1. Ginipai i ayuguhe foro tipa Bakusirani?

KA SINGIA i asonosi ro ni boro sa dagba aDezire Yekova yo, si nawira gupai nga mo aima wirikapai tipa Yekova mbu ro kindi ni tooni gude. I aima yugo gupai foro nga, ko nga Bakusiahe, ko na bawene asino tiko, na ko naida ka sa kpotosende ni paradizo.—Bam. P. 1:1; Amo. 17:24-27.

2. Waigu kura aboro abi agu aboro idi kuti Bakusiahe?

² Ono tie, badungu aboro aidanga kuti gupai nga Mbori kina ti ni watadu ko nakusi ahe dunduko te. Kuba gure, i idi kuti gupai nga, raka aenge nisaha, na si atona ka sona yeeye ti taata rakirakiahe kuti kpakarakpakara rakirakiahe. Kura agu aboro idi kuti gipai re nga agu aboro naima wirikapai wenengai. I ima rengba ka ya, birĩ-inohe ima yugo gupai nga Ziazia Kekeapai ni irairaha na agu aboro du na idapase kuti Bakusiahe nga agu aboro awirikanga pai ya, adunga na bakere inohe ya, watadu agu aboro i ananga yo niipo.

3. Tipagine duhe ti ni ni nyanyakipa pai ani nyakasi gaani idapase?

³ Ya mo gupai wene abawirikipai apehe rengbe ka sarani ani du na kapa singia Yekova nga gu Bakusirani du na nyemuse ti ko? Gipai re naru ni bakerehe gbe rii ndu gupai idi ani ti ni kuti gupai nga Yekova nga Bakusirani. Ya mo ani idi kuti Bakusiahe mbiko gupai nga i agumbaha agumba furani nga ani idi kutiko watadu ani ima dia regbo ka wisigo agu agopai duho nitirani? (1 Kor. 3:12-15) Ka si vura du vurũ nga ani aima du ni boro sa dagba aDezire Yekova yo tipa gbanga regbo, ani dunduko si aida ani naandu kindi kumbatayo kaa nyakasa gaani idapase. Ka ani mangihe wo, aboro nangingo rani ho i nikaa pe gupai ni nga, agu apai Ziazia Kekeapai apehe ni irairaha te. (Koro. 2:8; Eb. 11:6) Tipa ka undo rani ani mangi gipai re, gi kekeapai re nika sakapai tipa (1) ndu gupai badungu aboro aidanga ti ni kuti Bakusiahe ya, (2) wai rengbe mo ka nyakasa gamo idapase kuti Yekova nga Bakusiro, na  (3) wai rengbe mo kaa ndu kindi kumbatayo kaa banda gu idapase re si du ninyanyakihe.

4. Ringbisihe kuti AEbere 11:1, Baibiri naya mburu ndikidi idapase rii ginihe?

⁴ Gu kura aboro naberã gupai nga, du na idapase nayugo gupai nga ida kuti pai zanga gopai. Ono ringbisihe kuti Ziazia Kekeapai, gure nga ndikidi idapase te. (Oni gedi AEbere 11:1) Ziazia Kekeapai nagumba gupai nga, mburu idapase rii ndikidi gopai, wa vura duhe nga ka ani bingo Yekova, Yesu, gbiati Kindo te, gopai kina berani nayugo gupai nga aYekova na Yesu nga ndikidi aboro na Kindo nga ndikidi he. (Eb. 11:3) Gu kura boro birĩ-inohe sa nada ni Dezire Yekova aya: “Ndupai kinaho be aDezire Yekova tipa agu apai idi yo kutini. I abasanga pa agu arengo nga ga birĩ-inohe te.”

5. Tipagine badungu aboro aida ti ni kuti gupai nga, raka aenge zanga Bakusiahe?

⁵ ‘Tipagine badungu aboro aida ti ni kuti gupai nga, Mbori nakusi rakirakiahe dunduko te si ki vura du vurũ nga badungu agopai kinaho nayugoho nga ko nakusi ahe dunduko?’ Kura aboro awisigongo agu agopai duho nitiyo te. Robert, du awere nga boro sa dagba aDezire Yekova yo aya: “Wa i aafuranga tipa pa kusaahe sukuru yo ya, mi aberẽhe tigimi nga ahe akuru nisaha. Mi aye ka inopai tipa kusaahe ho garãre ada ni nga 22, mi afura na aDezire Yekova, na mi ki wiriki gupai nga, Ziazia Kekeapai ima fu wene nduapai furani tipa ani idi kuti gupai nga, Mbori du nakusi ahe dunduko.” *—Oni bi gu sanduki nga, “ Nyanyakipa Tingidapai fu Avunguagude.”

6. Tipagine du kura aboro ti ni na gu ida nga Bakusiahe ti ni te?

⁶ Gu kura aboro aidanga kuti Bakusiahe te  mbiko i nape gupai nga, i naida kina kuti guhe i abihe abi ni bangiriyo. Ono wa vura duhe wo, i naida aida kuti agu ahe i abingo ho ya, ni kpiapai wa wege, mbiko gopai kinaho nayugo gupai nga wege kina ti ni. Gu ngbatunga idapase i nape paha rogo Ziazia Kekeapai yo, mburuhe rii ndikidi ahe nga agu ahe ka bangirise abingoho ya. (Eb. 11:1) Si nadia regbo adia gbiati asadatise tipa ani wisigi gu gopai duho ni tirani, ono badungu aboro aidanga ka manga gi asadatise re te. Gu boro aidanga ka wisigo agopai nitini ya ima rengba kada kuti gu digisopai nga Mbori ti ni te.

7. Ya mo abawirikipai dunduko natikango na gupai nga Mbori nakusiahe dunduko? Oni sakingo rogoyo.

⁷ Fuo aboro-birĩ-inohe wisigi agu agopai duho, agu akurayo ima ida kuti gupai nga Mbori nakusiahe dunduko. * Wakina Robert i nifura tipa ko kusayo, gu kura aboro idi kuti gupai nga Bakusiahe  ti ni te mbiko gupai nga i aawirikanga pai tipa kusaahe yunivasiti yo te. Ono tie, badungu aboro-birĩ-inohe ima ye ka ino Yekova na kini kpinyemuko. A wa si adu tipa agi aboro-birĩ-inohe re, ani dunduko si aida ani nyakasi gaani idapase kuti Mbori, gipai re abingo pa bakio wai ani nawirikipai te. Boro ho rengbe ka manga gipai re furani te.

8-9. (a) Gini sanahe ani nika sakapai tipaha awere? (b) Waigu rengbe mo ka gbia undo ti wisigo mo pai tipa kusikusiahe?

⁸ Waigu rengbe mo ka nyakasa gamo idapase kuti Bakusiahe? Ani bingo agene ue.

⁹ Mo wisigi kusikusiahe. Mo ima rengba ka nyakasa gamo idapase kuti Bakusiahe ni wisigo mo anya, kurukuru ahe, gbiati akerekuru. (Tam. 19:1; Yes. 40:26) Kina wai mo nikaa dia bakere regbo tipa kaa wisigo ngbatunga agu ahe re, kinawo a mo nika ida kuti gupai nga, Yekova nga Bakusiahe. Gaani awaraga dedede ninaasaka futufutuapai asaka tipa pa kusaahe. Ka mo mbunga geda gu kekeapai re ya, ka si vura du vurũ nga si ima kpakara tipa ka giarogoyo. Mo wiriki gupai du mo na rengba ka wirikaha. Na ka bangiro gonga ti bi gu bawene avidio du rogo gaani bangiriba nga jw.org nga gu kuru vuru agu agarã yo susi barambeda kusayo ti regbo gaani abakere adunguratise ya.

10. Oni funga kpiapai nga gu nayugo gupai nga, Bakusiahe kina ti ni. (ARomo 1:20)

¹⁰ Ho mo awisigopai ni tipa kusikusiahe, mo gbeberã ro ni bakerehe gbe tipa agu apai rengbe mo ka wirikaha tipa Bakusirani. (Oni gedi ARomo 1:20.) Ni kpiapai, uru nafu faarago gbiati imarago nga gu du na nyanyakipaha tipa raka auru kpotosende. Ono tie, kura anzerẽ uru ima rengba kadu ni gbegberẽhe. Wangia ani aboro, si naida i banda rani abanda be agu anzerẽ uru re. Na ani ni kina bandabanda rani behe! Ngba gini gene? Gu kura ngbatunga wege kinaho nga gu ke kpotosende kirikiri nga gu nabanda rani be agi anzerẽ uru re. Na ho agi anzerẽ uru re afaani nikerehe, bakio gu wege du pati kpotosende re nakio kina kumbatayo. Awere tie, ya mo mo adanga kuti gupai nga boro kinaho du kugii gipai re nga boro nyemuse na ni gu Bakusiahe du na bakere inohe te?

11. Wari rengbe mo ka bi agu apai ni rengbe ka nyakasa gamo idapase kuti Bakusiahe? (Oni bi gu sanduki nga, “ Agu Apangbanga Nika Nyakasa Gamo Idapase Kuti Bakusiahe.”)

¹¹ Oni ima rengba ka gbia badungu agopai nga gu nanyakasa gaani idapase kuti kusikusiahe nimanga oni sunge na Watch Tower Publications Index na nimanga oni wetekapai rogo jw.org. Oni ima rengba ka tonaha na gu kekeapai gbiati avidio ninaakura rogo gu kekeapai nga, “Was It Designed?” Gi kekeapai gbiati avidio re ni guruguruhe na si nayugo bawene agopai tipa anya gbiati kura kusikusiahe. Si a na akpiapai rogoho nga ga wai aboro-birĩ-inohe naˈasadi ka mbakada ahe nibiyo kusikusiahe.

12. Ho ani awisigo Ziazia Kekeapai ni, gini apai si aida ani gbeberã rani kutini?

¹² Mo wisigi Ziazia Kekeapai. Gu boro birĩ-inohe i nifura tipa ko rogo genewaraga biama aaidanga niipo kuti Bakusiahe te. Ono fuo bete regbo kusa, ko aye ka ida kuti gupai nga, Bakusiahe kina ti ni. Ko aya: “Mburu gimi idapase aadunga sa kina riimburu agu apai mi awirikihe rogo birĩ-inohe te. Mburuhe adu a rii gupai mi awirikihe rogo Ziazia Kekeapai.” Si ima rengba kadu nga, mo ima ino agu ayugopai nga ga Ziazia Kekeapai wenengai. Ono tipa ka nyakasa gamo idapase kuti Bakusiro, si naida mo naandu kindi kumbatayo kaa wisigo Fugo Mbori. (Yos. 1:8; Tam. 119:97) Ni kpiapai, mo berẽkurii wai Ziazia Kekeapai asakapai tipa agu apai namangi bakuru kusayo futufutu. Mo gbeberã ro kuti sangbaanebi na wai si atagbaganga tihe ya. Ka mo mangihe wo, si nika nyakasa gamo idapase kuti gupai nga, Bakusiahe kinaho nga boro nyemuse na ni iratatamana nakusi rani na ko naadu  kugiipa ke Ziazia Kekeapai.—2 Tim. 3:14; 2 Pet. 1:21.

13. Gini kpiapai sa nga ga tatamana du rogo Fugo Mbori yo?

¹³ Ho mo awisigo Fugo Mbori ni, mo bingo wai gaha arugute afu undo. Ni kpiapai, Ziazia Kekeapai aima zahe bakuru kusayo nga nyemu marã nga gbegberẽpai na si naye na “dungu arungo.” (1 Tim. 6:9, 10; Snz. 28:20; Mt. 6:24) Ya mo gupai re kindi nirengo areme? Gu kura buku sa nga gu nafura tipa sino aboro ti gi gaani regbo re aya: “Dedede, agu aboro idi kuti gupai nga du na marã nga gupai nyakipaha kisusi rogo raka yo na ngbarago te na i na bakere gberãrago. Zavura agu aboro nga aguyo nakpinyemu ka gbia bakere marã na ngbarago te na i na badungu akaza kpotose.” Sidu, gu zahe Ziazia Kekeapai afuhe tipa kpinyemu marã nga bawene rugute! Ya mo ka mo berẽpa kura rugute rogo Baibiri yo nga gu undo ro? Ho ani aberãpa gu wene arugute ni dunduko du rogo Baibiri, ani nika bihe abi nga, gu Bakusirani nga boro nyemuse ima ino gupai ngba gbe tipa rani na si nika sa gupai nga ani naangera ti aregbo dũ kubeko tipa rugute. (Yak. 1:5) Ni sangbanaha, raka rani nika du ni bawenehe gbe.—Yes. 48:17, 18.

14. Ginipai wisigo Ziazia Kekeapai nika yugoho foro tipa Yekova?

¹⁴ Mo naawisigo Ziazia Kekeapai na gu sasa nga—ka ino Yekova wenengai. (Yo. 17:3) Ho mo nikaa wisigo Ziazia Kekeapai ni, mo nika wirikapai tipa asino Yekova—nga gu bangisa asino rengbe mo ka wirikapai tipaha ho mo awisigo kusikusiahe ni. Wirika ani pai tipa asino Yekova nasarani ani idi kuti gupai nga, Yekova kina ti ni nzunzu. (Gate 34:6, 7; Tam. 145:8, 9) Wa mo nika ye ka ino Yekova gbe, gamo idapase kutiko nika sona, gamo nyemuse tipa ko nika nyaka, na gamo pabakure na ko kida ninyanyakihe gbe.

15. Waigu mo nika gbia undo ti fura mo na kura aboro tipa gamo idapase kuti Mbori?

¹⁵ Mo fura na kura aboro tipa gamo idapase kuti Mbori. Wa mo nikaa mangaha wo, gamo idapase nika du ninyanyakihe. Ono na ka si du nga gu boro mo natungusipai fu ni na akapa singia Mbori kina ti ni na ka mo ainongo gupai ka mo pehe ya? Mo asadi ka gbia karagapai nga ga Ziazia Kekeapai kuti gu sanahe re rogo kura gaani awaraga yo, na ki sakipai tipaha na gu boro re. (1 Pet. 3:15) Mo ima rengba a ka sana gu Dezire Yekova du na bakere inohe tipa undo. Singia gu boro re idi kuti agu akaragapai du rogo Ziazia Kekeapai yo watadu ni aidanga kutini te, mo nika gbia undo agbia ti manga mo gu wetekapai re. Gamo idapase nika du ni nyanyakihe gbe. Ni sangbana gipai re, mo aidanga kuti agu aboro si awiraha wa i nga airatatamana watadu wene abawirikipai nga aguyo naya Bakusiahe ti ni te te.

16. Ginipai rengbe ka manga ka ani aandunga kindi kumbatayo kaa nyakasa gaani idapase na kini bandaha ya?

¹⁶ Ka si vura du vurũ nga ani aima digo niirisi Yekova tipa gbanga regbo, si naida ani naandu kindi kumbatayo kaa nyakasa gaani idapase kutiko na kini bandaha. Tipagine? Bambiko ka ani aadunga na rubangirise ya, gaani idapase ima rengba ka rungbura. A wa ani nasakipai tipaha, mburu idapase rii ndikidi ahe nga agu ahe ka ani abingo ho ni bangirise ya. Guhe ka ani abingo ho ya, bangirani ima rengba ka go ti ni niipo. Si du nga ndu gupai gu mokedi nangia Pauro aya ti ni tipa zanga idapase wẽ, si nga “gu ingapai ninaaye dedede ka manga rani.” (Eb. 12:1) Si du tie, waigu rengbe ani ka sa gaani idapase si nye ninyanyakihe?—2 Tesa. 1:3.

17. Ginihe rengbe ka undo rani ani banda gaani idapase si du ninyanyakihe?

¹⁷ Nibambatapai, mo sana Yekova tipa gako ziazia toro na kini mangihe wo dedede. Tipagine? Mbiko idapase nga papara zuzu toro. (Gara. 5:22, 23) Ani arengbanga ka nyakasa gaani idapase kuti Bakusirani na kini bandaha zanga na gu  undo nga ga gako ziazia toro te. Ka ani aandu kindi kumbatayo kaa sana Yekova tipa gako ziazia toro, ko nika fuhe afu furani. (Rk. 11:13) Ani ima rengba ka manga kparakpee nga: “Mo kíisi gaani idapase.”—Rk 17:5.

18. Ringbisihe kuti Atambuahe 1:2, 3, gini nyanyakipa gamahe ani nagbiaha?

¹⁸ Kurigure, mo naageda Fugo Mbori na aˈuru dunduko. (Oni gedi Atambuahe 1:2, 3.) Ho i ake gi papara Atambuahe re ni, bete aYisaraere aima du na ga Mbori Andiko beyo nga gu i aima nyasa kehe. Ono tie, bakindo gbiati aboromotumo aima du na rengba beyo ka gbia agi Andiko re, na vuru asaba garã yo dunduko, mbakadapai anidu ho fu “akumba na ade na rukutu agude,” gbiati gu kungbo aboro naaraka dagba aYisaraere i naadegatuyo kuti ga Mbori Andiko i nigedihe. (Pa Rug. 31:10-12) Ti rago Yesu, kina bete aboro gbua naadu na Ziazia Kekeapai beyo, na i anaabanda dunguhe kina rogo abambutiria. Ono si wo areme te, badungu aboro areme ima du na rengba tipa ka geda papara watadu Fugo Mbori dunduko. Gere nga nyanyakipa momu. Waigu rengbe ani ka yugoho nga ani na tambuahe tipa Ziazia Kekeapai?

19. Ginipai si aida ani naamangaha tipa ka banda gaani idapase si du ninyanyakihe?

¹⁹ Ani rengbe ka yugoho nga ani na tambuahe tipa gu momu nga ga du na Fugo Mbori re ni geda ani he dedede. Si naida ani sia regbo asia tipa kaa geda Baibiri na kini wisigihe, angianga kaa gedaha kinaho du ani ni na regbo berani ya. Ka ani awisigo Ziazia Kekeapai dedede, ani ima rengba ka banda gaani idapase si du ninyanyakihe.

20. Ginipai si aida ani diberã ka mangaha?

²⁰ Ani wa agu “airatatamana na arugutinapai” nga ga gi zegino yo re te, ani na nyanyaki idapase nga gu du mburuhe rii Fugo Mbori. (Mt. 11:25, 26) Baibiri nasaka ndu gupai furani apai agberã ti ni kina kumbatayo auru kpotosende na gupai Yekova nika mangaha tipaha. Sidu, ani dinga berã adia ka nyakasa gaani idapase na kini undo badungu aboro i du na idapase kuti Bakusirani. (1 Tim. 2:3, 4) Na ani naandu kindi kumbatayo kaa ngera tipa gu regbo nga gu agu aboro dunduko nika du ni unga yo auru kpotosende nika tambua Yekova na ki pe agu afugo du rogo Yugoti 4:11 nga gu naya: “Mo gaani Gbia nga gaani Mbori, re mo are na dia taarimo . . . bambiko mo nafu ahe dunduko.”