Ya mo mo agedinga agu aNgbaõbambu Sinziri sirisiri kuru bara mbeda kusayo? Mo bingoho singia mo rengbe ka karagapai kuti agi asanahe re:

Ho agu avunguagude nga ayeaye aundo awiriyo ni rogo toro yo, tipagine si aida i berãpa gupai nga ga fugo ti ni?

Si nawira gupai nga agude nika wirika gu fugo i agumbaha rogo gu dagbarago re sukuru yo na be agu aboro du rogo gu dagbarago re. Si ima rengba kadu ni wenehe fu gude u ini badungu afugo. Si naida avunguagude ini wari awiriyo nika giarogo rengo yo ni wenengai na ki mangi sonakumbatayo rogo toro yo, singia nidu yo rogo gu dungurati nape gu fugo du rogo gu dagbarago re watadu nidu yo rogo gu dungurati nape gu fugo nga ga avunguyo nga ayeaye. Agu avunguagude nga aKristano namaa padu awiriyo rogo toro yo wenengai mbatayo fu agu apai ngbatiyo.​—w17.05, kpe. 9-11.

Ho Yesu asana Petero ni nga: “Mo nakpi nyemu re bakere ti [agira re?” NW] gu fugo nga “agira re” aaru kuba gine? (Yo. 21:15)

Si nawira gupai nga Yesu aafura tipa atĩo nga agura naadu kina mbembedi ho, watadu ko aafura tipa sunge baga atĩo. Tingbafuo kpio Yesu, Petero akaraga tiko kuti ngba gu sunge ko aamangaha mbata, nga gu nangia sunge manga atĩo. Si naida aKristano wisigi gu bangiriba i namoi sunge marã rogoho kpotoyo yo.​—w17.05, kpe. 22-23.

Tipagine Abarayama aya ti ni fu diako ri ya dawiriko du nga u? (Bam. P. 12:10-13)

Nirengo, Sara angia gu dawiri Abarayama nangia wiribako. Ka Sara aya diako du nga u, kura regbo, ka i aima imo Abarayama na rogo gi gene re, ka ko avunganga gu gude Mbori akido ko tipa ru ya.​—wp17.3, kpe. 14-15.

Gini birĩ Elias Hutter akusihe tipa ka undo agu aboro naaida ka wirika pa-Ebere?

Ko aaida abawirikipai ini gu kparakparapai du dagba gu tarã afugo nga ga pa-Ebere du rogo Ziazia Kekeapai yo gbiati agu afugo i amaaha ti tonatona fugo yo watadu ti digidoho yo. Tipa ka mangaha wo, ko akusi agu afugo nga tarã afugo ni kikindigihe ono tipa agu afugo i agbiaha ti tonatona fugo na digidoho, ko amangisunge na kungbo kekeapai si ki du na dagba ti ni. Kina gu ngbatunga gene kekeapai re i namangisunge na ni rogo gu rukutu kekeapai du bandu waraga yo nga ga New World Translation of the Holy Scriptures​—With References.​—wp17.4, kpe. 11-12.

Gini apai si aida si du na maapai kurii gu bipai nga ga Kristano nibipa du na bundu tipa ka bandatise na ni be kura aboro?

Bete agu apai re nga: Mbori nabi unga ni guhe du ni ziaziaha. Yesu aangarasanga apefuoko i rogo abasape kubeyo ka bandatiyo na ni te. (Rk. 22:36, 38) Si naida ani taki gaani abasape ni marã sopabino. Unga na nyanyakipaha kisusi aũzegino. Ani nairisa sangbakpoto kura aboro yo, na ani naida kadu ni wene kpiapai. (2 Kor. 4:2)​—w17.07, kpe. 31-32.

Tipagine du ga Matayo pangbanga tipa ga Yesu raka mbuko ni tooni gude ti ni kia ti gu nga ga Ruka?

Matayo amoiberãko gbe fuo Yosefa, wagu nga wai ko amangipai ho Maria adu ni na vuse na gupai Mbori agumbaha fuko nga ko oro ku Ezipeta yo na kusa ki karagatiko. Ruka amoiberãko gbe fuo Maria; ni kpiapai, ho ri andu ni kua Erizabeta yo na wai ri amangipai ho gu kumbagude nga Yesu anye ni kina yekaru yo.​—w17.08, kpe. 32.

Gini kpakarapai Ziazia Kekeapai nahihe tipa ka nyeanye kindi?

Wa regbo ninaasusa, kura agu afugo i namangisunge na ni rogo Ziazia Kekeapai yo, rogoyo ima ariatihe. Agu asonakumbatayo nga ga birĩ zogarago ima du na maapai kurii gu fugo badungu aboro apehe. Sogote aima du kuti pa sa Ziazia Kekeapai ku rogo agu afugo yo badungu aboro apehe.​—w17.09, kpe. 19-21.

Ya mo maraika ho nabanda ro?

Oó. Yesu afura tipa agu amaraika nga ga gako abawiriki yo nga i nabi kpakpu Mbori. (Mt. 18:10) Gupai ko aaida ka gumbaha nga amaraika na nyemu gako abawiriki, angianga amaraika nabanda yo ni basasa ngba iiriwo gene ya.​—wp17.5, kpe. 5.

Gini nyemuse kiipaha kisusi anyemuse dunduko?

A·gaˈpe nga gu ngbatunga nyemuse kiipaha kisusi anyemuse dunduko, bambiko mburuhe rii agu arugute nga ga Ziazia Kekeapai. Si rengbe ka koda wesewese nyemuse. Ono si nayugo kpia agu arugute nga ga Mbori, wagu nga ka mangapai tipa gu wenepai nga ga kura aboro.​—w17.10, kpe. 7.