1, 2. (a) Tipagine si aidanga ti ni si iriwo tirani ho ani agbiatirani ni na abakabangirise ya? (Oni bi gu sura duti tonatonaha.) (b) Gini apai ani nika wisigoho rogo gi kekeapai re?

ANI naraka ti kere regbo fudifudiapai. Satana ni zingizingi ko na ‘ko nata kina wai bahu nata ki nipoi, nigbata boro ka rita ni.’ (1 Pet. 5:8; Yugo. 12:17) Sidu, si airiwongo tirani te nga kura aregbo kinaho ani nga ga Yekova amoyambu nagbiatirani na fudifudiapai. Gu kurapai berewe nga, ti gu kura aregbo, zavura gu ga Mbori amoyambu naadu bakuru kusayo, wa Bakindo Davide, i aduadu na ‘rungo kpotoyo yo.’ (Tam. 13:2) Oni tingidi gupai a nga, gu mokedi nangia Pauro aduadu na “baka bangirise tipa akanisa dunduko.” (2 Kor. 11:28) Ono ginipai rengbe ani ka mangaha ka si du nga bakabangirise fu rii omerani?

² Gu Barani nga boro nyemuse du ngbangbaturũ yo aima undo gako amoyambu bakuru kusayo, na areme, ko ima rengba ka undo rani a ani dibe gaani fudifudiapai watadu gaani abakabangirise. Ziazia Kekeapai nangarasa rani ki ya: “Oni bá agu apai nafuda roni ku auru ko yo; mbiko ko naberã pa roni.” (1 Pet. 5:7) Ono wai tie rengbe mo ka manga gipai re? Ani bingo agene biama rengbe mo ka mangaha ngbaha, ni manga mo gu kparakpee naye kina boro ngbaduro yo, ni geda mo Fugo Mbori na kini berẽkuriihe, ni sana  mo Yekova tipa gako ziazia toro, na ni gumba mo agu apai nafuda ro fu gu boro mo nakido kutini. Wa ani nikaa wisigo agi agene biama re, mo ngere tipa agu apai rengbe mo ka mangaha si undo ro rogo fudifudiapai.

3. Wai rengbe mo ka “bá ga tindiro ku auru Yekova” rogo kparakpee yo?

³ Gu bambatapai rengbe ani ka mangaha nga ka fura na Yekova rogo kparakpee yo. Ho mo agbia tiro ni na agu akpakarapai naye na gberãrago watadu bakabangirise, mo kusuko ngbaduro yo fu gu Bamo nga boro nyemuse du ngbangbaturũ yo. Gu bake papara Atambuahe nangia Davide akpari fu Yekova ki ya: “Ako Mbori, mo yé turo sa gi kpetambuahe.” Na ko ki pe gupai berewe nga: “Mo bá ga tindiro ku auru Yekova, ko asóngoda ro.” (Tam. 55:1, 22) Fuo manga mo agu apai dunduko rengbe mo ka mangaha ka diabe kpakarapai, kparakpee fu Yekova nika undoro berewe bakere gbe ka mo naabakanga bangiro ya. Ono wai rengbe kparakpee ka undo ro ka abakabangirise funga rii omero ya?—Tam. 94:18, 19.

4. Ho du ani ni rogo bakabangirise, tipagine du kparakpee ti ni na nyanyakipaha gbe?

⁴ Oni gedi AFiripoio 4:6, 7. Yekova ima rengba ka gia gu gaani kakaka kparakpee gbiati akpesarawatise naye kina boro ngbadu rani yo. Wai du rengbe ko ka mangaha? Ni fuko zereda furani nga gu rengbe ka dia abakabangirise kusayo berãrani yo. Badungu aboro aima gbia gu zereda re. Ti regbo fudifudiapai, Mbori aundo yo i gbia gu zereda nagasi rugatinapai dunduko. Gupai re ima rengba ka manga foro a. Gu “zereda nga ga Mbori” rengbe arengba ka diabe ai gu kpakarapai ka mo du rogoho. Mo ima rengba kadu na kido kuti gu ga Yekova kidohe nga: “Ka mo gúnde nga ya, mbiko mi du na mo, ka mo kío nga ya, mbiko mi nga ga Mbori; mi anyákasa ro, mi aúnda ro.”—Yes. 41:10.

5. Wai du rengbe Fugo Mbori ka ye na zereda ku berãrani yo?

⁵ Gu ue gene rengbe ani ka gbia zereda berãse yo ngbaha nga ni geda ani Ziazia Kekeapai na kini berẽkurii gupai ani agedaha. Tipagine du gipai re ti ni na nyanyakipaha? Ziazia Kekeapai na apai rogoho nga gu rengbe ka undo ro mo né agu apai naye na abakabangirise, watadu mo sovura kuti abakabangirise. Ka mo bingo gu rengo nga, Fugo Mbori ni guhe nafu undo na zereda napaa taata ya, bambiko si na afugo tatamana nga ga Bakusiahe rogoho. Wa mo nikaa berãkurii agu aberãpai nga ga Mbori uru watadu yuru, na kini bi wai rengbe mo ka mangasunge ngba wene gene na agu arugute du rogo Ziazia Kekeapai yo, mo nika gbia ngarasaro bakere gbe. Yekova naringbisa geda Fugoko kuti du “nyanyaki ki du na bakere erã” na ki zanga ‘gunde.’—Yos. 1:7-9.

6. Gini wenepai rengbe afugo Yesu ka mangaha na mo?

⁶ Ani nabi ga Yesu afugo wasa rogo Fugo Mbori yo. Afugo Yesu gbiati gako ayugopai afu wasa afu fu agu aboro naagia ko. Badungu aboro aaye fuoko bambiko ko azeresa kpoto agu aboro yo naadu na rungo, ko anyakasi agu aboro naadu ni rurungbura yo, na ki fu wasa fu agu aboro naadu na gberãrago. (Oni gedi Matayo 11:28-30.) Ko ayugu gupai nga ko aaida aboro du wenengai rogo toro yo, berãyo yo, na ti kpotoyo a. (Mk. 6:30-32) Ga Yesu kidohe nibipa undo namangasunge amangaha areme a. Mo ima rengba ka gbia undo be Yesu a wa agu amokedi ko ata na yo agbiaha. Anga si naida mo du mbata kina pati Yesu, mo kini ru ka gbia undo te. Wa du Yesu ni gu bakindo du ngbangbaturũ yo, ko na nunga aboro tiko kindi. Sidu, ko rengbe arengba ka ‘undo ro’ ho du mo ni rogo bakabangirise na ki ‘undoro ti regbo zingo’ a. Nirengo, Yesu ima rengba ka undo ro mo sovura kuti fudifudiapai na ko rengbe arengba ka fu maabangirise  gbiati ngarã foro.—Eb. 2:17, 18; 4:16.

7. Ka mo sana Mbori tipa ziazia toro, ko kini fuhe foro, wai du ka mo gbia undo?

⁷ Yesu akidohe nga gu Barani du ngbangbaturũ yo azanganga fu ziazia toro fu agu aboro nasanahe tipaha te. (Rk. 11:10-13) Gu biata he nga gu du na ome ti ni rengbe ka undo rani ani mbu bakere bakabangirise nga, zuzu toro. Gu wene asino ga Mbori zaaza ome mangaapai akusaha nayugo kina boro pa wai du Mbori na tanduapai dũ. (Oni gedi AGaratio 5:22, 23; Koro. 3:10) Wa mo nikaa sonosa zuzu gu toro re, mo nika du na wene pagume dagbaro na akuaro. Sidu, mo nika bi gupai nga gu dungu apai ka rengbe ka ye na bakabangirise adunga te. Mo berãnga ni wiri guruhe kurii wai zuzu toro nika undo ro.

8-12. Wai du rengbe ga Mbori ziazia toro ka undoro mo sovura kuti bakabangirise watadu mo bandatiro ti fudifudi apai?

⁸ “Nyemuse, na ngbarago, na zereda.” Ho mo amanga ome ni kaa mangapai na aboro ngba irisa, mo nika bi gupai nga mo ima rengba ka sovura kuti agu apai nafuda ro. Wai du duhe wo? Sidu, wa mo nikaa yugo gu nyemuse nga ga awirina, wesewese nyemuse, gbiati irisa, mo nika né agu apai rengbe ka ye na bakabangirise kutiro.—Rom. 12:10.

⁹ “Hipai, na mangapase, na weneringise.” Mo nadu na zezeredi pagume dagbaro na akuaro ni irisa mo gu rugute nga: “Ringironi ngbá angba fu akuaroni, yee kpotoroni yo, oni nivú akuaroni avu.” (Ef. 4:32) Ka mo amangaha wo, mo nika banda tiro ti agu apai rengbe ka ye na bakabangirise kutiro. Berewe a, mo ima rengba ka mangapai ngba wene gene ho agu apai akura ni naye be gu zangarengba nga ga aboro.

¹⁰ “Du ngangarã,” watadu du na idapase. Areme, ani nidu ni fudifudi rani berãrani yo dedede mbiko bakabangirise tipa marã watadu aũzegino. (Snz. 18:11) Mbiko agi apai re, nyanyaki idapase kuti gupai nga Yekova nangera angera fuo aboro nika undo ro mo dibe bakabangirise. Wai du duhe wo? Mo ima rengba ka banda tiro be bakere bakabangirise ni irisa mo gu rugute ga Mbori toro adu kugii gu mokedi nangia Pauro ko kehe ki ya, ‘agu he dube aboro rengbe bangiriyo.’ Ko agbia kurapai kuti gure nga: “Bambiko [Mbori] aya tigako, ‘Mi ahe nga unda ro wa sa te, mi ambú nga ro a wa sa te.’ Si du ani aerã ti ni wenengaĩ ki ya, ‘Gbia nga gimi mounda; mi agúnde nga wa sa te; gini pai boro ka manga re na ni?’”—Eb. 13:5, 6.

¹¹ “Zera, rugatise.” Mo berẽnga kurii wai duhe foro ni wenepai kadu na agu asino re. Sidu, mo nika bandatiro ti agu apai rengbe ka ye na bakabangirise kutiro, na mo nika gbia undo a ti zanga mo du na ‘zinga, erã, paa, gbiati gbegberẽ afugo.’—Ef. 4:31.

¹² Nirengo, si naida mo du na umbasitise tipa kadu kutii “gu nyanyaki be yo nga ga Mbori” na ka ‘bá agu apai nafuda ro ku auru ko yo.’ (1 Pet. 5:6, 7) Ono wa mo nika sonosa gu sino nga ga umbasitise, Mbori nika ida na mo na ki undo ro. (Mika 6:8) Ka mo inipa agu apai rengbe mo ka mangaha, na agu mo arengbanga ka mangaha ya, mo dunga na bakere abakabangirise te, mo nikido kina kuti Mbori.

13. Ginipai Yesu aaida ka pehe ho ko ayani wẽ: “Ka oni wisigi nga pai” watadu ka oni bakingo bangironi ya?

¹³ Rogo Matayo 6:34 (oni gedihe), ani nabi ga Yesu nyanyakipa rugute nga gu naya: “Ka oni wisigi nga pai” watadu ka oni bakingo bangironi ya. Si ima rengba kadu ni mbumbuhe ka irisa gi rugute re. Ginipai du Yesu aaida ka pehe ho ko aya ni wẽ: “Ka oni wisigi nga pai” watadu ka oni bakingo bangironi ya? Si tie ziazia nga, anga gupai ko aaida ka pehe nga ka ga Mbori moyambu bakingo bangirini  kandara tooni rogo raka ya te; ani ima bi afugo Davide gbiati Pauro rii gipai re. Ono Yesu aundo gako abawiriki i rugutiyo na gupai nga bakere bakabangirise arengbanga ka mbakadapai te. Agu akpakarapai nga ga uru kinaha rengbe tipaha, sidu, si aidanga aKristano ye na agu abakabangirise nga ga agu apai namangi kusayo watadu nika manga kumbatayo kurii agu du awere te. Wai du rengbe mo ka mbu bakere bangirise mbiko gia mo sangba ga Yesu rugute?

14. Wai du rengbe mo ka sovura kuti gu bakabangirise naye mbiko agu apai mo amangihe kusayo?

¹⁴ Boro ima rengba kaa bakabangirini mbiko agu apai watadu agu aingahe ni amangihe kusayo. Sangbakpotoniyo ima rengba kaa mbusa ni mbiko gupai ni amangihe kusayo, zavura badungu agarã kusayo a. Ti kura aregbo, Bakindo Davide aabihe nga gako ‘irairapai aima fu riko.’ Ko aya: “Mi napaa apaa ku ari be gu fudifudipai du kpotore yo.” (Tam. 38:3, 4, 8, 18) Ginipai si aaida Davide mangihe ti regbo wa gure? Ginipai ko amangihe? Ko adu na kido kuti ga Yekova inapai na mbupai. Ko aya na bakere kido: “Boro maku nga gu ni vu yo ni ti gani samungu.”—Oni gedi Atambuahe 32:1-3, 5.

15. (a) Tipagine si aidanga mo du na bakabangirise ti ni tipa agu apai namanga awere ya? (b) Gini apai rengbe mo ka mangaha ka zogosa bete abakabangirise? (Oni bi gu sanduki nga “Agu Apai Rengbe Mo ka Mangaha ka Zogosa Bete Bakabangirise.”)

¹⁵ Ti kura aregbo, mo ima rengba kadu na bakabangirise tipa agu apai namanga awere. Ni kpiapai, ho Davide ake Atambuahe 55 ni, ko aagunde agude tipa ungako. (Tam. 55:2-5) Ono wa si avura duwo, ko aambunga bakabangirise si gberesipa gako kido kuti Yekova te. Davide apeke gako akparakapai rogo kakaka kparakpee yo fu Yekova, na ko aima ino a nga si ni nyanyakipa pai ka mangapai kuti gupai naaye na bakabangirise kutiko. (2 Sam. 15:30-34) Mo wirikipai be Davide. Kuba gupai nga ka mbu bakabangirise si furii omero, mo mangi ai gupai ka mo mangihe ka diabe gu kpakarapai dumo rogoho, na mo ki mbu apai ku be Yekova.

16. Wai du rengbe rogo rimo Mbori yo ka nyakasa gamo idapase?

¹⁶ Kura aregbo kinaho Kristano abakabangirini tipa agu apai rengbe ka manga kumbatayo. Ono tie, si aidanga mo naabaka bangiro tipa agu apai mo ainongo pai tipaha ya te. Tipagine? Bambiko dedede, apai naayengo ki gberẽ ki da kuti wai ani naagunde nga si nika da te. Kurigure, pai ho ka gasi gu Mbori rengbe mo ka ba gamo fudifudiapai ku auru ko te. Rogo rimoko yo nga “Ko Nasa Pai Si Du.” (Gate 3:14) Wai du gu rimo Mbori re na bakere rogoyo ti ni nakido rani nga, gupai Mbori naringbisihe tipa gako amoyambu nika daada ti rengo. Mo rengbe arengba kadu na kido nga Mbori ima rengba ka fu mosoro fu gako ruru aboro na ki undoyo i sovura kuti bakabangirise tipa gupai namangi kusayo, gu namanga awere, na gu nika manga kumbatayo.

17, 18. Wai rengbe wene fugodagbase ka undo ro mo sovura kuti bakabangirise?

¹⁷ Gu biama gene rengbe ka undo ro mo sovura  kuti bakabangirise nga fura mo na gu boro du mo na kido kuti ni. Gamo badiarogatise, mbembedi bakureamo, watadu bakumba rogo dungurati ima rengba ka undo ro mo gi tiro na gupai namanga ro gbe. “Rungo boro ku kpotoni yo nazoga ni ku sande, ono wene fugo nafu ngbarago fu ni.” (Snz. 12:25) Ndikidi fugodagbase ima rengba ka undo ro mo gi tiro na gupai naye na bakabangirise kuti ro na mo ki ini wai ka sovura kutini. Ziazia Kekeapai naya furani wẽ: “Yo adu nga rugapai ni ya, apai yo na kina gberãrago, ono bambiko rimbasa aboro rondo apai ni nyakasinyakasi he wenengaĩ.”—Snz. 15:22.

¹⁸ Yekova naundo aKristano a i sovura kuti bakabangirise vurube agu adunguratise namanga na aposo dunduko. Ho du mo ni badunguratise yo, mo nakoda tiro na akuaro aidipase nga aguyo naberã paro na kini idi ka ngarasa ro. (Eb. 10:24, 25) Ngbatunga gu ‘wasa dagba tise’ re nika ngarasaro na ki saha foro taata mo sovura kuti abakabangirise.—Rom. 1:12.

19. Tipagine rengbe mo kadu ti ni na kido nga gamo pagume na Mbori nika nyakasa gamo idapase anyakasa?

¹⁹ Mo bingo wai bakumba rogo dungurati Canada yo awiriki pa wai duhe ni nyanyakipa pai ka ba agu apai nafuda ko ku auru Yekova. Ko aamangasunge bayugupai nga gu sunge naafu bakere mbugo fuko, na berewe a, ko anaasovura kuti gu kaza naye be bakere bakabangirise. Ginipai naundo gi wirina re? Ko aya, “Gupai naundo re aundo gbe mi sovura kuti bakabangirise nga, manga bakere asadatise ka nyakasa gi pagume na Yekova. Gu undo boro agbiaha be ndikidi abakure gbiati agu awirina du rogo dungurati na nyanyakipaha ti regbo fudifudiapai. Mi naape kina boro gupai namanga re nzunzu fu diare. Agu aboro du ani na yo ni abaakumba rogo dungurati gbiati gaani babi adungurati aima undo re ni bakerehe mi naabi apai ngba kura agene a. Mi aima gbia undo be amunganga a, na mi ki aria gi regbo mangaapai, na ki moi regbo tipa kaa ongoda na kini mangi mangonvo. Tooni tooni, mi atona kadu wenengai. Ho du apai ni nga gu mi arengbanga ka mangapai kutini ya, mi nambuhe ku be Yekova.”

20. (a) Wai rengbe ani ka ba agu apai nafuda rani ku auru Mbori? (b) Ginipai ani nika fura tipaha rogo gu kekeapai ngbefuo gere?

²⁰ Rogo gi kekeapai re, ani ima bi wai nyakipa ba agu apai nafuda rani ku auru Mbori ni fura ani fuko rogo kparakpee yo na ni geda ani Fugoko na kini berẽkuriihe. Ani ima bi wai a nyakipa sonosa zuzu toro, peka gaani apai fu gu boro ani nakido kuti ni, na gbia ngarasaro ho ani akodatirani ni na awirinarani nga aKristano. Gu kekeapai ngbefuo gere nika fura tipa wai Yekova aundo rani ni fuko maabangirise furani tipa mosoro.—Eb. 11:6.