HO TOÑI aye ni berewe, gu dee re azingi berewe na ri . Wai du Toñi amangipai? Ri aya. “Si aima du ni kpakarakpakaraha. Ndupai adunga ho ri senge re te.” Wa si avura duwo, Toñi aho mbupai berewe na ki gumba gupai fugu dee re nga rima ino pa gu rungo du ri rogoho.

Ka mo angia Toñi, mo naberãha nga ka mo amangipai wai? Ka mo aasadi ka yugo gu sino nga ga zera? Ka si adu foro ni kpakarapai mo banda tiro ti zinga? Zanga kango, si arengbanga kadu taata boro banda tini ti zinga ti ngbatunga gu regbo furayo tipaha kuari re te. Ho du ani ni rogo gberãrago watadu ho boro nagbata rani ni, si ni kpakarapai ani nye ni bayee rani.

Ono tie, Ziazia Kekeapai nangarasa aKristano nga i du ni bayee aboro. Nirengo, Fugo Mbori nakoda gu sino re na tatamana. Yakoba asanahe nga, “Da du ni iratatamana, ni boro inahe dagba roni yo? Ni yúgu gani mangaapai rogo wene sinoni ni gu umbasiti nga ga tatamana.” (Yak. 3:13) Ngba gini gene du, padu ni bayee ayugopa gu tatamana naye ariyo? Na ginipai rengbe ka undo rani ani sonosi gu sinombori re?

Bayee boro ima rengba ka zeresa kpakarapai. “Zezeredi karagapai nazeresa zinga, ono iimi fugo nazingisa zinga.”—Snz. 15:1.

Karagapai ni zinga nasa kpakarapai si nandu kina kumbatayo. (Snz. 26:21) Ono tipa gu karagapai du ni bayee he tigaha, si nazeresa apai. Na si rengbe arengba a ka zeresa ngbadu gu boro zingi.

Toñi ni tiri aima bi ngbatunga gupai re. Fuo gu dee re bi ga Toñi karagapai ni zera, ri ati ni kpee. Ri ape gupai nga ome gari akpakarapai na gu nga ga gari aboro kporo ima fu riri. Toñi afu wene dezirepai, na i ki tona ka wisigo Ziazia Kekeapai na gu dee re, agi apai re dunduko amangi mbiko ri adu ni zezeredi boro.

Du bayee rengbe ka sarani ani du na ngbarago. “Aboro maku nga bayee aboro, bambiko i adú ni adikumbo zegino.”—Mt. 5:5.

Tipagine du du bayee boro tini na ngbarago? Ni ukadi yo tiyo ni zera, dungu agu aboro naadu mbata ni kere aira zinga awere na ngbarago. Gayo raka ima ngba, na ima inoho nga wene apai napido yo kumbatayo. (Koro. 3:12) Adolfo, du nga babi adungurati Spain yo, natingida pa wai gako raka adu mbata fu ko ini rengo.

Adolfo aya, “Mi aainongo ku wari gimi raka aandu na mi kuhoni te, mi adu ni kere zingizingi boro gbe, na si ki sa kura abadia ngbare i naagunde agunde be gi mangimangi apai ni ome. Niyangaraha, ariapai aye ka manga. Ti regbo kpata, I arupu re na sape bara sita na kurere kiga mi ki mbedi ka kpi.”

Ono tie, awere, Adolfo nayugopai fu kura aboro rogo fugo yo na mangaapai i du ni bayee aboro. Dungu aboro na ngbarago kadu patiko mbiko gako wene sino. Adolfo aya ko na ngbarago tipa gu ariapai ko amangihe. Na ko nafu bakere tambuahe fu Yekova tipa pa undoko ko sonosi gu sino nga ga du bayee.

Du bayee nasa Yekova ko du na ngbarago. “Ako wire, mo dú ni iratatamana, ka fu ngbarago fu kpotore yo, ya mi karaga pai fu gu ni nasoa pai kuti re.”—Snz. 27:11.

Ka pepai ngba kura gene, vura Yekova nga Bakitingbanga nasoapai kuti ko. Mbori na wene ndupai beko ka zinga mbiko Satana nata inoaino ni senge ko, ono wa vura duhe wo, Ziazia Kekeapai nafura tipa Yekova ya ko “ni bayee ko tipa zinga.” (Gate 34:6) Ho ani amanga asadatise ni ka wirika wai du Mbori ni bayee ko tipa zinga, ani napekafuo gu tatamana nga gu nasa ngbarago ti Yekova ni bakere he.—Ef. 5:1.

Gi zegino du awere re ima hi be zingizingi aboro. Ani ima rengba ka gbiatirani na agu aboro nga “airaruka, airarekangose, agberẽngba yo, . . . airasoapai, airazanga rugatise, airaerã.” (2 Tim. 3:2, 3) Wa vura duhe wo, si aidanga gure ká na Kristano ti sonosa gu sino nga ga zera te. Fugo Mbori natingida rani na gupai nga “gu tatamana naye ari yo si du . . . na zera, ki du yee.” (Yak. 3:17) Ka ani ayugo gu toro nga ga zera na rugatinapai, ani nayugo gu gopai nga ani na gu tatamana naye be Mbori. Ngbatunga gu tatamana re nika sarani ani karagapai na zera ho boro agbata rani ni na si nika sarani anidu mbembedi na Yekova du nga Mburu gu tatamana adunga na digidoho ti ni ya.