1 Tim. 6:12, 19.