1. Gini maapai rengbe gu toro nga ga abaangirã kadu na ni kurii aboro?

ROGO zegino areme, dungu aboro du na gbangbati tiyo nga gu naye mbiko gu sino nga ga abaangirã. Ni kpiapai, babagiahe ima rengba ka ida kadu na diabese kisusi gu kura ababagiahe, na ni ima rengba ka manga gupai rengbe kadu na gbegberẽ sangbanaha kurii gu kura aboro. Bangikandi ima rengba ki ta ino aino kini igirãsi kura bangikandi rogo gu kura riigbu tipa gupai nga gani riigbu du na diabese ti regbo abaangirã. Gude sukuru ima rengba ka dĩ pai ti regbo asada wa ka ni rẽ tipa ka rimo gu yunivasiti rimoho naima wo gbe. Wa du ani ni aKristano, ani ima ino gupai nga agi apai re ni irairaha; na si nga papara “agu apai borose amanga.” (Gara. 5:19-21) Ono tie, ya mo gu kura ga Yekova amoyambu ima rengba ka sonosa gu sino nga ga abaangirã rogo dungurati zanga i inihe? Gi sanahe re na nyanyakipa ha bambiko gu toro nga ga abaangirã ima rengba kadu na bakere maapai kuri gu kodatise nga ga dungurati.

2. Giniapai ani nika sakapai tipaha rogo gi kekeapai re?

² Rogo gi kekeapai re, ani nika sakapai tipa gu gbegberẽ asino rengbe ka sa rani ani sonosi gu sino nga ga abaangirã dagbatirani na awirinarani. Ani nika sakapai a tipa agu akpiapai nga ga gu ruru akumba na adee nga aguyo naadu tigu regbo i ake Ziazia Kekeapai ti ni nga aguyo naambunga tiyo gu toro nga ga abaangirã du na maapai kuriyo ya. Ni bambataha, ani sakingopai tipa wai rengbe ani ka wisigo gaani ndu mangaapai.

3. Gini asanahe si aida ani sana tirani na ni?

³ Ti kura aregbo, si ni wene bẽrapai ka wisigo ndu gupai ani amanga apai ti ni. Ani ima rengba ka sana tirani nga: ‘Ya mo mi naaringbisa bakio agu apai mi amangaha niringbisa mi tire na  kura aboro? Ya mo mi naamangasunge rogo dungurati mbiko gupai nga mi naida aboro bi re nga mi ini mangasunge wenengai kisusi watadu mi pa re nakii kisusi pa gu kura aboro? Watadu ya mo mi namangasunge nyanyaki mbiko mi naida kasa ngbarago ti Yekova?’ Tipagine si aida ani sana agi asanahe re ti ni? Oni bingo gupai Fugo Mbori apehe.

4. Tipagine du si aida ani ne gu sino ti ni nga ga ringbisa tirani na kura aboro, a wa pe yo ho rogo AGaratio 6:3, 4?

⁴ Ziazia Kekeapai nazarani nga ka ani naaringbisa nga tirani na kura aboro ya. (Oni gedi AGaratio 6:3, 4.) Tipagine? Ndupai sa nga, ka ani aabẽraha nga ani namanga apai kisusi gu kura aboro, si rengbe ka sarani ani du na rukö. Ono ka ani aabẽra gupai nga awirinarani namangapai kisusi rani, ani ima rengba kadu na gberãrago. Agu abẽrapai ue re dunduko ni ruruhe te. (Rom. 12:3) Wirina du rimori nga Katerina, * nga guri naraka ringara aGiriki yo aya: “Mi anaaringbisa tire na agu aboro mi anabihe nga i ngba kisusi re, kidu na dungu abirĩ nga ga tungusapai, na kidu wenengai rogo zio abakure yo. Na nisangbana gipai re, mi aabi tire nga sunge tire te.” Ani tingidi gupai nga, Yekova agberani koyo du ko ni, angianga mbiko gupai nga ani ni bawene rani, ani ima ino ka fura wenengai, watadu dungu aboro ima kpinyemurani ya, ono ko agberani koyo du ko ni mbiko gupai nga ani ima ida ka kpinyemu ko na ka degaturani fu Wiriko.—Yo. 6:44; 1 Kor. 1:26-31.

5. Ginipai mo awirikaha ti gu kpiapai nga ga gu wirina du rimoko nga Hyun?

⁵ Gu kura sanahe rengbe ani ka sana tirani na ni nga, ‘Ya mo awirina ninaabire ni gu boro ninaamanga zereda na kura aboro, watadu i naabire ni gu boro nidu dedede na zanga giatise na kura aboro?’ Oni bingo gu kpiapai nga ga Hyun, nga gu wirina naraka South Korea yo. Ti gu kura regbo sa, ko anaabi kura aboro naadu na amamu beyo wa avurako. Ko aya, “Mi adu na iraira bipai tipa agi awirina re, na dedede, mi anaidanga kuti agu apai i anaagumba ha te.” Sangbana gipai re angia gine? Ko aya, “Gu sino mi adu na ni re aima ye na kparakaro ku rogo dungurati.” Gu kura abakurea Hyun aundo ko ko rugutiko na gako kpakarapai. Hyun amangi agu aˈariapai si aaida ko mangihe na areme, ko nga bawene bakumba rogo dungurati. Ka ani bi gupai rogorani yo nga ani na gu sino nga ga sonosa abaangirã rogo dungurati kuba gupai nga ka sonosa zereda, si naida ani mangipai tipaha.

6. Ringbisihe kuti AGaratio 5:26, gini gbegberẽ asino du na kusa gu toro nga ga abaangirã?

⁶ Oni gedi AGaratio 5:26, NW. Gini gbegberẽ asino rengbe ka kusa gu toro nga ga abaangirã? Gu sa nga kiisopatise. Gu boro nakiisopatini ni nga irarukö na ni nga boro gbangbati. Gu kura gbegberẽ sino berewe nga kpihe. Anga gu boro du na kpihe naida kina guhe sa du be kura boro te, ono ni naida ka dia guhe adia a du be gu boro re. Sidu, gu boro na kpi kurani ima soga ni nirengo. Ni rengo, si naida ani banda tirani ti gu gbegberẽ asino re na ki ne ti ni tuturũ!

7. Gini kpiapai nayugopa wai du rukö gbiati kpihe ni gbegberẽhe?

⁷ I rengbe ka ringbisapa gu gbegberẽ asino nga kiisopatise na kpihe kuti angbari nga agu ra nari riibambu yo. Ka gu bambu re vura ngbaangba wai vuru, ono ka angbari ta rihe kindi, si ima rengba ka ti. Wakina gure a, boro ima rengba ka iriso Yekova tipa gbanga regbo. Ono ka ni du na kiisopatise watadu kpihe, ni ima rengba ka ti. (Snz. 16:18) Ni rengbe ka mbu iriso Yekova na ki ye na gbegberẽpai kuti tini na kuti kura aboro. Ono waigu tie rengbe ani ka ne gu sino nga ga kiisopatise gbiati kpihe?

8. Waigu rengbe ani ka sovura kuti kiisopatise?

 ⁸ Ani rengbe ka sovura kuti gu sino nga ga kiisopatise nimanga ani pai kuti gu rugute gu mokedi nangia Pauro afuhe fu aFiripoio nga gu naya: “Ka oni mángi nga pai na vura na ruka wa sa ya, ono gu ni bérẽ pa kura ni rogo umbasi gani berã ya ni ngba susi ni.” (Frp. 2:3) Ka ani aabi kura aboro nga i kiipayo kisusi rani, si nika sarani ka ani mangingo abaangirã na agu aboro kii gayo inohe watadu gayo tandu mangaapai kisusi gaani ya. Kuba gure, ani nika du na ngbarago tipa yo. Gipai re ima rengba kadu wo nirengo ka si du nga i namangasunge na gayo tandu mangaapai rogo ga Yekova sunge yo tipa ka fu taarimo fuko. Na ka si dunga gu wirina nga kumba watadu dee nga gu ni du na tandu mangaapai tini namangasunge kuti gu rugute Pauro afuhe, ni ima rengba ka bi gu wene asino a du tirani. Na ni sangbanaha, ani dunduko nikaa sonosa zereda gbiati kodatise rogo dungurati.

9. Waigu rengbe ani ka ne gu sino nga ga kpi awirinarani?

⁹ Ani rengbe ka bandatirani ti kpi wirinarani ka ani tingidi gupai nga, gu kura apai kinaho adunga ani na rengba ka mangaha wenengai ya. Ka ani du na umbasitise, ani atonanga kaa yugoho nga ani kiipa rani kisusi pa gu kura aboro te. Kuba gure, ani nika ngera tipa gupai rengbe ani ka wirikaha be agu aboro du na bakere inohe kisusi gu du ani na ni. Ni kpiapai, ka si dunga wirina rogo dungurati namanga bawene agumbapai, ani ima rengba ka sana ni tipa wai ninaambakada gani agumbapai. Ka si du nga wirina ni dee nga wene namangi riahe, ani ima rengba ka sana ri tipa bete abẽrapai nga gu rengbe ka undo rani tipa ani du ni wene amangi riahe. Na ka si du nga si ni taataha fu paranga wirina tipa ni zi abakure te, ni ima rengba ka sana gu boro du wenengai rogo zio abakure yo tipa rugute. Ho ani amanga agi apai re ni, ani adunga na gu sino nga ga kpihe te na ani nika mbakada gaani birĩ mangaapai.

10. Gini kpakarapai Gidiona agbia tiko na ni?

¹⁰ Oni berẽngapa gupai naamangi dagba Gidiona nga guko naadu rogo gu ngbatunga nga ga Manase na aboro Efuraima. Yekova aundo Gidiona na gako akumba 300 tipa i dibe vura, i aima rengba kadu na bakere rukö mbiko gipai re. Aboro Efuraima agbia Gidiona, ono angianga  ka tambua ko ya ono ka paa na ko. Si nangera wa ngbaduyo aaima aima bambiko Gidiona aayamba nga yo tipa i koditiyo na ko tipa ka sovura kuti avura Mbori ti tonatonaha te. I aabakabangiriyo kina tipa gupai nga aboro naabi gayo ngbatunga na irisa ono bangiriyo ki go ti gupai paha anyaki gbe nga—Gidiona aundo ka ye na taarimo kuti rimo Yekova na ki banda Gako aboro.—Abasa. 8:1.

11. Waigu Gidiona akaragapai fu aboro Efuraima?

¹¹ Gidiona agumba gupai ni umbasitise fu aboro Efuraima nga: “Ginipai mangi mi ringbisihe na gaoni?” Na ko ki tingidi yo na pagu bakere apai Yekova aundo yo i mangihe. Ho agi akumba nga aboro Efuraima agi gipai re ni, “gayo zinga kuti ko ki zeredi.” (Abasa. 8:2, 3) Gidiona aima asada kadu na umbasitise tipa ka banda zereda dagba ga Mbori aboro.

12. Ginipai ani awirikaha tigu kpiapai nga ga aboro Efuraima na gu nga ga Gidiona?

¹² Ginipai rengbe ani ka wirikaha ti gi pangbanga re? Gupai ani awirikaha ti gu kpiapai nga ga aboro Efuraima nga, si aidanga ani namaabẽra rani gbe kuti ye na taarimo kina futirani te, ono ani naabẽra gbe tipa ye na taarimo fu Yekova. Abariikporo na abaakumba ima rengba ka wirikapai be Gidiona. Ka si ngia rago gberẽ ti boro na gupai ani namangihe, si naida ani asadi ka ino ndu gupai rago na gberẽ ti ni tigu boro re. Ani ima rengba ka tambua gu boro re a tipa gu weneapai ni namangi he. Si naida ani du na umbasitise tipa ka manga gipai re, gbe ka si du nga, gu boro re du mangi ingahe. Gupai nyakipaha gbe nga, kadu na wene pagume dagbarani na awirinarani angianga ka asada ka yugo gupai nga gaani pai ru ya.

13. Gini kpakarapai Ana agbiatiri na ni, na waigu ri adibe he?

¹³ Oni berẽngapa gu kpiapai a nga ga Ana. Ri adi boro Revi rimoko angia Erikana, ko aima kpinyemuri ni bakerehe. Ono gu kura dia Erikana adu kinaho rimori angia Penina. Erikana aima kpinyemu Ana nikerehe kisusi wai ko akpinyemu Penina; ono tie, “Penina nadu na agude be ri, ono agude adu nga be Ana te.” Mbiko gipai re, Penina aanafuda Ana tipa gupai nga ka sa ri ‘ri naarungo gbe.’ Waigu Ana amangipai kuti gipai re? Rago aima gberã tiri ni bakerehe! ‘Si du Ana anaakpara ti ni, ka ri ari nga he ya.’ (1 Sam. 1:2, 6, 7) Ono Ziazia Kekeapai apenga gupai nga Ana aˈasadi ka irobape ti Penina ngba kura agene te. Kuba gure, ri auka kpotori yo fu Yekova na kidu na gu kido nga ko nika rugusa gene apai arugusa. Ya mo gu bipai Penina adu na ni kuti Ana aˈariatihe? Ziazia Kekeapai apengaha wo te. Ono gupai ini anihe nga, Ana agbia gari zereda nga ga kpotose yo na ki banda ha. “Ka kpakpuri adu nga na rungo berewe ya.”—1 Sam. 1:10, 18.

14. Ginipai ani awirikaha tigu kpiapai nga ga Ana?

¹⁴ Ginipai rengbe ani ka wirikaha ti ga Ana kpiapai? Ka si du nga boro naida ka manga abaangirã na mo ngba kura agene, mo tingidi gupai nga, mo ima rengba ka aria gupai re ka si  dunga ni abaangirã ya. Si aidanga mo mbu patiro na ki rimisi tiro ku rogo abaangira yo te. Kuba gupai nga ka karaga gbegberẽpai kuba gbegberẽpai, mo asadi ka manga zereda dagbaro na gu boro re. (Rom. 12:17-21) Ka ni aavuranga manga ariapai ya, mo nika duadu na zereda kpotoroyo gbiati ngbarago.

15. Waigu Aporo na Pauro adu kina sa?

¹⁵ Ni yangaraha, ani bingo gu pai rengbe ani ka wirikaha ti agu akpiapai nga ga gu bawiriki nangia Aporo na gu mokedi nangia Pauro. Agi akumba re ue dunduko aima du na bakere inohe rogo Ziazia Kekeapai yo. I dunduko ue badungu aboro aima ino yo na i kidu a ni bawene abayugupai. Na i dunduko ue aima undo tipa ka sa badungu aboro ni abawiriki. Ono i aadunga na kpihe dagbatiyo te.

16. Gini ngbatunga boro nangia Aporo?

¹⁶ I avungu Aporo Aresanduria yo,’ nangia gu ba aboro anaandu ku rogoho rogo bambata sa kama agarã tipa wirikapai. Ko angia wene bagumbapai na ‘ko aima ino pa Ziazia Kekeapai nyanyaki.’ (Amo. 18:24) Ho Aporo aamangasunge ni Korinda yo, gu kura awirina rogo dungurati aima yugo gupai nga i aima kpinyemu ko nikerehe susi gu kura awirina, kodihe na Pauro. (1 Kor. 1:12, 13) Ya mo Aporo du nasonosi gu sino nga ga kparakaro re? Ani arengbanga ka bẽra gupai nga ko amangipai wa gure te. Fuo Aporo guari Korinda yo tipa bete regbo, Pauro azungodi ko ko karagatiko koyo. (1 Kor. 16:12) Ka si adu nga Pauro abihe nga Aporo naye na kparakaro ku rogo dungurati, ka Pauro asana nga ko ko karaga tiko koyo te. Si tie ziazia nga, Aporo amangisunge na gako tandu mangaapai ngba wene gene—ka takapande wene pangbanga na ka ngarasa awirinako. Ani ima rengba a kadu na gu kido nga Aporo angia boro umbasitise. Ni kpiapai, Ziazia Kekeapai apenga gupai nga rago agberẽ tiko ho aAkuira na Puriseka ‘ayugu pa ga Mbori gene fu ko ni wenengaĩ’ te.—Amo. 18:24-28.

17. Waidu Pauro asonosi zereda?

 ¹⁷ Pauro aima inopa gu wene sunge nga gu Aporo amangihe. Ono Pauro aabakanga bangiriko nga aboro nika berãha nga pa Aporo kii kisusi pa ko te. Ho ani ageda agu apai ni nga gu Pauro akehe fu gu dungurati naadu Korinda yo, ani nabihe abi nzunzu nga Pauro aima du na umbasitise na kidu ni gu boro naanagia rogopai yo agia. Rago anaangbanga tiko ho aboro aanaya ni wẽ, “Mi nga ga Pauro ko” te. Kuba gure, ko anaagbeberã aboro dunduko kina kuti Yekova Mbori na kuti Yesu Kristo.—1 Kor. 3:3-6.

18. Ringbisihe kuti 1 AKorindo 4:6, 7, ginipai ani awirikaha ti agu akpiapai nga ga Aporo na Pauro?

¹⁸ Gini apai rengbe ani ka wirikaha ti agu akpiapai nga ga Aporo na Pauro? Ani ima rengba ka mangasunge nyanyaki fu Yekova na ani ima rengba ka undo badungu aboro i mangi sonakumbatayo kida ti zio bapatiza. Ono ani natingida gupai nga ai gu diabese du ani na ni si mbiko ga Yekova maku. Gupai ani awirikaha tigu kpiapai nga ga Aporo na Pauro nga—ka ani du na badungu asunge berani rogo dungurati, ani ima rengba ka sonosa zereda rogo dungurati. Ani nadu na bakere tambuahe ho abaakumba na amaundo abaakumba aundo rani ni tipa anidu ni kodikodi rani na kidu na zereda dagbarani na akuarani. I namanga gipai re ho i amaamburu agu arugute dunduko i afuhe furani ni rii Ziazia Kekeapai, i aidanga kadu na kikipayo rogo dungurati te ono i naundo aboro dunduko rogo dungurati tipa i gisangba Yesu na kini pekefuo gako kpiapai!—Oni gedi 1 AKorindo 4:6, 7.

19. Ginipai rengbe ani ni basasa dunduko ka manga ha? (Oni bi gu sanduki nga “ Oni Ne Sonosa gu Sino Nga ga Abaangirã.”)

¹⁹ Ani dunduko du na tandu mangaapai tirani. Ani ima rengba ka mangasunge na gaani tandu mangaapai ka ‘mangapa akuarani na ni.’ (1 Pet. 4:10) Ani ima rengba kaa bẽra gupai nga gupai ani amangaha paha anyaka nga te. Ono si naida ani tingidi gupai nga, rukutu wiri agire ninaazio bawene roko sidu ni gbiagbiaha, sidu, ai gupai rengbe mo ka mangaha na undo dungurati dunduko si du na kodatise. Ani dunduko manginga ome amanga ka dia ai gu sino kusayo nga ga abaangirã nga gu kadu rogorani yo. Ani dinga bẽra adia tipa ka manga agu apai dunduko rengbe ani ka mangaha tipa ka sonosa zereda gbiati kodatise rogo dungurati.—Eph. 4:3.