I avungure rogo gu ba nga St. Paul, Minnesota yo, Amerika yo rogo gu garã nangia 1954 ku rogo gu riikporo nangia ga aKatoriko nga gu naadunga ni kumukokumuko ho ya. I avungu rani bisue, na mi nga namba ue. Ho mi adu ni ni gude, mi andu ku rogo gu sukuru nga ga aKatoriko, na mi nangia gu gude nanaaundo abavugahe ti regbo vuga misa. Ono wa si avura du wo, mi aainongo dungu apai tipa Ziazia Kekeapai te. Wa vura duhe nga mi aima ida kuti gupai nga Mbori kinaho nakusi ahe dunduko, mi aadunga na idapase kuti Kanisa te.

Rogo gimi bambata garã nga ga wirika andiko rogo gu bawirikapai nga William Mitchell College of Law, aDezire Yekova aye ku kpure yo. Mi aazunda gimi aroko na agu arogotise naye re ki gumba gupai fere ngba wene gene nga i nika karagatiyo fuo re kusa. Ho i akaragatiyo ni, mi asana yo na asanahe ue nga: “Tipagine du gbegberẽ aboro na diabese ti ni rogo raka yo kisusi wene aboro?” na “Waigu rengbe boro kadu nzunzu na ngbarago?” Mi adi gu buku beyo nga, The Truth That Leads to Eternal Life na gu Baibiri nga New World Translation of the Holy Scriptures, naanidu na kpotoho wa kpe. Na mi aidi ka tona wisigo Ziazia Kekeapai a. Gipai re aima undo re mi wiriki dungu weneapai. Mi aima du na bakere ngbarago ka wirika gupai nga ga Mbori Kindo nga zogarago nga gu nika zogarago ku auru kpotosende. Mi aye ka bi gupai  nga gu zogarago nga ga aboro ima ti na zegino ima hi be aigirã, arungo, iraira sarangbanga, na gbegberẽ apai.

Mi akpara gimi raka fu Yekova ti tonatona gu garã nangia 1982 na ki zi bapatiza kusa rogo gu garã re ti regbo gu Bakere Dunguratise riihe angia, “Kingdom Truth” nga gu i amangihe St. Paul Civic Center yo. Mi akaraga tire ku Minnesota yo rogo gu poso naangbe tifuo gure tipa ka manga asada nga ga andiko. Rogo tonatona Tanvuo, mi aye ka ino gupai nga mi ima nagia gu asada re na si kini yugu gupai nga mi ima rengba ka mangasunge ni bainiparugute.

Ti regbo gu bakere dunguratise nangia “Kingdom Truth” re, mi agbia Mike Richardson, nangia boro Betere Brooklyn yo, ko agumba gupai fere nga i ima maa gu basunge nga gu nangerafuo agu apai nga ga andiko rii-basunge yo. Mi atingidi afugo gu banyaki nangia boro Etiopia nga gu du ni kekehe rogo Amokedi 8:36 na mi ki sana tire nga, ‘Ginipai naká na mi ti mangasunge rogo gu basunge nga ga Andiko?’ Sidu, mi asanahe tipa ka mangasunge Betere yo.

Avungure aadunga na ngbarago nga mi da ni Dezire Yekova te. Buba asana re singia pa manga mi sunge Betere yo aundo na gu sunge nga ga bainiparugute. Mi agumba gupai fuko nga mi fu tire kaa mangasunge angianga tipa marã ya. Mi agumba gupai fuko nga i nikaa fu adorari nga 75 fere na adiwi dunduko, nangia gu marã i anaafu ru fu aboro Betere ti gu regbo re.

Mbiko gupai nga mi aima ida gupai nga ka mangasunge bagumba ngbanga yo, mi aarengbanga ka ndu ku Betere yo nibasa te, mi atona mangasunge rogo gu Betere nga ga Brooklyn du New York yo rogo gu garã nangia 1984. I afu re ku rogo gu basunge nga ga Andiko. Agu apai mi awirikihe ho mi aamangasunge ni bagumba ngbanga yo aima mbakada re tipa gupai narengbe ka manga.

I angbe gu meme bambu nga Stanley Theater du rogo gu gbata nga Jersey City, New Jersey, rogo Ngbangba 1983. Awirina asanahe tipa i idihe fuyo tipa i mbakadi gu bambu re na giri awe gbiati agu ahe ime ninaora rogoyo. Ho awirina agbia agu aboro biroo ni du rogo gu dagbarago re, awirina agumba gupai fu yo nga i nakpinyemu ka mangasunge na gu meme bambu nga Stanley Theater re si du ni ba bakere dunguratise nga ga aDezire Yekova. Gipai re aima kusa kpakarapai. Agu andiko nga ga gu gbata nga Jersey City aagumba gupai nga kina gu meme arago sa du rogo agu aba aboro araka rogo yo rengbe yo ka mangasunge na ni tipa irisombori. Gi bambu nga Stanley Theater re adu rogo gu ba nga ga bagaahe, sidu, agu aboro biroo nga ga gu gbata re aima ká paha fuyo. Agu awirina re  asanahe berewe tipa i aria gayo diaberã, ono i aima káha.

Rogo gu bambata poso mi andu ku Betere yo, riigbu andu na gupai re ku bagumba ngbanga yo. Mbiko gupai nga mi amangisunge tipa agarã ue rogo gu ba gumba ngbanga du St. Paul, Minnesota yo, mi aima inopai tipa ngbatunga apai wa gure. Gu kura gaani bainiparugute sa aagumba gupai nga kura aboro ni naamangasunge amanga na Stanley Theater tipa dungu apai, tipa kaa yugo asinima na abia rogo gu ba re. Tipagine rengbe yo ka ya ti ni wẽ si arẽnga tipa i mangi agu apai nga ga pambori rogo yo te? Bambu ngbanga angere rii gupai re na ki gumba gupai nga Jersey City aairisanga gu ranirii du berani nga ga irisombori te. Bambu gumba ngbanga afu gu ndiko nga i mbugene furani, na mi atona bi wai Yekova aafu maku kurii gako riigbu nimanga ko sunge na agu apai du kuti ndiko tipa gako sunge ndu kumbatayo. Mi adu na bakere ngbarago nga mi afu bee kuti gipai re.

Awirina atona mbakada gi bambu re, na i amangi gu riko nga ga Girada namba 79 kina rogo gu Bambu Bakere Dunguratise nga ga Jersey City rogo Mbirinvuo 8, 1985, fuo garã sa fuo tona yo mbakadaha. Mi aima du na bakere ngbarago ka undo na gi sunge re fu Yekova. Si aima sa gupai nga mi du na bakere ngbarago kisusi gu ngbarago mi adu na ni mbata fu ndu mi ku Betere yo. Mi aainongo gupai nga Yekova nika mangasunge na mi tipa dungu angbanga te.

Rogo gu garã nangia 1980, amunganga gbiati abambungua anaairisanga gu rengo du boro na ni tipa i husi ni zanga fu kure kutii kpoto ni yo te. Agu adee naanidu na vuse aniidu rogo bakere kpakarapai, mbiko Abasapungbanga dedede anaaberã gupai nga rengo be dee tipa ka ká dia kure kutii kpotoniyo te. Abasapungbanga anaagumba gupai nga ka nagude ká ka dia kure kutii kpotori yo, ri ima rengba ka kpi na gu gude re ki sono zanga nai ti ni.

Rogo Banduru 29, 1988, wirina nga Denise Nicoleau awoki nikerehe be zanga kure mbiko ri avungu gude. Gari zamba kure aima zorã ni kerehe, na mbiko gupai nga si aangera wa gari raka ngba kerepai, amunganga aaida gupai nga ri idihe tipa i fu kure kutii kpotori yo. Wirinarani nga Nicoleau aima ká. Rogo gu wiso naangbe fuo gure, bambungua asana kura basapungbanga tipa ko idihe tipa i fu kure fu ri. Basapungbanga aafunga momu fu Nicoleau watadu kumbari tipa i gumba gayo bipai te, na ko aagumbanga gupai fuyo a nga ko ima idaha fu bambungua tipa i fu kure ku tii kpotori yo.

Rago Bisue rogo Banduru 30, bambungua afu kure kutii kpoto Nicoleau yo wa si avura du vurũ nga kumbari gbiati gu kura gari aborokporo aaidanga ha te. Rogo gu nyemu re, i azi dungu gari aborokporo gbiati kura abaakumba mbiko gupai  nga i aru pati ga Nicoleau ba ki kisi gene tipa ka i funga kure kutii kpotori yo ya. Rago Nzengu wiso rogo Banduru 31, awaraga apangbanga na aterevizioni gbiati aba aradio New York City yo gbiati kura aba afura tipa pa zio agi awirina re.

Rago Sa Sunge wiso, mi afura na gu basapungbanga naadu rogo bakere bagumba ngbanga du rimoko nga, Milton Mollen. Mi agumbapa agu arengo fuko naadu tipa gupai re, ki gumba gupai fuko ziazia nga gu kura basapungbanga amoi fuo beko tipa gupai nga i fu kure kutii kpotori yo zanga ko sanahe. Gu basapungbanga nangia Mollen re asana re tipa mi ye ku rogo gako basunge fuo bebere gu uru re tipa ka sakapai tipa agu arengo du tipa gupai re na agu andiko du tipaha. Gimi babiapai nangia Philip Brumley agasi re ku rogo gu basunge nga ga gu basapungbanga nangia Mollen re rogo gu nyemu re. Gu basapungbanga re ayambu gu bainiparugute nga ga gu bambungua re a tipa ko ye kadu pati gu sakapai re. Gu sakapai re aima faya. Ti kura regbo sa, Wiriba Brumley akepai fere rogo gako waraga kekeapai nga, “mo fura zezeredi.” Ni rengo, gu rugute re aima ngba mbiko gupai nga mi aima tona kaa fura na bakere ome tipa ka yugo gupai nga gu bainiparugute nangia ga gu bambungua re aima manga irairapai.

Fuo he wa saa sa, gu basapungbanga nangia Mollen re aya gu ngbanga re nika ngia bambata ngbanga i nika gumbaha wiso. Wa ani aakura rogo ga gu basapungbanga re basunge, Mollen agumba gupai nga gu bainiparugute nga ga gu bambungua re na “kpakarakpakara sunge beko gba.” Gere aayugo gupai nga si adunga taata fu gu bainiparugute re tipa ko yugu gupai nga bambungua aima du na rengo tipa ka sa Nicoleau ngbaome tipa ri di kure kutii kpotori yo te. Mi abihe nga Yekova afu gu kidohe furani nga ani ima rengba kadu na diabese rogo gipai re. Kina iriwopai naati tire ka bi gupai nga Yekova aamangasunge na ani tipa ka digiso gupai ko akpinyemuhe.

Ani amangisunge da ku gii regbo yo tipa ka mbakada gupai ani nika gumbaha rogo gu wiso re. Gu bambu gumba ngbanga re adu mbembedi na gu Betere nga ga Brooklyn, sidu, badungu agu aboro du rogo gaani basunge nga ga Andiko andu koyo ni kina ndu yo. Tingbafuo agu abasapungbanga naadu biama gi agu apai naadu ngbarani, i ada kuti gupai nga si aaidanga i fu kure te. Bakere bambu gumba ngbanga asaringbanga ni wenehe kina ku bara wirinarani yo nga Nicoleau na ki gumba gupai nga gupai nga ka maa fuo bee ti pai zanga gia gu bipai nga ga borokaza si arunga kuti gu rengo du boro na ni te.

Fuo gure tingbafuo bete regbo, gu bakere Bambu gumba-ngbanga nga ga New York aidi kuti gu rengo nangia ga Nicoleau tipa i husi ri zanga fu kure kutii  kpotori yo. Si nangia gu bambata ngbanga dagba agu angbanga yo biama nabipa kure bakere Bambu gumba-ngbanga asarihe nga gu mi adu na momu tipa ka fu bee tipaha. (Oni bi gu sanduki nga, “Agu Adiabese Ani Agbiaha Rogo gu Bakere Bambu-gumba Ngbanga Nga ga Amerika.”) Mi aima mangasunge a na kura abainiparugute nga agu yo du Betere yo tipa apai wa gu nga gu boro rẽ tipa ngerafuo gude, mbutise, na agu andiko du tipa mekemeke arago gbiati sende.

Ho mi agbia diare ni nga Dawn, kumba aima mburi na ri aangerafuo awiiri biata. Ri anaamangasunge marã na kini mangisunge tungusapai ni nazakigene. Ri aima gbia tiri na kpakarakpakara raka, na pa gu nyanyaki kakutipai ri adu na ni tipa ka iriso Yekova aima zio ngbadure yo ni kerehe. Rogo gu garã nangia 1992, ani adu sa na ri pati gu bakere dunguratise riihe angia, “Light Bearers” naamangi New York City yo, na mi asana ri singia ani rengbe ka ino tirani wenengai. Ani amangi rogatise fuo garã sa kusa. Gamahe du be Yekova ka dia gu dee namaa Yekova mbatayo na kidu na wene asino tiri. Dawn ima manga pa re wenengai na auru dunduko rogo gaani raka yo naabaha.—Snz. 31:12.

Ho ani amangi rogatise ni, garã awiiri adu nga 11, 13, na 16. Mi aaida kadu ni wene ba fuyo, sidu, mi anaageda agu apai dunduko du rogo gaani awaraga tipa wai kadu ni kumbaku nase na kini mangipai kutini. Rogo agu agarã re, akpakarapai adu kinaho, ono mi na ngbarago nga agu agude re aima ye ki idi na mi ni gu bakurea yo rengbe yo ka kido kuti ni na ni gu bayo nakpinyemu yo. Ani anaadia abakurea awirani kugume ku kpurani na ani ima kpinyemu gupai nga gi wene paranga aboro re nidu pati rani.

Rogo 2013, mi gbiati Dawn aga ku Wisconsin yo tipa ka ngerafuo gbinza avungurani. Gupai nairiwo tire nga pa manga mi sunge Betere yo aadigongo kuo te. I asana re mi naandu kindi kumbatayo kaa undo gaani riigbu na gu kuraapai nga gu nabi pa andiko.

Rogo Mbirinvuo 2018, mi aye ka bi gupai nga mi anaakpera gore yo ni kerehe. Gaani munganga awisigi re, ono ko aarengbanga ka ino ginipai naaye na gipai re te. Kusa rogo Ngi 2019, gu kura munganga agumba gupai fere nga si nangera wa mi na gu kaza tire angenga ti aboro ya nga gu nika gbarasa kpotore dunduko fuo bete regbo.

Fuo arame biata kusa, ho mi aangi gu mbaro ni ngba tire gbe, mi ati na kumbabere ki kuo. Mi aima tona ningi gi mbaro re rogo gimi raka yo naabaha na mi aima inoho wenengai. Sidu, ho mi ati ni, mi aima ino gupai nga angbazunga re ima tona kaa rungbura. Kina ngbare naazere ka bi wai gu kaza re aagberã kina kumbatayo ni ipo. Si atona kadu fere ni kerehe kpakarakpakaraha ka fura, ka ta, na ka mbirahe.

Mi na bakere ngbarago nga mi ima du na rengba bere ka undo ga Yekova riigbu na gimi sunge wangia mi bainiparugute. Na mi na ngbarago nga mi aima rengba ka ke badungu amagazini nga gu amunganga, abainiparugute, na abasapungbanga agedaha. Wa vura duhe wo, mi nape kina gupai gu bake Ziazia Kekeapai nangia Ruka agumbaha rogo Ruka 17:10 nga: ‘Mi nga mumungo moyambu; mi mangi kina gupai nga gu si aaida mi mangihe.’