1. Gini rugute AFiripoio 2:3 afuhe, na gini undo duti mangapai kutini?

ANI nagiasangba Yekova ni umbasitise mbiko ani ima rugatirani na gupai nga Yekova ti aregbo dũ ima ino gupai ngba tipa rani. (Ef. 4:22-24) Umbasitise nasa rani ani moi gupai Yekova akpinyemuhe mbatayo fu gupai ani akpinyemuhe na kini bi akuarani nga i nyakipa yo tirani. Ni sangbana gipai re, ani naadu na wene pagume na Yekova gbiati awirinarani.—Oni gedi AFiripoio 2:3.

2. Ginipai gu mokedi nangia Pauro arugutiko na ni, na gini apai ani nika wisigoho rogo gi kekeapai re?

² Ka ani adunga na rubangirise ya, agu aboro du rogo gi ga Satana zegino re ima rengba kadu na maapai kurirani nga agu aboro du nga airarukö na ni aboro gbangbati. * Si nawira gupai nga gu sino nga ga rukö gbiati gbangbati aima du na maapai kurii agu aKristano naadu rogo bambata sa kama agarã, mbiko gu mokedi nangia Pauro akepai fu aRomo nga: “Mi naya furoni dunduko wẽ ka gu ni berẽ nga pa tini susi gu si aidaha ya, ono ni berẽpa tiní wa rengbehe.” (Rom. 12:3, NW) Pauro aima rugatiko na gupai nga si naida ani duadu na ruru bipai tipa tirani. Ono tie, umbasitise nika undo rani ani du na ruru bipai tipa tirani. Gi kekeapai re nika sakapai tipa abangiriba biata nga gu rengbe umbasitise ka undo rani ani ne du ni airarukö rogoho. Agu abangiriba re nga (1) gaani rogatise, (2) agu amomu sunge du berani, na (3) wai ani amangasunge na Internet.

3. Tipagine atagbagapai narengbe ka kura ti ni rogo rogatise, na waigu kura aboro ninaaida ka mangapai kuti agu atagbagapai re?

³ Yekova ambakadi rogatise si du ni mburu ngbarago fu kumbakudee  na diakumba. Ono tie, boro ho du ni rengberengbe ni te, sidu, atagbagapai ima rengba ka kura. Pauro akepai nga agu aboro namanga rogatise nika gbiatiyo agbia na akpakarapai. (1 Kor. 7:28) Agu akurayo nabihe nga i napaa na gayo abadiarogatise ti aregbo dũ, na i ima rengba ka berã gupai nga si aarẽnga i mangi rogatise na gu boro re te. Ka si du nga gu maapai kurii nga ga zegino kuriyo, i ima rengba ka berã gupai niipo nga mbutise nga gupai si aidaha. I ima rengba ka berã kina pa tiyo na ki berẽ gupai nga i rengbe kadu na ngbarago sa kina gu ka i mbutiyo.

4. Ginipai si aida ani nehe?

⁴ Si naida ani ne berã gupai nga gaani rogatise ima gburuwa na ka si dunga na diabese te. Ani ima ino gupai nga gu yangara ndupai Ziazia Kekeapai afuhe tipa mbutise nga kina bari sa. (Mt. 5:32) Ho ani agbiatirani ni na agu akpakarapai Pauro akepai tipaha, aberãpai kinaho si aidanga ani mbu rukö si sarani ani du na ni ya, wa agu aberãpai nga: ‘Gimi badiarogatise aberãnga pa re te. Mi agbianga gu nyemuse nzunzu si aida mi gbiaha te. Watadu ka mi adi kura boro kia, ka mi du na bakere ngbarago.’ Ka ani aaberã wa gure, gure nga ani naberã kina pa tirani angianga pa gaani badiarogatise ya. Gu tatamana nga ga zegino ima rengba ka pe gupai foro nga si naida mo pekefuo gupai du ngbaduro yo na kini mangi gupai nasa ngbarago tiro, ka si vura vurũ nga gupai re nika ida gupai nga mo digisi gamo rogatise adigiso. Gu tatamana tigaha nga ga Mbori naya: “Ka oni bérẽ nga pa kina gaoni pai ya, ono oni bérẽ pa ga akuaroni apai.” (Frp. 2:4) Yekova naida gupai nga mo banda gamo rogatise, angianga ka digisoho ya. (Mt. 19:6) Ko naida mo berẽpa ko mbata, angianga patiro ya.

5. Ringbisihe kuti AEfeso 5:33, si naida kumbakudee na diakumba naamangapai dagbatiyo wai?

⁵ Si naida kumbakudee na diakumba naamangapai dagbatiyo na nyemuse gbiati irisa. (Oni gedi AEfeso 5:33.) Ziazia Kekeapai nangarasa rani nga ani naamaaberã rani gbe tipa fu he  angia tipa dia he ya. (Amo. 20:35) Gini sino rengbe ka undo arogotise tipa i yugu nyemuse gbiati irisa? Karagapai nga umbasitise. Agu akumbakuadee na dereakumba du na umbasitise agbatanga kina gupai ngbatiyo te, ono “gu ngba fu akurayo.”—1 Kor. 10:24.

6. Ginipai mo awirikaha ti gupai aSteven na Stephanie apehe?

⁶ Umbasitise ima undo dungu agu arogotise nga aKristano tipa i gbia bakere ngbarago rogo gayo rogatise. Ni kpiapai, kura kumbakudee sa du rimoko nga Steven aya: “Ka singia oni nga badona, oni nika mangasunge wa sa, gbe, ho du akpakarapai ni. Kuba gupai nga kaa berã gupai nga, ‘ginipai ngba gbe kisusi tipa re?’ mo nikaa berã gupai nga ‘ginipai ngba gbe kisusi tipa rani?’” Diako nga Stephanie, na kina gu berãpai re. Ri aya, “Boro ho naida ka raka na gu boro i apaa apaa kindi dagbatiyo na ni te. Ho tagbagapai ninaakura ni, ani ninaasada ka ino ginipai niiye na gu tagbagapai re. Fuo gure, ani ki mangi kparakpee, ki mangi wetekapai rogo gaani awaraga, na ki fura tipa wai rengbe ani ka mbakada gu tagbagapai re. Ani ninaasada ka mbakada gu tagbagapai re angianga ka sovura dagbarani ya.” Nirengo, kumbakuadee na dereakumba nagbia undo gbe ho i aberãnga kina pa tiyo ni kisusi gu si aidaha ya.

7. Gini sino si aida wirina du na ni ho ni nagbia amomu sunge ni?

⁷ Si furani ni pa momu ka mangasunge fu Yekova ngba ai gu gene rengbe ani ka manga sunge fuko ngbaha. (Tam. 27:4; 84:10) Ka singia wirina nga kumba fu tini tipa ka mangasunge ni bakerehe rogo ga Yekova riigbu, gure nga wenepai. Nirengo, Ziazia Kekeapai naya: “Ka kumba gbata sunge babipai ni nakpi nyemu wene sunge.” (1 Tim. 3:1) Ono tie, ho ni agbia sunge ni, si aidanga ni berẽpa tini kisusi gu si aidaha te. (Rk. 17:7-10) Si naida gani sasa du nga ka mangasunge fu gu kura aboro na umbasitise.—2 Kor. 12:15.

8. Ginipai ani awirikaha ti gupai Dioturepe, Uziya, na Abisaroma amangihe?

⁸ Badungu akpiapai du rogo Ziazia Kekeapai yo nga ga agu aboro naaberã kina pa tiyo gbe. Dioturepe aadunga na ruru bipai te. Ko anaasada kadu “ni barumbatayo” rogo dungurati. (3 Yo. 9) Uziya amangi gu sunge ni rukö nga gu Yekova aafunga ha fuko ya. (2 Peka 26:16-21) Abisaroma aaida kada ni bakindo, sidu, ko amangi tiko nga ko ima kpinyemu aboro tipa gupai nga i ngbe na ko. (2 Sam. 15:2-6) A wa agu akpiapai nga ga Ziazia Kekeapai re ayugoho ziazia, Yekova na ngbarago na agu aboro nagbata kina gayo taarimo te. (Snz. 25:27) Agu aboro nga airarukö na nga aguyo nakpinyemu aboro nibiyo na nyanyakipa yo, i naaye aye ki gbiatiyo na akpakarapai ni yangaraha.—Snz. 16:18.

9. Gini kpiapai Yesu amoihe?

⁹ Yesu aadunga wa agu aboro rukö re te. Ziazia Kekeapai nagumba gupai nga, wa Yesu “adu ni [kpia Mbori]; rengba ko na Mbori adu nga bangiriko ni mosoro te.” (Frp. 2:6) Wa vura duhe nga kina Yekova sa du na ome tiko kisusi Yesu, Yesu aberãnga pa tiko kisusi gu si aidaha te. Ko agumba gupai fu gako abawiriki nga: “Gu ni du ni toni ni dagba roni dunduko, ni nga bakumbaroni.” (Rk. 9:48) Nairiwo gu pa maku ngaha ka mangasunge na agu abazakigene, amoundo abaakumba, abaakumba, gbiati ababi adungurati nga aguyo nawirika Yesu niyugo yo umbasitise! Ka ani du na umbasitise, ani nika yugo bakere nyemuse fu kura aboro. Na Yesu agumba gupai nga ndikidi ga Mbori amoyambu nikaa yugo nyemuse dagbatiyo.—Yo. 13:35.

10. Ginipai rengbe mo ka mangaha ka mo abihe nga i amanganga pai tipa agu akpakarapai du rogo dungurati ngba wene gene te?

¹⁰ Ginipai rengbe mo ka mangaha ka si  aangera wa akpakarapai gu du rogo dungurati na mo nabihe nga abaakumba amanganga pai wenengai tipaha te? Kuba gupai nga kaa kpakanahe, mo rengbe ka yugo umbasitise ni songoda mo agu aboro nangbembatayo. (Eb. 13:17) Tipa mo mangi gipai re, mo sananga tiro nga: ‘Ya mo agu akpakarapai mi abihe re ima du ni kerehe nga gu si aida i mangipai amanga sa ni? Ya mo gere nga wene regbo tipa ka mangapai sa ni? Ya mo gimi sunge du nga ka mangapai sa ni? Ka gumba guhe nga rengo, ya mo mi naˈasada ka ye na kodatise nzunzu ku rogo dungurati watadu mi naˈasada ka manga tire nga pare ima nyaka ni kerehe?’

11. Ringbisihe kuti AEfeso 4:2, 3, waigu gaani dungurati nika gbia undo ka ani du na umbasitise?

¹¹ Yekova nabi umbasitise na nyanyakipaha kisusi tandu mangaapai na ko nabi kodatise na nyanyakipaha kisusi gu sunge ani amangaha. Sidu tie, mo mangi asadatise tipa ka mangasunge fu Yekova ni umbasitise. Ka mo mangihe wo, mo nika ye na kodatise ku rogo dungurati. (Oni gedi AEfeso 4:2, 3.) Mo naamanga sunge tungusapai kakaka. Mo ngere tipa agu agene rengbe mo ka undo aboro ngbaha ni manga mo wene apai fuyo. Mo nidi aboro dunduko kugume, kodihe na agu aboro adunga asunge beyo rogo dungurati ya. (Mt. 6:1-4; Rk. 14:12-14) Wa mo nikaa manga sunge ni umbasitise na dungurati, aboro abingo kina gu tandu mangaapai sa du tiro te, ono i nika bi gamo umbasitise abi a.

12. Ya mo Ziazia Kekeapai nangarasa rani tipa ani du na abakure? Oni sakingo rogoyo.

¹² Yekova naida ani gbia ngbarago ti dia ani regbo na abakurearani gbiati gaani aborokporo. (Tam. 133:1) Yesu aduadu na wene abakure beko. (Yo. 15:15) Ziazia Kekeapai nape pa agu aundo ape ani agbiaha ho du ani ni na ndikidi abakure berani. (Snz. 17:17; 18:24) Na si nape  gupai furani nga ngbanga ha ani kpara tirani kusayo nisarani te. (Snz. 18:1) Badungu aboro nabihe nga rogo Internet yo du rengbe yo ka gbia badungu abakure ni na i ki zanga du nisa yo. Ono tie, si naida ani du na rubangirise nibipa mangasunge na agu aũfugo dagbase nga ga Internet.

13. Tipagine kura agu aboro namangasunge na Internet naabi tiyo ti ni nga i nisayo na kidu na bakere gberãrago?

¹³ Awisigopai ima yugo gupai nga agu aboro nadia bakere regbo kaa biko agu ahe aboro amaaha ku rogo Internet ima rengba ka bi tiyo nga i ni sayo na i kidu na bakere gberãrago. Tipagine? Bambata ndupai rengbe kadu nga, dedede, aboro ninaamaa kina agu asura ku rogo Internet nayugopa nyanyakipa aregbo rogo gayo raka yo, na i naamaa kina bawene asura yo, bawene asura abakureayo, gbiati gu wene arago i ata rogoyo. Gu boro nabi agu asura re ima rengba kada kuti gu digisopai nga, gani raka ni wenehe wa ga agu aboro re te, watadu sunge tini te. Kura paranga Kristano sa ni dee du garãri nga 19 aima ida kuti gupai re, ri aya, “Rago aima tona kaa gberã tire ho mi anaabi asura kura aboro ni i nigbia ngbarago ti wene aregbo ti digido aposo na mi ki sungu tigimi kporo yo zanga manga ai wiripai.”

14. Waigu rengbe gu rugute nga ga Ziazia Kekeapai du rogo 1 Petero 3:8 ka undo rani nibipa mangasunge na Internet?

¹⁴ Rengo ngaha nga, ani ima rengba ka mangasunge na Internet ngba wene gene, ni kpiapai, ani ima rengbe ka mangasunge na ni tipa kaa fura na agumerani watadu abakurearani. Ono tie, ya mo mo bingo gupai nga kura aboro ninaakeka apai, kini moi asura, na avidio ku rogo Internet tipa ka sa kura aboro i naabiyo nga i nyakipa yo? Si nawira gupai nga i naamanga gipai re tipa gupai nga ka gbeberã aboro koyo du yo ni. Gu kura aboro nakeka gbegberẽ afugo tii agu asura i amaaha rogo Internet watadu agu kura aboro amaaha. Ono tie, i nangarasa aKristano nga i du na umbasitise na kidu na nyemu awirinayo tiyo, sidu, i arengbanga ka mangasunge na Internet ngba gu gene re te.—Oni gedi 1 Petero 3:8.

15. Waigu rengbe Ziazia Kekeapai ka undo rani ani ne gu sino nga ga sa aboro i naabi rani nga parani ima nyaka kisusi?

¹⁵ Ka singia mo naamangasunge na Internet, mo sananga tiro nga: ‘Ya mo agu apai mi akekaha na agu asura, watadu avidio mi amaaha rogo Internet rengbe ka ye na gupai ku berã aboro yo nga mi namanga rukö? Ya mo mi nasa  kura aboro i tona ka kpihe?’ Ziazia Kekeapai naya: ‘Agu ahe dunduko du zegino, gu nyemuhe nga ga borose, na gu nyemuhe nga ga bangirise, na gu ũmosangi enda nga ga unga, si ni ga Mbori nga Ba te, ono si ni kina ga zegino.’ (1 Yo. 2:16) Agu afugo nga, “gu ũmosangi enda nga ga unga,” gu kura sasa-fugo Ziazia Kekeapai sa moihe nga, “ida gupai nga kaa ngera wa gu boro pani naima nyaka ni kerehe.” AKristano aidanga kaa biti yo nga payo ima nyaka ni kerehe te, na i aidanga aboro naabiyo nga payo ima nyaka ni kerehe a te. I napekafuo gu rugute nga ga Ziazia Kekeapai nga gu naya: “Ka ani mángi nga ruka, ka zingisa tirani, ka kpi tirani ya.” (Gara. 5:26) Ka si du nga ani na umbasitise, ani adunga wa aboro zegino nga aguyo du nga airarukö na naida kura aboro naaberã gupai nga i nyakipa yo kisusi kura aboro te.

16. Tipagine si aida ani ne gu sino ti ni nga ga rukö?

¹⁶ Si naida ani sonosi gu sino nga ga umbasitise, mbiko agu aboro nga airarukö aberãnga pa tiyo “wa rengbehe” watadu rengbe arengba te. (Rom. 12:3) Aboro rukö ni agu aboro naye na atagbagapai na i nga aboro gbangbati. Gayo aberãpai na mangaapai ninaasa yo dedede i niimisi tiyo gbiati kura aboro. Ka i aˈarianga gu gene i aberã ngbaha ya, Satana nika kiso berãyo na ki gbarasihe. (2 Kor. 4:4; 11:3) Ono gu boro nga boro umbasitise na ruru bipai. Ni na ruru bipai tipa tini, ni ima ino gupai nga pa kura aboro ima nyaka kisusi ni ngba dungu agene. (Frp. 2:3) Na ni ima ino gupai nga “Mbori naka fu aboro rekangose, ono ko nafu undahe fu agu yo naumbasi tiyo.” (1 Pet. 5:5) Agu aboro du na ruru bipai akpinga nyemu gupai nga Yekova ká yo te.

17. Ginipai si aida ani mangihe tipa ka nye ni aboro umbasitise?

¹⁷ Tipa ka nye ni aboro umbasitise, si naida ani mangipai kuti gu rugute nga ga Ziazia Kekeapai nga gu naya, ‘ani mbu kuru borose, na gaha mangaapai, ki ukadi vovo borose.’ Sunge du si aidaha tipa ka manga gipai re. Si naida ani wirikipai tipa ga Yesu kpiapai na ki asadi ka wirika ko teketeke wa rengbe omerani na ni. (Koro. 3:9, 10; 1 Pet. 2:21) Ka ani mangihe wo, ani nika gbia undo ni bakerehe. Ho ani asonosa umbasitise ni, gaani riikporo nika du na bakere ngbarago, ani nika ye na kodatise ku rogo dungurati, na ani nika ino wai ka zanga mangasunge na Internet ngba gbegberẽ gene. Gu nyakipaha anyaka kisusi nga, ani nika gbia ga Yekova amaku na ko ki idi na ani.