1-3. (a) Ginipai si aida ani kodihe ku dagba gaani nyanyakipa aida yo? (b) Tipagine du zingabekpio ti ni ni nyanyakipa pai? (Oni bi gu sura duti tonatonaha.)

KA BORO sanaro nga, ‘Bangua ayugopai nga ga gamo ida nga gine?’ Ginipai ka mo pehe? Nirengo, mo pe gupai nga mo idi gupai nga Yekova nga Bakusiahe na kingia Bafu-Unga. Si nawira wa mo pe gupai ape a nga mo ima ida kuti Yesu Kristo, nga guko naakpi ni motumo. Na mo duadu na ngbarago a ka pe gupai nga Paradizo kpotosende nika ye kumbatayo, nga gu ga Mbori aboro nika raka rogoho nyeanye kindi. Ono ya mo mo pepa zingabekpio ni he sa dagba gu gamo aida yo nyakipaha gbe?

² Ani na wene nduapai berani ka maa zingabekpio ku dagba gu gaani aida yo du na nyanyakipaha gbe, ka si vura du vurũ nga ani na maabangirise ka bata ti regbo bakere gberãngbi ki raki auru kpotosende nyeanye kindi. Gu mokedi nangia Pauro ape ndu gupai du zingabekpio ti ni ni nyanyakipa papara gaani ida, ko aya: “Si ngia zingabekpio dagba kangba aboro ho te, i azingisa nga Kristo tie te.” Ka i aazingisanga Kristo ya, ka ko dunga ni gaani bakindo nga guko nazogarago awere te, na ka gaani yugopai tipa ga Kristo zogarago du ni kungbopai. (Oni gedi 1 AKorindo 15:12-19.) Ono tie, ani ima ino gupai nga Yesu aima zinga be kpio. Ni du ani na gu ida nga ko aima zinga be kpio, ani kia ti agu aYudo nangia aSadoke, nga aguyo naatikango nga ka boro zinginga be kpio te.  Zavura ho aboro asawia rani ni, ani naka kuti gu gaani ida nga ga zingabekpio.​—Mk. 12:18; Amo. 4:2, 3; 17:32; 23:6-8.

³ Ho Pauro akepa ‘tonatona yugopai tipa Kristo’ ni, ko akodi “yugo pa . . . zingabekpio” ku rogoho a. (Eb. 6:1, 2) Na Pauro anyakasipa zingabekpio ni guhe ko aima du na idapase kuti ni. (Amo. 24:10, 15, 24, 25) Wa vura du zingabekpio ni papara tonatona ayugopai, du nga “mburu gu tonatona apai nga ga sangba Mbori,” si ayugongo gupai nga si nga taata yugopai te. (Eb. 5:12) Tipagine adunga ha ti ni wo ya?

4. Gini asanahe rengbe ka kura nibipa zingabekpio?

⁴ Ho aboro atona wisigo Ziazia Kekeapai ni, badunguyo nageda agu apangbanga nga ga agu azingabekpio namangi bakuru kusayo, wa gunga pa zingisa yo Razaro be kpio. Na i nawirika gupai nga Abarayama, Eyobo, gbiati Daniere aima du na kido nga kpikpi aboro nika raka araka berewe kumbatayo. Ono wa vura duhe wo, wai du rengbe mo ka karagapai ka i sana ro tipa gu gopai nayugo gu ndupai rengbe ani kadu ti ni na kido kuti agu akidohe nga ga zingabekpio i amangihe dungu akama agarã kusayo? Na ya mo Ziazia Kekeapai nayugopa gu regbo zingabekpio nika manga ti ni nzunzu? Akaragapai kuti agu asanahe re nika nyakasa gaani idapase, sidu, ani bingo gupai Ziazia Kekeapai apehe.

5. Ginipai ani nika fura tipaha mbata?

⁵ Si ima rengba kadu taata ka berãpa zingisayo gu boro be kpio kpi bambeda kusayo. (Yo. 11:11; Amo. 20:9, 10) Ono, na gu kidohe nga zingabekpio nika manga fuo agarã, na zavura fuo akama agarã kumbatayo? Ya mo mo rengbe kadu na kido kuti gu kidohe i amangihe gbanga regbo kusayo re, singia gu kidohe re tipa gu boro kpi bambeda kusayo watadu guni naaima kpi bakuru kusayo? Nirengo, zingabekpio kinaho namangi nga gu i akidopaha akama agarã kusayo mbata fu si mangi, na mo ima ida kutini. Wai du duhe wo? Na wai du du gupai re na ngbanya dagbaha na gupai rengbe mo ka berãpaha nibipa zingabekpio kumbatayo?

6. Wai du Yesu adu rogo digisidigisi gu sangbanebi yo du rogo Atambuahe 118?

⁶ Nibipa gu zingabekpio i agumbapaha nga si nika manga fuo gbanga regbo kumbatayo, oni bingo Atambuahe 118, nga gu kura aboro abihe nga Davide du naakehe. Si nakoda gu zungodihe nga: “Ako Yekova, mo bátasi rani awere, ani nazungadi ro! . . . Boro maku nga gu ni naye ti rimo Yekova!” Si nawira wa mo natingida gupai atingida nga aboro ape afugo gi sangbanebi tipa Masiya re ho Yesu aandu ni ri dongi ku Yerusarema yo rogo Nisana 9, ngbutuko mbata fu kpiko. (Tam. 118:25, 26; Mt. 21:7-9) Ono wai du Atambuahe 118 afura tipa gu zingabekpio nga gu naandu ka manga fuo dungu agarã kumbatayo? Oni bingo gu kurapai berewe gu bia atambuahe re apehe, si aya: “Gu mbia abaduabambu nigindiga ha kina ha du ni mbia tukpu he ri he.”​—Tam. 118:22.

7. Wai du aYudo agindigo Yesu?

⁷ Ga aYudo abarumbatayo du nangia agu “abaduabambu” nagindigo Masiya. Anga i agindigo ko sa kina rogo gu gene yo nga ka zanga degatuyo fuko watadu ka zanga ida pako ni Kristo te. Badungu aYudo agindigo ko nipeyo gupai nga i imiko. (Rk. 23:18-23) Nirengo, i aima fubee kuti pa imo yo Yesu.

8. Wai du Yesu arengbe kada ni “mbia tukpu he”?

⁸ Ka si du nga i aima gindigo Yesu na ki ima imoko, wai du ko arengbe kada ni “mbia tukpu he”? Gure arengbe ka manga sa kina gu ka ko azingi be kpio. Yesu nitiko aima yugo gu ngbanya naadu dagbako na gupai re. Ko agumba sanza nga gu naafura tipa wai ababanda ati aamanga agu aboro gbegberẽ iraati aakeda yo koyo du yo ni, kina wai aYisaraere aamanga agu anebi gbegberẽ Mbori aakeda  yo koyo du yo ni. Ni yangaraha, rogo gu sanza re, iraati akedi wiriko nga guko naadu ni dikumbo na ko akpinyemuko gbe. Ya mo i adi gu wiriko re kugume? Wagu sa te. Agu ababanda ati re aimi ko. Fuo Yesu pe gu sanza re, ko afura tipa gu sangbanebi du rogo Atambuahe 118:22. (Rk. 20:9-17) Gu mokedi nangia Petero afura tipa gu bangisapai re ho ko aafura ni fu ga aYudo ‘abazogo, abaakumba, gbiati abakeapai nga aguyo naadungura tiyo ku Yerusarema yo.’ Ko aya, ‘Yesu Kristo nga boro Nazareta, gu ko oni awagi ko, Mbori ki zingisi ko dagba akangba.’ Fuo gure, Petero ape gupai ziazia nga: “Ko nga gu mbia oni ambu, oni nga abadua ha, gu i amangi ni gu wene kikii mbia nidu pangbaha.”​—Amo. 3:15; 4:5-11; 1 Pet. 2:5-7.

9. Atambuahe 118:22 afura tipa ginipai kumbatayo?

⁹ Nirengo, gu sangbanebi du rogo Atambuahe 118:22 ayugupa zingabekpio nga gu si adu nga si nika manga fuo akama agarã kusa. Si adu nga i nika gindigo Masiya na ko ki kpi, ono i ki zingisi ko be kpio ko du ni mbia tukpu he. Gi Wiri Mbori nga Yesu i azingisiko be kpio re ada ni gu yangara boro i afu gu rimo fuko “ku dagba aboro ani abata mbiko ho.”​—Amo. 4:12; Ef. 1:20.

10. (a) Ginipai Atambuahe 16:10 afura tipaha kumbatayo? (b) Tipagine rengbe ani kadu ti ni na gu kido nga Atambuahe 16:10 aadigisongo tihe kuti Davide te?

¹⁰ Oni bingo kura veresi nga gu naafura tipa zingabekpio kumbatayo. Wa i akepa ha, si amangi fuo agarã naima susa kutu kusa, na gere nga gu rengo rengbe ka nyakasa gu gamo kido nga i ima rengba ka pepa zingabekpio, si ki mangi fuo gbanga regbo kusa. Rogo Atambuahe 16, nga gu Davide akehe, ani nageda gupai nga: “Mo ambu nga mbisimore ku Baatoro kpikpi aboro yo te, mo afu nga ga ziazia ko, ko bi zirã a te.” (Tam. 16:10) Davide aayanga aya wẽ ko akpingo te watadu ko adanga murö yo te te. Fugo Mbori ima pe gupai ziazia nga Davide aima ye ki gbinza. Fuo kpiko, i ‘akpisidi kangbako rogo gu bakporo nga ga Dawidi.’ (1 Aba. 2:1, 10) Ono da tie Atambuahe 16:10 afura tipa ni?

11. Gini regbo du Petero afura tipa Atambuahe 16:10?

¹¹ I ambunga rani ku bitimo yo zanga pepa gu boro re te. Agarã naima susa kutu fuo keyo gu bia tambuahe re na fuo susa aposo tingbafuo Yesu kpi na ki zingi be kpio, Petero afura fu akutu aYudo na agu aboro nasa tiyo ku rogo gu pambori nga ga aYudo tipa Atambuahe 16:10. (Oni gedi Amokedi 2:29-32.) Ko ape gupai nga Davide aima kpi nzunzu na i ki ima kpisido ko. Agu aboro naagia Petero aima ino gupai re. Na Ziazia Kekeapai apenga gupai nga boro ho dagbayo naatikango na agu afugo Petero apehe nga Davide ‘abi na ki gumba pa gu zingabekpio’ nga ga Masiya te.

12. Atambuahe 16:10 adigisitihe rogo gini gene, na ginipai si ayugoho nibipa gu kidohe nga ga zingabekpio?

¹² Petero asongodi gako afugo nipe ko agu afugo Davide du rogo Atambuahe 110:1. (Oni gedi Amokedi 2:33-36.) Ga Petero sakapai ringbisihe kuti Ziazia Kekeapai aundo gu ndurumo aboro ko aafura fuyo re i idi kuti gupai nga Yesu angia ‘Gbia, na kingia Kristo.’ Kurigure, aboro aini gupai nga Atambuahe 16:10 adigisitihe ho i azingisi Yesu ni be kpio dagba akangba. Kusa, gu mokedi nangia Pauro amangisunge na kina gu bangisa gopai re ho ko aafura ni fu aYudo rogo gu gbata nga Andiokia Pisidia yo. Gako sakarogopai yo aima ngbatiyo, na i kidu na nyemu ka gia kura apai berewe. (Oni gedi Amokedi 13:32-37, 42.) Si naida gupai ngbaangba a tirani nga agu asangbanebi nga ga Ziazia Kekeapai naadu tipa ga Yesu zingabekpio re aima du ni agu apai aboro aima kido kutini, wa si avura du nga si adigisitihe fuo akama agarã kusa.

13. Gini asanahe nakura nibipa zingabekpio?

¹³ Si naida gupai ngarasi rani nga ka i pepa zingabekpio kumbatayo, si ima rengba ka manga tingbafuo akama agarã kusa. Ono tie, boro ima rengba ka bakabangirini nga: ‘Ya mo gure nayugo gupai nga mi nika sungo tipa bagbanga regbo mi kini ru ka bi gu gimi boro nakpi? Gi zingabekpio mi amaabangire tipaha re, si nika manga ti gini regbo?’ Yesu ape gupai fu gako amokedi nga apai kinaho i aainongo ho ya na i aarengbanga ka inoho a ya. Na sa gayo na ino gu futufutuapai nibipa “rago ahe na gu regbo ahe Mbori nga Ba amoi sa kina gako tandu.” (Amo. 1:6, 7; Yo. 16:12) Ono tie, gere ayugongo gupai nga pai ho ani nainihe tipa regbo zingabekpio te te.

14. Wai du ga Yesu zingabekpio adu kia ti ga agu aboro naadu mbata?

¹⁴ Tipa ka rugatise na gupai re, si naida oni tingidipa agu azingabekpio Ziazia Kekeapai afura tipaha kumbatayo. Rengo ngaha nga gu nyakipaha gbe nga ga Yesu. Ka i aazingisanga ko be kpio ya, boro ho dagbarani kaa du na gu maabangirise nga ga bi gu gaani aboro berewe naakpiki te. Agu aboro i azingisiyo be kpio mbata fu Yesu, wa aguyo aEriya na Erisa azingisi yo aarakanga nyeanye kindi te. I aima kpi berewe na ki bi zirã murö yo. Ono Yesu tigako ‘azingi dagba akangba, ko akpi nga berewe te na kpio afu nga ri ko berewe te.’ Ko naraka “nye anye kindi,” ngbangbaturũ yo na ko abingo zirã te.​—Rom. 6:9; Yugo. 1:5, 18; Koro. 1:18; 1 Pet. 3:18.

15. Tipagine duhe ti ni ni nyanyakipa pai nga Yesu nga “makawa”?

¹⁵ Ga Yesu zingabekpio ku ngbangbaturũ yo ni gu boro nga toro nangia bambata gu ngbatunga zingabekpio re, na kidu na nyanyakipaha gbe kisusi. (Amo. 26:23) Ono tie, anga kina ko sa i akidopa ko nga i nika zingisako ku ngbangbaturũ yo ni gu boro nga toro te. Yesu akido gako ruru amokedi nga i nika zogarago na ko ngbangbaturũ yo. (Rk. 22:28-30) Tipa i gbia gu mosoro re, si adu nga i nika kpi mbata. Fuo gure, i ki zingisi yo na gu kpoto nga ga toro wa Kristo. Pauro ake gupai nga ‘i azingisi Kristo dagba kangba aboro, ni makawa agu yo nara ara.’ Pauro andu kumbatayo ki yugu gupai nga kura aboro kinaho i nika zingisayo ku ngbangbaturũ yo, ko aya: ‘I adu ti kina ragoyo ni ba sa sa: Kristo nga makawa; fuo gure agu yo nga ga Kristo yo, rago ye ko.’​—1 Kor. 15:20, 23.

16. Ginipai duho nayugopa regbo gu zingabekpio nga ga ngbangbaturũ?

¹⁶ Gure nayugo regbo zingabekpio nga ga ngbangbaturũ furani. Si adu nga si nika manga “rago ye ko.” Tipa dungu agarã awere, aDezire Yekova aima sigira gupai ringbisihe kuti Ziazia Kekeapai nga “rago ye” Yesu watadu gako zogarago atona rogo 1914. Si nandu kindi kumbatayo na digido gi gbegberẽ zegino re ima mbeda gbe.

17, 18. Ginipai nika manga kura mbedimbedi aKristano ti rago ye Kristo?

 ¹⁷ Ziazia Kekeapai nasaka kura apai berewe tipa gu zingabekpio nga ga ngbangbaturũ ni ya: “Ani akpi nga nyemu oni zanga ina pa agu yo ka ti ni rame te . . . Bambiko si ngia ani idi pai ya Yesu akpi ki zingi berewe, a wo Mbori nikaye na agu yo ti ni rame . . . Agu rani ka du ni ungarani, ki nye daho Gbia ka ye ni, ani andu nga mbata yo fu agu yo ti ni rame wa sa te, bambiko Gbia nikazorã tigako ngbangbaturũ yo, na bakere tata ngba, . . . agu yo du ni kangbayo rogo Kristo yo ki guari mbata. Fuo gure agu rani ka du ni ungarani, ki nye anye, i amongo tuka rani na yo rogo mai yo ka gbia Gbia yuge yo, ani ki du na Gbia tie nye anye kindi.”​—1 Tesa. 4:13-17.

¹⁸ Gu zingabekpio nga ga ngbangbaturũ atona bara tingbafuo gu regbo “rago ye” Kristo atona ti ni. Gu mbedimbedi aKristano nikaa raka ti regbo bakere gberãngbi, i ‘nika tuka yo rogo mai yo.’ (Mt. 24:31) Aguyo i nika ‘tuka yo’ i atinga ‘ni rame’ te rogo gu gene nga i adunga ni kpikpi yo tipa gbanga regbo te. I ‘asá yo kia dunduko, ni ipo, wa pira bangirise, ti woro yangara kpangi.’​—1 Kor. 15:51, 52.

19. Gini “wene zingabekpio” nika manga kumbatayo?

¹⁹ Areme, badungu ruru aKristano ni mbedimbedi yo te, na i asianga yo i ndu ka zogarago na Kristo ngbangbaturũ yo a te. Kuba gure, i napido digido gi gbegberẽ zegino re ti regbo “rago Gbia.” Boro ho rengbe ka ino gu ndikidi regbo re nzunzu te, ono gopai nayugoho nga si ima mbeda. (1 Tesa. 5:1-3) Fuo gure ngbutuko, kura ngbatunga zingabekpio kia nika manga, nga gu i nika zingisa aboro ku rogo paradizo kpotosende. Agu aboro i nika zingisa yo nika du na gu maabangirise nga ga da ni rengberengbe yo na ka i akpingo berewe ya. Nirengo, gure nika ngia “wene zingabekpio” kisusi gu naadu bakuru kusayo ti gu regbo “ade arogo gayo akangba mbiko zingabekpio” ono i ki ima kpiko berewe kusa.​—Eb. 11:35.

20. Tipagine rengbe ani kadu ti ni na gu kido nga gu zingabekpio naye mbatayo nika manga ti kina genehe?

²⁰ Ziazia Kekeapai nape gupai nga agu aboro i nika zingisa yo ku ngbangbaturũ yo, i nika zingisayo “ti kina ragoyo ni ba sa sa.” (1 Kor. 15:23) Ani ima rengba kadu na kido nga zingabekpio nga ga kpotosende nika manga kinawo a ti genehe. Gure nga bawene maabangirise. Ya mo i nika zingisa agu aboro naakpiki bambeda kusayo ti tonatona ga Kristo Zogarago Tipa Agarã Kutu tipa gu gayo aboro naima ino yo di yo kugume? Ya mo i nika zingisa gu ruru akumba mbata naadu bakuru kusayo na gu wene inohe nga ga ngbembatayo tipa gupai nga i ngbembatayo fu ga Mbori aboro rogo apai yo rogo vovo zegino? Na agu aboro tigayo naairisongo Yekova ya? Ti gini regbo i nika zingisa yo na rogo gini ba? Badungu asanahe rengbe ani ka sanaha. Ono ani penga guhe nga rengo, ya mo ndupai ho nzunzu ani berẽkurii agu apai re awere? Ya mo anga si ni wenepai ani sungudi kina gu regbo re ka bi gupai nika manga te? Ani ima rengba kadu na gu kido nga si adu ni pa ngbarago ka bi wai nitirani Yekova nika manga apai.

21. Ga maabangirise nga gine tipa zingabekpio?

²¹ Wa du rago re, si naida ani nyakasi gaani idapase kuti Yekova, nga guko nakido rani rogo Yesu yo nga gu kpikpi aboro du berã Mbori yo nika zinga azinga be kpio. (Yo. 5:28, 29; 11:23) Tipa ka yugo gupai nga Yekova ima du na rengba be ko ka zingisa kpikpi aboro be kpio, Yesu ape gupai ti kura regbo sa nga, aAbarayama, na Yisaka gbiati Yakobo dunduko “ni unga yo” bangiriko. (Rk. 20:37, 38) Wa du rago re tie, ani na bakere ndupai berani ka pe gupai Pauro apehe nga: ‘Mi namaa bangire koyo du Mbori ni ya aboro azinga be kpio.’​—Amo. 24:15.