1-2. Gini apai ani nika sakapai tipaha rogo gi kekeapai re?

WAIGU rengbe mo kadu ka si du nga mo napido he nga gu mo aidaha na omero dunduko tipa si da ono guhe re adanga ti gu regbo mo aidaha ti ni te? Ya mo mo du na gberãrago? Asanza 13:12 nagumba gupai ni rengo nga: “Ima na pa maabangirise nafu kaza ngbaduse.” Ono na ka mo ye ka ino gupai nga, wene nduapai kinaho sa gupai nga ka guhe re danga ti gu regbo mo naidaha ti ni ya? Ka si du wo, si nawiraha wa mo duadu na zerangbaduse na kidu na nyemu ka pidoho.

² Rogo gi kekeapai re, ani nika bi bete abangua arengo nga ga Baibiri nga gu rengbe ka undo rani ani sonosi gu sino nga ga ‘súnguda Mbori’ na ki banda gu sino re. (Mika 7:7) Na fuo gure, ani nika bi abangiriba ue nga gu si aida ani sungudi Yekova rogoho na zerangbaduse tipa ko mangipai. Niyangaraha, ani nika bi agu amaku napido agu aboro du na nyemu ka sungudo Yekova ko mangipai.

3. Ginipai Asanza 13:11 ayugoho furani?

³ Asanza 13:11 nayugo ndu gupai furani si aida ani du ti ni na zerangbaduse. Si naya: “Gu kumuko bi boro be pa enda, si apáya apaya, ono gu boro nadungura he toni toni, si akía akia.” Ginipai ani awirikaha ti gi veresi re? Boro tatamana namangaapai na rubangirise gbiati zerangbaduse na ni nagbia wene surungbaha agbia.

4. Ginipai gu rugute du rogo Asanza 4:18 ayugoho?

⁴ Asanza 4:18 nape gupai furani nga, “ga ruru aboro gene du wa gu imarago nga ga ngbawiso, nakĩ akĩ ki susi ki da ti kina bebere uru.” Gi veresi re nayugo gupai ayugo ziazia nga, Yekova  naundo gako aboro aundo i rugutiyo yeeye na pa gako ringbisapai. Gi veresi re ima rengba ka undo rani a ani rugutirani na pa wai Kristano amanga aˈariapai rogo gani raka yo na ki mbedi gbe na Yekova. Si nadia regbo adia tipa boro mbedi gbe na Yekova. Ka ani wisigi agu arugute sirisiri ani agbiaha rogo Fugo Mbori yo na be gako riigbu na ki nimangipai kutini, yeeye, ani nika sonosa agu asino Kristo adu na ni tiko. Ani nika ino Mbori a wenengai gbe. Ani bingo wai Yesu ayugu gipai re na kpiapai.

5. Gini kpiapai Yesu amangisunge na ni tipa ka yugo gupai nga si nadia regbo adia tipa boro mangi aˈariapai?

⁵ Yesu amangisunge na kpiapai tipa ka yugo wai du gu wene pangbanga nga ga Kindo ani atungusaha wakina wiri tooni tunga nga gu nasona yeeye ngbadu agu aboro yo nakpinyemu rurupai. Ko aya: “Tunga ki ta kura nisono, ka ni [ba rũ tunga] aina nga pa sona ha ya. He nazu ti sende ni sa ha; bambata ha nga kpehe, sisihe nikadu, kikindigi tunga ki du vuru sisihe yo.” (Mk. 4:27, 28) Ginipai Yesu aaida ka gumbaha na gupai re? Gupai ko aaida ka gumbaha nga, a kina wai kurukuru he ninaasona yeeye, si nadia regbo adia a fu gu boro di gu pangbanga nga ga Kindo kugume ni mangi aˈariapai. Ni kpiapai, ho gaani abawiriki Ziazia Kekeapai ambeda ni na Yekova gbe, ani natona ka bi gu badungu wene aˈariapai i namangihe. (Ef. 4:22-24) Ono si naida ani tingidi gupai nga, Yekova du nasa gu tooni tunga re si sono.—1 Kor. 3:7.

6-7. Ginipai ani awirikaha ti gu gene Yekova ambakadi kpotosende ngbaha?

⁶ Rogo agu apai yo dunduko Yekova amangaha, ko nayugo zerangbaduse na kini di gu regbo ko aidaha tipa ka manga gako sunge. Ko namanga gipai re wo tipa ka ye na taarimo kuti rimoko na ka undo kura aboro. Ni kpiapai, ani bingo wai Yekova aambakada kpotosende yeeye tipa aboro.

⁷ Ho Ziazia Kekeapai asakapai ni tipa wai Yekova ambakadi kpotosende, si nafura tipa wai ko aringbisi “bakiaha,” wai ko amoi “amburu he,” na wai ko amoi “mbia tukpu he.” (Eyo. 38:5, 6) Na zavura ko adi regbo adia tipa ka wisigo gako fuo sunge. (Bam. P. 1:10, 12) Mo berẽnga pa wai amaraika adu ho i aabi ai gu vovo he ni Yekova aambakadaha. I aima du na bakere  ngbarago! Mbiko gupai re, i atona ka “ngbiko ni ngbarago.” (Eyo. 38:7) Ginipai ani awirikaha ti gipai re? Si aima dia dungu agarã tipa Yekova mbakadi kpotosende, akerekuru, gbiati rakirakiahe dunduko, ono ho Yekova abi agu ahe ni dunduko ko ambakadihe, ko aya, si “ni wene he gbe.”—Bam. P. 1:31.

8. Ginipai ani nika wisigopai tipaha awere?

⁸ Agi akpiapai ani nabihe re nayugo gupai furani nga, badungu arugute kina rogo Fugo Mbori yo nayugopai furani tipa ani du na zerangbaduse. Ani nika bi abangiriba ue awere nga gu si aida ani du na nyemu ka pido Yekova rogoho ko mangipai.

9. Gini kura bangiriba sa si aida ani sungudi Yekova rogoho tipa ko mangipai?

⁹ Si naida ani sungudi Yekova asungudo tipa ko karagapai kuti gaani akparakpee. Ho ani amanga kparakpee ni tipa ome ka hi kpakarapai watadu ho ani amanga kparakpee ni tipa undo ka mbu manga gupai Yekova asogaha, ani ima rengba ka berã gupai nga, Yekova nadia gbanga regbo adia ka karagapai kuti gaani akparakpee. Tipagine Yekova akaraganga pai ti ni kuti gaani akparakpee dunduko ni kina ipo ya?

10. Tipagine si aida ani sungudi Yekova ti ni na zerangbaduse ko karagapai kuti gaani akparakpee?

¹⁰ Yekova nadegatuko adega wenengai kuti gaani akparakpee. (Tam. 65:2) Ko nabi gu gaani akparakpee naye ngbadurani yo ni gu gopai nayugo gupai nga ani na idapase kuti ko. (Eb. 11:6) Ho ani amanga kparakpee ni fu Yekova ko undo rani ani mangi gupai nasa ngbarago tiko, ko naida ka bi gupai nga, ani na nyemu ka manga ome tipa ka manga gupai ko akpinyemuhe. (1 Yo. 3:22) Sidu, ho ani asana Yekova ni tipa ko undo rani ani mbu manga gupai ko asogaha, si ima rengba ka ida ani du na zerangbaduse na ani kini mangi ai gupai rengbe ani ka mangaha tipa ka manga ariapai. Yesu aundo rani ani rugutirani na gupai nga, kura gaani akparakpee kinaho ani arengbanga ka gbia karagapai kutini ni kina ipo ya. Ko aya: “Oni sana he tipa he, i ki fu he fu roni; oni gbata ha, oni ki bi he abi; oni ngoka ngbadimo, i ki uru he fu roni. Bambiko gu ni nasana he tipa he ni adía ha adia; gu ni nagbata he ni abí he abi; gu ni nangoka ngbadimo i aúra ha fu ni.” (Mt. 7:7, 8) Ho ani apekafuo gi rugute re ni na kini “kpári akpara dedede kindi,” ani ima rengba kadu na gu kido nga, gu Barani du ngbangbaturũ yo nadegatuko adega kuti gaani akparakpee na ko nika karagapai akaraga kuti ni.—Koro. 4:2.

11. Waigu AEbere 4:16 narengbe ka undo rani ho si narengbe kaa ngera ni bangirani wa karagapai kuti gaani akparakpee nadia regbo adia?

¹¹ Wa vura duhe nga, si ima rengba kaa ngera bangirani wa karagapai kuti gaani akparakpee nadia regbo adia, Yekova ima kidohe nga ko nika karagapai akaraga kuti ni ti “rago zingo” watadu ti wene regbo. (Oni gedi AEbere 4:16.) Sidu, ka ani ya berẽnga gupai nga, Yekova ima manga ingahe ka si du nga ko akaraga nga pai kuti gaani akparakpee niipo kuti wai ani aida ko karagaha te. Ni kpiapai, badungu aboro aima digo ni kpari tipa ga Mbori Kindo tipa dungu agarã tipa si ye ka digiso gi sino raka re kusayo. Zavura Yesu aima pe gupai nga ani naamanga kparakpee amanga tipa gipai re. (Mt. 6:10) Ono tie, si rengbe kadu ni bakerepa mungo ka ani zanga gaani idapase kuti Yekova mbiko digido zegino ayengo wa gu ani aaberãha nga si nika ye te! (Abak. 2:3; Mt. 24:44) Tatamana nasarani ani naapido Yekova na kini kpari fuko ni idapase nga ko nika mangapai amanga kuti gaani akparakpee. Digido zegino nika da ti kina gu regbo rẽarẽ mbiko Yekova ima sia “gu uru na gu saa” si nika da ti ni. Na gu regbo re nika ngia bawene regbo fu aboro dunduko.—Mt. 24:36; 2 Pet. 3:15.

12. Gini regbo si narengbe kadu ni bambumbuhe furani tipa ani du na zerangbaduse?

 ¹² Si ima rengba ka ida ani du na zerangbaduse gbiati hipai tipa ka hi iraira mangaapai. Dedede, aboro rogo gi zegino re ninaamanga pai gbegberẽ na agu aboro du rangi kpotoyo kia, ngbatungayo, gayo sino mangaapai, watadu gu ba i aye rogoho. I namanga agu akurayo gbegberẽ mbiko i ni gbarĩgbarĩ yo watadu i na gu kaza nga ga berã. Badungu ga Yekova aboro ima hi iraira mangaapai mbiko gu gayo aida du mburuhe rii Ziazia Kekeapai. Ho i amangapai ni na ani gbegberẽ, si naida ani tingidi gupai Yesu agumbaha. Ko aya: “Gu ni nikaru ki da ho ragoho ka diga ni, ni abáta abata.” (Mt. 24:13) Ono ginipai rengbe mo ka mangaha ka mo inipa boro nga gu ni mangi kere ingapai rogo dungurati? Fuo abaakumba inipai tipa gupai re, ya mo mo ambu apai ku be Yekova kini sungudi abaakumba na zerangbaduse tipa i mangipai kutini ngba ga Yekova gene? Ginipai si narengbe ka ida abaakumba mangihe ho boro amanga kere ingapai ni?

13. Ginipai Yekova aida abaakumba mangihe ho boro namangi kere ingapai ni?

¹³ Ho abaakumba ainopa kere ingapai ni rogo dungurati, i namanga kparakpee tipa “gu tatamana naye ari yo” tipa gupai nga i ini ga Yekova bipai tipa gupai re. (Yak. 3:17) Gayo sasa nga ka undo gu boro mangi ingapai re tipa ni karaga ti ni “ngba gani iraira gene.” (Yak. 5:19, 20) Na berewe, i namanga ai gupai rengbe yo ka mangaha tipa ka banda dungurati na ka fu wasa fu agu aboro gbiatiyo na gberãrago. (2 Kor. 1:3, 4) Ho abaakumba naini gupai ni nga boro ima manga kere ingapai, si naida i ini agu arengo mbata dunduko duho tipa gupai re, gipai re ima rengba ka dia bete regbo. Na abaakumba namanga kparakpee na ki fu gu rugute du mburuhe rii Ziazia Kekeapai fu gu boro mangi kere ingapai re na ki rugu ni “rogo ruru ringbisahe.” (Yere. 30:11) Wa vuru duhe nga abaakumba agbisigongo pai te, i amanganga diaberã a ni wiri ipo te. Ho abaakumba apekafuo agu arugapai ni naye be Yekova, aboro dunduko rogo dungurati nagbia bakere undo. Ono tie, zavura ho abaakumba namangi pai ni sa gupai mangi ngba wene gene, boro wenesa ima rengba kadu kindi na gberãrago. Ka singia gipai re nga rengo tipa ro, ginipai rengbe mo ka mangaha ka zogosa bete gamo gberãrago?

14. Gini kpiapai nga ga Ziazia Kekeapai rengbe ka undo ro mo gbia wasa ka si du nga kuaro Kristano imisi ro?

¹⁴ Ya mo boro amangingo ro gbegberẽ isoke zavura gu kuaro oni airisombori na ni? Mo ima rengba ka bi wene akpiapai rogo Fugo  Mbori yo nga gu nayugopa wai furani rengbe ani ka pido Yekova ko mangipai kuti iraira mangaapai. Ni kpiapai, wa vura duhe nga awiriba Yosefa amangipai na ko ngba iraira gene, ko aambunga gayo ingapai si sa ko ko da ni zingizingi boro te. Kuba gure, ko aamanga gupai omeko arengbe na ni tipa ka iriso Yekova, na Yekova aima fu mosoro fuko tipa gako zerangbaduse gbiati hipai. (Bam. P. 39:21) Niyangaraha, Yosefa aima du na rengba ka mbupai fu agu aboro naimisi ko na ko ki ima bi wai Yekova afu maku fuko. (Bam. P. 45:5) Wakina Yosefa, ani nagbia wasa agbia ho ani ambeda ni na Yekova na ki mbupa ruru sarangbanga kubeko.—Tam. 7:17; 73:28.

15. Ginipai naundo kura wirina sa ri hi iraira mangaapai na zerangbaduse na ki gbia gari zereda nga ga berãse yo berewe?

¹⁵ Rengo ngaha nga, anga iraira mangaapai dunduko du ni kerehe wa gu Yosefa agbiatiko na ni te, ono wa vura duhe wo, ani dunduko nidu adu na gberãrago ho i amanga rani ni gbegberẽ ngba kura agene. Ho du kpakarapai ni dagbarani na boro, kodihe na gu boro airisongo Yekova ya, ani nagbia undo ni bakerehe nimanga ani pai kuti agu arugute nga ga Ziazia Kekeapai. (Frp. 2:3, 4) Oni bingo kpiapai sa. Wirina ni dee adu na bakere gberãrago ho ri aini gupai ni nga kurari basunge yo aapeka gbegberẽ apai nga gu naangianga rengo ya tipa ri fu kura aboro. Kuba gupai nga gu wirina re zingi niipo, ri adi regbo ka berãkurii ga Yesu kpiapai. Ho aboro aagberã ngbayo yo ni fuko, ko aagberãnga ngbako yo fuyo te. (1 Pet. 2:21, 23) Na gipai re berãri yo, ri adiberã ka zanga mangapai kuti gupai namangi re. Kusa, ri aye ka ino gupai nga, gu kurari basunge yo re aawoka ni kerehe na ri adu rogo bakere gberãrago. Na gu wirina re ada kuti gupai nga, gu kurari basunge yo re aaidanga aida ka pe gbegberẽ apai tipa ri te. Sidu, gu wirina re adu na bakere ngbarago mbiko ri adu na zerangbaduse kini hi iraira mangaapai, na ri agbia gari zereda berewe nga ga berãse yo.

16. Ginipai rengbe ka fu wasa foro ka mo aahi iraira mangaapai? (1 Petero 3:12)

¹⁶ Ka si du nga mo nahi iraira mangaapai watadu gu kura apai nga gu nafu gberãrago foro, mo tingidi gupai nga, Yekova nagbe agu aboro fuoko du “kpotoyo yo na rungo.” (Tam. 34:18) Ko ima kpinyemuro tipa gamo zerangbaduse na pa ba mo gamo tindiro ku auru ko. (Tam. 55:22) Ko nga Basapungbanga gi kpotosende re dunduko. Ko nabi agu apai dunduko namanga. (Oni gedi 1 Petero 3:12.) Ka mo aandu  rogo akpakarapai nga gu adunga rengba bero ka mangapai kutini ya, ya mo mo adu na nyemu ka pido Yekova ko mangipai?

17. A wa duhe rogo Yesaya 30:18, gini kidohe Yekova nafuhe furani?

¹⁷ Barambeda, gu Barani du ngbangbaturũ yo nika fu badungu amaku furani vurube gako Kindo. Yesaya 30:18 naya: “Yekova nasunguda roni ti ni ka du na undahe fu roni; si du du ko ti ni ni kiisikiisi pako ka ina pai fu roni. Bambiko Yekova nga Mbori ruru sarangbanga; maku du fu agu yo dunduko nasunguda ko.” Agu aboro nasungo Yekova tipa ko mangipai nika gbia badungu amaku awere na rogo gu vovo zegino nika ye.

18. Gini amaku napido rani kumbatayo?

¹⁸ Ho ga Mbori aboro nika rimo ni ku rogo vovo zegino, i ahinga agu abakabangirise na akpakarapai i agbia tiyo na ni areme berewe te. Iraira mangaapai gbiati aima adunga ho berewe te. (Yugo. 21:4) Ani adunga na bakabangirise tipa agu ahe ani aidaha te, mbiko ahe nika du kpaima. (Tam. 72:16; Yes. 54:13) Si nika du ni bakerepa maku nirengo!

19. Ginipai Yekova ambakada rani awere tipaha yeeye?

¹⁹ Yekova nambakada rani awere tipa ani raki tii gako zogarago niundo ko rani ani dibe gaani gbegberẽ mangaapai na kini sonosi agu asino nafu ngbarago fuko. Ka rago gberẽnga tiro na mo ki mbu iriso Yekova ya. Bawene raka naye kumbatayo! Wa ani angera kumbatayo tipa gu bawene regbo re, ani du na ngbarago kini sungudi Yekova na zerangbaduse tipa ko mangi agu apai ko nagumba gupai nga ko nika mangaha!