1, 2. (a) Wai du du nyemuse na idapase ni kodikodihe? (b) Gini asanahe ani nika sakapai tipaha?

NYEMU Yekova tirani “bambiko ko nyemurani adu ti ko mbata.” (1 Yo. 4:19) Yekova ima yugo gako nyemuse tipa gako ruru amoyambu ni fuko maku fuyo. Ka ani akpinyemu Yekova gbe, kinawo ani nika du na nyanyaki idapase nga ko kina ti ni na ko nafu mosoro afu fu agu aboro ko akpinyemu yo.—Oni gedi AEbere 11:6.

² Fu mosoro nga nyanyakipa sino Yekova na gupai ko amangaha. Ka ani adunga na kido nga Mbori nafu mosoro afu fu agu aboro nagbata ko ya, gaani idapase dunga ni rengberengbehe te, bambiko “idapase nga sungudo agu apai boro amaabangirini tipaha nika manga amanga.” (Eb. 11:1) Nirengo, idapase nakoda maabangirise tipa gu ga Mbori amaku ko nakidopaha. Wai tie gu maabangirise nga ga gbia mosoro aundo rani? Wai du Yekova afu mosoro fu gu gako amoyambu naadu bakuru kusayo gbiati aguyo du areme? Ani bingoho.

3. Gini kidohe du rogo Maraki 3:10?

³ Yekova ima futiko ka fu mosoro fu gako ruru amoyambu, sidu, ko nayamba rani tipa ani gbiaha. Ani nakeda gupai nga: “‘Oni ki  asadi re, . . .’ wo poi Yekova nga ga arimbasa ko, ‘si ngia mi azá abangiri angbangbaturũ tipa roni ki uka maku ku ri roni ka ba adu nga tipa ha ya.’” (Mara. 3:10) Ani nayugo gaani tambuahe ho ani adia agu ahe ni Yekova afuhe furani.

4. Tipagine rengbe ani kadu na kido ti ni kuti gu ga Yesu kidohe du rogo Matayo 6:33?

⁴ Yesu aima kido gako abawiriki nga ka i moi agu apai nga ga Kindo mbatayo, Mbori nika undoyo aundo. (Oni gedi Matayo 6:33.) Padu gu ga Yesu kidohe re ni rengo aru riipa wai du Yekova ni gu boro napepai si ki mangi kina kuho. Yesu aima inoho nga ka ga Mbori akidohe zanganga na da ti rengo te. (Yes. 55:11) Ani tigaani rengbe arengba a kadu na kido nga ka ani du na nyanyaki idapase kuti Yekova, ko nika banda gu gako kidohe abanda nga: “Mi ahe nga unda ro wa sa te, mi ambú nga ro a wa sa te.” (Eb. 13:5) Ani rengbe ka ringbisa agu afugo re na gupai Yesu apehe nibipa gbata agu apai mbata nga ga Kindo gbiati ga Mbori rurupai.

5. Tipagine du du ga Yesu karagapai ti ni fu Petero ni gupai nanyakasa idapase?

⁵ Gu mokedi nangia Petero asana Yesu ti kura regbo ki ya: “Wa ani ambu ahe dunduko, ki nipeke ro; ani adía gine?” (Mt. 19:27) Kuba gupai nga Yesu fu zahe fu Petero tipa sana ngbatunga gu sanahe re, ko aya fu gako abawiriki i nika gbia mosoro agbia mbiko fuyo tiyo ka pekako. Gu ruru amokedi re gbiati kura aboro nika zogarago na ko ngbangbaturũ yo. Ono zavura awere, amosoro kinaho. Yesu aya: “Gu ni mbu abambu na awirinani, na adawirini, na bani, na nani, na awirini, na aati, tipa  rimore, ni aróga ahe susi gu naadu mbata bara 100, ni ki di kumbo nyenye unga.” (Mt. 19:29) Si adu nga gako abawiriki nika gbia amaku kisusi gu gayo apai i ambupaha. Ya mo anga agu abarani, anarani, awirinarani gbiati awirani du rogo dungurati na nyanyakipa yo kisusi ai guhe ani nambupaha tipa Kindo te?

6. Tipagine Yekova akido airisiko ti ni nga ko nikafu mosoro fuyo?

⁶ Ni kido Yekova airisiko nga ko nika fu mosoro afu fuyo, ko naundo yo ti regbo agu aʹasada nga ga padu ni ruruse. Kupati agu amaku nga ga toro ga Yekova ruru amoyambu agbiaha awere, i nangera kumbatayo tipa badungu kura amaku. (1 Tim. 4:8) Nirengo, padu ani na gu kido nga Yekova “nafu mosoro fu agu yo nagbata ko” nika undo rani ani ru nyanyaki rogo idapase.—Eb. 11:6.

7. Wai du du maabangirise ni ũzada mbisimo?

⁷ Ti regbo gu ga Yesu tungusapai naadu rii bagangara yo, ko aya: “Oni sámbua tironi asambua, ki ningi angi; bambiko gaoni mosoro du ngbangbaturũ yo kii gbe: bambiko kina wo i amangi anebi nadu mbata fu roni.” (Mt. 5:12) Kparakusayo ti agu aboro nika gbia mosoro ngbangbaturũ yo, gu maabangirise nga ga nyenye unga rogo paradizo auro kpotosende ni gupai nirengo si aida aboro ‘sámbua tiyo asambua’ tipaha. (Tam. 37:11; Rk. 18:30) Singia ani na maabangirise ka raka ngbangbaturũ yo watadu auru kpotosende, gaani maabangirise rengbe arengba kadu wa “ũzada mbisimo, nga maabangirise du ni nyanyaki he nganganga.” (Eb. 6:17-20) A wakina wai ũzada bakurungba naundo ho si ru nyanyaki ti regbo bavugumo, gu maabangirise nga ga gbia mosoro rengbe arengba ka undo rani ani ru nyanyaki berãrani yo na rogo toro yo. Si ima rengba ka undo rani ani du na ome ka hi akpakarapai.

8. Wai du du maabangirise na ome ti ni ka dia bete gaani abakabangirise?

⁸ Gu gaani maabangirise du mburuhe rii Ziazia Kekeapai na ome ti ni ka zogosa bete gaani abakabangirise. Ga Mbori akidohe wa kina nzeme nga ga toro, nga gu rengbe ka zeresa kpotoraniyo ho du ani ni na abakabangirise. Nairiwo wai duhe ni pa wasa furani ka ‘bá gaani atindiro ku auru Yekova,’ ni ini gupai nga ko nika ‘sóngoda rani asongoda’! (Tam. 55:22) Ani rengbe arengba kadu na bakere kido nga Mbori ima rengba ‘ka manga pai bakere gbe si ki moi pai susi gu ani aõ na gu ani aberã dunduko.’ (Ef. 3:20) Oni berẽnga kurii gipai re, anga Mbori rengbe ka mangapai kina bakere gbe gbua te, ono ka ‘mangapai bakere gbe si ki moi pai susi’!

9. Ginipai rengbe ani ka mangaha tipa Yekova fu maku furani?

⁹ Tipa ka gbia gu mosoro re, si naida ani du na bakere idapase kuti Yekova na kini pekefuo gako arugapai. Moize ape gupai fu aYisaraere nga: “Yekova afú maku fu roni rogo gu ringara nga gu Yekova gaoni Mbori afu fu roni ka dia ha ni ringara, kina gu ka oni dege turoni nyanyaki sa fugo Yekova gaoni Mbori, ka kparia pa gu rugute rugu mi roni kuti ni ni gi uru re ka amanga ha. Bambiko Yekova gaoni Mbori nikafu maku fu roni, a wa ko akido roni.” (Pa Rug. 15:4-6) Ya mo mo na bakere kido nga Yekova nikafu maku afu foro ka mo airisoko kindi ni ruru ro? Nirengo, wene ndupai kinaho tipa mo du na gu kido re.

10, 11. Wai du Yekova afu mosoro fu Yosefa?

¹⁰ I ake Ziazia Kekeapai tipa gaani undo. Si na apangbanga rogoho nibipa wai Mbori afu mosoro fu gako ruru amoyambu. (Rom. 15:4) Yosefa nangia bangua kpiapai. Ko aye ka bi tiko bambukiso Ezipeta  yo ni sangbana gu buro awirinako ataha gbiati gu ziree dia bairako arẽhe ti rimoko kusa. Ya mo ko adu ni kparakpara ko ti gako Mbori? Wagusa te! “Yekova adu na Yosefa, ko ki yugu inapai fu ko . . . Yekova adu na ko; agu apai dunduko ko anamanga ha, Yekova anausa ha.” (Bam. P. 39:21-23) Yosefa aasungudo gako Mbori ni hipai ti gu kere aregbo re.

¹¹ Fuo susa agarã kusa, Faro akusi Yosefa bambukiso yo na ki moiko ni ue bazogo Ezipeta yo. (Bam. P. 41:1, 37-43) Ho dia Yosefa avungu agude ni fuko ue, ko “ayambu rimo bambata wiriko nga Manase, ko aya, ‘Mbori gbandaka pa mbugo gimi asunge dunduko bangire, na pa ga buba aborokporo a dunduko.’ Na ko ki yambu rimo gu ue wiriko nga Efuraima, ko aya, ‘Mbori zugasi re rogo ringara gi rungo.’” (Bam. P. 41:51, 52) Mbiko gupai nga Yosefa anye ni ruruko fu Mbori, Mbori afu amaku fuko nga gu nabatasi unga aYisaraere gbiati aEzipeto a. Sidu, gupai i aida ka pehe ane nga, Yosefa aima inoho nga Yekova du naafu mosoro fuko na ki fu amaku fuko.—Bam. P. 45:5-9.

12. Wai du Yesu anye ni ruruko ho ko adu ni rogo aʹasada?

¹² Wakina gure a, Kristo anye ni ruruko fu Mbori rogo dungu aʹasada nga ga gako idapase, na ko ki ima gbia mosoro. Ginipai naundoko ko du na diabese? Fugo Mbori naya: ‘Ko ahi pa wagiwagi ngua mbiko gu ngbarago nadu fu ko ku mbata yo, ki basa pa gaha zee.’ (Eb. 12:2) Yesu aima gbia ngbarago nirengo mbiko ziasi ko rimo Mbori. Kurigure, Bako aidi na ko na ko ki fu badungu wene amamu fuko. Ziazia Kekeapai nape gupai nga, ko “ima sunga pati kumbabe gu mbata nga ga Mbori.” Na ani nageda kurapai berewe nga: ‘Mbori akiisi pako gbe, ki fu gu rimo fu ko zogo arimo dũ.’—Frp. 2:9.

13, 14. Wai du Yekova abi agu apai ani amangaha fuko?

¹³ Ani rengbe arengba kadu na kido nga Yekova na tambuahe tipa gu ome ani amangaha ka mangasunge fuko. Ko ima gia tiko na gaani abakabangirise gbiati agu akapa du ani na ni tipa tirani. Ko nayugo nunga ayugo furani ho ko abi gupai ni nga zingo marã watadu akaza nasarani ani zogosi bete gaani sunge fuko. Na ani ima rengba kadu na kido nga Yekova nakpinyemu agu apai akpi gako amoyambu amangaha tipa ka nye ni ruruyo fuko.—Oni gedi AEbere 6:10, 11.

¹⁴ Oni moi gupai a ku berãroni yo nga, ani ima rengba ka fura na “gu ko ninagia kpetambuahe” na kidu na gu kido nga ko nika degatuko adega furani. (Tam. 65:2) “Ba inaapai, nga Mbori wasa dunduko” nika undo rani aundo berãrani yo na rogo toro yo vurube agu aboro ani airisoko na yo. (2 Kor. 1:3) Rago nangba angba ti Yekova ho du ani ni na nunga aboro tirani. “Gu boro du na nunga rungorungo boro ti ni nafu he fu Yekova, tipa gani wene mangapai ko afú mosoro fu ni.” (Snz. 19:17; Mt. 6:3, 4) Sidu, ho ani aundo agu aboro ni du rogo kpakarapai, Yekova nabi gaani wene mangapai wa ka i ya bape du ani nafuhe fuko. Na ko ima kidohe nga ko nika gasaha agasa nifu ko mosoro furani.

15. Gini amosoro oni angera kumbatayo tipaha? (Oni bi gu sura duti tonatonaha.)

¹⁵ Agu aKristano du ni mbedimbediyo ni toro na gu maabangirise nga ga gbia ‘kpakpari rurupai, nga gu Gbia nga ruru basapungbanga ka fuhe ni gu rago re.’ (2 Tim. 4:7, 8) Ono tie, anga paro ni umbaha bangiri Mbori ka ko fu gu maabangirise foro du kia te. Amirioni ga Yesu “kura akandoro” napido gu  mosoro nga ga nyenye unga kumbatayo rogo paradizo auro kpotosende. I nika du yo “na ngbarago tipa gu wenepia du kpaima.”—Yo. 10:16; Tam. 37:11.

16. Gini afugo wasa ani agbiaha rogo 1 Yoane 3:19, 20?

¹⁶ Ti kura aregbo, ani rengbe ka berã gupai nga ani namangasunge fu Yekova tooni, watadu ani rengbe kaa bakabangirani singia rago nangba tiko na agu aome ani amangaha. Ani ima rengba a kaa kapa singia ani rẽ nzunzu ka gbia mosoro be Yekova. Sidu, ka bangirani gonga ti gupai nga ‘Mbori nga bahe ti kpotorani yo, na ko ini apai dũ’ ya. (Oni gedi 1 Yoane 3:19, 20.) Ho ani amangasunge ni fu Yekova na kpotorani yo dunduko mbiko gu nyemuse gbiati idapase du ani na ni kutiko, ko nika fu mosoro afu furani, ka si vura du vurũ nga gupai ani amangaha na tooni paha bangirani.—Mk. 12:41-44.

17. Gini amosoro ani agbiaha awere?

¹⁷ Yekova nafu maku afu fu gako aboro zavura ti gi yangara arame nga ga gi ga Satana zegino re. Ko naundo gako ruru amoyambu i du wenengai rogo toro yo na kini gbia ngbarago wa du yo ni kodikodi yo rogo zegino dunduko. (Yes. 54:13) A wa Yesu akidohe, Yekova nafu mosoro furani awere ni sako rani ani du ni papara gu riigbu nga ga awirina rogo zegino dunduko. (Mk. 10:29, 30) Kurii gure, agu aboro nagbata Mbori kakaka, i nagbia agu amaku nga ga du zezeredi berãse yo, rengba be agu ahe du beyo, gbiati ngbarago.—Frp. 4:4-7.

18, 19. Ga Yekova amoyambu nabi agu amosoro i agbiaha wai?

¹⁸ Ga Yekova amoyambu rogo zegino dunduko ima inopa agu amosoro i agbiaha beko. Ni kpiapai, Bianca du Germani yo aya: “Mi natambua Yekova ni bakerehe tipa wai ko aundo re na gimi abakabangirise na tipa wai du ko patire na auru dunduko. Zegino ima hi be vunduvunduapai na ruruhe rogoho te. Ono wa mi amangasunge mbembedi na Yekova, mi nabi tire ni bandabanda re kpabeko yo. Ai gu regbo mi ambupa gimi apai tipa ka mangasunge fuko, ko nafu amaku fere ni bakerehe kisusi.”

¹⁹ Na oni bingo gupai du tipa Paula du garã ri nga 70 Canada yo nga gu ri nawoka be gu kaza du rimoho nga spina bifida. Ri ape gupai nga, “Ho adunga gene ni be boro kaa ndu ngba nduni wenengai ya, anga gure nga si naida gani sunge tungusapai zoro te. Mi naatungusapai ngba agene ni bakiakia, wa gu nga tungusapai rogo terefuni gbiati manga dezirepai angianga kuti asino mangaha ya. Tipa ka gbia ngarasaro, gi buku kekapai kinaho mi naakeka averesi gbiati aberãpai nga ga gaani awaraga rogoho, nga gu mi naangera ku rogo ti kura aregbo. Mi naayambaha nga ‘Gi Buku Bata.’ Ka ani agbe berãrani kuti agu akidohe nga ga Yekova, ani nyenga kindi kina rogo gberãrago te. Yekova kinaho ti aregbo dunduko ka undo rani rogo ai agu akpakarapai du ani rogoho.” Si rengbe kadu nga agu apai du tipa ro kia ti ga aBianca na Paula. Ono wa vura duhe wo, mo ima rengba ka berãpa agu agene Yekova nafu mosoro foro ngbaha gbiati agu aboro du mo na yo. Nairiwo gu wenepai nga ha ka berãkurii wai Yekova afu mosoro foro ti gi regbo re, na wai ko nika fu mosoro foro kumbatayo!

20. Ani rengbe kaa ngera kumbatayo tipa ginipai ka ani aamangasunge fu Yekova na mbisimorani dũ?

²⁰ Ka bangironi gonga ti gupai nga oni nika gbia “bakere mosoro” agbia mbiko gu gaoni akparakpee oni amangaha fu Mbori ya. Oni ima rengba kadu na kido nga ‘fuo manga oni sangba Mbori, oni nika dia gu mosoro i akido roni tipa ha.’ (Eb. 10:35, 36) Sidu, ani naanyakasa gaani idapase anyakasa kindi, na kini mangisunge fu Yekova na mbisimorani dũ. Ani rengbe ka mangaha wo, ni ini gupai nga Yekova du nikafu mosoro furani.—Oni gedi AKorosaio 3:23, 24.