WAIGU mo nidu ho wene bakureamo ni kedi waraga ni foro nga ga ngarasaro? Gu Kristano nangia Timoteo agbia ngbatunga waraga wa gure be gu mokedi nangia Pauro. Gi waraga re du du awere nga 2 Timoteo. Zanga kapa, Timoteo aima gbata gu ba du zezeredi tipa wa ka ko rengbe ka geda gupai wene bakureako aaida ka gumbaha fuko. Isoke Timoteo aaberã gupai ku berãko yo nga: ‘Apai wai na Pauro? Ya mo rugute ho ko aida ka fuhe fere nga gu rengbe ka undo re ti ngba gimi sunge? Ya mo gi gako rugute re rengbe ka undo re tipa mi naatungusapai na kini yugupai ni wenehe na kini undo kura aboro?’ A wa ani nika bihe, Timoteo aima gbia akaragapai kuti agu asanahe re gbiati agu akuraha rogo gi nyanyakipa waraga naye fuko re. Rogo gi kekeapai re, ani nika sakapai tipa bete gu wene arugute du rogo gi waraga re.

Ho Timoteo atona geda gu waraga re ni, ko aima rugatiko ni ipo na gupai nga Pauro aaberãpa ko aberã nzunzu. Pauro atona gako afugo ni yamba ko Timoteo nga, “wire du nyemuko ti re gbe.” (2 Tim. 1:2) Timoteo agbia gi waraga re bara rogo gu garã nangia 65. Si nawira wa garã Timoteo adu nga 30 na ko adu ni gu Kristano naadu ni bakumba na kidu na inohe. Ko aima mangasunge na Pauro tipa agarã naima susa 10 na ko aima wirika dungu apai.

Si aima du nipa ngarasaro fu Timoteo ka ino gupai nga, Pauro aahi fudifudiapai kindi ni ruruko. Pauro adu ni zizi ko bambukiso Roma yo, na si adu nga i nika imoko barambeda. (2 Tim. 1:15, 16; 4:6-8) Timoteo aima bi gupai nga, Pauro aima du na ngarã mbiko gupai ko agumbaha nga: “Mi naru nyanyaki fu apai dunduko.” (2 Tim. 2:8-13) Wakina Timoteo, gu kpiapai nga ga hipai Pauro adu na ni ima rengba ka nyakasa rani.

Pauro angarasi Timoteo tipa ko naabi gu sunge ko aamangaha ti ngba ga Mbori sunge na nyanyakipaha. Pauro aaida Timoteo “utudi gu ga Mbori gamunihe” naadu rogoko yo. (2 Tim. 1:6) Pauro amangisunge na gu fugo Giriki nga khaʹri·sma ho ko amangisunge ni na gu fugo nga “gamunihe.” Gu fugo Giriki re nayugo pa gu gamahe du gbua na arẽnga boro arẽ tipa ka gbiaha ya. Timoteo agbia gi gamahe re ho i asiako ni tipa ko undo dungurati ngba kparakpara gene.—1 Tim. 4:14.

Ginipai Pauro aangarasa Timoteo tipa ko mangihe  na gi gamahe re? Ho ko aageda gu fugo ni nga ‘mo utudi ga Mbori gamunihe,’ isoke ko aima berãpa gu we naanidu rogo akporo nga gu naanisa tihe ni kingiriwe. Si anaaida i utudihe autudo tipa si kusi mirã we na ki kusi faaha. Gu kura buku sakarogoapai yo sa nagumba gupai nga, gu pa-Giriki nga (a·na·zo·py·reʹo) Pauro amangisunge na ni nayugo gupai nga “ka zingisa watadu ka ziga mirã we si tona ki berewe,” nga gu narukuba “du boro na ngbarago na ki du zaaza tipa vovo sunge.” Sidu, Pauro aangarasa Timoteo nga: ‘Mo mangi gamo sunge na ome ro dũ!’ Areme a, si naida ani mangi kina gu bangisapai nga ka manga gaani sunge na omerani dũ.

Rogo ga Pauro waraga fu Timoteo, ko ape gu kura pai nga gu narengbe ka undo Timoteo tipa ko du na diabese rogo gako sunge. Pauro aya: “Gu wene he i afu foro mo bánda ha rogo Ziazia Toro yo nanye rogo rani yo.” (2 Tim. 1:14) Gini wenehe du i afuhe fu Timoteo? Rogo agu averesi yo du mbata fu gere, Pauro afura tipa “wene apai,” nga agu arengo du rogo Ziazia Kekeapai yo. (2 Tim. 1:13) Mbiko wa Timoteo angia gu Kristano nga batungusipai, si aaida ko yugu rengo fu agu awirina naadu rogo dungurati na fu agu aboro naadu rogo gako dagbarago. (2 Tim. 4:1-5) Sidu, i aima sia Timoteo ni bakumba tipa ko naangerafuo ga Mbori akandoro. (1 Pet. 5:2) Timoteo arengbe ka banda gu he i afuhe fuko nga gu rengo ko aayugoho ni kido ko kuti ga Yekova ziazia toro gbiati Fugoko.—2 Tim. 3:14-17.

Areme a, i ima fu gu rengo furani ani ayugoho fu kura aboro. (Mt. 28:19, 20) Si aidanga bangirani go ti wai du gi rengo ani ayugoho re na nyanyakipaha te na si naida ani naandu kindi kumbatayo kaa manga kparakpee na kini wisigipai dedede. (Rom. 12:11, 12; 1 Tim. 4:13, 15, 16) Ani ima rengba ka gbia gu kura asunge nga ga mangasunge ni bakumba rogo dungurati watadu kadu ti ngba mangasunge Kindo ti aregbo dũ. Ka ani du na amomu sunge wa gere, si naida si sarani ani du na umbasitise na ki sarani ani naangera koyo du Mbori ni tipa gako undo. Sidu, ani rengbe ka banda guhe Mbori nafuhe furani ni bi ani he na nyanyakipaha na kini ngere koyo du Mbori ni tipa ko undo rani ani naangerafuoho.

Papara ga Timoteo sunge angia ka raba gu kura aboro tipa i naamanga gu sunge ko anaamangaha. Si nga ndu gupai Pauro ape gupai fu Timoteo ti ni nga: “Agu apai mo agi ngbare na dagba dungu adezire a re, mo fú kina ha fu kangara aboro, ka rengbe na yugo pai fu akura yo a.” (2 Tim. 2:2) Nirengo, Pauro atingidi Timoteo na gupai nga, si naida ko yugu agu apai dunduko ko awirikihe fu gu kura awirina. Si ni nyanyakipa pai fu ai babiapai rogo gu dungurati nga ga aKristano areme tipa ni mangi asadatise ka manga kina gu bangisapai re. Wene babiapai aokanga gu inohe du ni na ni tipa sunge te. Kuba gure, ni nayugopai fu kura aboro tipa i du na rengba ka manga gu sunge re. Ni agundenga nga gu boro re nika ino gu sunge re wenengai gbe na kini mangihe susi gu ni amangaha te. Sidu, gu babiapai re ayugongo kina wiri bete apai gbua tipa gu sunge re te. Si naida ni undo gu boro re ni ini wai ka berã ku rogo pai yo wenengai na ki du na dudungurobipai, naida ka ya ka undo ni ni sono rogo toro yo. Rogo gi gene re, gu “kangara aboro” ni nayugu pai fuyo re nika du na rengba ka undo dungurati bakere gbe.

Si nawira gupai nirengo nga, Timoteo aima bi gi waraga nga ga ngarasaro Pauro akedihe fuko re na nyanyakipaha. Ani ima rengba ka makiapa Timoteo ko nidi regbo kaa geda gi wene arugute re berewe na berewe na kini berẽkurii pa wai rengbe ko ka mangapai kuti gi rugute re ti ngba gako sunge.

Tipa rani a, si naida ani mangipai kuti agi arugute re. Waigu rengbe ani ka mangaha? Ani rengbe ka manga ome kakaka tipa ka utudo gaani gamahe wa we, ni banda ani gu he i nafuhe furani, na ni yugo ani agu apai dunduko ani nainihe fu kura aboro. Ka ani mangihe wo, ani nika ‘dígisa gaani sunge’ a wa Pauro agumbaha fu Timoteo.—2 Tim. 4:5.