Gopai nayugo gupai nga Yesu ada ni Gbiamotumo ho ko azi bapatiza ni rogo gu garã nangia 29 Fuo Batikayo Kristo. Wai du ani aino gipai re? Ho Yesu azi bapatiza ni, ko ayugu gupai nga ko adu na nyemu ka fu raka ko rii gu bamotumo narukuba gupai Mbori “akpi nyemu he.” (Gara. 1:4; Eb. 10:5-10) Wa duhe nga bamotumo nga nyanyakipa papara yekaru, si nawira gupai nga gu yekaru nga ga toro atona a ho Yesu azi bapatiza ni. Ga Yekova bakere yekaru nga ga toro narukuba agu apai dunduko nasa gupai nga ani du na rengba ka irisombori ngba ruru gene riimburu ga Yesu motumo.—Mt. 3:16, 17; Eb. 5:4-6.

Gu bakere yekaru nga ga toro aaida na gbiamotumo. Sidu, Yekova ambedi Yesu “ni Ziazia Toro na tandu” tipa ko du ni gbiamotumo. (Amo. 10:37, 38; Mk. 1:9-11) Ono tie, waigu rengbe ani kadu na gu kido nga i amoi Yesu ni Gbiamotumo mbata fu kpioko na gako zingabekpio? Gu kpiapai nangia ga aArona na agu agbiamotumo naye tingbafuoko nika undo rani ani karagapai kuti gu sanahe re.

Agu Andiko Yekova afuhe fu Moize aape gupai nga kina gbiamotumo sa naanirengbe ka rimo ku rogo Kparakpara Ziazia Ba Kisusi nga ga banye na kusa, ni kini rimi ku rogo Kparakpara Ziazia Ba Kisusi nga ga yekaru. Remu dada rago nanaakparaka agu aba ue re. Gbiamotumo anaasusa remu dada rago kina rogo Uru Dada Ingapai sa. (Eb. 9:1-3, 6, 7) I ambedi aArona na agu aboro naye tifuo ko ni agbiamotumo mbata fu i rimi rogo remu dada rago ku rogo Kparakpara Ziazia Ba Kisusi. Sidu, i amoi Yesu a ni Gbiamotumo mbata fu ko kpi na ki rimi ‘rogo remu dada rago, du nga boroko’ ku rogo gu raka nga ga ngbangbaturũ. (Eb. 10:20) Mbiko gipai re, gu mokedi nangia Pauro afura tipa Yesu nga ko aye ni “gbiamotumo” na ki rimi rogo gu “bamburoko dungurati ngba angba, ni ziazia ha ti gu kuru he, nga gu i amanga nga ha ni be ya” na ku “ngbangbaturũ” yo.—Eb. 9:11, 24.

Kparakparapai ho dagba gu regbo i akusi vovo mokido na gu regbo si atona ti ni te. Tipagine adunga kparakparapai ti ni ho ya? Ho Yesu aga ni ku ngbangbaturũ yo na ki yugupa nyakapa gu rengberengbe ungako ko afuhe tipa rani, ko adi diandue sa dagba agu adiandue yo biata nga gu narengbe ka kusa vovo mokido. Kina gu bangisa adiandue re a nasa gu mokido re si tona mangasunge. Gini adiandue du nangiaha re?

Ni bambataha, Yesu akuru ku barabangiri Yekova; fuo gure, Yesu ayugu pa nyakapa gako motumo tumorii fu Yekova; na niyangaraha tie, Yekova aidi na pa nyakapa kure Yesu. Sidu, agi apai re amangi mbata dunduko vovo mokido kini tona mangasunge.

Ziazia Kekeapai apenga pa gu regbo furani nzunzu Yekova aidi na pa nyakapa ga Yesu motumo te. Mbiko gi pai re, ka ani penga pa gu regbo nzunzu vovo mokido akuru na ki tona mangasunge te. Ono wa vura duhe wo, ani ima ino gupai nga Yesu aga ku ngbangbaturũ yo mbu arame koyo bawe kuti Pendekote. (Amo. 1:3) Vuru gu wiri gu regbo yo re, ko ayugu pa nyakapa gako motumo tumorii fu Yekova, na Yekova ki ima ida na ni. (Eb. 9:12) Gopai nga ga gipai re aima du ni yuguyuguhe ti regbo Pendekote. (Amo. 2:1-4, 32, 33) Si adu ziazia nga i aima kusa vovo mokido na si ki ima tona mangasunge.

Ka pepai ni guruhe, vovo mokido akuru na ki tona mangasunge tingbafuo Yekova idi na pa nyakapa kure Yesu. Sidu, gu vovo mokido re kini tona mangasunge na Gbiamotumo nga Yesu kini du ni gaha Azarõ.—Eb. 7:25; 8:1-3, 6; 9:13-15.