1-2. Ringbisihe kuti Atambuahe 34:8, ginipai si aida ani mangihe tipa ka inopa ga Yekova wenesino?

MO BERẼNGA gupai nga boro fu gu riahe foro mo rihe nga gu mo aaringa ha mbata ya. Mo ima rengba ka inopai tipaha ningana mo ho, nigia mo fuõho, nigbia mo agu ahe i nipasi he na ni, watadu nisana mo kura aboro tipa gayo berãpai tipa ha. Ono tie, gu yangara gene rengbe mo ka inoho ngbaha singia gu riahe re ngba tiro nga ni ía mo ho nitiro.

² Ani ima rengba ka wirikapai tipa ga Yekova wenesino nigeda ani Baibiri, gaani awaraga, na nigia ani gu kura aboro i nifura tipa agu amaku nga gu gbiayo ho be Yekova. Ono ani rengbe ka ino wai du Yekova ni wene ko nzunzu ho ani ‘aía’ gako wenesino ni nitirani. (Oni gedi Atambuahe 34:8.) Ani bingo kpiapai sa nga gu rengbe ani ka manga gipai re ngbaha. Ani yanga ani naida ka mangasunge Kindo ti aregbo dunduko, ono tipa ani da ti gu sasa re, si naida ani sa gaani raka si du taata. Isoke, ani ninaageda gu ga Yesu kidohe ageda nga, ka ani moi agu apai nga ga Kindo mbatayo, Yekova fu agu ahe afu furani nzunzu nga gu ani aidaha, ono ani aabingo Yekova ko namangi gupai re furani te. (Mt. 6:33) Ono mbiko gu idapase du ani na ni kuti ga Yesu kidohe, ani naasada ka mangasunge na marã ni betehe na kini mangi aˈariapai basunge marã yo, na kini tungusipai ni bakerehe wa rengbe omerani na ni. Ho ani amangaha ni wo, ani nabihe abi nzunzu nga Yekova naberãpa agu ahe aberã du ani na zingo tipaha. Ani nika “ia” ga Yekova wenesino nitirani.

3. Ringbisihe kuti Atambuahe 16:1, 2, ada nagbia ga Yekova wenepai?

³ Yekova ni “wene ko fu aboro dũ,” zavura fu agu aboro ainonga ko ya. (Tam. 145:9; Mt. 5:45) Ono gbe, agu aboro ini Yekova na kini irisiko na kpotoyo yo dunduko nagbia badungu amaku agbia beko. (Oni gedi Atambuahe 16:1, 2.) Ani sakingo pai  tipa gu weneapai nga gu Yekova namangihe furani.

4. Waigu Yekova ayugo gako wenesino fu agu aboro natona ka mbeda na ko?

⁴ Ai gu regbo ani amanga gupai ani awirikaha be Yekova, ani nabi wene sangbanaha abi rogo gaani raka yo. Ni kpiapai, ho ani awiriki badungu apai ni tipa ko na ki tona ka kpinyemu ko, ko aundo rani ani mbu berãkuriipa agu apai ko aidanga ha ya na ki mbu mangaha. (Koro. 1:21) Na ho ani akpara gaani raka ni fu Yekova na ki zi bapatiza, ko afu badungu wene ahe furani wa gu nga wene sangbakpotoseyo gbiati mbembedi pabakure na ko.—1 Pet. 3:21.

5. Waigu ani agbia ga Yekova wenepai gene tungusapai yo?

⁵ Ani nandu kindi ku mbatayo kaa gbia ga Yekova wenesino ho ani atungusapai ni. Ya mo boro zee ningia mo? Badungu ga Yekova aboro ningia aboro zee. Isoke, mbata fu mo da ni boro sa dagba ga Yekova amoyambu yo, mo aarengbanga ka berãpa tiro mo nindu ku rogo gu kporo mo ainonga ho ya na kini fura fu irakporo tipa Baibiri te. Ono areme, mo namanga gupai re amanga dedede. Na zavura Yekova ima undo ro mo gbia ngbarago ti sunge tungusapai! Yekova ima undo ro a ngba kura agene. Ko ima undo ro mo du na zerangbaduse ho boro azinga ni kutiro gene tungusapai yo. Ko ima undo ro a mo tingidi kina gu veresi nzunzu si aida mo mangisunge na ni gene tungusapai yo ho irakporo ayugo nyemupai ni. Na ko ima fu gu ome foro si aidaha tipa mo naandu kindi kumbatayo kaa tungusapai zavura ho aboro aidanga ka degatuyo ni foro ya.—Yere. 20:7-9.

6. Waigu gu rabahe Yekova afuhe furani ayugopa gako wenesino?

⁶ Yekova ima yugo gako wenesino furani a ni raba ko rani tipa sunge tungusapai. (Yo. 6:45) Ti regbo agu adunguratise nga ga bebere poso, ani nadegaturani kuti wene akpiapai nga ga gupai rengbe ani ka pehe ho ani atungusapai ni fu aboro, na ani namangasunge na gi wene aberãpai re gene tungusapai yo. Ti tonatonaha, ani ima rengba kadu na gunde tipa ka asada vovopai, ono ho ani aˈasada ha ni, ani nadu na ngbarago ka bihe nga agu aberãpai re namangasunge amanga rogo gaani dagbarago. I naangarasa rani ba adunguratise yo na ba bakere adunguratise yo ani asadi asunge tungusapai ni bakiakia nga gu ani aˈasadanga ha mbata ya. Gure berewe ima rengba ka sa rani a anidu na gunde, ono ho ani aˈasada agi apai re ni, Yekova nafu maku afu furani. Awere tie, ani nika wirikapai tipa gu wene ahe nga gu Yekova afuhe furani ho ani akido ni kuti ko na kini asadi vovo agene nga gu rengbe ani kafu guhe fuko ngbaha nga gu ngba kisusi ka kina gini apai vura du tipa rani vurũ. Fuo gure, ani nika sakapai tipa wai rengbe ani kada ti gaani asasa.

7. Gini amaku ani agbiaha ho ani aˈasada ni ka kiiso gaani sunge tungusapai?

⁷ Ani nambeda gbe na Yekova. Oni bingo kpiapai nga ga gu bakumba du rimoko nga Samuel, * nga gu ko namangasunge na diako Colombia yo. Agi arogotise re agbia ngbarago ti mangayo sunge abazakigene rogo gu dungurati naadu rogo gayo ringara, ono i aaida ka kiiso gayo sunge tungusapai nigayo ku rogo gu dungurati naadu na bakere zingo rogoho. Tipa ka da ti gu sasa re, si aaida i mbupa kuraapai ambu. Samuel aya, “Ani amangipai kuti Matayo 6:33 na ki mbu ngbeka agu ahe ani aadunga na zingo tipa ha ya, ono gu nyanyaki diandue ani amangihe nga ka mbu kpurani. I ambakadi kpurani kina wai nzunzu ani aaidaha na marã ho naadu kurirani tipaha te.” Ho i aga ni ku rogo gayo vovo dungurati, i aaida gbua na bete marã kaa raka ngbaha susi wai si adu mbata. Samuel aya, “Ani ima bi wai Yekova angbe  mbatayo furani na kini karagapai kuti gaani akparakpee. Ani nabihe nga Yekova na ngbarago na ani na ani nabi gako nyemuse abi ngba agu agene ani aabingoho ngbaha mbata ya.” Ya mo mo na rengba ka kiiso gamo sunge tungusapai ngba kura gene? Ka singia wo duhe, mo ima rengba kadu na gu kido nga mo nika mbeda ambeda na Yekova na ko nika ngera angera fuo ro.—Tam. 18:25.

8. Ginipai mo awirikaha ti agu apai Ivan na Viktoria agumbaha?

⁸ Ani nagbia ngbarago ti gaani sunge. Oni bingo agu apai Ivan na Viktoria agumbaha, nga agu arogotise namangasunge abazakigene Kigistan yo. I abanda gayo raka si du ni taataha tipa ka futiyo tipa ai sunge, kodihe na sunge meka agu arago nga ga Kindo. Ivan aya: “Ani aamanga ai gu sunge nyanyaki nga gu naadu berani. Wa vura duhe nga ani anidu na mbugo ti digido uru, ani anidu na ngbarago ni ino ani gupai nga ani mangisunge na gaani ome nyanyaki fu Yekova. Ani anidu na bakere ngbarago a mbiko manga ani dungu abakure na ani ki gbia badungu weneapai.”—Mk. 10:29, 30.

9. Ginipai wirina du na akpakarapai tiri namangihe tipa ka kiiso gari sunge tungusapai, na sangbanaha nga gine?

⁹ Ani nagbia ngbarago tiga Yekova sunge zavura ho du apai ni ni kpakarakpakaraha. Ni kpiapai, sosono wirina sa ni dekurugbo du rimori nga Mirreh nga guri du West Africa yo aamangasunge ni munganga. Ho ri azoro ni ti sunge, ri atona mangasunge ni nazakigene. Mirreh na iigirã kaza tiri nga gu nasa boro ka ni naandunga wenengai ya na ri na rengba ka dia saa gbua sa ti gu regbo ri atungusapai kporo na kporo. Ono ri na rengba ka dia bakere regbo ho ri amanga dezirepai ni gbaiga. Ri na badungu aboro ri akaraga tiri fuo yo gbiati abawiriki Ziazia Kekeapai, agu akurayo kinaho ri ayamba yo kina rogo terefuni. Tipagine du Mirreh aaida ka mangapai ti ni fu Yekova ni bakerehe? Ri aya, “Kpotore yo ima hi be bakere nyemuse tipa Yekova gbiati Kristo Yesu. Na mi naamanga kparakpee dedede fu Yekova ko undo re tipa mi mangi gupai rengbe mi ka mangaha tingba gako sunge.”—Mt. 22:36, 37.

10. A wa yuguyo ho rogo Yesaya 54:13, ginipai agu aboro naida ka gbia sunge agbiaha be Yekova?

¹⁰ Ani nagbia kura arabahe be Yekova. Kenny nga bazakigene namangasunge Mauritius yo abi gipai re nirengo. Ho ko agi rengo ni, ko ambu yunivasiti, ki zi bapatiza, na ki tona mangasunge ni bazakigene. Ko aya, “Mi naaˈasada ka raka kuti afugo gu nabi nangia Yesaya, nga guko na ya: ‘Mi du re! Mo kédi re.’” (Yes. 6:8) Kenny ima mangasunge mekaarago nga ga Kindo ni badunguhe na ko ima mangasunge a rogo gu basunge nga ga sa fugo tipa ka undo na sa agu awaraga du mburuhe rii Ziazia Kekeapai ku rogo fugoko yo. Kenny aya, “Mi agbia rabahe nga gu nayugu agu abirĩ fere mi aaidaha tipa ka digiso gimi asunge.” Ono ko aima wirika badungu apai kisusi gu gbua nga, wai ka manga gu sunge re. Ko agumba gupai berewe nga, “Mi awirikipai a tipa agu apai nga gu naadu ni kpakarakpakaraha fere na tipa agu asino si aaida mi sonosi he tipa kada ni ga Yekova wene moyambu.” (Oni gedi Yesaya 54:13.) Isoke mo ima rengba ka manga aˈariapai a tipa Yekova raba ro ngba kura agene.

11. Gini asadatise agu awirina ni adee du South Korea yo amangihe tipa kaa mangasunge tungusapai, na sangbanaha nga gine? (Oni bi gu sura duti kpotoho.)

¹¹ Zavura agu aboro naima du ni aDezire Yekova tipa dungu agarã naida aida na rabahe ho i aˈasada kura vovo sunge ni. Ti regbo gu ririkaza nga Korona, agu abaakumba du South Korea yo akepai ki ya: “Gu kura aboro rengba aadunga beyo ka tungusapai wenengai ya bambiko kaza kpotose, natungusapai atungusa awere rogo vidio. Sosono awirina biata ni adee garã yo naima susa 80 awiriki wai ka mangasunge na kompiuta tipa ka manga gipai re, na awere i namangasunge tungusapai dedede.”  (Tam. 92:14, 15) Ya mo mo na nyemu ka kiiso gamo sunge tungusapai na ka ía ga Yekova wenesino ni bakerehe? Ani wisiginga bete agu apai rengbe mo ka mangaha tipa ka da ti gu sasa re.

12. Ginipai Yekova nakido paha fu agu aboro nakido kutiko?

¹² Mo wiriki wai ka kido kuti Yekova. Ko ima kidohe ka gama wene ahe furani ho ani akido ni kuti ko na kini mangi gupai fuko ngba kisusi. (Mara. 3:10) Wirina du rimori nga Fabiola nga guri naraka Colombia yo abi wai Yekova adigisi gi kidohe re nibi gupai naadu tipa ri. Ri aaida ka mangasunge ni nazakigene nibasa fuo zio ri bapatiza. Ono tie, si aaida ri mangisunge nyanyaki tipa ka undo gari aborokporo. Sidu, ho si adu ni nga ri nika zorã ti sunge, ri amangi kparakpee nyanyaki fu Yekova tipa undo. Ri aya: “Dedede, si naaida aboro sungu asungo tipa gbanga regbo mbata fu i tona zio gayo makafa, ono mi atona ka zio gimi makafa ti ngbafuo diwi sa gbua fuo mbu mi sunge. Si adu fere wakina iiriwopai!” Ti ngbafuo adiwi ue kusa, ri atona mangasunge ni nazakigene. Garãri ima susa 70 awere, na ri aima digo nimangisunge anazakigene tipa agarã naima susa 20. Vuru agu aregbo yo re, ri ima undo aboro muambe tipa i zi bapatiza. Ri aya: “Wa vura duhe nga mi naabi tire ti kura aregbo nga mi rurungbura, Yekova ninaaundo re na aˈuru dunduko tipa mi naamangasunge anazakigene kindi.”

13-14. Gini akpiapai rengbe ka undo rani ani rẽ tipa sunge?

¹³ Mo wirikipai ti agu akpiapai nga ga agu aboro naima kido kuti Yekova. Baibiri ima hi be agu akpiapai nga ga agu aboro namangisunge  nyanyaki ti ngba ga Yekova sunge. Badungu akpiapai kinaho nga ga gu regbo Yekova anifu maku fuyo ho i animangi gupai ni nayugo gupai nga i ima du na kido kutiko. Ni kpiapai, Yekova afu maku fu Abarayama kinaho ko ambu kpuko ni ka—“ko aina nga ho ko andu ku ho ni ya.” (Eb. 11:8) Yakobo agbia maku kina tingbafuo ta ko kpata na maraika. (Bam. P. 32:24-30) Ho gu riko aboro nga aYisaraere aambeda ni ka rimo ku ringara mokido yo, aboro arengbe ka si ku mbitiyo kinaho aboro motumo azogo nduyo ni ku rogo gu di nga Yaradene.—Yos. 3:14-16.

¹⁴ Oni ima rengba ka gbia undo a ti gu kpiapai nga ga agu aDezire Yekova du ti gi gaani regbo re nga aguyo naima kido kuti Yekova na ki rẽ tipa sunge. Ni kpiapai, wirina du rimoko nga Payton na diako nga Diana agbia undo ti geda yo apai tipa agu awirina nga aguyo naima kiiso gayo sunge fu Yekova, wa aguyo i nafura tipa yo rogo gu kekeapai ninaakura nga “I Afu Tiyo Na Kpotoyo Yo Dunduko.” * Payton aya: “Ho ani aageda gayo apangbanga ni, si adu furani wa ka i ya, ani nabi boro ni niri bawene riahe. Ho ani anaadia regbo ni kaa bi ni, ani anaabihe a nga si naida ani ‘ía Yekova bambiko ko du ni wene ko.’” Ni yangaraha tie, aPayton na Diana aga kurogo gu ba naadu na bakere zingo abatungusipai rogoho. Ya mo mo gedinga gi kekeapai re? Na ya mo mo bingo agu avidio nga Witnessing in Isolated Territory—Australia na Witnessing in Isolated Territory—Ireland nga gu du rogo jw.org? Gi kekeapai na avidio re ima rengba ka undo ro tipa mo ngere tipa agu agene rengbe mo ka kiiso gamo sunge ngbaha.

15. Waigu rengbe wene abakure ka undo rani?

¹⁵ Mo naakoda tiro na agu aboro namaa Kindo ni bambatapai. Si ni taataha furani tipa ani ri gu riahe ani aasadanga ha mbata ya ho du ani ni na agu aboro ninaari gu riahe re ari na kini gbia ngbarago ti ni. Ka ani akodatirani na agu aboro namaa Yekova ni bambata boro rogo gayo raka yo, si nawiraha wa ani ima rengba ka ngera tipa agu agene rengbe ani ka kiiso gaani sunge ngbaha fu Mbori. Arogotise du rimoyo nga Kent na Veronica aima bi gipai re nirengo. Kent aya, “Abakurearani gbiati gaani aborokporo angarasi rani tipa ani asadi gu kura vovo agene nga ga sunge. Ani aye ka ino gupai nga, koda ani tirani na agu aboro nga aguyo nagbata Kindo mbata asarani ani gbia gu kido si aidaha tipa ka asada vovopai.” AKent na Veronica namangasunge awere ni kparakpara abazakigene Serbia yo.

16. A wa yugu yo ho rogo gu ga Yesu kpiapai yo du rogo Ruka 12:16-21, tipagine si aida ani du ti ni na nyemu ka mbupa kuraapai?

¹⁶ Mo mbupa kuraapai tipa Yekova. Anga si naida ani mbupa agu apai dunduko ani agbia ngbarago ti ni tipa ka sa ngbarago ti Yekova te. (Batu. 5:19, 20) Ono tie, ka ani sia ka mbu manga bakere sunge tingba ga Yekova sunge bambiko ani aidanga ka mbupa kura apai ngba tirani te, ani ima rengba ka manga kina gu bangisa ingahe gu kumba du pako rogo ga Yesu kpiapai yo amangihe, nga guko namangisunge nyanyaki tipa kadu na badungu wene ahe ono bangiriko ki go tipa ka berãpa Mbori. (Oni gedi Ruka 12:16-21.) Wirina du rimoko nga Christian naraka France yo aya, “Mi anaafunga gimi regbo na gimi ome fu Yekova nafu gimi aborokporo te.” Ko gbiati diako adiberã tipa ka mangasunge abazakigene. Tipa ka da ti gu sasa re, si aaida i mbu agu asunge i aamangaha. I atona wiri sunge giriso arago tipa si naaundo yo na i awiriki wai kadu na ngbarago zavura ho du yo ni na marã beyo tooni. Ya mo i na ngbarago mbiko i ambupa gu kura ahe tipa ka mangasunge abazakigene? Christian aya, “Ani nagbia bakere ngbarago ti sunge tungusapai  awere na ani nagbia ngbarago ti bi ani abawiriki Ziazia Kekeapai gbiati agu aboro ani akaraga tirani fuoyo i niwirikipai tipa Yekova.”

17. Ginipai rengbe ka ká na ani ti asada ani vovopai gene tungusapai yo?

¹⁷ Mo du na nyemu ka asada gu kura vovo agene nga ga tungusapai. (Amo. 17:16, 17; 20:20, 21) Si aaida Shirley nga nazakigene Amerika yo mangi aˈariapai ti gari sunge tungusapai ti regbo Korona. Ti tonatonaha, ri aduadu na ndundu tipa ka manga dezirepai rogo terefuni. Ono tie, fuo gbia ri rabahe ti gu regbo babi rimbasa aye ku rogo gayo dungurati, ri atona tungusapai na terefuni dedede. Ri aya: “Ti tonatonaha, si aafu kina gunde fere, ono awere mi nagbia ngbarago agbia ti ni nzunzu. Ani nagbia badungu aboro awere kisusi wai ani anaagbiayo ho ani anaatungusapai ni kporo na kporo!”

18. Ginipai rengbe ka undo rani ka si du nga pai kinaho nga gu nasaha ni mbumbuhe furani tipa ani kiisi gaani sunge tungusapai?

¹⁸ Mo moi sasa na ki asadi ka da ti ni. Ho ani agbiatirani ni na akpakarapai, ani nakpara tipa undo na ki berẽ wenengai kurii gupai rengbe ani ka mangaha tipa gupai re. (Snz. 3:21) Sonia nga guri namangasunge ni nazakigene rogo gu badona napepa aboro Romania du Putu yo aya: “Mi naakpinyemu kaa ke gimi asasa ti kpewaraga na ki moi gu kpewaraga re rogo gu ba rengbe mi ka bihe taata rogoho. Mi keke sura agene ue nga gu nandu ku rogo aba ni bakiakia rii gimi mbisa. Ho du mi ni na diaberã si aida mi mangihe, mi naabi agu agene du ue re na ki bihe singia gimi adiaberã nika undo re mi da ti gimi sasa watadu si aundonga re te.” Sonia ninaasada kadu na ruru bipai tipa gari akpakarapai. Ri aya, “Ho apai aˈariatihe ni tipa re, si naida mi bihe singia ai gu ariapai du tipa re re wa ngapa nga gu naká na mi ti da mi ti gimi sasa watadu wa paga nga gu naundo re tipa mi da ti ni.”

19. Waigu rengbe ani ka yugoho nga ani na tambuahe tipa gu weneapai nga gu Yekova namangihe furani?

¹⁹ Yekova nafu maku furani ngba dungu agene. Ani ima rengba ka yugo bakio wai du ani na ngbarago tipa agu amaku re nimanga ani agu apai rengbe ani ka mangaha ka fu taarimo fuko. (Eb. 13:15) Ani ima rengba ka manga badungu asunge ni bakiakia tipa ka kiiso gaani sunge tungusapai, na fuo ho Yekova ima rengba ka fu maku furani ni bakerehe. Rogo aˈuru ni basasa, ani naangeranga angera tipa agene ka ‘ía Yekova ngbaha ka bi ko, ko du ni wene ko.’ Fuoho, ani nika du wakina Yesu naya: “Gi riahe nga manga kina gu pai gu ko akpi nyemu he nakedi re, mi nyasi gako sunge.”—Yo. 4:34.