Ya mo mo agedinga agu aNgbaõbambu Sinziri sirisiri kuru bara mbeda kusayo? Mo bingoho singia mo rengbe ka karagapai kuti agi asanahe re:

Gini ngbatunga ingapai du Yesu aafura tipaha rogo gu rugute du rogo Matayo 18:15-17?

Ko aafura tipa agu akpakarapai rengbe agu aboro arengba duhe dagbayo ka mbakadaha. Ono si ki duadu ni gu kere ingapai i naima rengba ka kusa boro kusayo rogo dungurati tipaha ka si du nga i ambakadanga ha te. Ni kpiapai, gu ingapai re rengbe kadu nga pe ziree ti rimo boro, watadu si rengbe ka koda biriko boro.—w16.05, kpe. 8.

Ginipai rengbe mo ka mangaha tipa ka gbia undo ti gamo geda Ziazia Kekeapai?

Agi apai re mo narengbe ka mangaha: Mo gedipai na berãro ni zazaha, kini gbata agu apai rengbe mo ka wirikaha; mo sana tiro na asanahe wa ‘Wai du rengbe mi ka mangasunge na gipai re ka undo kura aboro?’; na mo mangisunge na agu aũsunge duho tipa ka weteka gupai mo nagedihe.—w16.05, kpe. 29-31.

Ya mo si ni gbegberẽpai fu Kristano ni kpari tipa kpio boro ni ki vura du vurũ na maabangirise tipa zingabekpio?

Idapase kuti zingabekpio adianga gu gberãrago du Kristano na ni ho gani boro akpi ni te. Abarayama aima kpara tipa Sara. (Bam. P. 23:2) Fuo regbo kusa, gu gberãrago re nazera azera.— w16.05, kpe. 4.

Gu kumba du na kambu ime ke waraga pavuko na agu akumba sita du na aũvura beyo du payo rogo gu yuguyugupai du rogo Yezekere kapita 9 narukuba gine?

I narukuba gu rikavura nga ga ngbangbaturũ nagbarasi Yerusarema na i a nika gbarasa gu gbegberẽ zegino nga ga Satana re ti regbo Aramegido. Gu digisidigisihe namanga wa du rago re nga, gu kumba du na kambu ime ke waraga pavuko narukuba Yesu Kristo, nga guko nagbahe ti ngbanda kpakpu agu aboro nika bata.—w16.06, kpe. 16-17.

Gini apai Ziazia Kekeapai abati behe?

Si abati be (1) kuruko agu ahe i akehe ti ni, ngbatunga ahe wa badumo na kpoto anya; (2) sogote be agbia ngbii na abarumbatayo nga ga akanisa yo nga aguyo naasadi ka gbarasa ha; na (3) asadatise be kura aboro ka aria gaha pangbanga.—w16.07, kpe. 4-7.

Gini agene rengbe Kristano ka sa gani raka si du taata ngbaha?

Mo ini agu ahe nzunzu du mo na zingo tipaha, na ki di agu ahe kusayo anyakanga paha ya nagberesa marã. Mo mbakadi wai mo nika mangasunge na marã. Mo mbu agu ahe mo amanganga sunge na ni ya, na ki tumo gu bape kadu riro. Mo zogosi bete sunge marã, na ki mbakadi pa wai ka kiiso gamo sunge tungusapai.—w16.07, kpe. 12.

Ginihe Ziazia Kekeapai aya tipaha wẽ si nyakipaha kisusi dahabu watadu feda?

Eyobo 28:12, 15 nayugoho nga gu tatamana naye be Mbori ngba kisusi dahabu watadu feda. Wa mo nikaa gbataha, mo mangi ome ka nye na umbasitise na kidu nyanyaki rogo idapase yo.—w16.08, Kpe. 18-19.

Ya mo si ruaru wirina du na maingba ni ti ni areme?

Rogo kura angbatunga, mbu maingba ni guruhe ngbaangba na si arengbanga ka gbe berãse ti gu wene pangbanga nga ga Kindo te. Ono wa vura duhe wo, kura awirina ima rengba ka diaberã ka zanga mbu maingbayo ti ni. (1 Kor. 8:9) Rogo kura arago, si arunga fu agu abatungusipai nga aKristano i du na maingbayo ti ni te.—w16.09, kpe. 21.

Tipagine du rengbe ani ti ni ka kido kuti gu pangbanga du rogo Ziazia Kekeapai yo tipa gu vura naadu dagba Davide na Goriata?

Bagizo Goriata rogo Ziazia Kekeapai yo ima gbanga kisusi gu gbanga kumba du auru kpotosende ane ti gi gaani regbo re. Davide angia ndikidi boro, a wa gu kuru kekeapai naadu bakuru kusayo ti vuro ahe ayugoho mbiko si nafura tipa gu kporo nangia ga Davide na gupai berewe a Yesu agumbaha. Agu arago furayo tipaha nandu sa na agu arago aboro naima inopai tipaha areme.—wp16.5, kpe. 13.

Gini kparakparapai du dagba inohe, giarogopai yo, na tatamana?

Gu boro du na inohe, ni ima inopai tipa agu arengo duho. Gu boro du na giarogopai yo, ni ima ino gu ngbaya du dagba agu arengo re na agu akuraha. Ono gu boro du na tatamana, ni nakoda inohe gbiati giarogopai na ki mangisunge na ni ngba wene gene.—w16.10, kpe. 18.