1-2. Waigu agu afugo Yekova du rogo Yesaya 65:16, 17 angarasa rani ani naahipai kindi?

“KA OMERONI BATINGO YA!” si nangia gu bawene riipai nangia ga gu bakere dunguratise naadu rogo 2017. Gu bakere dunguratise re ayugu wai furani rengbe ani ka hi gaani akpakarapai. Agarã ima susa biama wa ani amangi gi bakere dunguratise re, na ani nandu kindi kumbatayo kaa hipai rogo gi gbegberẽ zegino re.

² Gini akpakarapai mo nagbia tiro na ni barambeda? Ya mo boro sa dagba gamo aborokporo yo watadu dagba wene abakureamo yo kpi? Ya mo mo na kere kaza tiro? Ya mo raka nikere kpakarakpakaraha foro mbiko mo ima gbinza? Ya mo mo nambu be gu gberãngo naye nisangbana gu mangaapai nga ga ome zegino, zuu, watadu rungosiro? Watadu ya mo mo nambu be agu apai kaza aye na ni, wa gu kaza nga Korona? Ani nangera kumbatayo tipa gu regbo, agi akpakarapai re dunduko nika go ti ni —bangirani ki go ti ni na ka si amanganga berewe ya!—Oni gedi Yesaya 65:16, 17.

3. Ginipai si aida ani mangihe awere, na tipagine?

³ Raka ima kpakara rogo gi zegino re, na ani ima rengba ka hi kere kpakarakpakaraapai kisusi kumbatayo. (Mt. 24:21) Si tie ziazia nga, si naida ani naandu kindi kumbatayo kaa hipai ni bakerehe. Tipagine? Bambiko Yesu aya: “Rogo gaoni hipai oni abátasa ungaroni abatasa.” (Rk. 21:19) Pa berã ani kuriipa wai kura aboro ahi agu akpakarapai du wa kina gaani na kidu na diabese ima rengba ka ngarasa rani ani hipai.

4. Tipagine rengbe ani ka ya ti ni Yekova nga gu bawene kpiapai kisusi nga ga du na hipai?

⁴ Da nga gu bawene kpiapai kisusi nga ga du na hipai? Yekova Mbori. Ya mo kina ngbaro zere be gu karagapai re? Isoke ngbaro ima zera, ono ka mo berẽkuriihe, ngbaro zerenga te. Gi zegino re ni zogozogoho kutiibe Bakitingbanga, na si ima hi be badungu akpakarapai. Yekova na kina ome beko tipa ka gbarasa gi zegino re awere, ono ko napido gu regbo du kumbatayo tipa ka  manga gipai re. (Rom. 9:22) Wa du rago re, gaani Mbori nandu kindi kumbatayo kaa hipai da kinaho gu ringbisiringbisi regbo re nika da ni. Ani bingo apai ribua nga gu Yekova ahihe.

5. Waigu i naye na gbarasarimo kuti rimo Mbori, na gipai re nasa ro mo du wai?

⁵ Gu gbarasarimo i aye na ni kuti rimoko. Yekova ima kpinyemu rimoko, na ko naida aboro dunduko nairisaho a. (Yes. 42:8) Tipa agarã wa sita akutu awere, i aima digo niye na gbarasarimo kuti rimoko. (Tam. 74:10, 18, 23) Gipai re atona ati Edene yo ho Bakitingbanga (du rogoyo nga “bape ziree”) akitingbanga Mbori ni nga ko naká na guhe be aAdamu na Eva nga gu si aaidaha tipa i du na ngbarago. (Bam. P. 3:1-5) Naatona ti gu regbo re da ku awere, i naakitangbanga Yekova ni ziree nga ko naká na agu ahe be aboro i aidaha nzunzu. Yesu aabakabangiriko abaka tipa gu gbarasarimo naaye kuti rimo Bako. Mbiko gu ndupai re, ko ayugupai fu gako abawiriki nga i naakpara wa gere: “Barani du ngbangbaturũ yo, Ani írisi rimoro airisa.”—Mt. 6:9.

6. Tipagine Yekova nambu bakere regbo ti ni si susi mbata fu ko yugu gupai nga ko du na rengo beko ka zogarago ngbangbaturũ yo na ku auru kpotosende?

⁶ Gu sogote du kuti gako bakere pagbia. Kina Yekova sa du na gu rengo beko nga ga zogarago ngbangbaturũ yo na ku auru kpotosende, na gako gene zogarago ngba kisusi. (Yugo. 4:11) Ono Bakitingbanga aˈasadi ka nanga amaraika gbiati wiri aboro i berẽ gupai nga, Mbori na gu rengo re beko te. Si aaida si di regbo adia tipa si yugu gupai nga Yekova du na rengo beko ka zogarago na ko nga bawene bazogo kisusi. Si ni patatamana nga, Mbori ima mbu wiri aboro i zogorago tipa gbanga regbo tipa i bihe nitiyo nga i arengbanga ka zoga tiyo nitiyo kidu na diabese te ka i adeganga tuyo fu Bakusiyo ya. (Yere. 10:23) Ni sangbana ga Mbori hipai, i nika nyasa riipa gipai re bara sa kindi. Mbiko gupai nga Mbori aima digo nihipai, boro ho nika du na kapa nga Mbori du na rengo beko ka zogarago ngbangbaturũ yo na ku auru kpotosende te. Aboro dunduko nika ino gupai nga ga Yekova gene zogarago ngba kisusi na kina gako Kindo sa nika ye na ndikidi zereda gbiati ngbabase ku auru kpotosende.

7. Ada samungu kuti Yekova, na ginipai ko nika mangaha tipa yo?

⁷ Gu samungu nga ga kura awiriko. Yekova akusi amaraika gbiati agu awiriko nga wiri aboro ni rengberengbe yo zanga wiri ingapai. Ono tie, gu maraika nga Satana asamungu kuti Yekova na ko ki zomia gu rengberengbe aboro nangia aAdamu na Eva tipa i samungu kuti Yekova a. Gu kura amaraika gbiati aboro akoditiyo a ku rogo gu samungu re. (Yuda 6) Na zavura kusa, kura aboro dagba gu rikaaboro yo nangia aYisaraere nangia ga Mbori siasia aboro aká ko na ki satiyo kaa iriso ziree ambori. (Yes. 63:8, 10) Yekova abihe nga i ima samungu kutiko. Ono ko ima hipai, na ko nikaa ndu kindi kumbatayo kaa hipai da kinaho ko nika gbarasa agu abasamungu re ni dunduko kusayo. Fuo gure, Yekova na agu aboro du ni ruruyo fuko nika du na ngbarago mbiko gu gbegberẽ apai i ahihe rogo gi sino raka re adunga berewe te!

8-9. Gini aziree i agumbaha tipa Yekova na wai du ani amangapai tipaha?

⁸ Ga Bakitingbanga aziree. Satana akitingbanga Eyobo gbiati kura ruru airisi Yekova dunduko nga, i nairiso Mbori mbiko kina gu undo i agbiaha beko. (Eyo. 1:8-11; 2:3-5) Bakitingbanga nandu kindi kumbatayo kaa kitangbanga aboro da ku areme. (Yugo. 12:10) Ani ima rengba ka undo ka yugo gupai nga Satana nagumba ziree nihi ani gaani aˈasada na ki nye niruru rani fu Yekova mbiko ani ima kpinyemuko. Yekova aima fu mosoro fu Eyobo na ko nika fu mosoro afu furani a ka ani hipai.—Yak. 5:11.

 ⁹ Satana namangasunge na abarumbatayo rogo ziree pambori tipa ka pe gupai nga, Yekova nga kere gbegberẽ boro na ko du nasa aboro i naarungo. Na zavura agu akurayo nape gupai nga, ho agude akpi ni, Mbori du nadia yo mbiko ko naida badungu amaraika ngbangbaturũ yo. Gipai re ima du ni kere zanga pa irisa fu Mbori! Ani ima ino gupai nga, Yekova nga gu Baagude nga boro nyemuse. Ho kere kaza azio rani ni watadu ho gaani boro akpi ni, ani abiranga Mbori te. Kuba gure, ani na kido nga uru nika duadu ho sa ko nika husa agu aboro du na kaza, na ki zingisi agu aboro kpiki. Ani ima rengba ka gumba gupai fu agu aboro dunduko rengbe ka degatuyo nga, Yekova nga Mbori nyemuse. Si nika sa Yekova ko karagapai fu gu boro nasoapai kuti ko.—Snz. 27:11.

10. Ginipai Atambuahe 22:23, 24 ayugoho tipa Yekova?

¹⁰ Gu rungo nga ga gako amoyambu du na nyanyakipa yo fuko. Yekova nga Mbori nunga. Ko na bakere gberãrago ho ko abi rani ni ani nirungo, singia be rungosiro, kaza, watadu gaani azangarengba. (Oni gedi Atambuahe 22:23, 24.) Yekova ima rugatiko na pa gaani arungo; ko naida aida ka diaha kusayo, na ko nika diaha adia kusayo. (Oni ringbisinga ha na Gate 3:7, 8; Yesaya 63:9.) Regbo nika daada ho ko nika ‘wéga aume ni ti bangiri rani kusayo dunduko. Kpio adú nga berewe te, rungo adú nga na akpe na ima a te.’—Yugo. 21:4.

11. Ga Yekova bipai nga gine tipa gu gako ruru amoyambu kpiki?

¹¹ Zingo tipa agu abakureako kpiki. Ga Yekova bipai nga gine tipa gu ruru akumba na adee kpiki? Ko na bakere nyemu ka biyo berewe! (Eyo. 14:15) Mo berẽnga pa wai du Yekova na nyemu ka bi bakureako nga Abarayama berewe! (Yak. 2:23) Watadu mo berẽnga pa wai du Yekova na nyemu ka fura na Moize berewe, nga gu ko ko anaafura na ko “kina ku bangiriko”! (Gate 33:11) Na ko nangera kumbatayo tipa ka gia fugo Davide gbiati kura abake papara  Atambuahe i nibi gayo abia tambuahe! (Tam. 104:33) Wa vura duhe nga agi abakurea Mbori re aima kpiko, bangiri Yekova agonga tiyo te. (Yes. 49:15) Ko natingidapa agu apai dunduko du tipa yo na gayo asino. Ziazia Kekeapai nagumba gupai nga, “bangiri ko aboro dunduko du ni unga yo.” (Rk. 20:38) Uru nika duadu ho ko nika zingisayo be kpio na ki degetuko berewe kuti gayo wene akparakpee na ki idi na gayo iriso. Ka singia gamo boro kpi, agi aberãpai re ima rengba ka fu wasa foro.

12. Ginipai nafu bakere gberãrago fu Yekova ti gi gbegberẽ yangara arame re?

¹² Gbegberẽ aboro naimisa kura aboro. Ho samungu atona ni ati Edene yo, Yekova aima ino gupai nga, apai nika gberã kisusi mbata fu apai ngba. Yekova ima soga gbegberẽ apai, iraira sarangbanga, gbiati gu zuu namanga areme rogo zegino. Yekova ti aregbo dunduko ni naaberãpa agu aboro ni bakerehe adunga gene be yo ya—ni kpiapai agu aboro du ni rurungbura yo na arengbanga ka bandatiyo ya, wa awirinyaure na adekurugbo. (Zek. 7:9, 10) Yekova na bakere gberãrago gbe ho ko abi gako ruru amoyambu ni i nirungosi yo na kini ba yo ku bambukiso yo. Oni du na gu kido nga, ko ima kpinyemu agu aboro dunduko nahipai wa sa na ko.

13. Gini wasiwasi mangaapai Mbori abihe dagba aboro na ginipai ko nika mangaha tipaha?

¹³ Aboro nandu kina kumbatayo namanga wasiwasi kodaba. I akusi awiri aboro i naawirika Mbori, ono Satana nakpinyemu gupai nga, i naamanga wasiwasi apai. Ho Mbori abi gupai ni nga “ga aboro gbegberẽpai adu ni bakere he gbe” ti rago Noa, “Yekova ki birĩ tiko wa ko afu aboro ku auru kpotosende, ngbaduko ki niimi aima.” (Bam. P. 6:5, 6, 11) Natona tigu regbo re, ya mo apai ariatihe wenengai rogo zegino? Wa gu sa te! Bakitingbanga na bakere ngbarago ka bi gupai nga, wasiwasi kodaba ngba arikoho dunduko ima maapai ni bakerehe, kodihe na wasiwasi kodaba dagba kumba na dee, kumba na kumba, gbiati dee na dee! (Ef. 4:18, 19) Satana nadu na ngbarago gbe ho agu aboro nairiso Yekova amanga kere ingaapai ni. Ho ga Yekova hipai nika digo ni, ko nika yugo gupai nga ko ima soga wasiwasi mangaapai ni dia ko agu aboro dunduko kusayo namanga wasiwasi mangaapai nga aguyo ká ka saberã yo.

14. Ginipai wiri aboro amangaha na kpotosende gbiati anya?

¹⁴ Awiri aboro nagbarasa gu kpotosende Mbori ambakadihe. Anga padu boro ‘ni gbia ku ri kura ni ka imisa ni’ nga gupai sa aboro amangaha te, ono aboro angeranga fuo gu kpotosende na anya Yekova asanayo tipa i namangaha wo te. (Batu. 8:9; Bam. P. 1:28) Gu kura aboro birĩ-inohe nape gupai nga, mbiko wai aboro amangapai, fuo bete agarã kumbatayo, anya watadu kurukuru ahe wa mirioni sa ima rengba ka zanga du ti ni. Si tie taata ani rugutirani na ndu gupai aboro abakabangiriyo ti ni tipa kpotosende na agu ahe du rogoho! Ani na tambuahe nga, Yekova ima kidohe ka “gbarasa agu yo nagbarasa kpotosende” na ki sa kpotosende ni paradizo.—Yugo. 11:18; Yes. 35:1.

15-16. Ginipai si aida si sarani ani hipai wa Yekova? Oni funga kpiapai tipa gipai re.

¹⁵ Mo berẽnga pa agu akpakarapai dunduko gu Barani du ngbangbaturũ yo ninaahihe tipa akutu agarã. (Oni bi gu sanduki nga, “ Agu Apai Yekova Ahihe.”) Yekova ima rengba ka digiso gi gbegberẽ sino raka re ti ai regbo. Ono gako hipai ima undo rani ni bakerehe gbe! Oni berẽnga kurii gi kpiapai re. Ani yanga i gumba gupai fu kumba na diako nga, wiriyo du vuseyo kindi na kere akpakarapai nga ga kpotose na ho i nika vunga ru ni, raka ru nika du ni kere kpakarakpakaraha na u ki kpi ni tooni ru. Ono fuo vungayo gu gude re, avunguru na ngbarago si ki vura du vurũ nga si nika duadu ni kere  kpakarakpakaraha ka ngerafuo ru. Mbiko gupai nga i ima kpinyemu wiriyo, i nika hi ai kpakarapai tipa gupai nga ka ngerafuo wiriyo wa rengbe omeyo na ni na tipa u raki wene raka.

¹⁶ Wakina gure a, atita aAdamu na Eva dunduko nga kpakpa aboro ho i avungayo ni. Ono wa vura duhe wo, Yekova ima kpinyemu yo na ko nangera angerafuo yo. (1 Yo. 4:19) Yekova wa agu avunguagude du payo rogo gaani kpiapai te, Yekova ima rengba ka nyasa riipa agu arungo nga ga awiriko. Ko ima sia gu regbo ko nika nyasa riipa agu arungo dunduko nga ga wiri aboro ti ni. (Mt. 24:36) Si naida ga Yekova nyemuse sarani ani hipai ni gbangaha wa rẽhe.

17. Tipagine agu apai i nape paha tipa Yesu rogo 1 Petero 2:21-24 angarasa rani ti ni ani hipai?

¹⁷ Yekova nga bawene kpiapai nga ga du na hipai. Yesu awiriki ga Bako hipai. Ho Yesu adu ni auru kpotosende, ko ahi gbegberẽ afugo, zee, na pa imo yo ko ti ngbunduru ngua rungosi tipa rani. (Oni gedi 1 Petero 2:21-24.) Zanga kapa, ga Yekova kpiapai nga ga hipai aima fu ome fu Yesu ko hipai. Si ima rengba ka fu ome furani a.

18. Waigu 2 Petero 3:9 aundo rani ani rugu tirani na gupai mangi mbiko ga Yekova hipai?

¹⁸ Oni gedi 2 Petero 3:9. Yekova ima ino gu bawene regbo ngba kisusi tipa ka digiso gi gbegberẽ zegino re ti ni. Mbiko gupai nga ko nahipai, badungu aboro na rengba ka ino ko, na awere, badungu rimbasa amirioni aboro na rengba ka irisoko. I dunduko du na bakere ngbarago tipa ka ino gupai nga, Yekova ima hipai ni gbangaha tipa i vunguyo, i wiriki wai ka kpinyemu ko, na ki kparatiyo fuko. Ho amirioni aboro nika hipai ni ki da ti digidoho, si nika yugoho ayugo ziazia nga wene diaberã du Yekova amangihe tipa ka hipai!

19. Ginipai si aida ani diberã ka mangaha na gaani mosoro nika ngia gine?

¹⁹ Ani nawirika wai be Yekova rengbe ani ka hipai na ngbarago. Wa Satana navura ye vurũ na gberãrago gbiati arungo, Yekova kindi nga “betedi Mbori” watadu Mbori ngbarago. (1 Tim. 1:11) Ani ima rengba ka nye na ngbarago a wa ani ahipai kini pidi Yekova ko ziasi rimoko, ko di gbarasarimo kusayo ti gako bakere pagbia, ki nyasi gbegberẽ apai dunduko na ki nyasi agu akpakarapai dunduko ani agbiatirani na ni areme. Ani dinga berã adia kaa hipai na kini gbia wasa ti ino ani gupai nga, gu Barani du ngbangbaturũ yo na hipai ahi a. Ka ani mangihe wo, agi afugo du re nika du ni rengo furani: “Maku [ngbarago] du fu gu boro naru nyanyaki rogo asada, bambiko ho i ka bi gani pai ni si rengbe, i afu gu kpakpari unga fu ni, Gbia akido he tipa ha fu agu yo nakpi nyemu ko.”—Yak. 1:12.