Yekova naida agu aboro ue mangi rogatise nigbia ngbarago nzunzu na kidu na mbembedi pagume dagbayo nga gu nika nyeanye kindi. (Mt. 19:4-6) Ka mo aida ka manga rogatise, wai gu rengbe mo ka gbia wene badiarogatise? Wa du Yekova ni Bakusirani, ko ima ino gupai rengbe ka undo rani ani du na diabese rogo gu zio bakure nga ga rogatise na rogo rogatise yo. Sidu, ka mo mangipai kuti agu abangua rengo nga gu fu ko ho furani, mo duadu na ndikidi ngbarago. Ani bingo bete agi abangua rengo re.

Ni bambatapai, si naida ani ini gupai tipa tirani nga: “Kpotoboro yo nangi ahe ki susi ahe dunduko, si na kere kaza.” (Yere. 17:9) Ho aboro ue nga agu yo naida ka manga rogatise agbiatiyo ni na kini tona fura tipa rogatise, i natona niipo ka sonosa bakere nyemuse dagbayo, ho i atona kpinyemu tiyo ni, si nadu ni bambumbuhe fuyo tipa i mangi ruru adiaberã. Ho aboro amaamburu gayo diaberã ni nga ga rogatise rii gu nyemupai du yo na ni dagbayo, paha nagberã agberã ni yangaraha. (Snz. 28:26) Si du adunga ha ti ni nipa tatamana fu aboro ue i naapeka dudunguro afugo nyemuse dagbayo watadu kaa manga akidohe dagbayo mbata fu i ini tiyo wenengai ya.

Asanza 22:3 naya: “Ngangarã boro nabi kere pai, ki gbu; ono zangainahe nandu andu kindi, ki bi mbusa tipa ha.” Ginipai rengbe kadu ni gbegberẽhe tipa mangasunge na agu abangiriba rogo Internet yo nga gu du tipa gbata badiarogatise? Si nafu kina gberãrago nga, kura aboro ima gbia kura aboro rogo Internet i ainongo yo ya, na ki tona mbakada pa rogatise na yo, na kusa, i ki ye ka bihe nga gu boro i aambakada pa rogatise na ni re aananga yo ananga. Berewe a, aboro ziree ima kusa gayo abangiriba rogo Internet yo tipa ka biriko agu aboro zanga tatamana tipa ka dĩ gayo marã. Ti kura aregbo, agu aboro du gii gi gbigbita aziree re namanga tiyo nga kina aDezire Yekova du nga yo a.

Oni bingo gu kura kerepai berewe. Gu kura aboro rogo agu abangiriba nga ga Internet nga gu du tipa gbata badiarogatise namangasunge na ringbisapai nibipa ga agu aboro ue nyemuapai naida ka manga rogatise dagbatiyo tipa ka ino ada du rẽ si aida i mangi gu mbakadapai nga ga rogatise dagbatiyo. Ono tie, gopai ho na yugo gupai nga gi ngbatunga gbata badiarogatise re na wene sangbanaha te. Si arengbanga kadu nipa tatamana ka kido kuti gu mbakadapai nga ga kompiuta nga gu kina wiri aboro ambakadihe tipa ka manga diaberã wa tipa gu nyanyakipa pai nga ga gbata da nika ngia wene badiarogatise te. Ka ani du nga na kido kuti gu  mbakadapai nga ga kompiuta ya, ono kina kuti agu abangua rengo nga ga Baibiri—Snz. 1:7; 3:5-7.

Gu bangua rengo du rogo Asanza 14:15 naya: “Zangainahe naida pa apai aida dũ, ono bangbasia nawisiga pa gani nduge wenengaĩ.” Mbata fu mo diberã singia boro rengbe kadu ni wene badiarogatise foro, si naida mo asadi ka ino gu boro re aino wenengai. Ono gbiatise rogo agu abangiriba nga ga Internet arengba nga ka sa ro mo mangi gipai re te. Ka si vura du vurũ nga oni nawisigo agu apai du tipa roni na ki tona ka dia bakere regbo ni keka oni apai dagbaroni, ya mo mo rengbe nzunzu ka ya mo ima ino gu boro re? Gu kura aboro naberẽ gupai nga i ima gbia gu badiarogatise du na ndikidi nyemuse rogo agi abangiriba nga ga Internet re, kina ngbayo naazere ho i abi gu boro re ni na ki ini agu apai du tipa ni.

Bake papara Atambuahe aya: “Mi asunga nga na aboro sawia te, mi arima nga fuo airabiriki a te.” (Tam. 26:4) Dungu aboro nabihe nga si ni wenepai ka peka ziree tipa tiyo rogo gu bangiriba nga ga gbata badiarogatise du rogo Internet yo tipa bibiyo ngbaangba gbe ti kura aboro. I ima rengba ka õka gayo gbegberẽ asino ho i akeka apai ni fu kura aboro. Wa vura duhe nga kura aboro ima rengba ka yugo tiyo ni aDezire Yekova, ya mo i ni agu aKristano naima zio bapatiza? Ya mo i nyanyaki rogo toro yo? Ya mo i na pagume dagbayo na Yekova? Ya mo agu aboro du rogo gayo dungurati na irisa koyo du yo ni? Watadu ya mo i nga gbegberẽ kpiapai na kidu ni “gbegberẽ kpamiatise”? (1 Kor. 15:33; 2 Tim. 2:20, 21) Na ya mo rẽ yo arẽ tipa ka manga rogatise ringbisihe kuti agu abangua rengo nga ga Baibiri? Si naida mo gbia akaragapai agbia kuti agi asanahe re, ono si ima du ni kpakarakpakaraha tipa ka gbia akaragapai kuti agi asanahe re ni zanga mo na fura na gu kura aDezire Yekova ini gu borore wenengai. (Snz. 15:22) Na nirengo, ka ruru moyambu nga ga Yekova ni berẽnga pa ‘kpamia tini’ na azangaidapase te.—2 Kor. 6:14; 1 Kor. 7:39.

Nibipa gu kerepai du ti mangasunge na agu abangiriba nga ga Internet nga gu du tipa gbata badiarogatise, gu kura wene agene kinaho nga gu rengbe mo ka gbata badiarogatise ngbaha na ki gbia gu boro nga gu ni rengbe mo ka manga rogatise na ni. Wari gu rengbe mo ka gbia gu boro ni nga gu ni rengbe kadu ni wene badiarogatise foro? Ho adunga ani ni na rengba ka gbiatirani rogo ba sa ya, ani rengbe ka ino kura aboro nzunzu ti gu regbo ani andu tipa agu adunguratise nga ga dungurati, bakere adunguratise gbiati gu kura asungo.

Wa vura duhe nga agi adunguratise re amanganga te mbiko gu ririkaza nga Korona, ani namangasunge amanga na agu ũsunge nga ga erekturoni tipa kadu pati gaani adunguratise nga gu ba du amamu rogoho tipa ka gbia gu kura aDezire Yekova nga aguyo ata manga nga rogatise ya. Mo ima rengba ka bi wai i afu gayo akaragapai pati adunguratise na kini degeturo kuti wai i afura tipa gayo idapase. (1 Tim. 6:11, 12) Oni ima rengba ka fura dagbaroni tingbafuo dunguratise rogo gu bangiriba nga breakout room nga gu du kina rogo Internet. Ti regbo agu adunguratise nga ga wasa na gu kura aDezire Yekova rogo erekturoni, mo ima rengba ka bi wai gu boro re afura na kura aboro, na gere rengbe ka yugo ndikidi asino ni. (1 Pet. 3:4) Kusa, wa oni nika inido tironi na gu boro re, oni ima rengba ka bihe singia gaoni asasa na nyemuapai kina sa, na singia si rẽarẽ tipa oni mangi rogatise.

Ho agu aboro ata manganga rogatise ni ya amangasunge ni na agu abangua rengo nga ga Baibiri tipa si undo yo ho i gbata badiarogatise ni, i na rengba ka gbia ngbarago rogo gayo ramukporo. Si wakina gupai Asanza apehe nga gu naya: “Gu boro di de, ni bi wenepai, ni ngba bangiri Yekova a.”—Snz. 18:22.