1. Waigu badungu aboro aˈasada kaa mangasunge ni bakerehe tingba ga Yekova sunge?

BAKERE sunge du berani tipa ka mangaha wa gi sino raka re ambeda ka digo. (Mt. 24:14; Rk. 10:2; 1 Pet. 5:2) Ani dunduko naida ka mangasunge fu Yekova ni bakerehe wa rengbe omerani na ni. Badungu kura aboro nakiiso gayo sunge tungusapai. Agu akurayo na maabangirise tipa ka mangasunge ni abazakigene. Agu akurayo na maabangirise ka mangasunge Betere yo watadu ka mangasunge meka arago nga ga siokrasia. Na badungu agu awirina nga akumba namanga nyanyaki asadatise tipa ka rẽ ka da ni amoundo abaakumba watadu ni abaakumba. (1 Tim. 3:1, 8) Yekova na bakere ngbarago ho ko abi gu ome ni gako aboro amangaha tipa ka mangasunge fuko!—Tam. 110:3; Yes. 6:8.

2. Waigu rengbe ani kadu ka ani adanga ti sasa tingba gaani sunge fu Yekova ya?

² Ono tie, ani ima rengba kadu na gberãrago ka si du nga bete regbo ima susa na ani ata danga ti kura gaani asasa nga ga toro te. Watadu ani ima rengba kadu na gberãrago mbiko ani arengbanga ka manga kuraapai rogo ga Yekova riigbu te mbiko ani ima gbinza ni kerehe watadu mbiko kura nduapai. (Snz. 13:12) Ni kpiapai, gu wirina nga Melissa * aakpinyemu ka mangasunge Betere yo watadu ka ndu tipa Gu Sukuru Du Tipa Abatungusipa Kindo, ono ri aya: “Mi ima gbinza awere, mi arẽnga berewe ka ndu tipa agu asunge re te. Mi nidu adu na gberãrago ti kura aregbo.”

3. Gini adiandue si narengbe ka ida kura aboro mangihe tipa ka rẽ tipa kura amomu sunge?

³ Gu kura aboro ni paranga yo na kpotoyo kidu wenengai, ono si naida i nyaki anyaka na ki yugu gu kura asino mbata fu i rẽ tipa  kura amomu. Ni kpiapai, kura aboro ima rengba kadu na bakere inohe, kini mangi adiaberã niipo, na kidu na bakere nyemu ka mangasunge. Ono si ima rengba ka ida i wiriki wai kadu na bakere zerangbaduse, ka manga gayo sunge sirisiri, na ka yugo bakere irisa fu kura aboro. Ka mo mangi nyanyaki asadatise tipa ka sonosa agu asino si aidaha, mo ima rengba ka gbia amomu sunge tigu regbo mo aberãnga ha nga mo nika gbiaha ti ni ya. Ani bingo gu kpiapai nga ga Nick. Ho garãko adu ni nga 20, ko adu na bakere gberãrago mbiko i amaanga ko ni moundo abaakumba te. Ko aya, “Mi aberẽhe nga, gbegberẽpai kina tire.” Ono Nick aambunga sonosa agu asino si aaidaha te. Ko amangi gupai omeko arengbe namangaha rogo dungurati na tingba sunge tungusapai. Areme, ko namangasunge ni boro sa rogo Rondo nga ga Be Basunge.

4. Gini apai ani nika sakapai tipaha rogo gi kekeapai re?

⁴ Ya mo mo na gberãrago mbiko mo ata danga ti kura sasa nga ga toro te? Ka si du wo, mo pepa gamo abakabangirise fu Yekova. (Tam. 37:5-7) Kurigure, mo sana agu awirina naima nyaka rogo toro yo tipa aberãpai nibipa wai rengbe mo ka mbakada gamo gene mangasunge fu Mbori, na mo ki mangi asadatise tipa ka mangapai kuti gayo arugute. Ka mo mangi he wo, mo ima rengba kada ti gu sasa mo aida ka da ti ni. Wakina Melissa, isoke si ima rengba kadu ni kpakarakpakaraha awere foro mo mangi agu apai mo aida ka mangaha fu Yekova. Ono tie, waigu rengbe mo ka banda gamo ngbarago kindi? Tipa ka gbia karagapai kuti gi sanahe re, gi kekeapai re nika sakapai tipa (1) gupai rengbe ka fu ngbarago foro, (2) wai rengbe mo ka kiiso gamo ngbarago, na (3) gu ngbatunga asasa rengbe mo ka maaha nga gu rengbe ka kiiso gamo ngbarago.

5. Tipa kadu na ngbarago, ginihe si aida ani moiberãrani tipaha? (Batungusipai 6:9)

⁵ Batungusipai 6:9 (NW) nasakapai tipa gupai rengbe ka undo rani ani du na ngbarago. Gu boro nagbia ngbarago ti “gupai bangirise abihe” nadu na tambuahe tipa guhe du be ni, wa ngbatunga agu apai du tipa ni ti gu regbo re. Ono tie, gu boro nataata ku bani na ku bani fuo nyemuahe nakpinyemu kadu na guhe be ni nga gu ni arengbanga ka gbia ya. Sidu tie, ginipai ani awirikaha ti gipai re? Tipa kadu na ngbarago, si naida ani moiberãrani kuti guhe du berani, na guhe rengbe ani arengba kadu na maabangirise tipa ka gbiaha.

6. Gini sanza ani nika sakapai awere tipaha, na ginipai ani nika wirikaha ti ni?

⁶ Ya mo ka boro rengbe nzunzu kina be agu ahe du be ni? Badungu aboro naberã gupai nga, ka boro rengbenga kina be agu ahe du be ni te, mbiko ani ninaakpinyemu kaa wirika wai ka manga vovo apai. Ono tie, ani ima rengba ka rengba kina be agu ahe du berani. Nirengo, ani ima rengba kaa gbia ngbarago ti kina agu ahe du berani awere. Waigu rengbe ani ka manga gupai re? Tipa ka ino wai ka manga gupai re, ani bingo gu ga Yesu sanza nga ga ataranda nga gu du rogo Matayo 25:14-30. Ani nika wirika wai rengbe ani ka kiiso gaani ngbarago na kidu na bakere ngbarago nibipa agu apai du tipa rani awere.

7. Oni sakingo pai ni betehe tipa gu ga Yesu sanza du tipa ataranda.

⁷ Rogo gu sanza re, kumba aaida ka ndu nunguro. Mbata fu ko ndu, ko ayambu gako aborosunge na ki fu ataranda fuyo wa i adu ni basasa dunduko tipa i mangisunge bagaahe na ami. * Gu kumba re aima ino gupai nga gako amangisunge adu na rengbanapai ni bakiakia, sidu, ko afu ataranda bisue fu bambata ni, ki fu ataranda ue fu ue ni, na ki fu taranda sa fu biata ni. Gu bambata boro sunge gbiati ue ni aima mangasunge nyanyaki tipa ka manga bakere marã fu baira yo.  Ono tie, gu biata boro sunge aamanganga pai na gu marã baira ni afuru funi te, na baira ni ado ni kusayo ti sunge.

8. Ginipai gu bambata boro sunge du rogo ga Yesu sanza arengbe kadu na ngbarago mbiko ho?

⁸ Bambata boro sunge aima du na bakere ngbarago nga baira ni afu ataranda bisue funi. Gu marã re aima kio, na si ayugu gupai nga bairani aima du na bakere kido kuti ni! Ono ginipai tigaha naadu tipa ue boro sunge? Ni aima rengba kadu na gberãrago mbiko ni aagbianga ataranda ni dungura wa bambata boro sunge te. Ono wai du ni amangipai?

9. Ginipai Yesu aagumbanga ha tipa ue boro sunge ya? (Matayo 25:22, 23)

⁹ Oni gedi Matayo 25:22, 23. Yesu aapenga gupai nga ue boro sunge adu na gberãrago na ki kpipai mbiko ko agbia ataranda gbua ue te. Na Yesu aapenga gupai a nga gu boro sunge re akpakanahe na ki pe gupai nga: ‘Tipagine bairare nafu ataranda ti ni fere ni bete ra? Mi namangasunge nyanyaki wakina gu ko gbia ra bisue re! Ka si ngia bairare aberãnga gupai nga mi nga wene boro sunge te, si naida mi õko gi marã re tie ku sende yo na kini mangisunge tipa tire angianga fuko ya.’

10. Ginipai ue boro sunge amangihe na gani ataranda?

¹⁰ Wakina bambata boro sunge, ue boro sunge aima rugatini na gupai nga, gu sunge bairani nafuhe fu ni na nyanyakipaha na ni ki mangisunge nyanyaki fu bairani. Ni sangbanaha, gu ue boro sunge re agbia ataranda ue kurii agura ue naadu beko ami kidu biama. Baira sunge aima fu mosoro fu gi boro sunge re tipa gako nyanyaki sunge. Bairani adu na bakere ngbarago na zavura ki fu kura dungu asunge fu ni!

11. Waigu rengbe ani ka kiiso gaani ngbarago?

¹¹ Wakina gure a, ani rengbe ka kiiso gaani  ngbarago nimanga ani ai gu sunge i afuhe furani ti ngba ga Yekova sunge. Mo fu tiro “nyanyaki” tipa sunge tungusapai na kini mangisunge nyanyaki rogo dungurati. (Amo. 18:5, NW; Eb. 10:24, 25) Mo naandu tipa adunguratise na kini mbakadihe wenengai tipa wa ka mo aafu gu wene akaragapai nafu ngarasaro. Mo naabi agu asunge na nyanyakipaha i afuhe foro mo mangihe ti regbo agu adunguratise du bebere poso. Ka i sana ro mo mangi kura sunge rogo dungurati, mo mangihe ti kina gu regbo si aidaha ti ni na mo kidu ni gu boro du aboro adu na kido kutini. Ka mo berẽnga gupai nga gu sunge i afuhe foro na umbapaha na si aidanga mo di gamo regbo kuti ni ya te. Mo mangi nyanyaki asadatise ka mbakada gamo birĩ-sunge. (Snz. 22:29) Ka mo aamangasunge nyanyaki fu Yekova, mo nika du ni wene bakureako na mo ki gbia bakere ngbarago. (Gara. 6:4) Si nika du a foro taata mo du na ngbarago ho kura aboro agbia agu amomu sunge ni mo akpinyemu ka gbiaha.—Rom. 12:15; Gara. 5:26.

12. Gini adiandue aDezire Yekova ue amangihe tipa ka kiiso gayo ngbarago?

¹² Ya mo oni natingidapa Melissa i nifura tipa ri rogo genewaraga ue nga guri naadu na nyemu ka mangasunge Betere yo watadu ka ndu tipa Gu Sukuru Du Tipa Abatungusipa Kindo? Wa si avura du vurũ nga ri aarengbanga ka manga gipai re te, ri aya: “Mi aˈasadi ka manga gupai ni bakerehe omere arengbe na ni tingba gimi sunge nazakigene na mi aˈasadi agu angbatunga gene tungusapai duho. Gipai re ima ye na bakere ngbarago fere.” Na waigu Nick amangipai kuti gako gberãrago ho i aamaanga ko ni ni moundo abaakumba ya? Ko aya, “Mi amoiberã re kuti agu amomu naadu ho ti gu regbo re bere—wa tungusapai nafu wene akaragapai nga ga ngarasaro ba adunguratise yo. Na mi asanahe a ka mangasunge Betere yo na i aidihe rogo gu garã nangbefuo ho.”

13. Ka si du nga mo namanga gu sunge du bero awere nyanyaki, sangbanaha nika ngia gine? (Batungusipai 2:24)

¹³ Ka singia mo namanga gu sunge du bero awere nyanyaki, ya mo mo agbia kura bakere asunge kumbatayo? Mo ima rengba ka gbiaha a wa si amangi tipa Nick. Ono ka mo aagbianga ha ya wakina Melissa, mo ima rengba kindi ka kiiso gamo ngbarago, na kidu na ngbarago na gupai mo amangaha fu Yekova. (Oni gedi Batungusipai 2:24.) Kurigure, mo nika du a na bakere ngbarago mbiko mo ima ino gupai nga, mo nafu ngbarago fu gu Bairarani nga Yesu Kristo.

14. Nibipa gu gaani asasa nga ga toro, ginipai si aida si du berãrani yo?

¹⁴ Ka ani amaaberã rani kuti gu sunge du berani awere, ya mo gure nayugo gupai nga si aidanga ani ngere tipa agene ka kiiso gaani sunge fu Yekova te? Oó, anga wo duhe te! Si naida ani moi agu asasa amaa nga ga toro nga gu rengbe ka undo rani ani du ni wene abatungusipai, wene abayugupai na kini undo awirinarani ni bakerehe gbe. Ani ima rengba kada ti agu asasa re ka si du nga ani namaaberã rani tipa undo kura aboro angianga kina tipa tirani ya.—Snz. 11:2; Amo. 20:35.

15. Gini kura asasa rengbe ka undo ro mo kiisi gamo ngbarago?

¹⁵ Gini asasa rengbe mo ka maaha tipa tiro? Mo sana Yekova ko undo ro mo ini agu asasa rengbe mo ka da ti ni. (Snz. 16:3; Yak. 1:5) Ya mo mo rengbe kada ti sasa sa dagba agu asasa yo i nigumba paha rogo bambata gene waraga nga ga gi kekeapai re—ka da ni moundo abazakigene, watadu bazakigene, ka mangasunge Betere yo watadu ka manga sunge mekaarago nga ga Kindo? Mo ima rengba ka wirika vovo fugo tipa ka gbataka wene pangbanga watadu zavura ka ndu ka tungusapai rogo kura rago kia. Mo rengbe ka wirikapai ni bakerehe gbe tipa agi asasa re nigeda mo kapita 10 nga ga gu buku nga, Mbakadatise ka  Manga Gupai Yekova Akpinyemuhe na nifura mo na abaakumba rogo gamo dungurati. * Ho mo nikaa mangasunge ni nyanyaki kada ti agu asasa re, aboro nika bihe abi nga mo namanga sonakumbatayo na gamo ngbarago nika kio gbe.

16. Ginipai rengbe mo ka mangaha ka si du nga mo arengbanga awere kada ti kura sasa te?

¹⁶ Ono na ka si du nga mo na rengba awere kada ti agu asasa i nagumbapaha rogo gi kekeapai re te? Mo asadi ka maa gu sasa mo narengbe arengba kada ti ni. Ani bingo bete agu asasa rengbe mo ka maaha.

17. Ringbisihe kuti 1 Timoteo 4:13, 15, ginipai rengbe gu wirina nga kumba ka mangaha tipa kadu ni wene bayugupai?

¹⁷ Oni gedi 1 Timoteo 4:13, 15. Ka singia mo nga gu wirina nga kumba naima zio bapatiza, mo ima rengba ka asada kadu ni bawene bagumbapai watadu bayugupai. Tipagine? Bambiko ka mo mangi asadatise “nyanyaki” tipa kadu ni wene bagedipai, bagumbapai, na bayugupai, mo nika du na bakere rengba ka undo agu aboro nadegatuyo foro. Mo asadi ka maa gu sasa nga ga wisigo agu arugute du rogo gu burosua nga Mo fu Tiro Tipa Gedapai na Yugopai, na kini mangipai kuti ni. Mo wisigi agu arugute watadu rugaapai du rogo gu burosua re dunduko, mo asadi ka mangaha wenengai kporo yo, na kini mangipai kuti agu arugute re ho mo amanga gumbapai ni. Mo gbata aberãpai be ue bafurugute watadu be kura abaakumba nga agu yo “namanga sunge [nyanyaki] rogo tungusapai na yugopai.” * (1 Tim. 5:17) Ka mo moingo berãro sa kina kuti manga agu apai du rogo gu burosua re ya, ono mo moiberãro amaa a kuti undo agu aboro nadegatuyo foro tipa ka nyakasa gayo idapase watadu ka sa yo i mangipai kuti gupai i awirikaha. Ka mo mangihe  wo, mo nika kiiso gamo ngbarago gbiati ga agu aboro nadegatuyo foro.

18. Ginipai rengbe ka undo rani rogo gaani sunge tungusapai yo ani da ti gaani asasa?

¹⁸ Ani dunduko du na gu sunge berani nga ga tungusapai na ga sa aboro ni abawiriki. (Mt. 28:19, 20; Rom. 10:14) Ya mo mo nakpinyemu kadu na bakere birĩ mangasunge rogo gi nyanyakipa sunge re? Mo moi agu asasa rengbe mo kada ti ni nga gu rengbe ka undo ro mo mangipai kuti agu apai mo awirikaha rogo gu burosua nga Mo fu Tiro Tipa Gedapai na Yugopai. Mo ima rengba ka gbia kura wene aberãpai rogo Waraga Dunguratise Nga ga Gaani Raka Nga ga AKristano na Gaani Sunge na rogo agu avidio nga gu nayugo kpia wai ka tungusapai nga gu i naayugoho ti regbo gaani adunguratise bebere aposo. Mo asadi aberãpai ni bakiakia tipa ka ino gini gu namangasunge wenengai gbe rogo gamo dagbarago nga ga tungusapai. Ka mo mangipai kuti agi aberãpai re, mo nika du ni wene batungusipai watadu bayugupai na gipai re nika fu bakere ngbarago foro.—2 Tim. 4:5.

19. Waigu rengbe mo ka sonosa agu asino nga ga aKristano?

¹⁹ Wa mo nikaa maa asasa tipa tiro, ka bangiro gonga ti gupai nga, nyanyakipa sasa sa dagba agu asasa rengbe mo ka maaha nga—ka sonosa agu asino nga ga aKristano ya. (Gara. 5:22, 23; Koro. 3:12; 2 Pet. 1:5-8) Ginipai rengbe mo ka mangaha kada ti gu sasa re? Ni kpiapai, ani yanga mo naida ka sonosa nyanyaki idapase. Mo ima rengba ka geda agu akeke apai nakura rogo gaani awaraga yo nga gu nafu aberãpai tipa wai rengbe mo ka nyakasa gamo idapase. Mo nika gbia undo agbia ni rengo ti bi mo gu papara JW Terevizioni^® nga gu nayugopa wai awirinarani ayugo bakere idapase ho i asusa ni rogo aˈasada yo ni bakiakia. Fuo gure, mo wisigi agu agene rengbe mo ka wirika gayo idapase ngbaha rogo gamo raka yo.

20. Waigu rengbe ani ka kiiso gaani ngbarago na ki zogosi bete gberãrago?

²⁰ Zanga kapa, ani dunduko naida ka manga bakereapai fu Yekova susi gu rengbe ani ka mangaha awere. Rogo ga Mbori vovo zegino, ani nika duadu na rengba tipa ka mangasunge fuko ni bakerehe gbe. Wa du rago tie re, ka ani mangi ai gupai na omerani dunduko rengbe ani ka mangaha awere, ani ima rengba ka kiiso gaani ngbarago na ki zogosi bete gaani gberãrago. Gu nyakipaha gbe nga, ani nika ye na taarimo gbiati irisa fu Yekova nga gaani “betedi Mbori.” (1 Tim. 1:11) Si du tie, ani gbianga ngbarago agbia ti agu amomu du berani!